युहना 1
1सबैसै ङ्‌हा यात्‌चाक् नोःराय् त तोओ खेःतो। ओउः नोःराय्‌पाय् परमेस्‍वर्‌कुस् ब्रक्‌त मुती परमेस्‍वर्‌ गतलो ओउः नोःराय् ओउःतलेः खेःतो। 2ओउः नोःराय्‌पाय् ङ्‌हाहाङःसै परमेस्‍वर्‌कुस् मुओ खेःतो। 3ओउःकुस्इ परमेस्‍वर्‌इ सबै थोक् जाङ्‌ह्आकान्। ओउः नोःराय् नाःमाःत दोह्‌मा जाङ्‌ह्‌ल। 4फेरी ओउः नोःराय्‌पाय् जीङः दोःताक्ओचाक् खेःतो। जीङः दोःआक्‌तीको मान्‍तालम् ल्‍हुङ् थोङ्‌तो वाह्‌सा खाय्‌नानी। 5च्‍याक्ओहाङः थोङ्‌तो स्‍याव्आक्‌तीको च्‍याक्ओइ क्‍लीमःसा गलमा खाय्उलु।
6ओहाङःसैको परमेस्‍वर्‌इ लयःकोः कुरा थोल्‍ह्‌ती तोसाकायः यात्‌चाक् मान्‍ता ल्‍हाव्‍ह्‌दैबाङ्‌हाङः ल्‍होक्आकान् ओउः मान्‍तापाय् “युहना” त मय्‍ङ्ओ खेःतो। 7युहना त तोओपाय् मान्‍ताकोः ल्‍हुङ् थोङ्‌ताक्ओ कुरा छ्यानःती तोलाङ् वाङ्आ। “इ कुरा सबैइ सायःआक्‌तीको ङ्‌हाम्‌पानी” त दाय्‍ह्‌ती तोसाकायः परमेस्‍वर्‌इ युहनाकायः ल्‍होक्आथै। 8युहनाखे ओउः ल्‍हुङ्‌हाङः थोङ्‌ताक्‌सा चाक् खेःबाय्‌ल ओउःइ ल्‍हुङ् थोङ्‌ताक्‌सा चाक्‌कायः छ्यानःलाङ् वाङ्ओआः। 9ओउः दोङ् थोङ्‌ताक्‌सा चाक्‌पाय् ल्‍हाव्‍ह्‌दैबाङ् वाङ्‌ती सबै मान्‍ताकायः थोङ्‌ताक्‌सा चाक् लेःआः बा। 10ओउः दोङ् थोङ्‌ताक्‌सापाय् ल्‍हाव्‍ह्‌दैबाङ्‌हाङः वाङ्‌ती मुओ खेःतो ओउःकुस्इलेः परमेस्‍वर्‌इ ल्‍हाव्‍ह्‌दैबाङ् ङ्‌हा जाङ्‌ह्आकान्। जाङ्‌ह्‌सापाय् जाङ्‌ह्उतो ल्‍हाव्‍ह्‌दैबाङ्‌हाङः मुओलम्इ ओउःकायः तय्‍ह्‌थाल। 11फेरी लयःकोः मान्‍ताकःताङ् वाङ्‌तो ओउःमयःइ रोम्‌थाल। 12ओउःमयःखेइ रोम्आक्‌थाल सुसु मान्‍ताखेइ ओउःकोः मय्‍ङ् पेह्‌ती ङ्‌हाम्‌ती रोम्आथै ओउःकायः परमेस्‍वर्‌इ लयःकोः चोः त तोती बयःआथास। 13ओउःमयःकायः मान्‍तालो लेखा चोः जाङ्‌ह्ओलेः खेःबाय्इली मान्‍ता ह झाक्‌ती जाङ्‌ह्ओमा खेःबाय्इली ओउःमयः परमेस्‍वर्‌कःसै चोः स्‍याव्आकाय् बा। 14ओहाङःसै ओउः नोःराय् त तोओपाय् मान्‍तालेः स्‍याव्‌ती ङीकःहाङः याक्‌ती मुओ खेःतो। ङीकःहाङः याक्‌ती मुतोक्‌हाङः ओउःपाय् दोङ् कुरा स्‍यान्‌ती मान्‍तालम्‌कायः योनःती योती आन बाल्‌ती जाङ्‌ह्आकान्। बेला बेलाहाङः ओउःकायः परमेस्‍वर्‌कोः ल्‍हुङ्‌गोरे चोःलो लेखा अङ्‌ग थङ्‌ग त पेओमा ताङ्‌ह्ओमा च्‍यवःआलाङःसु। 15ओउःकोः कुरा युहनाइ छ्यानःती तोलाङ् वाङ्आ “लौ लोने यात्‌चाक् ङासै गुल्‍ह्‌ती वाङ्‌नाः। ‘ओउःपाय् ङासै ताङ्‌ह्‌लेःनाः बा दोह् हायःती दाय्‍ह्‌सा ङा ओत्‌धाङ्‌माःखाहाङःसै ङ्‌हा ओउःपाय् मुओ खेःतो’ त दाय्‍ह्ओ अनम्‍ह् तोती मुङोतो ओउः ताङ्‌ह्ओचाक्‌पाय् द्याह् इलेः खेःजेःनाः बा” त दाय्‍ह्‌तो युहनाइ तोआकान्। 16ङीकायः योनःती योती ओउः नोःराय् त तोओकोः ग्‍वम् आन मुती झ्‍यान्‍ते ङी सबैकायः नाःतोलेः उह्‌ताक्‌ती बयःआतय्‍ही। 17मोसाकःसै परमेस्‍वर्‌कोः ऐन्‌खे दोःओ खेःतो दोङ् पेओ व्‍हाय्ओ कुराखेमा काङ्‌ती बयःओ कुराखेमा येसु ख्रीस्‌सै दोःनाःतय्‍ही। 18परमेस्‍वर्‌कायः सुइमा च्‍यवःनीली ओउःकोः यातैज्‍योः गोय्‌चोःइलेः ह लयः आपाकुस् द्याङ्‌तो मुती ओउः आपाकायः मान्‍ताकःताङ् छ्यानःआथै।
19ओहाङःसैको यात्‌दीन्‌हाङः यहुदीलम्इ यरुसालेम्‌सै पुरोहीत्‌लम्‌मा लेवीत तोओ मन्‍दीर्‌हाङः काम् जाङ्‌ह्ओमयःमा ल्‍होक्आथास “इ युहना त तोओ ‘सुखेलो’ ” त लयः चीःताक्‌सा थेङा ओउःकःताङ् सायःती योसाकायः ल्‍होक्आथास। ओउः ल्‍होक्‌ती वाङ्ओलम्‌पाय् युहनाकःहाङः दाह्‌ती “लौ नाङ् सुलोतेः खेःतेःनाः” त व्‍हत्‌थातो 20ओउःइ दोङ् पेतो फुती त्‍याङ्आकान् “ङापाय् ओउः दल्‌ताक्‌लाङ् वाङ्‌सा खेःओ ख्रीस् त तोओलेः खेःबाय्‌ङल” त दाय्‍ह्‌ती माःमाःत दोङ्‌सीःओ त्‍याङ्आ। 21“ओउःत खेःया सुलोतेः खेःतेःनाः। नाङ् एलीयाया” “ओउःमा खेःङल” त युहनापाय् त्‍याङ्‌माआ “ओउः वाङ्‌सा खेःओ परमेस्‍वर्‌कोः कुरा छ्यानःसा चाक्‌या” त ओउःमयःइ फेरी व्‍हत्‌नीतो “खेःल” त युहना त्‍याङ्आ 22“लौ ङीकायः ल्‍होक्ओ मान्‍तालम्‌कःताङ् ङी द्यान्‍ह्‌ती नाङ्‌कोः कुरा ल्‍हाक्‌ती छ्यानःसा परनाङी ओउःत झ्‍यान्‍ते ङीकायः पेतो तोताङी दा। नाङ् ‘सुलो’ त लयःकःसै छ्यान्‍ह्‌ताङी दा” त दाय्‍ह्‌ती तोआकानी 23“लौ ‘ “परमेस्‍वर्‌कायः ल्‍याम् पेतो जाङ्‌ह्‌नु” त दाय्‍ह्‌ती यात्‌चाक्इ मान्‍ता याक्‌गार्‌सीःमालोहाङः गोःनौ’ त दाय्‍ह्‌ती ओउः परमेस्‍वर्‌कोः कुरा छ्यानःओ एसायालेः दाय्‍ह्आ। इ कुरा थोल्‍ह्‌ती तोलाङ् ङालेः वाङ्ओआः ङ” त दाय्‍ह्‌ती युहना त्‍याङ्आ। 24ओहाङःसैको यात्‌नीस्‌चाक् ओउः फरीसीकःसै ल्‍होक्ओ मान्‍तालम् वाङ्‌ती मुती 25“लौ नाङ्‌पाय् ओउः दल्‌ताक्‌सा खेःओ ख्रीस् त तोओ खेःतेःल एलीयामा खेःतेःल ओउः परमेस्‍वर्‌ छ्यानःओ मान्‍तामा खेःतेःल ओउःत खेःया दोह् हायःतीतेः बाप्‍तीस्‍मा बयःतेःनौ” त दाय्‍ह्‌ती व्‍हत्‌लाङ् दाह्आकाय्। 26“लौ ङाखेइ तीःइ ह बाप्‍तीस्‍मा जाङ्‌ह्‌नाङः। नीङ्इ चीःमाःत यात्‌चाक् नीङ्‌कःगन मुलेःनाः। 27ओउःखेइलेः ङाकायः गुल्‍ह्‌ताङःतो ओउःपाय् ङासै आन ताङ्‌ह्‌लेःनाः रैस बा। ङाच्‍युक् मीओ मान्‍तापाय् ओउःकोः जुत्ता फास्‌सामा स्‍याव्‌ल बा” त दाय्‍ह्‌ती युहना दाय्‍ह्आ। 28एत दाय्‍ह्‌ती नोःकाय्‌तोक्‌हाङः ओउःमयः योर्‌दन् खोलाकोः उःसै दाह्‌न्‍याम्‌ताङ् बेथानी त तोओहाङः मुआकाय् ओहाङः युहनाइ बाप्‍तीस्‍मा बयःओ खेःतो। 29ओहाङःसैको उनम्‌कोः स्‍याङ्‌ह्‌लोहाङः येसु वाङ्‌धै वाङ्ओलेः युहनाइ च्‍यवःआकान् “लौ इपाय् ल्‍हाव्‍ह्‌दैबाङ्‌कोः मान्‍ताकायः रेव्ओ काम् क्‍युम्‍ह्‌ताक्‌सा चाक् लेःआः। ओउःपाय् परमेस्‍वर्‌कायः ल्‍हाती सात्‌सा भेदाकोः चोःलो लेखा लेःआः। 30ओउःकोः कुरापाय् ङाइ अनम्‍ह् इतलेः तोआलाङः ‘लौ ङाकायः गुल्‍ह्‌ती वाङ्ओ चाक्‌पाय् ङासै ताङ्‌ह्‌तोलेः खेःनाः रैस बा। दोह् हायःती दाय्‍ह्‌सा ङा मुधाङ्‌माःखाहाङः ओउःपाय् ङ्‌हा मुओ खेःलेःतो’ 31ओउःकायः ङाइ ङ्‌हापाय् तय्‍ह्आक्‌ङल। नीङ् इस्राएल्‌कोः मान्‍तालम्‌कायः ओउःपाय् छ्यानःसा थेङा ङाइ तीःइ बाप्‍तीस्‍मा बयःलाङ् वाङ्ओआः ङ। 32-33ओउःकःगन परमेस्‍वर्‌कोः ग्‍वालामः परेवाःलो लेखा ग्‍ल्‍युङ्‌ह्‌ती तेक्ओ च्‍यवःङोतो ओउःपाय् ‘सुखेलो’ त तय्‍ह्आक्‌ङल। तय्‍ह्‌धाङ्‌माखाहाङः ‘लौ सुकःगनलो परमेस्‍वर्‌कोः ग्‍वालामः ग्‍ल्‍युङ्‌ह्‌ती तेक्ओ त नीङ्इ च्‍यवःतेःनानी ओउःइलेः परमेस्‍वर्‌कोः ग्‍वालामःइ बाप्‍तीस्‍मा बयःनौ’ त दाय्‍ह्‌ती ङाकायः बाप्‍तीस्‍मा बयःलाङ् ल्‍होक्ओ परमेस्‍वर्‌इ तोआताङः। 34ओहाङःसै परमेस्‍वर्‌इ तोओलो लेखा च्‍यवःआलाङः बा। च्‍यवःआक्‌तीको ‘लौ इपाय् परमेस्‍वर्‌कोः चोः लेःआः’ त तोनेःनाङ्‌सु” त दाय्‍ह्‌ती युहना दाय्‍ह्आ।
35ओहाङःसैको उनम्‍ह्‌कोः स्‍याङ्‌ह्‌लोहाङः युहनामा नीस्‌चाक् ओउःकुस् वाह्ओमयःमा ओहाङः चीङ्‌ती मुआकाय्। 36ओहाङः चीङ्‌ती मुतोक्‌हाङः येसु द्याङ्‌ती वाह्ओ च्‍यवःआकानी। एत च्‍यवःती “लौ योनु दा। इपाय् परमेस्‍वर्‌कोः भेदा मेत्‌छ्याःकोः चोः लेःआः बा” त दाय्‍ह्‌ती युहनाइ तोआथाच। 37ओउःइ तोओ कुरा सायःती ओउःकुस् मुओ नीस्‌चाक्इ येसुकायः गुल्‍ह्आकाचु। 38ओउःनीस् गुल्‍ह्‌ती वाह्‌तोक्‌हाङः येसु ल्‍हेःती योती च्‍यवःआथाच “नीङ्‌जीइ दोह्‌तेः बोङःतेःनाःजु” त दाय्‍ह्‌ती व्‍हत्‌थाचतो “अ राबीय नाङ् गाःताङ्‌तेः याक्‌तेःनाः” त दाय्‍ह्‌ती द्यानःती व्‍हत्आकाचु। “राबी” त तोओकोः माने “गुरु”। 39“लौ योलाङ् वाङ्‌ज दा” त दाय्‍ह्‌ती येसु दाय्‍ह्आ। येसु ओउःत दाय्‍ह्आक्‌तीको ओउःनीस् वाङ्‌ती येसुकोः याक्ओ थाव्‌ताङ् योलाङ् आल्आकाच। आल्आक्‌तीको ओउःनीस्‌पाय् न्‍याम् घेल्ओहाङःसै याह्‌दीङ् दाह्‌तोलेः ओउःकुस् मुआकाच। 40ओउः येसुकुस् वाङ्ओ नीस्‌चाक्‌कोःपाय् यात्‌चाक् अन्‍द्रीयस् त तोओ खेःतो ओउःपाय् सीमोन् पत्रुस् त तोओकोः पुःलेः। 41येसुकुस् मुआक्‌तीको अन्‍द्रीयस् त तोओइ ङ्‌हा लयःकोः हौ बोङःलाङ् आल्आ। हौकायः बोङःती क्रुस्आक्‌तीको “लौ हौय नीचीइ ओउः वाङ्‌सा खेःओ मासी त तोओ च्‍यवःआलाङःचु” त दाय्‍ह्‌ती तोआथै। ओउः “मासी” त तोसापाय् ओउः वाङ्‌सा खेःओ ख्रीस् लेःआः। एत तोआक्‌तीको अन्‍द्रीयस्इ लयःकोः हौकायः येसुकःताङ् वानःआथै। 42वानःआक्‌तीको येसुइ ओउःकायः योती “लौ नाङ्‌पाय् सीमोन् त मय्‍ङ्ओतेःआः युहना त तोओकोः चोःपाय्। द्याह्‌हाङःसै नाङ्‌कायः ‘केफास्’ त मय्‍ङ्‌तेःपाः” त दाय्‍ह्‌ती येसुइ तोआकान्। “केफास्” त तोओकोः माने “बाङ् लेःआः” एलेनीकोः भासाहाङः “पत्रुस्” त तोओ मुनाः।
43ओहाङःसैको उनम्‍ह्‌कोः स्‍याङ्‌ह्‌लोहाङः येसुपाय् गालील त तोओ अन्‍चल्‌ताङ् आल्‌सा म्‍हर्‌आ। आल्‌ती ओहाङः दाह्आक्‌तीको फीलीप् त तोओकायः क्रुस्आकान्। क्रुस्आक्‌तीको “लौ ङाकुस् वाह्अ” त दाय्‍ह्‌ती येसुइ तोआकान्। 44फीलीप् त तोओपाय् सीमोन् नीस्‌पुःचाःकोः बेथ्‌सैदा त तोओ गाव्‌ताङ् याक्ओ खेःतो। 45ओहाङःसैको फीलीप् आल्‌ती यात्‌चाक् नथानएल् त तोओकायः क्रुस्आकान्। नथानएल्‌कायः क्रुस्आक्‌तीको “लौ ङीइ ओउः वाङ्‌सा खेःआ चाक्‌कायः क्रुस्आलाङःसु। ओउःकायःपाय् मोसाइमा अरु परमेस्‍वर्‌कोः कुरा छ्यानःओमयःइमा कुरा लेखआकानी। ओउःपाय् नासरेत् गाव्‌हाङः याक्‌ती मुओ युसेफ्‌त तोओकोः चोः येसु लेःआः बा” त दाय्‍ह्‌ती फीलीप्इ ल्‍हाक्‌ती तोआकान्। 46एत तोआक्‌तीको “नासरेत् गाव्‌सै दोह् पेओ वाङ्‌चाः” त दाय्‍ह्‌ती नथानएल् दाय्‍ह्‌तो “योलाङ् वाङ्अ दै” त दाय्‍ह्‌ती फीलीप् त्‍याङ्आ। 47ओहाङःसैको आल्‌ती येसुकःताङ् वाङ्आ। वाङ्‌तोक्‌हाङः येसुइ नथानएल् वाङ्‌धै मुओ च्‍यवःती “लौ इपाय् दोङ् इस्राएल्‌कोः मान्‍ता लेःआः बा। ओउःपाय् माःओ कुरा गलमा नोःबाय्उलु” त दाय्‍ह्‌ती 48“लौ गत हायःतीतेः ङाकायः तय्‍ह्‌तेःआची” त दाय्‍ह्‌ती नथानएल्इ ग्‍याङ्‌ह्‌ती व्‍हत्आथै। “लौ फीलीप्इ नाङ्‌कायः गोत्‌धाङ्‌माःखाहाङः ओउः न्‍याम्‌सीकोः तुङःहाङः च्‍युङःती मुओ बेलाहाङः ङाइ च्‍यवःनेःआलाङ् बा” त येसुइ दाय्‍ह्‌ती तोआथै। 49“अहै गुरुय नाङ्‌पाय् परमेस्‍वर्‌कोः चोः लेःतेःआः बा इस्राएल्‌कोः राजालेः” त दाय्‍ह्‌ती नथानएल् दाय्‍ह्आ। 50“दोह् हायःती नाङ्इ इतलेः ङ्‌हाम्‌तेःआची। ‘न्‍याम्‌सी सीङःहाङः च्‍यवःनेःआलाङ् बा’ त दाय्‍ह्‌ती तोओकायः ङ्‌हाम्‌तेःआची माःर। लौ इसै ताङ्‌ह्ओ कुरा नाङ्इ लोने च्‍यवःतेःनौ बा। 51दोङ्‌सी दाय्‍ह्‌भनाङ् लोने ओउः फेल्‌बाङ् फोल्‌ती परमेस्‍वर्‌कोः लाङ्‌कासै ल्‍होक्ओमयः मान्‍ताकोः चोःत तोओकःताङ् ग्‍ल्‍युङ्‌ह्‌सामा ओउःकःसै लन्‍ह्‌सामा च्‍यवःतेःनौ बा” त दाय्‍ह्‌ती येसुइ तोआथै।

युहना 2
1ओहाङःसैको चीत्‌सैलोहाङः गालील अन्‍चल्‌कोः काना त तोओ गाव्‌हाङः बीहा जाङ्‌ह्आकानी। ओउः बीहा जाङ्‌ह्‌तोक्‌हाङः येसुकोः आमा मुओ खेःतो 2फेरी येसुकायःमा ओउःकुस् वाह्ओमयःकायःमा भोस्‌ताङ् गोत्आकानी। 3ओहाङःसैको भोस् जेःओ बेलाहाङः धाक्‌सायःकोः तीः दप्‌ती तुङ्आकानी। धाक्‌सायःकोः तीः द्योक्आ त चीःती येसुकोः आमाइ ओउःकःताङ् वाङ्‌ती “लौ धाक्‌सायःकोः तीः द्याह् नाःल दप्आकानी” त दाय्‍ह्‌ती ओउःकायः तोथातो 4“ङाकःताङ् दोह् हायःतीतेः वाङ्‌तेःआ ती। ङाकोः ग्‍वम् छ्यानःसा बेला दाह्‌धाङ्‌ल” त दाय्‍ह्‌ती येसु त्‍याङ्आ। 5एत त्‍याङ्ओ सायःती येसुकोः आमाइ कीम्‌कोः नोकरीकःताङ् ल्‍हेःती “लौ उया ओउःइ गतलोतेः तोतेःचै ओउःतलेः जाङ्‌ह्‌नु दा” त दाय्‍ह्‌ती तोआकान्। 6ओहाङःसैको कीम्‌हाङः छगोता तीःकोः घ्‍याम्‍पा खेःतो। ओउः बाङ्‌कोः जाङ्‌ह्ओ बीस् पाथीच्‍युक् ताङ्‌ह्ओ घ्‍याम्‍पाहाङः यहुदीकोः क्रुत् दोम् जेस्‌सा तीः गम्ओ खेःतो। 7“लौ इ घ्‍याम्‍पालम्‌हाङः तीः कावःती ब्‍लीङ्‌ताक्‌नु” त दाय्‍ह्‌ती येसुइ नोकरीकायः तोआकान्। 8तोआक्‌तीको घ्‍याम्‍पापाय् ब्‍लीङ्‌ताक्आकानी “लौ द्याह् घ्‍याम्‍पासै तीः हक्‌ती ओउः तीः कीम्‌कोः मुल् नोकरीकायः लात्‌ती वानःनु” त येसु दाय्‍ह्‌ती तोआक्‌तीको ओउः अरु नोकरीलम्इ कीम्‌कोः मुल् नोकरीकायः याङ्‌साकायः बयःआकानी। 9बयःआक्‌तीको ओउःइ याङ्‌ती म्रेमःती तुङ्‌तोक्‌हाङः धाक्‌सायःकोः तीःलेः सायःआकास “इ धाक्‌सायःकोः तीःपाय् गाःसै दोःओ” त दाय्‍ह्‌ती ओउः मुल् नोकरी चीःमाःत झ्‍यान्‍ते दाय्‍ह्आ ओउः धाक्‌सायःकोः तीःपाय् “घ्‍याम्‍पासै दोःओ” त अरु नोकरीलम्‌खेइ ह चीःआकानी ओउः कीम्‌कोः मुल् नोकरीखेइ चीःआक्उलु। ओउःत खेःआ ओउःइ भाव्‌कायः गोत्‌ती 10“लौ अरु मान्‍ताखेइ ङ्‌हा पेओ धाक्‌सायः तीः वेःनानी लोने पहुनालम् ङोती चीःमाःखाहाङःलेः पेमालो खाल् बयःनानी नाङ्‌खेइ लोनेकायः पेओलेः रेती गम्‌तेःआकान् बा” त दाय्‍ह्‌ती ओउः मुल् नोकरी दाय्‍ह्आ। 11एत हायःतोक्‌हाङः येसुइ ङ्‌हाकोः ग्‍याङ्‌ह्‌राय् जाङ्‌ह्आकान् गालील अन्‍चल्‌कोः काना त तोओ गाव्‌हाङः। ओहाङः ओउःकोः आन ताङ्‌ह्ओ ग्‍वम् छ्यानःआथास। छ्यानःआक्‌तीको येसुकुस् वाह्ओमयःइ ओउःकायः पेतो ङ्‌हाम्आथै। 12ओहाङःसैको बीहा जाङ्‌ह्‌ती खाय्आक्‌तीको येसुमा ओउःकुस् वाह्ओमयःमा कफर्‌नाहुम् त तोओ गाव्‌ताङ् आल्आकाय्। ओहाङः येसु लयःकोः आमाचोङ्‌कुस् यात्‌नीस् दीन्‌कायः याक्आकाय्।
13ओहाङःसैको ओउः यहुदीलम्‌कोः च्‍योल्ओ त तोओ भोस्‌कोः दीन् पुत्‌खेःआ। ओउः बेलाहाङः येसु यरुसालेम्‌ताङ् लन्‍ह्‌ती आल्आकाय्। 14लन्‍ह्‌ती वाङ्‌तोक्‌हाङः परमेस्‍वर्‌कोः मन्‍दीर्‌हाङःलेः स्‍याः मेत्‌छ्याः परेवाः वीनःओलम्‌मा च्‍यवःआकान्। ओउःमयःकुस्इ माःती जेःओ पैसा सात्ओमयःमा च्‍युङःती मुआकाय्। 15एत स्‍याव्‌मालो हायःओ च्‍यवःती झ्‍यान्‍ते येसुइ ला काकलुङ् छीत्आक्‌तीको ओउः लाइ सबैकायः मन्‍दीर्‌सै रुनःती ताह्आथास। स्‍याः भेदामेत्‌छ्याःमा ताह्‌ती ल्‍होक्‌ती ओउः पैसा सातओलम्‌कोः तैबल् प्‍लवःती ओउःमयःकोः पैसा म्‍होक्‌ती वाय्आकान्। 16फेरी ओउः परेवाः वीनःओलम्‌कायः “लौ इ वाःपाय् आलःनीङ्‌सी दा। ङाकोः आपाकोः कीम् बजार्‌लो लेखा जाङ्‌ह्‌तेःचानी” त दाय्‍ह्‌ती येसुइ जान्आथास। 17इ कुरा सायःती येसुकुस् वाह्ओमयःइ उय्‍ह्‌लेकोः आखरःहाङः लेखओ कुरा गीलआकानी “लौ नाङ्‌कोः कीम्‌कायः पेतो जाङ्‌ह्‌साकायः ङाइ काम् ह्र्युङ्‌तीलेः जाङ्‌ह्आलाङः बा” त दाय्‍ह्‌ती लेखओ। 18ओहाङःसैको यहुदीलम्‌कोः ताङ्‌ह्ओ मान्‍तालम्इ येसुइ अरुलम्‌कायः मन्‍दीर्‌सै ल्‍होक्ओ च्‍यवःती “लौ इ काम् जाङ्‌ह्‌साकायः सुसुइ तोती ताक्‌तेःआ। परमेस्‍वर्‌इ तोती ताक्‌तेःआ त खेःया लौ ग्‍याङ्‌ह्‌राय् जाङ्‌ह्‌ती नाङ्‌कोः ग्‍वम् छ्यानःताङी दा” त दाय्‍ह्‌ती ओउः यहुदीलम्इ तोआथै। 19“लौ इ मन्‍दीर्‌पाय् ह्र्योङःती वाय्‌तेःचानी त खेःया ङाइ तीन् दीन्‌हाङः नया जाङ्‌ह्‌नाङः” त दाय्‍ह्‌ती येसु त्‍याङ्आ। 20“खेःल इ मन्‍दीर्‌ ङ्‌हा जाङ्‌ह्‌साकायःपाय् छवालीस् बर्‌सच्‍युक् परओ खेःतो। गत हायःतीतेः नाङ् तीन् दीन्‌हाङः जाङ्‌ह्‌सा खाय्‌तेःचौ” त दाय्‍ह्‌ती ओउःमयः ग्‍याङ्‌ह्‌ती मुइतो 21दोङ् बाङ्‌कोः मन्‍दीर्‌कायः येसुइ तोउलु लयःकोः आङ्‌कायः तोओ खेःतो बा। 22ओहाङःसैको लोने येसुकोः आङ् वाय्आक्‌तीको ओउःपाय् सीओसै उह्‌ती च्‍योक्ओ बेलाहाङः इ कुरा ओउःकुस् वाह्ओमयःइ तय्‍ह्‌ती चीःआकानी। चीःआक्‌तीको आखरःहाङः लेखओ कुरामा येसुइ तोओ कुराकायःमा ङ्‌हाम्आकानी। 23ओहाङःसैको इ मन्‍दीर्‌ छय्‍ङ्‌ताक्आक्‌तीको ओउः च्‍योल्ओ भोस् जाङ्‌ह्‌तोक्‌हाङः येसुपाय् यरुसालेम् सहर्‌ताङ् मुओ खेःतो। ओहाङःसै येसुइ जाङ्‌ह्ओ ग्‍याङ्‌ह्‌राय् च्‍यवःती नाःतो मान्‍ताइ ओउःकायः ङ्‌हाम्‌नीतो 24ओउःमयःकुस् येसु वाह्‌सा ग्‍याआक्‌ल दोह् हायःती दाय्‍ह्‌सा ओउःमयःकोः ल्‍हुङ्‌तुक् दोङ् पेतो खेःल त ओउःइ चीःआकान्। येसुइपाय् सबै मान्‍ताकोः ल्‍हुङ्‌तुक् चीःआकान् 25अरुइ ओउःकायः छ्यान्‍ह्‌ती तोसा परल।

युहना 3
1ओहाङःसैको यात्‌चाक् फरीसी मान्‍ता नीकोदेमस् त तोओ खेःतो। ओउःपाय् यहुदीकोः ताङ्‌ह्ओ मान्‍तालेः खेःतो। 2यात्‌दीन्‌हाङः नीकोदेमस्‌पाय् येसुकःताङ् याह्‌दीङ्‌हाङःलेः वाङ्आ। येसुकःताङ् वाङ्‌ती “लौ गुरुय नाङ्‌पाय् परमेस्‍वर्‌कःसै स्‍यान्‌लाङ् वाङ्ओ मान्‍ता लेःतेःआः बा। नाङ्इ इच्‍युक् पेओ ग्‍याङ्‌ह्‌राय् जाङ्‌ह्‌ती झ्‍यान्‍ते परमेस्‍वर्‌ नाङ्‌कुस् मुनाः त ङीइ चीःनाङःसु। परमेस्‍वर्‌पाय् ओउःकुस् ब्राङ्‌ती मुमाया सुइमा इ काम् जाङ्‌ह्‌सा खाय्‌नीली” त दाय्‍ह्‌ती नीकोदेमस् दाय्‍ह्आ। 3“दोङ्‌सी दाय्‍ह्‌भनाङ् रौ जीङः दोःमाःत परमेस्‍वर्‌कोः राजी च्‍यवःसा सुइमा खाय्‌नीली” त दाय्‍ह्‌ती येसुइ तोथातो 4“ताङ्‌ह्ओ मान्‍तापाय् गत हायःती रौ जीङः दोःचाःनाः र। लयः आमाकोः तुक्‌हाङः द्यान्‍ह्‌ती पोक्आक्‌तीको फेरी ओत्‌सा गलमा खाय्‌बाय्उलु” त दाय्‍ह्‌ती नीकोदेमस् ग्‍याङ्‌ह्‌ती नोःआ। 5ओहाङःसैको येसु फेरी दाय्‍ह्आ “दोङ्‌सीलेः परमेस्‍वर्‌कोः राजीहाङः मुसाकायः लयः आमा आपाकःसै दोःओ जीङः स्‍याव्‌ल। तीःसैमा परमेस्‍वर्‌कोः ग्‍वालामःसै रौ जीङःपाय् दोःआक्‌सा खेःतो बा। 6मान्‍ताकःसै मान्‍ताकोः जीङः ह दोःनाः परमेस्‍वर्‌कोः ग्‍वालामःकःसै दोङ् पेओ रौ जीङःखे दोःआनाः। 7ङाइ तोओ रौ जीङःकोः कुरा सायःआक्‌तीको ग्‍याङ्‌ह्‌तेःचाः। 8मारुःकायः मान्‍ताइ सायःसापाय् सायःनौ। गाःसै वाङ्ओ गाःताङ् आल्‌नाः सुइमा चीःनीली लयः झाक्ओहाङः लय्‍क्‌नाः। मारुःलो लेखा परमेस्‍वर्‌कोः ग्‍वालामः लयः झाक्ओहाङः वाह्‌नाः। इलो लेखालेः परमेस्‍वर्‌कोः ग्‍वालामःइ गाःहाङः खेःयामा मान्‍ताकायः रौ जीङः बयःनौ बा” त दाय्‍ह्‌ती येसुइ स्‍यान्‌ती तोआकान्। 9इत स्‍यान्‌तोक्‌हाङः “इपाय् गत गत स्‍याव्‌चानाः रैस” त नीकोदेमस् दाय्‍ह्‌ती व्‍हत्‌थातो 10“नाङ्‌पाय् यहुदीकोः ताङ्‌ह्ओ स्‍यान्ओ मान्‍ता लेःतेःआः बा। दोह् हायःती इ कुरा चीःसा खाय्‌तेःउलु। 11दोङ्‌सी दाय्‍ह्‌भनाङ् ङीइपाय् लयः च्‍यवःओमा लयः चीःओमा तोनेःनाङ्‌सतो ङीइ तोओकायः ङ्‌हाम्‌तेःनीली। 12ङाइ ल्‍हाव्‍ह्‌दैबाङ्‌हाङः स्‍याव्ओ कुरा तोनेःनाङ्‌सतो नीङ्इ ओउः कुरा ङ्‌हाम्‌तेःनीली त खेःया गत हायःती लाङ्‌का स्‍याव्ओ कुराकायः ङ्‌हाम्‌तेःचानी। 13ङा ओउः मान्‍ताकोः चोः त तोओ झुङ्आले लाङ्‌कासै ग्‍ल्‍युङ्‌ह्आक्‌तीको फेरी लाङ्‌काताङ् लन्‍ह्‌ती पाय्‍ह्‌ती मुनाङः। अरुपाय् लाङ्‌काताङ् सुमा लन्‍ह्इली। 14मान्‍ता याक्‌गार्‌सीःमालोहाङः मोसाइ उय्‍ह्‌ले सीङःहाङः रु गम्‌ती योकोःआकान् मान्‍ता स्‍याक्‌ताक्‌सा थेङालेः। ओउःलो लेखालेः ङाकायःमा च्‍युन्‌ती योकोःसा खेःतो। 15ओहाङःसैको सुसुइ ङाकायः ङ्‌हाम्‌चाःताङः ओउःकायःलेः गलमा द्योक्‌मालो जीङः दोःनै बा” त दाय्‍ह्‌ती येसु दाय्‍ह्आ। 16परमेस्‍वर्‌इ ल्‍हाव्‍ह्‌दैबाङ्‌कोः मान्‍ताकायः आन पेतो राप्‌नौ बा ओहाङःसैको ओउःमयःकायः इच्‍युक् राप्‌ती झ्‍यान्‍ते लयःकोः ल्‍हुङ्‌गोरे चोः ल्‍होक्‌ती ल्‍हाआकान्। लयःकोः चोः ल्‍हाआक्‌तीको सुसुइ ओउःकायः ङ्‌हाम्‌नानी ओउःखेलेः अरुलो लेखा ह्र्योक्‌ती वाय्‌तो स्‍याव्‌माःत गलमा द्योक्‌मालो रौ जीङः दोःनै। 17ल्‍हाव्‍ह्‌दैबाङ्‌कोः मान्‍तालम्‌कायः गाल्‌तुम्‌ती नोःसाखेकायः परमेस्‍वर्‌इ लयःकोः चोः ल्‍होक्ओ खेःबाय्‌ल मान्‍ता दल्‌ताक्‌साखेकायः परमेस्‍वर्‌इ चोः ल्‍होक्आथै। 18ङ्‌हाम्ओलम्‌खेकायः गाल्‌तुम्‌ती नोःओ कुरा नाःल बा ङ्‌हाम्‌मालोलम्‌खेकायः ङ्‌हाहाङःसैलेः गाल्‌तुम्‌ती तोओ मुजेःनै दोह् हायःती दाय्‍ह्‌सा ओउःमयःइ परमेस्‍वर्‌कोः ल्‍हुङ् गोरे चोःकायः ङ्‌हाम्आक्‌नीली। 19ओउः गाल्‌तुम्‌ती नोःओ कुरा इलेःआः ल्‍हाव्‍ह्‌दैबाङ्‌ताङ् पेओ काम् जाङ्‌ह्‌साकायः थोङ्‌ताक्‌लाङ् वाङ्‌तो ओउः थोङ्ओसै ल्‍हाव्‍ह्‌दैबाङ्‌कोः मान्‍तालम् न्‍हाङ्‌तोलेः च्‍याक्ओहाङः मुसा झाक्‌लेःनै लयःकोः रेव्ओ काम् जाङ्‌ह्‌सा थेङा। इत हायःओकायः परमेस्‍वर्‌इ गाल्‌तुम्‌ती नोःनाःथास। 20रेव्‌तो जाङ्‌ह्ओमयःखेइ ओउःमयःइ पेमालो जाङ्‌ह्ओ काम् अरुइ चीःताक्‌सा ग्‍यामाःत झ्‍यान्‍ते थोङ्ओलेः झाक्‌माइली थोङ्ओकःताङ् वाङ्‌माइली। 21दोङ् पेतो जाङ्‌ह्ओमयःखे थोङ्ओकःताङ् वाङ्‌नै। परमेस्‍वर्‌कोः पेओ काम् जाङ्‌ह्‌ती झ्‍यान्‍ते ओउः काम् फुतीलेः छ्यानःसा ग्‍यानै।
22ओहाङःसैको लोने येसुमा ओउःकुस् वाह्ओमयःमा यहुदा अन्‍चल्‌ताङ् दाह्‌ती वाङ्आकाय्। वाङ्आक्‌तीको येसु ओहाङः बाप्‍तीस्‍मा बयःधै मुओ खेःतो। 23फेरी युहना त तोओइमा ऐनोन् त तोओ गाव्‌हाङः बाप्‍तीस्‍मा बयःधै मुओ। ओउः ऐनोन् गाव्‌पाय् सालीम् त तोओ द्याङ्‌काय्‌तो खेःतो ओहाङः तीः नाःनाः। युहनाकःताङ् मान्‍तालम्‌पाय् बाप्‍तीस्‍मा त्‍याक्‌लाङ् वाङ्‌धै मुइतो। 24ओउः बेलाहाङः युहनाकायः थुनधाङ्आक्‌थाल। 25ओहाङःसैको युहनाकुस् वाह्ओमयःपाय् यात्‌चाक् यहुदी मान्‍ताकुस् तानःकाय्‌ती नोःकाय्ओ खेःइतो। “लौ सुकोः बाप्‍तीस्‍मा दोङ् पेओलेः” त नोःकाय्‌ती काय्‌काय्‌ती मुआकाय्। 26काय्‌काय्‌तोक्‌हाङः युहनाकुस् वाह्ओमयः ओउःकःताङ् वाङ्‌ती “अ गुरुय नाङ्‌कोः योर्‌दन् खोलाकोः उःसै मुतोक्‌हाङः यात्‌चाक्‌कायः नाङ्इ दोक्‌ती छ्यानःतेःआकान्। द्याह् ओउःमा तेन्‌छ्याङ् बाप्‍तीस्‍मा बयःलेःनौ मान्‍तालम् सबै ओउःकःताङ् वाङ्‌नै बा” त दाय्‍ह्‌ती तोआथै। 27“लौ परमेस्‍वर्‌इ आःताः बयःमाःत मान्‍तापाय् दोह्‌मा दोःइली। 28ङापाय् ‘ओउः वाङ्‌सा खेःओ ख्रीस्‌लेः खेःबाय्‌ङल। ओउःकोः ङ्‌हासै वाङ्ओआः ह ङालेः’ त दाय्‍ह्‌ती ङाइ छ्यानःओ कुरा नीङ्इ लयः नोइ सायःतेःआकानी। 29लौ बीहा जाङ्‌ह्‌तोक्‌हाङः दुलही मोमःचोः वानःओ साथीलम्इ ओउः मोमःचोः भाव्‌कायः बयःनानी। ओहाङःसैको मोमःचोः भाव्‌कः पाय्‍ह्ओ बेलाहाङः ओउःकोः साथीलम् घ्‍युम्‌तो खेःइली चोङाय्‌तीलेः मुनै। ओउःलो लेखालेः तेन्‌छ्याङ् मान्‍तालम् ङाखेकःसै छीङ्‌तोलेः येसुखेकःताङ् न्‍हाङ्‌तोलेः वाङ्‌नै ङामा घ्‍युम्‌माःतो जुगाङ् चोङाय्‌तीलेः मुनाङः। 30ओउःखे द्याह् ताङ्‌ह्‌तो स्‍याव्‌सा खेःतो ङाखे मीतो स्‍याव्‌सा खेःनाङः। 31ओउः त्‍यावःअसै ग्‍ल्‍युङ्‌ह्‌ती वाङ्ओ चाक्आः अरुसै च्‍योन्‍ह्आनाः। ङाखेपाय् कामःअ ल्‍हाव्‍ह्‌दैबाङ्‌सै वाङ्ओआः ङ ल्‍हाव्‍ह्‌दैबाङ्‌कोःलेः मुनाङः ओउःत झ्‍यान्‍ते ङाइ इ कामःअकोः कुरा ह चीःती तोनाङः। ओउः लाङ्‌कासै वाङ्ओखेपाय् सबैसै ताङ्‌ह्‌लेःनाः बा। 32ओउःइ दोह्‌लो च्‍यवःमानौ दोह्‌लो सायःमानौ ओउः कुरालेः ओउःइ छ्यानःती तोनौ। तोसापाय् तोलेःनौ ओउःइ तोओ कुरा मान्‍ताइ ङ्‌हाम्‌सा ग्‍याइली। 33सुखेलो ङ्‌हाम्‌नानी ओउःइलेः परमेस्‍वर्‌कोः कुराकायः ‘इपाय् दोङ् कुरा लेःआः’ त चीःसा खाय्‌नानी। 34परमेस्‍वर्‌इ ल्‍होक्ओ चोःपाय् ओउःइ परमेस्‍वर्‌कोः कुरा नोःनौ बा। ओउःपाय् परमेस्‍वर्‌कोः ग्‍वालामः जुगाङ् पेतो दोःती झ्‍यान्‍ते इ कुरा चीःसा खाय्‌नौ। 35परमेस्‍वर्‌ आपाइ लयःकोः चोः राप्‌ती झ्‍यान्‍ते ओउःकायः जाङ्‌ह्‌सा ग्‍वम्‌मा दोह्‌मा सबै बयःआकान्। 36ओहाङःसैको परमेस्‍वर्‌कोः चोःकायः ङ्‌हाम्ओलम्‌खे गलमा वाय्‌मालो गलमा द्योक्‌मालो रौ जीङः दोःनै। सुसुइ ओउः चोःकायः ङ्‌हाम्‌नीली ओउःखे जीङः दोःबाय्इली ओउःकायः परमेस्‍वर्‌इ म्‍हर्‌ताक्‌माःत गलकायःमा न्‍युम्‍ह्‌ताक्‌नाःथास” त दाय्‍ह्‌ती तोआकान्।

युहना 4
1ओहाङःसैको “लौ युहनाकःताङ् वाङ्ओलम्‌कःसै न्‍हाङ्‌तोलेः नाःतो येसुकःताङ् बाप्‍तीस्‍मा त्‍याक्‌ती ओउःकुस् वाह्‌साकायः वाङ्‌नै” त दाय्‍ह्‌ती फरीसीलम् नोःकाय्आकाय् 2येसुखेइ बाप्‍तीस्‍मा लयः क्रुत्इ जाङ्‌ह्उलु ओउःकुस् वाह्ओमयःखेइ जाङ्‌ह्आकानी। 3ओहाङःसैको ओउः फरीसी नोःकाय्ओ कुरा चीःआक्‌तीको येसुपाय् यहुदा देस्‌सै फेती फेरी गालील अन्‍चल्‌ताङ् द्यान्‍ह्‌ती वाङ्आकाय्। 4ओहाङः वाङ्‌तोक्‌हाङः समारीया त तोओ देस्‌ताङ् च्‍योल्‌ती वाह्‌सा खेःतो। 5च्‍योल्‌ती वाह्‌तोक्‌हाङः सीखार्‌ त तोओ गाव् द्याङ्ओ इनार्‌ तीःहाङः दाह्आकाय्। 6ओउः इनार्‌ तीः मुओ राङ् उय्‍ह्‌ले याकुब् त तोओकोः खेःतो। ओउः राङ्‌पाय् ओउःइ लयःकोः युसेफ् त तोओ चोःकायः बयःआकान्। ओहाङःसैको ओउः इनार्‌ तीःताङ् दाह्‌ती वाङ्‌ती येसु वाह्ओइ ह्र्याम्आ त झ्‍यान्‍ते ओउः तीःकोः छेव्‌हाङः न्‍यास्‌लेःआ। 7-8ओहाङःसैको न्‍याम् दोपारे बेलाहाङः ओउःकुस् वाह्ओमयः बजार्‌ताङ् जेःगा लेःलाङ् आल्इतो येसु लयः झुङ्आले मुओ। ओहाङः न्‍यास्‌ती मुतोक्‌हाङः यात्‌चाक् समारीया देस्‌कोः मोमःचोः तीः हक्‌लाङ् वाङ्आ। ओउः मोमःचोः वाङ्आक्‌तीको “लौ ङाकायः तीः बयःची दा आन तीः अप्आलाङः” त दाय्‍ह्‌ती येसु दाय्‍ह्आ। 9“अहै गत हायःती नाङ् यहुदीकोः मान्‍ताइ ङालो लेखा समारीयाकोः मोमःचोःकः तीः तेतेःनाः” त दाय्‍ह्‌ती ओउः मोमःचोः ग्‍याङ्‌ह्‌ती दाय्‍ह्आ दोह् हायःती दाय्‍ह्‌सा ओउः बेलाहाङः यहुदीलम्इ समारीया देस्‌सै वाङ्ओमयःकः अह्र्ती ब्राङ्‌काय्‌सा ग्‍याइली। 10ओहाङःसैको “लौ दीदी परमेस्‍वर्‌इ दोह् बयःसा झाक्‌नाः त नाङ्इ चीःमातेःउलु। ङा तीः तेलाङ् वाङ्ओ सुलो त चीःमातेःउलु नाङ्इ चीःआ त खेःया ङाकः तेतेःचाः खेःतो। ओहाङःसै ङाइ रौ जीङः दोःताक्‌सा तीः बयःजेःचेःनाङ् खेःतो” त दाय्‍ह्‌ती येसुइ तोआकान्। 11“अ साहीप्‌य ओउः इनार्‌कोः घाङ्‌पाय् आन झ्‍युम्‍ह्‌लेःनाः बा गत हायःती इ पेओ तीः बयःसा खाय्‌तेःचौ। नाङ्‌कोः हक्‌सा थोक् नाःबाय्‌ल। 12ङीकोः तोकानः याकुब् त तोओइ इ इनार्‌पाय् जाङ्‌ह्‌ताङःआकान्। जाङ्‌ह्आक्‌तीको ओउःमा ओउःकोः चोःलम्इमा स्‍याःलम्इमा इकोः तीः तुङ्आकानी। ओउःकोः इनार्‌कोः तीःसै नाङ्इ बयःसा तीः पेनाः त खेःया दोङ्‌सी नाङ्‌पाय् याकुब्‌सै ताङ्‌ह्‌तोतेः खेःतेःचाः” त दाय्‍ह्‌ती ओउः मोमःचोः दाय्‍ह्आ। 13“सुसुइलो इ इनार्‌कोः तीः तुङ्‌नौ ओउःखेलेः लोने फेरीलेः तीः अप्‌तो स्‍याव्‌चै। 14सुसुइ ङाइ बयःसा तीः तुङ्‌नौ ओउःखे गलमा द्योक्‌मालो रौ जीङः दोःती अरु तुङ्‌सा परल। इ रौ जीङः दोःताक्‌सा तीःपाय् ङाकःसै गलमा लय्‍ङ्‌तीलेः वाङ्‌नाः” त दाय्‍ह्‌ती येसु त्‍याङ्आ। 15“लौ उया साहीप् ओउः तीः बयःचाक्‌ची दा ओहाङःसै ङा तीः अप्‌माःत झ्‍यान्‍ते इहाङः हक्‌लाङ् वाङ्‌सा परलाम्” त दाय्‍ह्‌ती 16“लौ उया द्याह् पाय्‍ह्अ नाङ्‌कोः बुधा गोत्‌ती वानःउ दा” त येसुइ दाय्‍ह्‌ती तोउतो 17“ङापाय् बुधा नाःबाय्‌ङल” त दाय्‍ह्‌ती ओउः मोमःचोः त्‍याङ्आ। 18“माः रैस ‘ङा बुधा नाःङल’ त दाय्‍ह्‌ती दाय्‍ह्ओ दोङ् कुरा लेःआः बा। नाङ्‌कोः बुधापाय् पोङाज्‍योः खेःइतो ओउः नाङ्‌कुस् तेन्‌छ्याङ् याक्ओ गोय्‌चोःपाय् नाङ्‌कोः बुधा खेःबाय्‌ल। नाङ् दोङ्‌सीलेः त्‍याङ्‌तेःआची” त दाय्‍ह्‌ती येसु त्‍याङ्आ। 19“अहै नाङ्‌पाय् यात्‌चाक् परमेस्‍वर्‌कोः कुरा छ्यानःओमयः लेःतेःआः बा। 20लौ ङीकोः आय्‌कानः तोकानःखेइ इहाङः मुओ बुम्‌हाङः परमेस्‍वर्‌कायः माननीतो ती नीङ् यहुदीलम्‌खेइ ‘खेःल इहाङः मानसा स्‍याव्‌ल यरुसालेम् सहर्‌हाङः झुङ्आले परमेस्‍वर्‌कायः मानसा खेःतो’ त दाय्‍ह्‌ती तोतेःताङी” त दाय्‍ह्‌ती ओउः मोमःचोः दाय्‍ह्आ। 21“लौ दीदी दोङ्‌सीलेः लोने स्‍याङ्‌ह्‌ससै इ बुम्‌हाङःमा यरुसालेम्‌हाङःमा मानसा परल। परमेस्‍वर्‌कायः गाःहाङः खेःयामा मानसा स्‍याव्‌नाः बा। 22तेन्‌छ्याङ् नीङ् समारीया देस्‌कोः मान्‍तालम्‌खेइ परमेस्‍वर्‌कायः मानसा पेतोलेः चीःधाङ्‌तेःनीली। ङीखेइ चीःनानी दोह् हायःती दाय्‍ह्‌सा परमेस्‍वर्‌कोः दल्‌ताक्ओ कुरा ङी यहुदी मान्‍तालम्‌कःसै दोःआनाः। 23लोने परमेस्‍वर्‌ आपाकायः दोङ् ङ्‌हाम्ओमयःइ सबै कुरा पेतो चीःती गाःहाङः खेःयामा म्रोताक्‌ती माननाःथै। ओउः बेलाहाङःपाय् दाह्‌खेःआ। माः रैस दाह्ओआः बा। 24परमेस्‍वर्‌लेः मान्‍तालो लेखा खेःबाय्‌ल ओउःपाय् गाःहाङः खेःयामा मुनाः ओउःकायः मान्‍तालम्इ ल्‍हुङ्‌हाङः दोङ् पेतो चीःती मानसा खेःतो बा” त दाय्‍ह्‌ती येसुइ तोआथै। 25“ओउः मासी त तोओ ख्रीस्‌पाय् ‘वाङ्आनाः’ त ङाइ चीःआलाङः। वाङ्‌तोक्‌हाङः ओउःइ सबै कुरा छ्यान्‍ह्‌नाःताङी” त दाय्‍ह्‌ती ओउः मोमःचोः दाय्‍ह्आ। 26“लौ ङा नाङ्‌कुस् नोःओ चाक्‌पाय् ओउःलेः खेःनाङः बा” त दाय्‍ह्‌ती येसु त्‍याङ्‌लेःआ।
27ओहाङःसैको ओउःत नोःतोक्‌हाङः येसुकुस् वाह्ओमयः दाह्आकाय्। दाह्आक्‌तीको येसु यात्‌चाक् मोमःचोःकुस् नोःकाय्ओ च्‍यवःती ग्‍याङ्‌ह्आकाय्। ग्‍याङ्‌ह्‌सापाय् ग्‍याङ्‌ह्इतो “लौ दोह् हायःलाङ् वाङ्‌तेःआ” त व्‍हत्‌सामा ग्‍याइली “दोह् हायःतीतेः इ मोमःचोःकुस् नोःकाय्‌ती मुतेःनाः” त दाय्‍ह्‌ती व्‍हत्‌सामा सुमा ग्‍याइली। 28ओहाङःसैको ओउः मोमःचोःपाय् लयःकोः पोम् फेती गाव्‌ताङ् पाय्‍ह्आ। ओहाङः दाह्‌ती 29“लौ योलाङ् वाङ्‌न दै। ङाइ जाङ्‌ह्ओ कुरा यात्‌चाक्इ सबै छ्यानःती तोआबत्‌ताङः बा। ओउःपाय् ओउः वाङ्‌सा खेःओ ख्रीस् त तोओलेः यादो” त दाय्‍ह्‌ती ओउः मोमःचोः गाव्‌कोः मान्‍तालम्‌कायः ल्‍हाक्‌ती तोआथास। 30एत सायःआक्‌तीको ओउः गाव्‌कोः मान्‍तालम् आल्‌ती येसुकःताङ् योलाङ् वाङ्आकाय्। 31ओहाङःसैको ओउः मोमःचोः गाव्‌ताङ् पाय्‍ह्‌तोक्‌हाङः येसुकुस् वाह्ओमयः ओउःकःताङ् वाङ्‌ती “लौ गुरुय द्याह् जेःगा जेःउ दा” त दाय्‍ह्‌ती तोनीतो 32“खेःल ङाकायः नीङ्इ चीःमालो जेःगा मुबत्‌नाःताङः” त दाय्‍ह्‌ती येसु दाय्‍ह्आ। 33“लौ इकायः सुलाङःइ जेःगा वानःती बयःआथै यादो” त दाय्‍ह्‌ती येसुकुस् वाह्ओमयः नोःकाय्आकाय्। 34ओउःमयः एत नोःकाय्‌तोक्‌हाङः “लौ ङाकायः ल्‍होक्ओ परमेस्‍वर्‌ आपाकोः काम् जाङ्‌ह्‌ती खाय्‌सा इत हायःसाकायः ल्‍हुङ् क्राय्आताङः। 35नीङ्‌पाय् ‘चार्‌ महीना पुत्आक्‌तीको ओउः राङ्‌कोः सायः त्‍युम्‍ह्‌ती वानःसा बेला दाह्‌नाः’ त दाय्‍ह्‌ती दाय्‍ह्‌तेःनै। दोङ्‌सी दाय्‍ह्‌भनाङ् योनु दा ओउः राङ्‌कोः सायःलम् द्याह्‌लेः मीन्ओ लेःआः बा द्याह् त्‍युम्‍ह्‌ती वानःसा खेःतो। 36सुसुइ परमेस्‍वर्‌कःताङ् मान्‍तालम् त्‍युम्‍ह्‌ती वानःचाःनानी ओउःकोः जाङ्‌ह्‌झ्‍याङ्‌कोः मुलेःनाः। ओउः वानःओलम्‌पाय् गलमा द्योक्‌मालो जीङः दोःलेःनै ओउःत झ्‍यान्‍ते ओउः पेओ समचार्‌ वार्‌ओ चाक्‌मा ओउः त्‍युम्‍ह्‌ती वानःओ चाक्‌मा ओउः नीस्‌चाक् चोङाय्‌तोलेः स्‍याव्‌नाःच। 37‘यात्‌चाक्‌खेइ वार्‌नौ अरु थे चाक्‌खेइ त्‍युम्‍ह्‌ती वानःनौ’ त दाय्‍ह्‌ती जवतेःनानी ओउः जवती नोःओ कुरापाय् दोङ् कुरा लेःआः बा 38दोह् हायःती दाय्‍ह्‌सा नीङ्‌कोः लयः वार्‌ओ राङ्‌लम् त्‍युम्‍ह्‌साकायः ल्‍होक्‌नेःनाङ्‌सल। अरुइ जाङ्‌ह्ओ काम्‌कोः जाङ्‌ह्‌झ्‍याङ्‌कोः नीङ्‌कायःमा दोःबत्‌तेःनै” त दाय्‍ह्‌ती येसुइ स्‍यान्आथास। 39ओहाङःसैको ओउः मोमःचोः “ङाइ जाङ्‌ह्ओ कुरा यात्‌चाक्इ सबै छ्यानःती तोआबत्‌ताङः” त दाय्‍ह्ओ ल्‍हाक्‌राय् सायःती नाःतो ओउः गाव्‌कोः मान्‍तालम्इ येसुकायः ङ्‌हाम्आथै। 40ओहाङःसै ओउःकःताङ् वाङ्‌ती “लौ ङीकुस् मुअ” त दाय्‍ह्‌ती ब्रीङ्‌ह्‌ती थुनओ कुरा तोनीतो ती ओउःत ब्रीङ्‌ह्‌ती तोआक्‌तीको येसु ओउःमयःकोः गाव्‌हाङः नीस्‌दीन्‌कायः मुआकाय्। 41ओहाङः मुतोक्‌हाङः अरु मान्‍तालम्इ येसुकोः लयः स्‍यान्‌ती नोःओ कुरा सायःती ओउःकायः ङ्‌हाम्आथै। 42“लौ नाङ्‌कोः ल्‍हाक्‌राय् सायःओ खेःल ओउःकोः स्‍यान्ओ ङी लःलयः नोइ सायःआलाङःसु त झ्‍यान्‍ते ‘दोङ्‌सीलेः मान्‍ताकायः दल्‌ताक्‌लाङ् वाङ्‌सा चाक् इ लेःआः बा’ त चीःनाङःइसी ओहाङःसै ओउःकायः द्याह् ङ्‌हाम्‌नाङःसु” त दाय्‍ह्‌ती ओउः मोमःचोःकायः तोआकानी।
43ओहाङःसैको नीस्‌दीन् पुत्आक्‌तीको येसुपाय् ओउः गाव् फेती गालील अन्‍चल्‌ताङ् आल्आकाय्। 44“लौ लयःकोः देस्‌हाङः परमेस्‍वर्‌कोः कुरा छ्यानःओ मान्‍ताकायः सुइमा ङ्‌हाम्‌थाल” त दाय्‍ह्‌ती येसु दाय्‍ह्‌झुङ्ओ खेःतो। 45ओहाङःसै गालील वाङ्‌तोक् बेलाहाङः ओहाङःकोः मान्‍तालम्इ पेतोलेः रोम्आथै। ङ्‌हासै ओउःमयःमा यरुसालेम्‌ताङ् भोस् जाङ्‌ह्‌लाङ् आल्‌ती ओहाङः येसुइ दोह् दोह् हायःओ त सबै च्‍यवःआकानी ओउःत झ्‍यान्‍ते येसु गालीलताङ् वाङ्ओ बेलाहाङः ओउःमयःइ ग्‍याती रोम्आथै। 46ओहाङःसैको फेरीलेः काना त तोओ गाव्‌ताङ् दाह्आकाय्। ओहाङः येसुइ ङ्‌हासै घ्‍याम्‍पाहाङः मुओ तीःपाय् दोङ् पेओ धाक्‌सायःकोः तीः थाङ्‌ताक्ओ खेःतो। ओहाङःसैको ओहाङः दाह्‌ती वाङ्‌तोक् बेलाहाङः यात्‌चाक् दर्‌बाल् कीम्‌कोः ताङ्‌ह्ओ मान्‍ता वाङ्आ। ओउःकोः चोःपाय् कफर्‌नाहुम् त तोओ सहर्‌हाङः जीक्‌ती मुओ खेःतो। 47“लौ येसु यहुदीयाकःसै इहाङः वाङ्आ” त दाय्‍ह्ओ सायःती ओउः जीक्ओ चोःकोः आपा येसुकःताङ् काःहाल्‌लाङ् वाङ्आ। येसुकःताङ् काःहाल्‌लाङ् वाङ्‌ती “लौ ङाकोः चोः सीखेःआ बा। ओउःकायः स्‍याक्‌ताक्‌लाङ् वाङ्‌चाक्‌ची दै” त तेती तोआथै। 48“लौ नीङ् मान्‍ताइपाय् ग्‍याङ्‌ह्‌राय् आःताः च्‍यवःमाःत गलमातेः ङ्‌हाम्‌तेःनीली” त दाय्‍ह्‌ती येसु दाय्‍ह्आ। 49“खेःल साहीप्‌य वाङ्‌चाक्‌ची दै उया ङाकोः चोः सीआनाः” त दाय्‍ह्‌ती फेरीलेः तेतो 50“लौ पाय्‍ह्अ दा नाङ्‌कोः चोः द्याह् स्‍योक्आ बा” त दाय्‍ह्‌ती येसुइ तोआथै। एत तोओ कुरा ङ्‌हाम्‌ती ओउः ताङ्‌ह्ओ मान्‍ता पाय्‍ह्आ। 51पाय्‍ह्‌ती वाङ्‌तोक्‌हाङः कीम् दाह्‌धाङ्‌माःखाहाङः यात्‌नीस् ओउःकोः नोकरीलम् ओउःकायः क्रुस्‌लाङ् वाङ्आकाय् “लौ नाङ्‌कोः चोः स्‍याक्आ जेःआ बा” त दाय्‍ह्‌ती ल्‍हाक्‌ती छ्यानःनाःथै 52“लौ उया ङाकोः चोः गलहाङःसै सेलः स्‍याव्आ” त दाय्‍ह्‌ती व्‍हत्‌थासतो “योह् न्‍याम् घेल्ओहाङःसै अय्ओ स्‍यम्‌ती ल्‍ह्योङ्आ बा” त दाय्‍ह्‌ती त्‍याङ्आकाय् 53“ओउःत खेःओ येसुइ ‘लौ नाङ्‌कोः चोः स्‍याक्आ’ त तोओमाकादे ङाकोः चोः स्‍याक्‌माकादे” त आपाइ चीःआकान्। ओहाङःसै ओउःमा ओउःकोः कीम्‌कोः मान्‍तालम्इमा येसुकायः ङ्‌हाम्आकानी। 54एत हायःओकुस् यहुदीया अन्‍चल्‌सै फेतोक्‌हाङः येसुइ गालीलहाङः नीस् ग्‍याङ्‌ह्‌राय् जाङ्‌ह्आकान्।

युहना 5
1-2ओहाङःसैको यहुदीलम्‌कोः भोस् स्‍याव्‌ती येसु यरुसालेम् सहर्‌ताङ् आल्आकाय्। ओहाङः यात्‌ज्‍योः बेथ्‌सैदा त तोओ दुम्‌हान् खेःतो। ओउःपाय् भेदामेत्‌छ्याःकोः धोका द्याङ्‌तोलेः मुओ खेःतो। छेव् छेव्‌हाङः पोङाज्‍योः एनःती मुसा थाव्‌लम् खेःतो। 3ओहाङः नाःतो जीक्ओलम् हुम्आकाय्। मीक् लोक्ओमा दोम् क्‍ल्‍याय्ओमा क्रुत् स्रुत्ओमा सबै ओउः तीः साङ्‌ह्‌साकायः ल्‍युङ्‌ह्‌ती एनःती मुओ खेःइतो। 4बेला बेलाहाङः यात्‌चाक् परमेस्‍वर्‌इ ल्‍होक्ओ लाङ्‌कामयः तीः साङ्‌ह्‌ताक्‌लाङ् वाङ्‌ताङःओ खेःतो। तीः साङ्‌ह्‌तोक्‌हाङः “सु जीक्ओ मान्‍ता तीःहाङः अरुसै ङ्‌हा च्‍युप्‌ती पोक्‌चाः ओउःलेः सेलः स्‍याव्‌ताङःनाः” त तोती मुओ खेःतो। 5ओउः जीक्ओलम्‌कःहाङः यात्‌चाक् ग्रुती जीक्ओ मान्‍ता मुओ ओउःपाय् आत्‌तीस् साल्‌कायः जीक्‌ती मुओ खेःतो। 6ओहाङःसैको येसु वाङ्‌ती ओउः मान्‍ताकायः च्‍यवःआथै “इ मान्‍तापाय् नाःतो साल्‌कायः जीक्‌तीलेः मुनाः” त चीःती “लौ नाङ् सेलः स्‍याव्‌सा झाक्‌तेःनाःया” त दाय्‍ह्‌ती व्‍हत्‌थातो ती 7“लौ साहीप्‌य तीः साङ्‌ह्ओ बेलाहाङः ङाकायः तीःहाङः पोक्‌ताक्‌सा मान्‍ता सुमा नाःङल। तीःहाङः पोक्‌सा बोङःओहाङः अरु मान्‍ता ङासै ङ्‌हा पोक्‌नाः” त दाय्‍ह्‌ती ओउः जीक्ओ मान्‍ता त्‍याङ्आ। 8“लौ च्‍योक्अ दा। नीङ्‌कोः न्‍हाप्‌लावः खुम्‌ती लात्‌ती वाह्अ” त दाय्‍ह्‌ती येसुइ तोउतो 9ओउःइ तोमाकादे ओउः जीक्ओ मान्‍ता सेलः स्‍याव्‌ती न्‍हाप्‌लावः लात्‌ती वाह्‌माकादे। ओहाङःसैको ओउः दीन्‌पाय् यहुदीलम्‌कोः धोओ दीन् खेःतो। 10ओउःत झ्‍यान्‍ते ओउः यहुदीलम् वाङ्‌ती “तेन्‌पाय् धोओ दीन् लेःआः बा। नाङ्‌कोः न्‍हाप्‌लावः तेन् लात्‌सा स्‍याव्‌ल” त दाय्‍ह्‌ती ओउः ङ्‌हा जीक्ओ मान्‍ताकायः जान्आकानी। 11“ङाकायः स्‍याक्‌ताक्ओ मान्‍तापाय् ओउःइलेः तोआताङः बा ‘नाङ्‌कोः न्‍हाप्‌लावः लात्‌ती वाह्अ’ त ओउः मान्‍ता दाय्‍ह्‌ती तोआताङः” त दाय्‍ह्‌ती त्‍याङ्आ। 12“ओउःत तोओपाय् सुलो” त दाय्‍ह्‌ती यहुदीलम्इ व्‍हत्‌थातो 13ओउः मान्‍ताइपाय् चीःउलु ओउःकायः स्‍याक्‌ताक्आक्‌तीको येसुपाय् हुम्ओ मान्‍तालम्‌कःताङ् मीह्‌ती ज्‍याल्आ। 14ओहाङःसैको येसु आल्‌ती लोने ओउः मान्‍ताकायःपाय् मन्‍दीर्‌हाङः क्रुस्आथै “लौ नाङ् सेलः मुतेःनाः द्याह् रेव्ओ काम् ताःताः जाङ्‌ह्‌ताःउलु। नाङ्इ रेव्ओ जाङ्‌ह्‌तेःचनौ त खेःया न्‍हाङ्‌तोलेः क्‍लोःतो स्‍याव्‌तेःचाः” त दाय्‍ह्‌ती येसुइ तोआथै। 15ओहाङःसैको ओउःत तोआक्‌तीको ओउः मान्‍ता यहुदीलम्‌कःताङ् द्यान्‍ह्‌ती वाङ्‌ती “लौ ङाकायः स्‍याक्‌ताक्ओपाय् ‘येसु’ त तोओ लेःआः बा” त दाय्‍ह्‌ती छ्यानःआकान्। 16ओउःत चीःती ओउः यहुदीकोः ताङ्‌ह्ओ मान्‍तालम्इ येसुकायः लीह्‌सीःओ बयःआकानी “ओउःइ यात्‌चाक्‌कायः धोओ दीन्‌हाङः स्‍याक्‌ताक्आकान्” त दाय्‍ह्‌ती ओउःकायः लीह्‌सीःओ बयःनीतो 17“लौ ङाकोः परमेस्‍वर्‌ आपाइ गलकायःमा पेओ काम् जाङ्‌ह्‌ती मुबाय्‌नाः ङाइमा ओउःतलेः हायःसा खेःनाङः” त दाय्‍ह्‌ती येसु त्‍याङ्आ। 18एत सायःआक्‌तीको ओउःमयः न्‍हाङ्‌तीलेः ल्‍हुङ् मल्‍ह्‌तो स्‍याव्‌ती “लौ इपाय् ङीकोः धोओ दीन्‌हाङः स्‍याक्‌ताक्‌माआकान् परमेस्‍वर्‌कायः ‘ङाकोः आपा’ त दाय्‍ह्‌ती लयःकायः तोती ‘परमेस्‍वर्‌च्‍युक् ताङ्‌ह्ओ लेःआः ङ’ त ताःमाआकास रैस” त नोःकाय्‌ती ओउः यहुदीलम्इ येसुकायः सात्‌सालेः बोङःआकानी। 19ओहाङःसैको “लौ दोङ्‌सीलेः तोनेःनाङ्‌स बा ओउः चोःपाय् लयःइलेः दोह्‌मा हायःसा खाय्उलु ओउःकोः परमेस्‍वर्‌ आपाइ जाङ्‌ह्ओ काम्‌पाय् ओउः ह च्‍यवःआक्‌तीको चोःइमा जाङ्‌ह्‌लेःनौ। गतलो ओउः आपाइ हायःचौ ओउःतलेः ओउःकोः चोःइमा हायःनौ। 20आपाइ चोःकायः राप्‌ती झ्‍यान्‍ते ओउःकायः सबै लयः जाङ्‌ह्ओ काम् छ्यानःनाःथै। माः रैस लोने ओउःकोः चोःकायः न्‍हाङ्‌तोलेः ताङ्‌ह्ओ काम् छ्यानःनाःथै ओउः कुरा च्‍यवःती नीङ् आन ग्‍याङ्‌ह्‌तेःनै। 21आपाइ सीओलम्‌कायः उह्‌ती च्‍योक्‌ताक्‌सा खाय्‌नौ ओउःतलेः ओउःकोः चोःइमा लयः झाक्ओ जाङ्‌ह्‌ती सीओलम्‌कायः च्‍योक्‌ताक्‌लेःनौ। 22ओहाङःसै मान्‍ताकायः तय्‌छनःती योसा काम्‌पाय् आपाइ लयः जाङ्‌ह्उलु ओउः काम्‌पाय् चोःकायः सबै जाङ्‌ह्‌साकायः नाती बयःआथै। 23बयःआक्‌तीको आपालो लेखा एङःतो चोःकायःमा एङःतोलेः स्‍याव्‌नाः। सुसुइ चोःकायः एङःथाल ओउःइलेः चोः ल्‍होक्ओ आपाकायःमा एङःथाल। 24दोङ्‌सी दाय्‍ह्‌भनाङ् सुसुइ ङाइ तोओ कुरा सायःती ङाकायः ल्‍होक्ओ आपाकायः पेतो ङ्‌हाम्‌नाःथै ओउःलेः गलमा द्योक्‌मालो जीङः दोःआनै बा। ओउःपाय् लयःकोः ङ्‌हा जाङ्‌ह्ओ रेव्ओ काम् जाङ्‌ह्‌झ्‍याङ्‌कायः न्‍युम्‍ह्‌माःत सीओहाङःसै उह्‌ती च्‍योक्आलेः स्‍याव्‌नै। 25दोङ्‌सीलेः लोने ओउः सीओलम्इ ङा परमेस्‍वर्‌कोः चोःकोः नोःराय् सायःती ओउःमयःमा उह्‌ती च्‍योक्आनै बा। माः रैस ओउः बेला दाह्‌खेःआ बा। 26आपापाय् जीङःकोः सीलाङ् लेःआः बा ओउःत झ्‍यान्‍ते चोःकायःमा ओउःतलेः जीङः दोःताक्‌सा ग्‍वम्‌लेः बयःआकान्। 27ओहाङःसै ओउःकोः चोःपाय् ‘मान्‍ताकोः चोः’ त तोओ लेःआः ओउःत खेःओ ओउःकायः सबै तय्‌छनःती योसा ग्‍वम् बयःआथै। 28एत हायःओ चीःती ग्‍याङ्‌ह्‌तेःचै लोने सबै पाम्‍ह्‌ती वाय्ओलम्इ ओउःकोः हाव्‌नयः सायःती 29तेस्‌लम्‌सै ग्‍ल्‍युङ्‌ह्‌नै। पेओलम्‌खे उह्‌ती च्‍योक्आक्‌तीको सेलः स्‍याव्‌नै रेव्ओलम्‌खे च्‍योक्आक्‌तीको न्‍युम्‍ह्‌तोलेः स्‍याव्‌नै। 30ओउः तय्‌छनःती योसा काम् ङाकायः ल्‍होक्ओ आपाकोः ल्‍हुङ्‌तुक् आःताः चीःमाःत ङाइ दोह्‌मा जाङ्‌ह्‌सा खाय्‌ङल। ओउःत हायःती ओउः तय्‌छनःती योसा काम्‌पाय् ङाइ पेतोलेः जाङ्‌ह्‌नाङः लयःकायः खेःल ङाइ ल्‍होक्ओ परमेस्‍वर्‌कायः ह ओउः काम् जाङ्‌ह्‌नाङः। 31इ कुरा ङाइ लयः तोओ ह खेःल। ङा लयः झुङ्आले तोचाङः त खेःया ओउः तोओपाय् ङ्‌हाम्‌सीःओ खेःल। 32अरुइ ङाकोः कुराकायःपाय् पाःती नोःनौ। फेरी ओउः पाःती तोओ कुरापाय् ‘दोङ् कुरा लेःआः’ त ङाइ चीःनाङः। 33नीङ्इपाय् युहनाकोः कुरा सायःसा थेङा लयःकोः मान्‍ताकायः ल्‍होक्‌तेःआकानी ओउःइ दोङ् कुरा छ्यानःतेःइतो 34ङाकायः पाःती तोसाकायः युहनालेः परल सुमा परल। नीङ्‌कायःपाय् ‘ङ्‌हाम्आक्‌तीको दल्‌तो स्‍याव्‌तेःपै’ त दाय्‍ह्‌ती इ युहनाकोः कुरा तोनेःनाङ्‌स। 35युहनाखे आन थोङ्ओ बत्तीलो लेखालेः पेओ कुरा छ्यानःतेःआकाय्। ओउःकोः कुरापाय् यात् चीच्‍योक्‌कायः सायःती नीङ् चोङाय्ओ खेःतेःइतो 36ङाकायः पाःती तोओ कुराखे युहनाकोः कुरासै ताङ्‌ह्‌लेःनाः बा। ङाइ जाङ्‌ह्ओ काम्‌लम् दप्‌ताक्‌साकायः ङाकोः आपाइ बयःआताङः। ओउः काम्‌लम् च्‍यवःती ङाकायःपाय् ‘परमेस्‍वर्‌इ ल्‍होक्आथै’ त चीःसा खाय्‌तेःनानी। 37ओहाङःसै ङाकायः ल्‍होक्ओ परमेस्‍वर्‌ आपाइमा ङाकायः पाःती तोलेःनौ। ओउःकायः नीङ्इ गलकायःमा नोइ सायःतेःनीली ओउःकोः रुप्‌पाय् मीक्इ गलकायःमा च्‍यवःतेःनीली। 38ओउःइ तोओ कुरापाय् नीङ्‌कोः ल्‍हुङ्‌हाङः जुगाङ् मुल दोह् हायःती दाय्‍ह्‌सा ओउः आपाइ ल्‍होक्ओ चाक्‌कायः नीङ्इ ङ्‌हाम्‌तेःनीली। 39परमेस्‍वर्‌कोः आखरःपाय् नीङ्इ ‘लौ इ आखरःपाय् पह्रती ङी रौ जीङः दोःनाःतय्‍ही बा’ त ताःती आन पह्रती मुतेःनै ओउः आखरःहाङः ङाकोः कुरा मुलेःनाः। 40ओहाङः ङाकोः कुरा मुसापाय् मुलेःनाः आखरः पह्रआक्‌तीको नीङ् रौ जीङः दोःसाकायः ङाखेकःताङ् वाङ्‌सा ग्‍यातेःइली।
41मान्‍ताकोः लुङ्‌ती नोःओ कुरा ङाकायः परल। 42नीङ्‌कोः ल्‍हुङ्‌पाय् चीःनेःनाङ्‌स बा। नीङ्इ ल्‍हुङ्‌हाङः परमेस्‍वर्‌ आपाकायः पेतोतेः राप्‌तेःनीली” त दाय्‍ह्‌ती येसुइ ओउः यहुदीलम्‌कायः तोआथास। 43“लौ ङा परमेस्‍वर्‌ आपाकःसै वाङ्‌ङोतो नीङ्इ ङाखेकायः रोम्‌सा ग्‍यातेःइली। अरु परमेस्‍वर्‌कःसै वाङ्‌मालो लयःकोः मय्‍ङ्‌हाङः वाङ्ओ मान्‍ताखेकायः नीङ्इ रोम्‌सा ग्‍यातेःनै बा। 44लयःमयःइ लुङ्‌ती तोओ कुराखे नीङ् झाक्‌तेःनै ओउः यातैज्‍योः मुओ परमेस्‍वर्‌इ लुङ्‌ती तोओ कुराखे नीङ् झाक्‌तेःइली ओउःत झ्‍यान्‍ते ङाकायःपाय् ङ्‌हाम्‌तेःनाङ्‌सल। 45नीङ्‌कायःपाय् ङाखेइ परमेस्‍वर्‌कःताङ् गाल्‌तुम्‌ती तोसा परङल नीङ्इ ङ्‌हाम्‌सा ग्‍याओ मोसा त तोओखे ओउःइलेः गाल्‌तुम्‌तीलेः तोतेःनै बा 46दोह् हायःती दाय्‍ह्‌सा ओउःइ दोङ्‌सीलेः ङाकोः कुरा छ्यानःती लेखओआः ङाकायःपाय् नीङ्इ ङ्‌हाम्‌सा ग्‍यातेःइली। मोसाकोः छ्यानःराय् नीङ्इ ङ्‌हाम्‌तेःआकान् त खेःया ङाकायःमा ङ्‌हाम्‌तेःचानाङ्‌स खेःतो। 47ओउःकोः छ्यानःराय् ङ्‌हाम्‌माःत झ्‍यान्‍ते ङाइ तोओ कुरामा ङ्‌हाम्‌तेःनाङ्‌सल” त दाय्‍ह्‌ती येसुइ तोआथास।

युहना 6
1ओहाङःसैको एत नोःआक्‌तीको लोने येसु गालीलकोः तीःपाय् दोङ्‌गाहाङः त्‍यात्‌ती आल्आकाय्। ओउः तीःकोः अरु मय्‍ङ् “तीबेरीयस्” त तोओलेः। 2ओउः तीः त्‍यात्‌ती आल्‌तोक्‌हाङः नाःतो मान्‍तालम्इ ओउःकायः गुल्‍ह्आथै। ओउःमयःइ येसुकोः स्‍याक्‌ताक्ओ ग्‍याङ्‌ह्‌राय् च्‍यवःती झ्‍यान्‍ते येसुकायः गुल्‍ह्‌ती वाङ्आकाय्। 3ओहाङःसै येसु दाह्‌ती लयःकुस् वाह्ओमयःकुस् यात्‌ज्‍योः बुम्‌हाङः लन्‍ह्‌ती ओहाङः च्‍युङःती मुआकाय्। 4ओउः बेलाहाङः यहुदीलम्‌कोः “च्‍योल्ओ दीन्” त तोओकोः भोस् जाङ्‌ह्‌सा बेला दाह्‌खेःआ। 5ओहाङःसैको ओहाङः च्‍युङःती मुतोक्‌हाङः “नाःतो मान्‍ता हुम्‌लाङ् दाह्‌ती वाङ्ओ” त येसुइ च्‍यवःआकान् 6“इच्‍युक् नाःतो मान्‍तापाय् सोर्‌ती बयःसाकायः जेःगा गाःहाङः दोःचाः” त दाय्‍ह्‌ती येसुइ फीलीप्‌कोः ल्‍हुङ्‌तुक् योसाकायः व्‍हत्‌थातो “ङाइ लयः बयःसा खाय्‌नाङः” त येसुइ लयःकोः ल्‍हुङ्‌हाङः चीःआकास। 7“सबैकायः बल बल थोप्‌ती बयःसाकायः नीस्‌सै चान्‍दी पैसा धान्‌ल” त दाय्‍ह्‌ती फीलीप् त्‍याङ्आ। 8-9“लौ इ यात्‌चाक् हौलम् मान्‍ता मुनाः। ओउःकोः नीस्‌मोसा ङाः पोङाकेरः जौकोः लाङ् मुनाः। मुसापाय् मुलेःनाः ओउःपाय् इच्‍युक् नाःतो मान्‍ताकायः जुगाङ्‌मा थोप्‌थासल” त दाय्‍ह्‌ती अन्‍द्रीयस् त तोओ पत्रुस्‌कोः हौइ तोआथै। 10एत तोती “लौ सबैकायः च्‍युङःताक्‌नु दा” त दाय्‍ह्‌ती येसुइ लयःकुस् वाह्ओमयःकायः तोआथास। ओहाङः आन लाङ्‌गनः मुओ ओउःत झ्‍यान्‍ते ओहाङः सबै च्‍युङःआकाय्। ओउःमयः गोय्‌चोः झुङ्आले पास् हजार्‌च्‍युक् खेःइतो। 11ओहाङःसैको ओउः पोङाकेरः लाङ् त्‍याक्‌ती परमेस्‍वर्‌कायः “च्‍युता” त तोती येसुइ लाङ्‌मा फन्‍ह्‌ती फन्‍ह्‌ती सबैकायः थोप्‌ताक्‌ती ल्‍हाआथास। ङाःमा ओउःतलेः ल्‍हाआथास। ओउः लाङ्‌मा ङाःमा त्‍याक्‌ती सबै कोस्‌तोलेः जेःआकानी। 12कोस्‌तो जेःआक्‌तीको “लौ य्‍हुन्‍ह्‌लम् रोत्‌ती त्‍युम्‍ह्‌नु दा दोह्‌मा वाय्‌लाम्” त दाय्‍ह्‌ती येसुइ तोथासतो 13मान्‍तालम्इ ओउः पोङाकेरः लाङ् जेःआक्‌तीको ओउःमयःइ वेओ य्‍हुन्‍ह्‌लम् रोत्‌ती बारगोता धाकर्‌कायः ब्‍लीङ्‌तोलेः काआकानी। 14एत ग्‍याङ्‌ह्‌सीःओ च्‍यवःती “लौ दोङ्‌सीलेः इपाय् इहाङः वाङ्‌सा खेःओ परमेस्‍वर्‌कोः कुरा छ्यानःसा मान्‍ता लेःआः बा” त दाय्‍ह्‌ती हुम्ओ मान्‍तालम् नोःकाय्आकाय्। 15ओउःत नोःकाय्‌तोक्‌हाङः “लौ इमयःइ ङाकायः चुम्‌ती लयःकोः राजा स्‍याव्‌ताक्‌सा बोङःनाःताङः” त येसुइ चीःती फेरीलेः लयःझुङ्आले स्‍यालुङ्‌ताङ् ज्‍याल्आ।
16ओहाङःसैको द्याह्‌मयःलोहाङः येसुकुस् वाह्ओमयः गालील तीःताङ् आल्आकाय्। 17ओहाङः आल्‌ती यात्‌ज्‍योः दोङ्‌गाहाङः पोक्‌ती कफर्‌नाहुम्‌ताङ् त्‍यात्‌सा बोङःआकानी। त्‍यात्‌सा बोङःतोक्‌हाङः न्‍याम् याह्ओ खेःतो येसुपाय् ओउःमयःकःताङ् द्यान्‍ह्‌ती वाङ्‌धाङ्इली। 18ओहाङःसैको ओउःमयः दोङ्‌गाहाङः वाह्‌तोक्‌हाङः गाय्‌ध वाङ्‌ती तीःकायःमा दोङ्‌गाकायःमा आन साङ्‌ह्‌ताक्आकान्। 19ओउः दोङ्‌गाकायः पास् कीलोमीतर्‌ चलावआक्‌तीको ओउःमयःइ येसुपाय् तीःकोः माल्‍गहाङः वाह्ओ च्‍यवःआकानी। ओउःपाय् दोङ्‌गाकःताङ् वाङ्ओ च्‍यवःती येसुकुस् वाह्ओमयःपाय् आन रैआकाय्। 20“लौ ङा लेःआः दाने रैलाम्” त दाय्‍ह्‌ती येसुइ तोआथास। 21एत तोआक्‌तीको “ओउः येसुलेः” त चीःती ओउःकायः दोङ्‌गाहाङः त्‍याक्‌ती वानःसा ग्‍याआकाय्। दोङ्‌गाहाङः वानःआक्‌तीको ओउःमयः रेन्‍ह्‌तोलेः तीःकोः उःसै दाह्आकाय्। 22गालील तीःकोः उःसै दाह्‌ती ओहाङःसै अनम्‍ह्‌कोः स्‍याङ्‌ह्‌लोहाङः ओउः तीःकोः इःसै हुम्‌ती मुओलम्इ येसु ओउःमयःकुस् मुमालो च्‍यवःती “येसुपाय् लयःकोः मान्‍ताकुस् दोङ्‌गाहाङः पोक्आक्‌ल आने अरु दोङ्‌गा नाःल। ओउःकुस् वाह्ओमयःपाय् लयःझुङ्आले त्‍यात्आकाय्” त चीःती नोःकाय्आकाय्। 23ओउःत नोःकाय्‌तोक्‌हाङः तीबेरीयस् त तोओ सहर्‌सै अरु दोङ्‌गालम् वाङ्‌ती दाह्आ। ओउः दोङ्‌गालम् दाह्‌ती वाङ्ओ थाव्‌पाय् येसुइ ङ्‌हासै “च्‍युता” त तोती सबैकायः जेःगा बयःओहाङः द्याङ्‌तोलेः खेःतो। 24दोङ्‌गालम् दाह्आक्‌तीको “लौ येसुमा ओउःकुस् वाह्ओमयःमा इहाङः मुइली” त दाय्‍ह्‌ती ओउः हुम्ओ मान्‍तालम् दोङ्‌गाहाङः पोक्‌ती कफर्‌नाहुम्‌ताङ् त्‍यात्‌ती येसुकायः बोङःलाङ् आल्आकाय्। 25ओहाङःसैको तीःकोः उःसै येसुकायः च्‍यवःती “लौ गुरुय इखा नाङ् गल दाह्‌तेःआ” त दाय्‍ह्‌ती व्‍हत्‌थातो 26“दोङ्‌सीलेः नीङ्इपाय् ङाइ बयःओ जेःगा कोस्‌तोलेः जेःतेःआकानी। फेरी जेःगा बोङःलाङ् वाङ्‌तेःआकाय्। ग्‍याङ्‌ह्‌राय् जाङ्‌ह्आक्‌तीको ङाकायःपाय् ‘सुलो’ त सायःसाकायः बोङःलाङ् वाङ्‌तेःइली। 27लौ इ ल्‍हाव्‍ह्‌दैबाङ्‌कोः जेःगालम् सय्‍ङ्‌ती ल्‍ह्योह्‌ती वाय्‌नाः ओउः जेःगाखेकायः केलःती काम् जाङ्‌ह्‌माःत ओउः गलमा द्योक्‌मालो रौ जीङः दोःताक्‌सा जेःगाखेकायः काम् जाङ्‌ह्‌नु। इ जेःगापाय् ङा मान्‍ताकोः चोः त तोओइ बयःनेःनाङ्‌स। एत हायःसाकायः ङाकोः परमेस्‍वर्‌ आपाइ ङाकायः दोक्‌तीलेः गम्आताङः बा” त दाय्‍ह्‌ती येसुइ तोआकान्। 28“लौ परमेस्‍वर्‌कोः काम् जाङ्‌ह्‌साकायः दोह् हायःसा खेःङीतो” त दाय्‍ह्‌ती व्‍हत्आकानी 29“परमेस्‍वर्‌इ ल्‍होक्ओ चाक्‌कायः ङ्‌हाम्‌नु दा। इलेः परमेस्‍वर्‌कोः काम्‌पाय्” त येसु दाय्‍ह्‌ती त्‍याङ्आ। 30“ओउःत खेःओ नाङ्‌कोः कुरा ङ्‌हाम्‌ताक्‌साकायः ङीकायः दोह् दोह् ग्‍याङ्‌ह्‌राय् जाङ्‌ह्‌तेःनाःताङी। 31ङीकोः आय्‌कानः तोकानःलम्इ मोसाइ बयःओ ‘मन्‍न’ त तोओ आम्‍ह् जेःताङःआकानी ‘ओउःइ लाङ्‌कासै दोःओ जेःगा बयःआथास’ त आखरःहाङः लेखती मुनाः” त दाय्‍ह्‌ती ओउः हुम्ओ मान्‍तालम् दाय्‍ह्आकाय्। 32“दोङ्‌सी दाय्‍ह्‌भनाङ् मोसाखेइ बयःओ थोक्‌लम् दोङ् लाङ्‌काकोः जेःगा खेःआक्‌ल ओउः दोङ् लाङ्‌काकोः जेःगापाय् ङाकोः आपाइ बयःओ खाल् लेःआः बा। 33ओउः लाङ्‌कासै ग्‍ल्‍युङ्‌ह्ओ ल्‍हाव्‍ह्‌दैबाङ्‌कोः मान्‍तालम्‌कायः रौ जीङः दोःताक्‌सा चाक्‌लेः ओउःपाय् परमेस्‍वर्‌इ बयःओ जेःगा त तोसा लेःआः” त येसु दाय्‍ह्‌ती दाय्‍ह्आ। 34“लौ साहीप्‌य द्याह्‌हाङःसै इ जेःगा गलकायः खेःयामा बयःचाक्‌ताङी दा” त दाय्‍ह्‌ती तेआकाय्। 35“लौ ओउः जीङः दोःताक्‌सा जेःगापाय् ङा लेःआः बा। सुसु ङाकःताङ् वाङ्‌चै ओउःलेः लोनेः गलमा योङ्‌क्राय्‌ल। सुसुइ ङाकायः ङ्‌हाम्‌नानी ओउःलेः लोनेः गलमा अप्‌ल” त दाय्‍ह्‌ती येसुइ स्‍यान्आथास। 36“ङाकायःपाय् नीङ्इ च्‍यवःतेःनाङ्‌सतो बुरु ङ्‌हाम्‌तेःनाङ्‌सल इतलेः ङाइ ङ्‌हासै तोनेःनाङ्‌सतो 37सुसु ङाकोः आपाइ बयःनाःताङः ओउःलेः ङाकःताङ् वाङ्‌नै। वाङ्आक्‌तीको ओउःकायःलेः ङाइ गल खेःयामा रुनःङुसुलु। 38ङा लयः झाक्ओ कुरा जाङ्‌ह्‌साकायः लाङ्‌कासै ग्‍ल्‍युङ्‌ह्‌ती वाङ्‌ङल ङाकायः ल्‍होक्ओ आपाकोः झाक्ओ कुराखे जाङ्‌ह्‌लाङ् वाङ्ओआः ङ। 39ङाकोः आपा झाक्ओ काम्‌पाय् इलेःआः गुच्‍युक् मान्‍तालम् ओउःइ ङाकायः बयःआताङः ओउःच्‍युक् नाःतो ङाइ यातैज्‍याङ् वेङ्‌ताक्‌माःत ल्‍हाव्‍ह्‌दैबाङ्‌कोः पुत्ओ दीन्‌हाङः उह्‌ती च्‍योक्‌ताक्‌साकायः गम्‌सा खेःनाङः। 40फेरी ङाकोः आपा झाक्ओमा इलेःआः। सुसुइलो परमेस्‍वर्‌कोः चोः च्‍यवःती ङ्‌हाम्‌नानी ओउःलेः रौ जीङः दोःती ओउः पुत्ओ दीन्‌हाङः उह्‌ती च्‍योक्‌तो स्‍याव्‌नै बा” त दाय्‍ह्‌ती दाय्‍ह्आ।
41एत दाय्‍ह्आक्‌तीको ओउः हुम्ओ मान्‍तालम् ल्‍हुङ् मल्‍ह्‌ती नोःआकाय् “लौ ओउःपाय् ‘लाङ्‌कासै ग्‍ल्‍युङ्‌ह्ओ जेःगापाय् ङा लेःआः’ त तोती मुलेःनाः बा” त दाय्‍ह्‌ती नोःकाय्आकाय्। 42“खेःल ओउःपाय् येसु लेःआः युसेफ् त तोओकोः चोः। ओउःकोः आमा आपा तय्‍ह्आलाङःसु ओउःत झ्‍यान्‍ते ओउः द्याह् गत हायःती ‘लाङ्‌कासै ग्‍ल्‍युङ्‌ह्आलाङः’ त नोःनाःस रैस” त दाय्‍ह्‌ती हुम्ओलम् नोःकाय्‌ती 43“ताःताः ल्‍हुङ् मल्‍ह्‌ती नोःताःनल। 44ङाकोः आपाइ ल्‍हुङ् द्यान्‍ह्‌ताक्‌माःत सुमा ङाकःताङ् वाङ्इली। ओहाङःसैको वाङ्ओलम्‌कायः ओउः ल्‍हाव्‍ह्‌दैबाङ् पुत्ओ दीन्‌हाङः ङाइ उह्‌ती च्‍योक्‌ताक्‌नाङःसु। 45‘लौ परमेस्‍वर्‌इ सबैकायः स्‍यान्‌नाःथास’ त दाय्‍ह्‌ती परमेस्‍वर्‌कोः कुरा छ्यानःओमयःइ लेखआकानी ओहाङःसै सुसुइ ङाकोः आपाकोः स्‍यान्‌राय् सायःती चीःनानी ओउःलेः ङाकःताङ् वाङ्‌नै। 46आपाकायः सुइमा च्‍यवःआक्‌नीली परमेस्‍वर्‌इ ल्‍होक्ओचाक् ह ओउःइलेः च्‍यवःआकान्। 47दोङ्‌सी दाय्‍ह्‌भनाङ् सुसुइ ङाकायः ङ्‌हाम्‌चाःताङः ओउःलेः गलमा द्युम्‌मालो जीङः दोःचै। 48फेरी ओउः रौ जीङः दोःताक्‌सा जेःगा त तोसा ङा लेःआः ङ। 49नीङ्‌कोः आय्‌कानः तोकानःलम्इ ओउः मन्‍न आम्‍ह्‌खे जेःनीतो ओउःमयः लोने सीआकाय्। 50ओउः लाङ्‌कासै ग्‍ल्‍युङ्‌ह्ओ जेःगाखे जेःओ त खेःया ओउः जेःओ मान्‍तालम् गलमा सीइली। 51लौ ओउः लाङ्‌कासै वाङ्ओ जीङः दोःताक्‌सा जेःगा ङा लेःआः बा। सुसुइ इ जेःगा जेःचानी ओउःलेः गलमा द्युम्‌मालो जीङः दोःनै। इ जेःगा त तोसापाय् ङाकोः आङ् लेःआः। ओउःपाय् ङाइ सबै ल्‍हाव्‍ह्‌दैबाङ्‌हाङः मुओलम्‌कायः जीङः दोःताक्‌साकायः बयःनाङःसु बा” त दाय्‍ह्‌ती येसुइ स्‍यान्‌ती तोआथास। 52ओहाङःसैको इ कुरा सायःआक्‌तीको ओउः यहुदीलम् लयःमयःकुस् काय्‌काय्‌ती नोःनै “गत हायःती ओउःइ लयःकोः मायः जेःसाकायः बयःचाःताङी” त दाय्‍ह्‌ती नोःकाय्आकाय्। 53“लौ दोङ्‌सीलेः ङा मान्‍ताकोः चोः त तोओकोः मायः आःताः जेःमाःत वयः आःताः तुङ्‌माःत नीङ् रौ जीङःपाय् दोःतेःइली। 54सुसुखेइ ङाकोः मायः जेःमानानी ङाकोः वयः तुङ्‌मानानी ओउःलेः गलमा द्युम्‌मालो जीङः दोःनाः। ओउःकायःपाय् ङाइ लोनेःकोः ल्‍हाव्‍ह्‌दैबाङ् द्युम्ओ दीन्‌हाङः च्‍योक्‌ताक्‌नाङःसु। 55ङाकोः मायःपाय् दोङ् जेःगा त तोसालेः ङाकोः वयःपाय् दोङ् तुङ्‌गा लेःआः बा। 56सुसु ङाकोः मायः जेःमानानी ङाकोः वयः तुङ्‌मानानी ओउःकुस् ङा ब्राङ्‌नाङःच। ङा ओउःकुस्‌लेः ओउः ङाकुस्‌लेः ब्राङ्‌नाङःच। 57ङाकायःपाय् ओउः जीङः नाःओ आपाइ ल्‍होक्‌ती जीङः दोःताक्आताङः ओउःलो लेखा ङाकायः जेःओलम्‌पाय् ङाइ जीङः दोःताक्‌नाङःसु। 58ओउः दोङ् लाङ्‌कासै ग्‍ल्‍युङ्‌ह्ओ जेःगा ङा लेःआः। इकायः जेःआक्‌तीको मान्‍तापाय् गलमा द्योक्‌मालो जीङः दोःनै। ओउः जेःगापाय् उय्‍ह्‌लेकोः मन्‍न आम्‍ह् त तोओलो लेखालेः खेःबाय्‌ल ओउः मन्‍नकायः जेःओलम् द्युम्‌मालो जीङः दोःइली। जेःआक्‌तीको ओउःमयः सीइतो ङाखेकोः जेःआक्‌तीको मान्‍ता गलमा द्युम्‌मालो जीङः दोःआनै” त दाय्‍ह्‌ती येसुइ तोआथास। 59इ स्‍यान्‌राय् येसुइ कफर्‌नाहुम्‌कोः थनःओ कीम्‌हाङः तोओ खेःतो।
60ओहाङःसै ओउः स्‍यान्ओ कुरा सायःती “लौ इ कुरापाय् चाक्‌लेःनाः रैस सुसुइ चीःती सायःसा खाय्‌चानी र” त दाय्‍ह्‌ती नाःतो येसुकुस् वाह्ओमयः लयःमयः नोःकाय्इतो 61येसुइ ओउःमयःकोः ल्‍हुङ् क्‍लोत्‌काय्‌ती नोःओ सायःमाःत ल्‍हुङ्‌हाङः लयः चीःती “लौ ङाइ तोओ कुरा सायःती ङाकःताङ् ल्‍हुङ् क्‍लोय्‍क्‌तेःनैया। 62ओउःत खेःया ङा अनम्‍ह् ग्‍ल्‍युङ्‌ह्‌ती वाङ्ओहाङःपाय् ङा ओउःताङ् द्यान्‍ह्‌ती लन्‍ह्‌ती पाय्‍ह्‌नाङः लौ ओउःतोक्‌हाङः नीङ् गततेः म्‍हर्‌तेःचै” त दाय्‍ह्‌ती व्‍हत्आथास। 63“लौ रौ जीङः दोःताक्‌साकायः परमेस्‍वर्‌कोः ग्‍वालामःइ ह खाय्‌नौ। मान्‍ताखेइ लयःकःसै जीङः दोःताक्‌सा खाय्‌नीली। ङाइ स्‍यान्‌ती तोओ कुरापाय् मान्‍ताकोः कुरा खेःल परमेस्‍वर्‌कोः ग्‍वालामःकोः जीङः बयःसा कुरा लेःआः बा। ओउः कुरा तोनेःनाङ्‌सतो 64नीङ्‌कःगन यात्‌नीस्‌चाक्इ ङ्‌हाम्‌धाङ्‌तेःनाङ्‌सल” त दाय्‍ह्‌ती दाय्‍ह्आ। येसुइपाय् दोङ् ङ्‌हाहाङःसै मान्‍ता मान्‍ताकायः “लौ इइमा ओउःइमा ङाकायः गलमा ङ्‌हाम्‌ताङःल” त ल्‍हुङ्‌हाङः चीःआकान्। फेरी “इ मान्‍ताइलेः यहुदीलम्‌कःताङ् दाक्‌ती ल्‍हानाःताङः” तमा ल्‍हुङ्‌हाङः ङ्‌हाहाङःसै चीःओ खेःतो। 65येसु एत चीःती “लौ ओउःत झ्‍यान्‍ते नीङ्‌कायः ङाइ ‘लौ परमेस्‍वर्‌ आपाइ ताक्‌माःत सुइमा ङाकःताङ् वाङ्‌सा खाय्‌नीली’ त ङ्‌हाहाङः तोनेःआलाङ्‌स” त दाय्‍ह्‌ती येसुइ तोआकान्। 66ओहाङःसैको ओउःत सायःआक्‌तीको नाःतो मान्‍तालम्इ येसुकुस् वाह्ओ फेआकानी। 67ओउःमयःइ येसुकायः फेआक्‌तीको “लौ नीङ्इमा ङाकायः फेसा झाक्‌तेःनै यादो” त दाय्‍ह्‌ती येसुइ ओउः बारजन लयः छ्युङ्‌ह्ओमयःकायः व्‍हत्‌थासतो 68“खेःल है अरु सुकःताङ् आल्‌चाङी र। नाङ्इ ह जीङः दोःताक्‌सा कुरा नोःतेःनाः। 69ओउः कुरा ङ्‌हाम्‌ती ‘नाङ्‌पाय् परमेस्‍वर्‌कोः लयःकोः जय्‌कुमःत मुओ चाक्‌लेःतेः खेःतेःनाः’ त ङीइ तय्‍ह्‌ती चीःनाङःसु” त दाय्‍ह्‌ती पत्रुस् त्‍याङ्आ। 70“लौ ङाइ ङ्‌हा बारजन छ्युङ्‌ह्‌नेःआलाङ्‌सु माःदै। छ्युङ्‌ह्‌सापाय् छ्युङ्‌ह्‌नेःआलाङ्‌सु यात्‌चाक्‌खेपाय् सैतान्‌कोः मान्‍ता लेःआः बा” त दाय्‍ह्‌ती येसु दाय्‍ह्आ। 71ओउःपाय् यात्‌चाक् इस्‍करीयोत्‌कोः सीमोन् त तोओकोः चोः “यहुदस्” त तोओलेः। ओउः यहुदस्‌कायः येसुइ ङ्‌हा छ्युङ्‌ह्‌थातो ती लोने यहुदस्इ येसुकायः यहुदीलम्‌कःताङ् सात्‌साकायः दाक्आकान्।

युहना 7
1ओहाङःसैको एत तोआक्‌तीको येसु गालील अन्‍चल्‌हाङः ब्‍याह्‌ती वाह्आकाय्। यहुदीलम्इ ओउःकायः सात्‌सा बोङःओ खेःइतो ओउःत झ्‍यान्‍ते यहुदीया देस्‌ताङ् आल्‌सा ग्‍याआक्‌ल। 2ओहाङःसै ओउः यहुदीलम्‌कोः झ्‍युह्‌रुक् कीम् त तोओ छ्यात् जाङ्‌ह्‌सा बेलाहाङः दाह्‌खेःआ। 3ओउः छ्यात् दाह्‌खेःतोक्‌हाङः येसुकोः हौचोङ्‌लम् ओउःकःताङ् वाङ्‌ती “लौ इहाङः फेती यहुदीया अन्‍चल्‌ताङ् आल्अ दै। ओहाङः आल्‌ती लयःकुस् वाह्ओमयःकायःमा ग्‍याङ्‌ह्‌राय् छ्यानःसा खाय्‌तेःनौ। 4सुइलो अरुकायः स्‍यान्‌सा म्‍हर्‌चै ओउःपाय् काम् जाङ्‌ह्‌तोक्‌हाङः नुकुती वाह्इली। नाङ्इ ताङ्‌ह्ओ काम् जाङ्‌ह्‌तेःनौ ओउः काम्‌पाय् सबैकायः छ्यानःउ दा” त दाय्‍ह्‌ती येसुकोः लयःकोः हौचोङ्इ तोआथै 5ओउःमयःइ येसुकायः ङ्‌हाम्‌मालो खेःइतो। 6ओहाङःसैको “लौ ङाखेकायः यहुदीयाताङ् आल्‌सा बेलाहाङः दाह्‌धाङ्‌ल नीङ्‌खेपाय् गलमा आल्‌सा स्‍याव्‌तेःनै। 7ल्‍हाव्‍ह्‌दैबाङ्‌कोः मान्‍तालम् नीङ्‌खेकः अह्र्इली ङाखेकः आन अह्र्लेःनै। दोह् हायःती दाय्‍ह्‌सा ओउःमयःकायः ‘लौ नीङ्इ जाङ्‌ह्ओ काम्‌लम्‌पाय् आन रेव्ओलेः’ त ङाइ तोधैलेः मुनाङः। 8-9लौ नीङ्‌खे छ्यात्‌ताङ् आल्‌न दा ङाखेपाय् आल्‌ङल। ङा आल्‌सा बेला दाह्‌धाङ्‌ल” त दाय्‍ह्‌ती येसुइ तोआकान् तोआक्‌तीको गालीलहाङः मुआ। 10ओहाङःलेः मुआ ओहाङःसैको ओउःकोः हौचोङ् आल्आक्‌तीको येसुमा यरुसालेम्‌ताङ् अरुइ चीःमाःत आल्आ। 11येसुपाय् अरुइ चीःमाःत आल्‌तो ओउः यहुदीकोः ताङ्‌ह्ओ मान्‍तालम्इ ओउःकायः बोङःआकानी “गाःताङ्‌लो मुनाः” त दाय्‍ह्‌ती नोःआकाय्। 12ओहाङःसैको ओउः छ्यात्‌ताङ् हुम्‌ती वाङ्ओलम् येसुकोः कुरा लयःमयःकुस् आन नोःकाय्आकाय्। यात्‌नीस् मान्‍ताखेपाय् “ओउःपाय् पेओ लेःआः” त दाय्‍ह्‌ती नोःकाय्आकाय् अरुलम्‌खे “खेःल ओउःइ सबैकायः माःती थ्‍योन्‍ह्‌तीलेः तोनौ” त दाय्‍ह्‌ती त्‍याङ्आकाय्। 13नोःसापाय् ओउःमयः लयःकुस् नोःनीतो ओउः यहुदीकोः ताङ्‌ह्ओ मान्‍ताकः रैती झ्‍यान्‍ते सुमा फवःती नोःसा ग्‍याइली।
14ओहाङःसैको ओउः छ्यात्‌कोः ल्‍हाक्‌बादीङ्‌हाङः येसुपाय् ओउः मन्‍दीर्‌ताङ् फवःतीलेः आल्‌ती ओहाङः स्‍यान्‌ती तोलाङ् दाह्आ। 15ओउःकोः स्‍यान्‌तोक्‌हाङः ओउः यहुदीलम्इ सायःती “लौ इइपाय् गलमा इस्‍कुल्‌हाङः स्‍यान्‌मालो खेःतो गत हायःती ओउःच्‍युक् म्‍हुक्‌ती नोःसा चीःनौ द्याह्” त दाय्‍ह्‌ती ओउःमयः ग्‍याङ्‌ह्आकाय्। 16“लौ ङाइ स्‍यान्ओ कुरापाय् ङाकोः लयःकोः ल्‍हुङ्‌सै खेःल ङाकायः ल्‍होक्ओ परमेस्‍वर्‌कःसै वाङ्‌नाः। 17सुसुइ परमेस्‍वर्‌कोः काम् जाङ्‌ह्‌सा ग्‍यानै ओउःलेः ङाइ स्‍यान्ओ कुराकायः ‘लौ ओउः कुरापाय् परमेस्‍वर्‌कःसै लेःआः लयःकःसै खेःल बा’ त चीःनानी। 18सुखेइ लयःकःसै ह स्‍यान्‌नौ ओउःइ लयःकोः नेह्‌रो ओर्‌ताक्‌नानी। सुखेइ लयःकायः ल्‍होक्ओचाक्‌कायः ताङ्‌ह्‌ताक्‌सा बोङःनौ ओउःपाय् जय्‌कुमःओ मान्‍ता लेःआः ओउःकोः कुरामा दोङ् कुरा लेःआः बा। 19लौ मोसा त तोओइ नीङ्‌कायः ऐन् बयःतेःइतो ओउः ऐन्‌कोः हुकुम् सुइमातेः जाङ्‌ह्‌तेःनीली। दोह् हायःतीतेः ङाकायः सात्‌सा बोङःतेःनानानाङ्‌स” त दाय्‍ह्‌ती येसुइ तोआथासतो 20“खेःल नाङ्‌कायः लान्इ ङायःती ब्रःताक्‌तेःनाः बा। सुसुइ नाङ्‌कायः सात्‌सा बोङःतेःचनै र” त दाय्‍ह्‌ती ओउः हुम्‌ती मुओलम् त्‍याङ्आकाय्। 21“लौ ङाइ यातैज्‍योः काम् जाङ्‌ह्आक्‌तीको नीङ् ग्‍याङ्‌ह्‌तीलेः मुतेःनै। 22मोसाइ नाङ्‌कोः पुन् तात्‌सा जवओ बयःतेःआकाय्। बयःसापाय् बयःतेःइतो मोसाइ लयः दाङ्‌ती बयःओ खेःल नीङ्‌कोः आय्‌कानः तोकानःइ ङ्‌हालेः जवओ खेःइतो। 23फेरी इत जवती जाङ्‌ह्‌साकायः नीङ्इ धोओ दीन्‌हाङः जाङ्‌ह्‌तेःनानी ओउःत झ्‍यान्‍ते ङाइमा धोओ दीन्‌हाङः यात्‌चाक्‌कायः जुगाङ् स्‍याक्‌ताक्ओ त झ्‍यान्‍ते दोह् हायःतीतेः जान्‌तेःनेःनानाङ्‌स। 24मान्‍ताकायः योती झुङ्आले ओउःकायः तय्‌छनःती योसा स्‍याव्‌ल ल्‍हुङ्‌हाङः पेतो लाय्आक्‌तीको ह तय्‌छनःसा स्‍याव्‌नाः” त दाय्‍ह्‌ती येसुइ तोआथास।
25एत तोतोक्‌हाङः “लौ ओउःमयःइ सात्‌सा बोङःओचाक्‌पाय् इलेःआः माःर। 26सात्‌सापाय् बोङःनीतो ओउःइ सबैकोः मीक्‌हाङः फुती नोःनौ रैस। एत नोःओ बेलाहाङःलेः ओउःकायः दोह्‌मा तोनीली दोह् हायःती दाय्‍ह्‌सा ताङ्‌ह्ओ मान्‍तालम्इ ओउःकायःपाय् ‘ख्रीस् लेःआः’ त तय्‍ह्‌ती चीःनानी यादो। ओउः ख्रीस्‌पाय् खेःल। ख्रीस् वाङ्‌सा बेलाहाङःपाय् ओउःखेकायः ‘गाःसै वाङ्ओ’ त सुइमा चीःनीली 27इ येसुखेकायः ओउःकोः दोःओ गाव् ङीइ चीःनाःतय्‍ह्‌नी ओउःत झ्‍यान्‍ते ओउःकायः ‘ख्रीस्’ त तोसा स्‍याव्‌ल” त दाय्‍ह्‌ती नोःकाय्आकाय्। 28“दोङ्‌सीलेः ङाकायः नीङ्इ तय्‍ह्‌तीमा चीःतेःनेःनेःनाङ्‌स ङा गाःहाङःसै वाङ्ओमा चीःतेःनानी बा। ङापाय् लयः वाङ्ओलेः खेःल ङाकायः ल्‍होक्ओपाय् दोङ् परमेस्‍वर्‌ लेःआः बा। ओउःकायः नीङ्‌खेइ तय्‍ह्‌ती चीःतेःनीली 29ङाखेपाय् ओउःकःसै वाङ्‌ती झ्‍यान्‍ते ओउःकायः तय्‍ह्‌ती चीःलेःनाङः” त दाय्‍ह्‌ती येसु मन्‍दीर्‌हाङः सबैकायः थोल्‍ह्‌ती तोआथास। 30एत तोओ सायःती ओउः यहुदीकोः ताङ्‌ह्ओ मान्‍तालम्इ ओउःकायः पानःसा बोङःनीतो सुमा चुम्‌सा ग्‍याइली दोह् हायःती दाय्‍ह्‌सा येसुकायः चुम्‌ती सात्‌सा बेलाहाङः दाह्आक्‌धाङ्‌ल। 31ओउः यहुदीकोः ताङ्‌ह्ओ मान्‍तालम्‌खे येसुकायः सात्‌सा बोङःनीतो नाःतो अरुखेइ ओउःकायः ङ्‌हाम्आथै “लौ ओउः ख्रीस् त तोओपाय् वाङ्‌तोक्‌हाङः इ मान्‍तासै ताङ्‌ह्ओ काम् जाङ्‌ह्‌सा खाय्‌चौ र” त दाय्‍ह्‌ती नोःकाय्आकाय्। 32ओउः हुम्ओ मान्‍तालम् नोःकाय्ओ कुरा सायःआक्‌तीको ओउः फरीसीलम्‌मा ताङ्‌ह्ओ पुरोहीत्‌लम्इमा “इ हुम्ओलम् नोःकाय्ओ कुरापाय् स्‍याव्‌ल रैस” त दाय्‍ह्‌ती येसुकायः पानःसाकायः लयःकोः सीपाहीलम् ल्‍होक्‌नीतो 33ओउः सीपाहीलम् ल्‍होक्‌तोक्‌हाङः “लौ देङी ङा नीङ्‌कुस् मुधाङ्‌नाङः ओहाङःसै ङा आल्‌ती ङाकायः ल्‍होक्ओकःताङ् पाय्‍ह्‌नाङः। 34पाय्‍ह्आक्‌तीको ङाकायः बोङःतेःनाङ्‌सतो ङाकायः च्‍यवःतेःनाङ्‌सल। ङा आल्ओहाङः नीङ्‌खे आल्‌सा खाय्‌तेःनीली” त दाय्‍ह्‌ती येसुइ तोआथास। 35एत तोओ सायःती “लौ इपाय् गाःहाङःलो आल्‌ती ङीइ च्‍यवःसा खाय्‌ङुसुलु ओउःपाय् अरु क्रव्‌ती ज्‍याल्ओ यहुदीलम्‌लो लेखालेः एलेनी मान्‍तालम्‌कोः सहर्‌ताङ् आल्‌ती ओउःमयःकायः स्‍यान्‌नौ यादो। 36लौ ‘ङाकायः बोङःतेःनेःनेःनाङ्‌सतो ङाकायः च्‍यवःतेःनाङ्‌सल ङा आल्ओहाङः नीङ्‌खेइ आल्‌सा खाय्‌तेःनीली’ त दाय्‍ह्‌ती ओउःइ दोह् हायःती तोआतय्‍ही” त दाय्‍ह्‌ती ओउः हुम्ओलम् लयःमयः नोःकाय्आकाय्।
37एत नोःकाय्‌तोक्‌हाङः ओउः छ्यात्‌कोः द्युम्ओमा ताङ्‌ह्ओ दीन् पुत्आ। ओहाङःसै येसु चीङ्‌ती सबैकायः थोल्‍ह्‌ती तोती “लौ सुसुलो अप्‌चानाः ओउःपाय् ङाकःताङ् तुङ्‌लाङ् वाङ्अ दा। 38‘सुसुलो ङाकायः ङ्‌हाम्‌नानी ओउःकोः ल्‍हुङ्‌तुक्‌सै जीङः दोःताक्‌सा तीः होती ग्‍ल्‍युङ्‌ह्‌नाः’ त परमेस्‍वर्‌कोः आखरःहाङः लेखती मुनाः” त दाय्‍ह्‌ती येसुइ तोआकान्। 39ओउः तीः त तोसापाय् परमेस्‍वर्‌कोः ग्‍वालामः लेःआः। ओउः बेलाहाङःपाय् येसु आपाकःताङ् पाय्‍ह्‌ती ताङ्‌ह्‌धाङ्आक्‌ल त झ्‍यान्‍ते परमेस्‍वर्‌कोः ग्‍वालामःपाय् ङ्‌हाम्ओलम्‌कायः बयःधाङ्आक्‌मालो खेःतो। 40ओहाङःसैको येसु तोओ कुरा सायःती यात्‌नीस् हुम्ओलम्‌खे “लौ इ मान्‍ता दोङ्‌सीलेः परमेस्‍वर्‌कोः कुरा छ्यानःसा मान्‍ता लेःआः बा” त दाय्‍ह्‌ती नोःआकाय्। 41अरुखेइ “ओउःपाय् ओउः वाङ्‌सा खेःओ ख्रीस् लेःआः” त दाय्‍ह्‌ती तोनीतो 42“खेःल ओउः ख्रीस्‌लेः गालीलसै गलमा वाङ्‌ल। 43‘ओउः ख्रीस्‌पाय् दावुद् राजाकोः खलक्‌कोः स्‍याव्‌ती दावुद्‌कोः बेथ्‌लेहेम् गाव्‌सै वाङ्‌सा खेःतो’ त आखरःहाङः लेखती मुनाः र” त अरु दाय्‍ह्‌ती ओउः हुम्ओलम् लयःकुस् काय्‌काय्आकाय्। 44ओहाङःसैको यात्‌नीस्‌चाक्इ येसुकायः चुम्‌सा बोङःनीतो सुइमा चुम्‌सा खाय्‌नीली। 45ओउःमयःइ चुम्‌सा खाय्‌नीली ओहाङःसैको ओउः ङ्‌हा ल्‍होक्ओ सीपाहीलम् पुरोहीत्‌लम्‌मा फरीसीलम्‌कःताङ्‌मा द्यान्‍ह्‌ती वाङ्आकाय्। द्यान्‍ह्‌ती वाङ्आक्‌तीको “लौ ओउःकायः दोह् हायःतीतेः चुम्‌ती वानःतेःनीली” त दाय्‍ह्‌ती व्‍हत्‌नीतो ती 46“ओउःइ तोओ नोःराय्‌पाय् अरु सुइमा तोआक्‌ल सायःधार्‌नालेः ङीइ चुम्‌सा खाय्‌ङुसुलु” त दाय्‍ह्‌ती सीपाहीलम् त्‍याङ्आकाय्। 47“दोङ्‌सीतेः ओउःकोः थोल्‍ह्‌ती तोओ सायःआक्‌तीको नीङ्‌मा ओउःकुस् वाह्‌सा ग्‍यातेःआकाय्‌या। 48ङीकोः ताङ्‌ह्ओ मान्‍तामा फरीसीमा सुइमा ओउःकायः ङ्‌हाम्‌नीली। 49ओउः येसुकः हुम्ओ मान्‍तालम्इ मोसाइ बयःओ ऐन् जुगाङ् चीःमाःत झ्‍यान्‍ते परमेस्‍वर्‌इ प्रनःबाङ् बयःआथास बा” त दाय्‍ह्‌ती ओउः फरीसीलम्इ जान्‌ती तोआकानी। 50-51“खेःल अरुइ गाल्‌तुम्‌ती नोःओ मान्‍तापाय् लयःकायः आःताः नोःआक्‌तीको ह न्‍युम्‍ह्‌ताक्‌सा स्‍याव्‌नाः ओउःत हायःसापाय् ङीकोः ऐन् लेःआः” त दाय्‍ह्‌ती नीकोदेमस् त तोओ दाय्‍ह्आ। ओउःपाय् यात्‌चाक् फरीसी खेःतो ङ्‌हालेः येसुकायः क्रुस्‌लाङ् वाङ्आ। 52ओउःकोः कुरा सायःआक्‌तीको “लौ नाङ्‌मा गालीलकोः मान्‍ता खेःतेःचाः र। ङीकोः आखरःहाङः पह्रउ दा। ओहाङःपाय् परमेस्‍वर्‌कोः कुरा छ्यानःओ मान्‍तापाय् गालीलसै वाङ्‌नाः त लेखओ खेःबाय्‌ल” त ओउःमयः दाय्‍ह्‌ती तोआथै। 53ओहाङःसैको सबै हुम्ओ मान्‍तालम्‌खे पाय्‍ह्आकाय्

युहना 8
1येसुखे जैथुन् त तोओ बुम्‌ताङ् लन्‍ह्‌ती आल्आ। 2ओहाङःसै उनम्‍ह्‌कोः स्‍याङ्‌ह्‌लो न्‍याम् थोङ्ओहाङः येसु मन्‍दीर्‌ताङ् द्यान्‍ह्आ। ओहाङः द्यान्‍ह्आक्‌तीको ओउःकःताङ् नाःतो मान्‍तालम् फेरी हुम्‌लाङ् वाङ्आकाय्। ओउःमयः वाङ्आक्‌तीको येसुइ मन्‍दीर्‌हाङः च्‍युङःती स्‍यान्आथास। 3ओहाङःसै एत स्‍यान्‌तोक्‌हाङः ऐन् स्‍यान्ओमयःमा फरीसीलम्इमा यात्‌चाक् ल्‍हास्‍या जाङ्‌ह्‌ती मुओ मोमःचोः वानःती सबैकोः मीक्‌हाङः चीङ्‌ताक्आथै। 4“लौ गुरुय इ मोमःचोःकायः दोङ् ल्‍हास्‍या जाङ्‌ह्‌ती वाह्ओ च्‍यवःती चुम्आलाङःसु। 5ङीकोः मोसाइ बयःओ ऐन्‌हाङः ‘ल्‍हास्‍या जाङ्‌ह्‌ती वाह्ओमयःकायः बाङ्इ थोःती सात्‌सा’ त लेखती मुनाः। लौ नाङ्‌खेइ गततेः तोतेःनौ ती इकायः द्याह् बाङ्इ सात्‌सा स्‍याव्‌नाःया स्‍याव्‌लया एत तोताङी दा” त दाय्‍ह्‌ती येसुकायः व्‍हत्आकानी। 6व्‍हत्आक्‌तीको “ओउःइ ‘सात्‌लाम्’ त दाय्‍ह्‌याकायः ओउःकायः गाल्‌तुम्‌ती नोःसा खाय्‌नाङःसु” त म्‍हर्‌इतो येसुइ खुङःती क्रुत्‌कोः ब्रय्‍ह्इ साःकायः लेखती मुआ। 7ओहाङःसैको ओउःमयःइ व्‍हत्‌धै मुती झ्‍यान्‍ते येसु ल्‍हेःती “लौ नीङ्‌कःहाङः सुखेतेः गलमा रेव्ओ काम् जाङ्‌ह्‌मालो मुतेःनै ओउःइलेः इ मोमःचोःकायः ङ्‌हा बाङ् आप्‌पौ” त दाय्‍ह्‌ती येसुइ तोआथास। 8इत तोआक्‌ती फेरीलेः खुङःती साःहाङः लेखआकान्। 9ओहाङःसैको ओउःकोः कुरा सायःती येसु खुङःती मुतोक्‌हाङः ओउः गाल्‌तुम्‌ती नोःलाङ् वाङ्ओलम् स्‍योत्‌ताङ् स्‍योत्‌ताङ् पाय्‍ह्आकाय् ङ्‌हासै पुःलम् लोन्‍ते हौलम् आल्‌ती सबै पाय्‍ह्आकाय्। पाय्‍ह्आक्‌तीको येसुमा ओउः मोमःचोःमा नीस्‌चाक् ह मुआकाच। 10फेरी ल्‍हेःती योती “लौ हौद्याङ्‌य नाङ्‌कायः गाल्‌तुम्‌लाङ् वाङ्ओलम् द्याह् गाःताङ् मुनै। नाङ्‌कायः सुइमा तोती मुइली यादो” त दाय्‍ह्‌ती येसु दाय्‍ह्आ। 11“माः रैस सुमा मुइली” त दाय्‍ह्‌ती ओउः मोमःचोः त्‍याङ्आ। “लौ उया ङाइमा गाल्‌तुम्‌ती तोनाङ्‌ल। लौ पाय्‍ह्अ। पाय्‍ह्आक्‌तीको रेव्ओ काम् फेरी जाङ्‌ह्‌लाम्” त दाय्‍ह्‌ती येसुइ तोती ल्‍होक्आथै।
12ओहाङःसैको येसुइ फेरी मन्‍दीर्‌हाङः हुम्ओ मान्‍तालम्‌कायः स्‍यान्‌ती तोआथास “लौ इ ल्‍हाव्‍ह्‌दैबाङ् थोङ्‌ताक्ओपाय् ङा लेःआः बा। सुसु ङाकुस् वाह्‌नै ओउःलेः च्‍याक्ओहाङः गलमा वाह्इली थोङ्ओहाङः रौ जीङः दोःती वाह्‌नै” त दाय्‍ह्‌ती येसु दाय्‍ह्आ। 13“लौ नाङ्‌जा लयःकायः तोतेःनाःस। मान्‍ताकोः लयःकायः तोओ कुराखे दोङ्‌सीःओ कुरा खेःबाय्‌ल सायःसा परल बा” त दाय्‍ह्‌ती ओउः फरीसीलम्इ तोआथै। 14“लयःकायः तोसापाय् तोङसतो ङाइ तोओपाय् दोङ्‌सी लेःआः बा दोह् हायःती दाय्‍ह्‌सा ‘ङापाय् गाःहाङःसै वाङ्ओआः ङ गाःताङ् आल्‌साआः ङ’ त ङाखेइ लयः चीःनाङःस नीङ्‌खेइ ङाकायः ‘गाःहाङःसै वाङ्ओआः गाःताङ् आल्‌साआः’ त चीःतेःनीली। 15फेरी नीङ्‌खेइ व्‍हाय्‌मालो ल्‍हाव्‍ह्‌दैबाङ्‌कोः मान्‍तालो लेखा अरुकायः तय्‌छनःती योतेःनानी ङाखे सुकायःमा तय्‌छनःती योङल। 16ओउःत हायःङल ङा तय्‌छनःती योसा परनाः त खेःया ङाइ पेतोलेः हायःनाङः बा दोह् हायःती दाय्‍ह्‌सा ङापाय् लयः झुङ्आले तय्‌छनःती योओ काम् जाङ्‌ह्ओ खेःङल ङाकायः ल्‍होक्ओ आपाकुस् ओउः काम् जाङ्‌ह्‌धै मुनाङः। 17ओहाङःसै नीङ्‌कोः ऐन्‌हाङःपाय् ‘यात्‌ज्‍योः कुराकायः नीस्‌चाक्इ ब्राङ्‌ती नोःनाः त खेःया ओउः कुरा सायःसा स्‍याव्‌नाः’ त लेखती मुनाः। 18ङाइमा लयःकायः तोओलेः मुनाङः ङाकायः ल्‍होक्ओ आपाइमा ङाकायः पाःती तोओ लेःआः खेःनाः बा” त दाय्‍ह्‌ती येसु त्‍याङ्आ। 19ओउःत सायःती “लौ नाङ्‌कोः आपा गाःताङ्” त दाय्‍ह्‌ती येसुकायः व्‍हत्‌थातो “नीङ्इपाय् ङाकायःमा तय्‍ह्‌तेःनाङ्‌सल ङाकोः आपाकायःमा तय्‍ह्‌तेःनीली। ङाकायः तय्‍ह्‌तेःचानाङ्‌स त खेःया ङाकोः आपाकायःमा तय्‍ह्‌तेःचानी खेःतो” त येसुइ दाय्‍ह्‌ती तोआथास। 20एत तोओ कुरा येसुइ मन्‍दीर्‌कोः पैसा ल्‍हाती कासा कोथाहाङः स्‍यान्‌थासतो ओउःकोः बेलाहाङः वाङ्‌धाङ्आक्‌ल त झ्‍यान्‍ते सुइमा ओउःकायः चुम्‌नीली। 21ओहाङःसैको “लौ ङा इसै आल्‌नाङः। आल्आक्‌तीको नीङ्इ ङाकायः बोङःतेःनाङ्‌सतो लयःकोः रेव्ओ काम् क्‍युम्‍ह्‌माःत सीतेःनै ओउःत झ्‍यान्‍ते ङा आल्ओहाङः नीङ्‌खे वाङ्‌सा दोःतेःइली” त दाय्‍ह्‌तो येसुइ तोआकान्। 22“लौ ओउःइपाय् दोह् हायःती ‘ङा आल्ओहाङः नीङ्‌खे आल्‌सा दोःतेःइली’ त तोनाःतय्‍ही ती ओउःपाय् लयः सात्‌सा बोङःनाःस यादो” त दाय्‍ह्‌ती ओउः यहुदीलम् लयःकुस् नोःकाय्आकाय्। 23“लौ नीङ्‌खेपाय् कामःसैकोः लेःतेःइ ङाखे त्‍यावःअसैकोः लेःआः ङ। नीङ्‌खे इ ल्‍हाव्‍ह्‌दैबाङ्‌कोः लेःतेःइ ङाखेपाय् लाङ्‌काकोः लेःआः ङ। 24ओउःत झ्‍यान्‍ते ‘नीङ्‌पाय् रेव्ओ काम् क्‍युम्‍ह्‌माःत सीतेःचै’ त दाय्‍ह्‌ती तोनेःआलाङ्‌स। ङाइ लयःकायःपाय् ‘ङापाय् ओउः लेःआः ङ’ त तोनाङ्‌स ओउः ङाइ तोओ कुरा नीङ्इ ङ्‌हाम्‌तेःनीली ओउःत झ्‍यान्‍ते नीङ् रेव्ओ क्‍युम्‍ह्‌माःत सीतेःचै” त दाय्‍ह्‌ती येसु दाय्‍ह्‌तो 25“लौ नाङ् सुतेः खेःतेःजेःआ” त ओउःमयःइ दाय्‍ह्‌ती व्‍हत्आथै “ङापाय् ‘सुलोआः ङ’ त दाय्‍ह्‌ती ङ्‌हासैलेः तोधै मुङोतो बा। 26नीङ्‌कायः ङाइ नाःतोलेः तोसामा खेःनाङः नाःतोलेः तय्‌छनःती योसामा खेःनाङः। ङाकायः ल्‍होक्ओइपाय् दोङ् कुरा ह तोती बयःलेःनौ। दोह् दोह् कुरा ङाइ ओउःकःसै सायःनाङः ओउः कुरालेः ङाइ सबै ल्‍हाव्‍ह्‌दैबाङ्‌हाङः मुओलम्‌कायः थोल्‍ह्‌ती तोनाङः” त येसुइ दाय्‍ह्‌ती ओउःकायः ल्‍होक्ओ परमेस्‍वर्‌ आपाकोः कुरा तोथासतो 27ओउःपाय् “परमेस्‍वर्‌कायः तोओ कुरा लेःआः” त तय्‍ह्आक्‌नीली। 28ओहाङःसैको “लौ ङा मान्‍ताकोः चोःकायःपाय् नीङ्इ त्‍यावःअ च्‍युन्आक्‌तीको ङाकायःपाय् ‘ओउः लेःआः बा’ त तय्‍ह्‌तेःनाङ्‌स। ङाइ लयःझुङ्आले दोह्‌मा हायःङल। दोह्‌लो ङाकोः आपाइ स्‍यान्‌चाःताङः ओउःलेः ह ङाइ थोल्‍ह्‌ती तोनाङः। 29फेरी ङाकायः ल्‍होक्ओ आपाइ ङाकुस् काम् जाङ्‌ह्‌नाङःचु ङा लयः झुङ्आले जाङ्‌ह्‌सा खेःङल दोह् हायःती दाय्‍ह्‌सा ङाकोः आपा झाक्ओ कुरा ङाइ गलमा जाङ्‌ह्‌नाङः” त दाय्‍ह्‌ती येसुइ स्‍यान्आथास। 30ओहाङःसैको ओउः स्‍यान्‌राय् सायःआक्‌तीको नाःतो मान्‍तालम्इ येसुकायः ङ्‌हाम्आथै।
31ओउः ङ्‌हाम्ओ यहुदीलम्‌कायः “लौ ङाइ स्‍यान्ओ कुराकः नीङ् ग्‍याती जाङ्‌ह्‌तेःनानी त खेःया नीङ्‌पाय् दोङ्‌सीलेः ङाकुस् वाह्ओमयःतेः खेःतेःनै बा 32ओहाङःसै नीङ्इ दोङ् कुरा चीःती फेन्ओलेः स्‍याव्‌तेःनै” त दाय्‍ह्‌ती येसुइ तोथासतो 33“लौ ङीपाय् आब्राहाम्‌कोः प्‍लोमःदाने मोमःदाने खेःनाङी। ङीकायः सुइमा नोकरी जाङ्‌ह्‌ताक्‌ताङीली पानःताङीली। दोह् हायःतीतेः ‘नीङ् फेन्ओ स्‍याव्‌तेःनै’ त तोतेःनाःताङी” त ओउःमयः दाय्‍ह्‌ती व्‍हत्आथै। 34“दोङ्‌सी दाय्‍ह्‌भनाङ् सुसुइ रेव्ओ जाङ्‌ह्‌नानी ओउःलेः रेव्ओकोः नोकरी स्‍याव्‌नै। 35फेरी नोकरीखे कीम्‌कोः मान्‍ताकुस् गलकायःमा मुसा दोःल दोङ् चोःखे ह गलकायःमा मुसा दोःनाः। 36ओउः चोःइलेः नीङ्‌कायः फेन्‌ती दल्‌ताक्‌तेःचै त खेःया नीङ् दोङ्‌सीलेः दल्ओ स्‍याव्‌तेःनै बा। 37नीङ्‌पाय् आब्राहाम्‌कोः प्‍लोमःदाने मोमःदानेतेः खेःतेःनै ओउःत ङाइ चीःलेःआनाङः। ओउःकोः प्‍लोमःदाने खेःसापाय् खेःतेःइतो नीङ्इ ङाकायः सात्‌सा बोङःतेःनानी दोह् हायःती दाय्‍ह्‌सा ङाकोः स्‍यान्‌राय् ल्‍हुङ्‌तुक्‌हाङः गम्‌सा ग्‍यातेःइली। 38दोह् दोह्‌लो ङाइ लयःकोः आपाकुस् मुतोक्‌हाङः च्‍यवःङोतो ओउः कुरालेः ङाखेइ तोनाङः बा। नीङ्‌खेइ लयःकोः आपाइ तोओ कुरालेः जाङ्‌ह्‌तेःनानी” त दाय्‍ह्‌ती येसु दाय्‍ह्आ। 39“ङीकोः आपालम्‌पाय् आब्राहाम्‌कःसै ग्‍ल्‍युङ्‌ह्आकाय्” त दाय्‍ह्‌ती ओउः यहुदीलम् त्‍याङ्आकाय्। “दोङ्‌सीलेः नीङ् आब्राहाम्‌कोः प्‍लोमःदानेतेः खेःचाः। खेःतेःइतो त खेःया आब्राहाम्‌लो लेखालेः नीङ्इमा पेओ काम् जाङ्‌ह्‌तेःचानानी। 40खेःल नीङ्इ जाङ्‌ह्‌तेःनीली। ङाइ दोङ् कुरा स्‍यान्‌ती झ्‍यान्‍ते सात्‌सा बोङःतेःनेःनाङ्‌स बा। ओउः दोङ् कुरापाय् परमेस्‍वर्‌इ चीःताक्आताङः। आब्राहाम्‌खेइ परमेस्‍वर्‌कोः कुरा स्‍यान्ओलम्‌कायः गलमा सात्‌सा बोङःउलु। 41नीङ्‌खेइ लयः आपालो लेखा रेव्ओ जाङ्‌ह्‌सा बोङःतेःनानी बा” त दाय्‍ह्‌ती येसुइ तोआथास। “ङीपाय् ल्‍हास्‍याकोः चोःलम् खेःङीली परमेस्‍वर्‌पाय् ङीकोः यातैज्‍योः आपा लेःआः ङीपाय् ओउःकोः दोङ् चोःलम् लेःआः ङी” त दाय्‍ह्‌ती त्‍याङ्आकाय्। 42“लौ नीङ्‌कोः आपा दोङ्‌सी परमेस्‍वर्‌ लेःआः त खेःया नीङ्इ ङाकायःतेः राप्‌तेःचानानाङ्‌स खेःतेःइतो दोह् हायःती दाय्‍ह्‌सा ङाखे परमेस्‍वर्‌कःसै दाह्‌ती वाङ्ओआः ङ। ङा लयः झाक्‌राय्‌कोः वाङ्ओ खेःङल ङाकायः परमेस्‍वर्‌इलेः ल्‍होक्आताङः बा। 43लौ ङाइ तोओ कुरा नाङ्इ चीःतेःनीली दोह् हायःती दाय्‍ह्‌सा नीङ्इ व्‍हाय्‌तीलेः सायःसा खाय्‌तेःनीली। 44नीङ्‌खे लयः सैतान् आपाकःसै वाङ्‌ती ओउःकोः मोह्‌हाय्ओ काम्‌लम् जाङ्‌ह्‌तेःनानी बा। ओउः सैतान्‌पाय् ङ्‌हाहाङःसै सात्‌रेव् खेःतो। ओउःपाय् दोङ् कुरा गलमा झाक्‌ल ओउःत झ्‍यान्‍ते दोङ् कुरा तोती जुगाङ्‌मा वाह्‌ल। ओउःपाय् माःरेव् ल्‍हुङ्‌तुक् लेःआः बा गलमा माःती तोती वाह्‌नाः। माः रैस ओउःखे माःरेव्‌मयःकोः आपा लेःआः। 45ङाखेइ दोङ् कुरा तोओ लेःआः ओउः त झ्‍यान्‍ते ङाकायः ङ्‌हाम्‌तेःनीली। 46नीङ्‌कःगन सुखेइलोतेः ङाकायःपाय् दोङ् गाल्‌तुम्‌ती नोःसा खाय्‌तेःनानी र ओउःत खेःओ ङाइ तोओ दोङ् कुरा दोह् हायःतीतेः ङ्‌हाम्‌तेःनीली। 47परमेस्‍वर्‌कोः चोःलम्‌खेइ ओउःकोः कुरा सायःनानी नीङ्‌पाय् ओउःकोः चोःलम् खेःतेःइली ओउःत झ्‍यान्‍ते नीङ्‌खेइ ङाइ तोओ कुरापाय् सायःतेःनीली” त दाय्‍ह्‌ती येसुइ तोथासतो
48“लौ ङीइ दोङ्‌सीलेः ‘नाङ्‌पाय् समारीया देस्‌सै वाङ्ओ स्‍यो लेःतेःआः’ त दाय्‍ह्‌ती तोनेःनाङ्‌सतो ‘नाङ्‌कायः लान्इ ब्रःताक्‌तेःआ’ तमा तोनेःनाङ्‌सतो” त दाय्‍ह्‌ती ओउः यहुदीलम्इ तोआथै। 49“खेःल बा। ङापाय् लान्इ ब्रःताक्ओ खेःबाय्‌ङल। ङाखेइ लयःकोः आपाकायः ताङ्‌ह्‌ताक्‌ङोतो नीङ्‌खेइ ङाकायः मीतेःताक्‌तेःनेःनाङ्‌स बा। 50ङा लयःकोः नेह्‌रो ओर्‌ताक्‌सा बोङःङल परमेस्‍वर्‌इलेः ङाकायः ताङ्‌ह्‌ताक्‌सा बोङःनौ। ओउःइमा ङाकोः कुरा तय्‌छनःती सायःनाःताङः। 51दोङ्‌सी दाय्‍ह्‌भनाङ् सुसुइ ङाइ तोओ कुराकः ग्‍याती मुचै ओउःलेः गलमा सीतो स्‍याव्इली” त दाय्‍ह्‌ती येसुइ तोआथास। 52येसुइ ओउःत तोओ सायःआक्‌तीको “लौ द्याह् नाङ्‌कायः ‘लान्इ ब्रःताक्‌तेःआ’ त दोङ्‌सीलेः चीःनेःनाङ्‌सु बा। आब्राहाम्‌मा सीओ लेःआः ओउः परमेस्‍वर्‌कोः कुरा छ्यानःओमयःमा सीओ लेःआः बा। दोह् हायःतीतेः ‘लौ सुसुइ ङाइ तोओ कुराकः ग्‍याती मुचै ओउःलेः गलमा सीतो स्‍याव्इली’ त नाङ्इ तोतेःनौ रैस। 53ङीकोः सीओ तोकानः आब्राहाम्‌सै नाङ् ताङ्‌ह्ओ खेःतेःल। ओउः परमेस्‍वर्‌कोः कुरा छ्यानःओमयःसैमा नाङ् ताङ्‌ह्ओ खेःतेःल ओउःमयःमा सीती मुनै। नाङ् लयःकायः ‘सुखेलो’ ततेः ताःतेःनौ” त दाय्‍ह्‌ती ओउः यहुदीलम्इ व्‍हत्‌थातो 54“लौ ङाइ लयःकायः लुङ्‌ती ताङ्‌ह्‌ताक्‌चाङःस त खेःया ओउःत हायःसापाय् आह्रे लेःआः। ङाकायः ताङ्‌ह्‌ताक्ओपाय् ङाकोः आपा लेःआः। ओउःकायःपाय् ‘लौ ङीकोः परमेस्‍वर्‌ लेःआः’ त दाय्‍ह्‌तेःनै। 55खेःल ओउःकायः नीङ्‌खेइ गलकायःमा तय्‍ह्‌तेःनीली ङाखेइ तय्‍ह्‌नाङः। ओउःकायः ‘ङाइ तय्‍ह्‌ङल’ त ङाइ तोचेःनाङ्‌सतो त खेःया ङापाय् नीङ्‌लो लेखा माःरेव् स्‍याव्‌चाङः खेःतो। ओउःकायः ङाइ तय्‍ह्‌मानाङः ओउःकोः कुरा ग्‍यातीलेः सायःमानाङः। 56दोङ्‌सीलेः नीङ्‌कोः तोकानः आब्राहाम्‌पाय् ङा वाङ्‌सा दीन् योसा झाक्ओ खेःतो। माः रैस ओउः दीन्‌पाय् ओउःइ चोङाय्‌तीलेः च्‍यवःआकान् बा” त येसु दाय्‍ह्‌ती तोथासतो 57“गत हायःती आब्राहाम्‌कायः च्‍यवःतेःचौ। नाङ्‌पाय् पचास् बर्‌स स्‍याव्‌धाङ्‌तेःल” त ओउःमयः त्‍याङ्आकाय् 58“दोङ्‌सी दाय्‍ह्‌भनाङ् आब्राहाम् ओत्‌धाङ्‌माःखाहाङः ङालेः ङ्‌हाकोः खेःनाङः बा” त दाय्‍ह्‌ती येसु दाय्‍ह्आ। 59ओहाङःसै एत सायःआक्‌तीको ओउः यहुदीलम्इ बाङ् रोत्‌ती येसुकायः आप्‌सा बोङःनीतो ओउःमयःकायः ल्‍हेत्‌ती येसु मन्‍दीर्‌सै ग्‍ल्‍युङ्‌ह्‌ती ज्‍याल्आ।

युहना 9
1ओहाङःसैको येसु आल्‌तोक्‌हाङः ओउःइ यात्‌चाक् ओत्ओहाङःसै जुगाङ् मीक् लोक्ओ मान्‍ता च्‍यवःआकान्। 2ओउःकायः च्‍यवःती “लौ गुरुय सुकोः रेव्ओ काम्‌कोः जाङ्‌ह्‌झ्‍याङ्‌कायः इ मान्‍तापाय् जुगाङ् मीक् लोक्ओ स्‍याव्‌ताक्ओ लेःआः। इत स्‍याव्ओ ओउःकोः आमा आपाकोः रेव्‌झ्‍याङ्‌कोःया लयःकोःया” त दाय्‍ह्‌ती ओउःकुस् वाह्ओमयःइ व्‍हत्‌थातो 3“सुकोःमा रेव्‌झ्‍याङ्‌कोः खेःल। आमा आपाकोःमा खेःल लयःकोःमा खेःल। परमेस्‍वर्‌कोः ग्‍वम् छ्यानःसाकायःलेः इ मान्‍ता मीक् लोक्‌तो स्‍याव्ओआः बा। 4ङीइ देङी इ थोङ्‌तो स्‍याव्ओहाङःलेः ङाकायः ल्‍होक्औ परमेस्‍वर्‌कोः काम् जाङ्‌ह्‌सा खेःनाःतय्‍ही। लोने वाङ्‌सा च्‍याक्ओहाङः सुइमा पेओ काम् जाङ्‌ह्‌सा खाय्‌नीली। 5इ ल्‍हाव्‍ह्‌दैबाङ् मुतोक्‌हाङः ङापाय् ओउःकोः थोङ्‌ताक्ओ लेःआः ङ” त दाय्‍ह्‌ती येसु दाय्‍ह्आ। 6ओउःत दाय्‍ह्आक्‌तीको येसुइ साःहाङः द्युर्‌ द्युरःती साःकुस् क्राक्‌ती ओउः मीक् लोक्ओ मान्‍ताकोः मीक्‌हाङः ल्‍यानःआथै। 7ल्‍यानःआक्‌तीको “लौ द्याह् ओउः सीलोम्‌कोः तीःहाङः जेस्‌लाङ् आल्अ दा” त दाय्‍ह्‌ती तोआथै। हेब्रैनी भासाहाङः सीलोम्‌कोः माने “ल्‍होक्ओ लेःआः” त दाय्‍ह्ओ खेःनाः। ओहाङःसै ओउः मान्‍ता आल्‌ती तीःहाङः जेस्आक्‌तीको मीक्इ पेतो च्‍यवःओलेः खेःतो। 8ओउःकोः मीक् पेतो स्‍याक्आक्‌तीको ओउःकायः ङ्‌हा तय्‍ह्ओलम्इमा कीम् द्याङ्‌काय्‌तो मुओलम्इमा “ओउःइ द्याह् च्‍यवःसा खाय्‌नौ” त चीःती “लौ इपाय् ङीकःताङ् ङ्‌हा युङ्‌ती तेओ मान्‍ता लेःआः माःर” त दाय्‍ह्‌ती ग्‍याङ्‌ह्इतो 9यात्‌नीस्‌चाक्‌खे “माःहै ओउः लेःआः रैस” अरुलम्‌खे “खेःल ओउःपाय् खेःबाय्‌ल। ओउःलो लेखा घार्‌ओ मान्‍ता लेःआः ह” त दाय्‍ह्‌ती त्‍याङ्आकाय्। इतलेः अरु मान्‍तालम्‌खे काय्‌काय्‌ती नोःकाय्इतो ओउः मान्‍ताखे “माःहै ङा लेःआः बा” त दाय्‍ह्‌ती लयः त्‍याङ्आ। 10“ओउःत खेःया नाङ्इ द्याह् गत हायःती मीक्इ च्‍यवःसा खाय्‌तेःआकान्” त ओउःमयःइ व्‍हत्‌थातो 11“यात्‌चाक् येसु त तोओलेः ओउःइपाय् बल न्‍यात्ओ साः जाङ्‌ह्‌ती ङाकोः मीक्‌कायः ल्‍यानःती ‘लौ द्याह् ओउः सीलोम् तीःहाङः जेस्‌लाङ् आल्अ’ त तोआताङः। इत तोआक्‌तीको ङा आल्‌ती तीःहाङः जेस्‌ङसतो जेस्‌धार्‌नाहाङः मीक्इ च्‍यवःसा खाय्आलाङः बा” त दाय्‍ह्‌ती ओउः ङ्‌हा मीक् लोक्ओ मान्‍तापाय् त्‍याङ्आ। 12“ओउः मान्‍तापाय् द्याह् गाःताङ् मुनाः” त दाय्‍ह्‌ती व्‍हत्‌ती “चीःङल गाःताङ् आल्आ गाःताङ्” त दाय्‍ह्‌ती ओउः मान्‍ता त्‍याङ्‌लेःआ।
13ओहाङःसैको ओउःकायःपाय् फरीसीकःताङ् लात्‌ती वानःआकानी 14फेरी येसुइ साः न्‍यात्‌ती ओउः मान्‍ताकोः मीक् च्‍यवःताक्‌नम् दीन्‌पाय् यहुदीयाकोः धोओ दीन्‌लेः खेःतो। 15ओहाङःसैको फरीसीकःताङ् वानःआक्‌तीको “नाङ्इ द्याह् गत हायःती च्‍यवःसा खाय्‌तेःनौ” त दाय्‍ह्‌ती ओउः फरीसीइमा व्‍हत्‌थातो “ओउःइ न्‍यात्ओ साःइ ङाकोः मीक् ल्‍यानःआक्‌तीको ङापाय् तीःहाङः जेस्आलाङःस द्याह् मीक्इ च्‍यवःसा खाय्‌नाङः बा” त दाय्‍ह्‌ती त्‍याङ्आ। 16एत सायःआक्‌तीको “लौ ओउः मान्‍तापाय् परमेस्‍वर्‌कोः धोओ दीन् जवउलु ओउःपाय् परमेस्‍वर्‌कःसै खेःल बा” त यात्‌नीस् फरीसीलम्‌खे दाय्‍ह्आकाय् “ओउःत खेःया गत हायःती ओउःलो लेखा रेव्‌तो जाङ्‌ह्ओ मान्‍तापाय् इत ग्‍याङ्‌ह्‌सीःओ काम् जाङ्‌ह्‌सा खाय्‌चौ” त अरु दाय्‍ह्‌ती ओउः फरीसीलम् ब्राङ्‌काय्‌ती नोःकाय्‌सा खाय्‌नीली। 17ओउःत हायःती झ्‍यान्‍ते “लौ नाङ्‌कोः मीक् स्‍याक्‌ताक्ओ मान्‍तापाय् ‘सुखेलो’ त ताःतेःनौ। एत तोताङी दा” त दाय्‍ह्‌ती फेरीलेः ओउःकायः व्‍हत्‌नीतो “ओउःपाय् परमेस्‍वर्‌कोः कुरा छ्यानःओ मान्‍ता लेःआः” त दाय्‍ह्‌ती ओउः मान्‍ता त्‍याङ्आ। 18ओहाङःसैको ओउः यहुदीलम्इ ओउःकायः ङ्‌हाम्‌नीली “ओउःपाय् माःती तोओआः। ङ्‌हासै मीक् लोक्ओ खेःल यादो” त दाय्‍ह्‌ती ओउः मान्‍ताकोः आमा आपाकायः व्‍हत्‌सा थेङा गोत्‌ती वानःआकानी। 19वानःआक्‌तीको “लौ इपाय् नाङ्‌कोः ओत्ओहाङःसै मीक् लोक्ओ चोःलेःया खेःलया। ङ्‌हा मीक् लोक्ओ त खेःया द्याह् गत हायःती च्‍यवःसा खाय्आकान्” त दाय्‍ह्‌ती आमा आपानीस्‌कायः व्‍हत्‌थाचतो 20“माः बाती नीचीकोः चोः लेःआः बा। दोङ्‌सीलेः ओउःपाय् ओत्ओहाङःसै मीक् लोक्ओ लेःआः इतलेः चीःनाङःचु। 21गत हायःती ओउःइ द्याह् च्‍यवःसा खाय्आकान् सुइलो ओउःकायः मीक् स्‍याक्‌ताक्आथै त चीःङुचुलु। लौ ओउःपाय् द्याह् मीओ हौलम् खेःबाय्‌ल ओउःकायःलेः व्‍हत्‌नु दै” त ओउःनीस् दाय्‍ह्‌ती त्‍याङ्आकाच। 22ओउः यहुदीलम्‌कः रैती झ्‍यान्‍ते एतलेः त्‍याङ्आकाच। ङ्‌हालेः ओउः यहुदीलम्इ “सुखेइ येसु त तोओकायः ‘ओउः वाङ्‌सा खेःओ ख्रीस् लेःआः’ त दाय्‍ह्‌ती तोचौ ओउःलेः ङीकोः थनःओ कीम्‌हाङः वाङ्‌ताक्‌लाम्” त दाय्‍ह्‌ती ओउः यहुदीलम्इ हुकुम् बयःआकानी 23ओउःत झ्‍यान्‍ते ओउः मान्‍ताकोः आमा आपानीस् रैती पेतो त्‍याङ्‌सा ग्‍याचल “ओउःकायः व्‍हत्‌नु” त दाय्‍ह्ओ ह त्‍याङ्आकाच। 24ओहाङःसैको ओउः ङ्‌हा मीक् लोक्ओ मान्‍ताकायः फेरी गोत्‌ती वानःआकानी “लौ परमेस्‍वर्‌कायः पेतो लुङ्‌ती ताङ्‌ह्‌ताक्‌तीलेः तोउ दा। ओउः मान्‍तापाय् रेव्ओलेः त चीःनाङःसु” त दाय्‍ह्‌ती तोनीतो 25“ओउः मान्‍तापाय् रेव्ओया रेव्‌मालोया त ङाइ चीःङल। ङा ङ्‌हा मीक् लोक्ओ खेःङोतो द्याह् मीक् च्‍यवःसा खाय्‌नाङः इतलेः चीःनाङः बा” त दाय्‍ह्‌ती त्‍याङ्आ। 26एत त्‍याङ्आक्‌तीको ओउःमयःइ फेरीलेः व्‍हत्आथै “ओउः मान्‍ताइ दोह् हायःआकान् गत हायःती नाङ्‌कोः मीक् स्‍याक्‌तेःताक्आ ती” त दाय्‍ह्‌ती व्‍हत्आकानी। 27“लौ मेस्‌खा तोनेःनाङ्‌सतो ङाइ तोओ कुरा नीङ्इ सायःतेःनाङ्‌सल। दोह् हायःतीतेः फेरी सायःसा म्‍हर्‌तेःनै। ओउःकुस् वाह्ओमयःकुस् नीङ्‌मा त्‍योम्‌सा झाक्‌तेःनै यादो” त दाय्‍ह्‌ती ओउः मान्‍ता त्‍याङ्आ। 28“अहः नाङ्‌खे ओउःकुस् वाह्ओतेःआः ङीखे मोसाकोः कुरा जाङ्‌ह्‌ती वाह्‌नाङी” त ओउःमयः जान्‌ती 29“परमेस्‍वर्‌इ मोसाखेकायः स्‍यान्‌ती तोथातो ओउः मान्‍ताखे गाःसै वाङ्ओ चीःङुसुलु” त दाय्‍ह्‌ती तोआथै। 30“लौ इपाय् ग्‍याङ्‌ह्‌सीःओ रैस। ङाकोः मीक् स्‍याक्‌ताक्‌सा खाय्ओ मान्‍तापाय् ‘गाःसै वाङ्ओ’ त नीङ्‌लो लेखा व्‍हाय्ओलम्इ चीःतेःताङःतेःनीली। 31परमेस्‍वर्‌इपाय् रेव्ओ मान्‍ताखेकोः तेती तोआ सायःसा ग्‍याल त चीःतय्‍ह्‌नीतो सुखेइ परमेस्‍वर्‌कोः काम् झाक्‌तो जाङ्‌ह्‌चौ ओउःकायःलेः परमेस्‍वर्‌इ ग्‍याती सायःनौ। 32इ ल्‍हाव्‍ह्‌दैबाङ् जापीनःती न्‍यास्ओहाङःसै यात्‌चाक्इ अरु ओत्ओहाङःसै मीक् लोक्ओकायः स्‍याक्‌ताक्ओ कुरापाय् दोह्‌मा नाःल बा। 33ओउः मान्‍तापाय् परमेस्‍वर्‌कःसै वाङ्ओ मान्‍ता खेःल त खेःया ओउःइ इलो खेःओ कुरा दोह्‌मा जाङ्‌ह्‌सा खाय्‌मालो खेःतो रैस बा” त दाय्‍ह्‌ती ओउः मान्‍ताइ तोआकान्। 34ओउःत तोती “दोङ्‌सीलेः नाङ्‌पाय् ओत्ओहाङःसै रेव्‌तो स्‍याव्ओतेःआः बा। नाङ्‌खेइ ङीकायः स्‍यान्‌ती तोसा बोङःतेःनौ” त ओउः यहुदीलम्इ ल्‍हुङ् मल्‍ह्‌तो स्‍याव्‌ती दाय्‍ह्‌ती ओउःकायः बाहीरताङ् क्‍लाःती ल्‍होक्आथै।
35ओहाङःसैको ओउःइ स्‍याक्‌ताक्ओ मान्‍ताकायः “ओउः यहुदीलम्इ थनःओ कीम्‌सै ल्‍होक्आथै” त येसुइ सायःती झ्‍यान्‍ते ओउः मान्‍ताकायः बोङःती क्रुस्आथै। क्रुस्आक्‌तीको “लौ नाङ्इ मान्‍ताकोः चोः त तोओकायः ङ्‌हाम्‌तेःनौया ङ्‌हाम्‌तेःउलुया” त दाय्‍ह्‌ती येसुइ व्‍हत्‌थातो 36“ओउःपाय् सुलो प्रभुय तोची दा ओहाङःसै ङाइ ओउःकायः ङ्‌हाम्‌सा खाय्‌नाङः” त दाय्‍ह्‌ती ओउः मान्‍ता त्‍याङ्आ 37“लौ ओउःकायः नाङ्इ च्‍यवःतेःआकान् बा। नाङ्‌कुस् द्याह् नोःकाय्‌धै मुओ चाक्‌पाय् ओउः लेःआः” त दाय्‍ह्‌ती येसु त्‍याङ्आ। 38“लौ प्रभुय ङाइ ङ्‌हाम्‌नेःनाङ् द्याह्” त दाय्‍ह्‌ती येसुकायः स्‍यवआथै। 39“लौ मान्‍ताकायः तय्‌छनःसा थेङा ङा इ ल्‍हाव्‍ह्‌दैबाङ्‌ताङ् वाङ्ओआः ङ ओहाङःसै च्‍यवःसा खाय्‌मालोलम्‌खेकायः च्‍यवःताक्‌सामा च्‍यवःसा खाय्ओखेकायः च्‍यवःताक्‌माःसामा ओउःत हायःसाकायः वाङ्आलाङः” त दाय्‍ह्‌ती येसुइ तोआकान्। 40ओहाङःसैको यात्‌नीस् ओउःकुस् मुओ फरीसीलम्इ इ कुरा सायःती “लौ ङीमा च्‍यवःसा खाय्‌मालो मुनाङी त नाङ्इ तोतेःनाःताङी खेःल र” त दाय्‍ह्‌ती व्‍हत्‌थातो 41“दोङ्‌सीलेः नीङ्‌पाय् च्‍यवःसा खाय्‌मालोलेःतेः खेःतेःइतो त खेःया नीङ्‌कायः न्‍युम्‍ह्‌ताक्‌सा परल। खेःल ‘ङी च्‍यवःसा खाय्‌नाङःसु’ त दाय्‍ह्‌ती मुतेःनै ओउःत खेःया नीङ्‌कायःपाय् न्‍युम्‍ह्‌ताक्‌सा खेःतो” त दाय्‍ह्‌ती येसुइ तोआथास।

युहना 10
1“लौ दोङ्‌सी दाय्‍ह्‌भनाङ् सुसु भेदा मेत्‌छ्याःकोः गोत्‌हाङः दय्‍ह्‌लौसै पोक्‌माःत नुक्‌ती वाह्‌ती अरु घाङ्‌सै पोक्‌चै ओउःखे पेमालो चोर्‌ मान्‍ता लेःआः बा। 2ओउः दोङ् भेदा ह्रामःओ गोथालाखे दोङ् दय्‍ह्‌लौहाङः पोक्‌ती वाङ्‌नाः। 3ओउःकायः अरु ल्‍युङ्‌ह्‌ती मुओलम्इ पोक्‌सा ताक्‌नाःथै। ओहाङःसैको ओउःइ गोत्ओ बेलाहाङः लयःकोः भेदालम्इ ओउःकोः हाव्‌नयः तय्‍ह्‌ती सायःनानी। फेरी भेदाकायः लःलयःकोः मय्‍ङ् पेह्‌ती गोथालाइ ओउःमयःकायः बाहीरताङ् स्‍यालःनौ। 4भेदालम्‌पाय् लःलयःकोः मय्‍ङ् सायःआक्‌तीको ओउः दोङ् गोथालाकायः गुल्‍ह्‌ती बाहीर ग्‍ल्‍युङ्‌ह्‌नै। बाहीर ग्‍ल्‍युङ्‌ह्‌ती वाङ्आक्‌तीको ओउः ङ्‌हा वाह्ओ दोङ् गोथालाकायः ओउःकोः लयःकोः भेदालम्इ गुल्‍ह्‌नाःथै। 5अरु थे मान्‍ताखेकायः ओउः भेदालम् गुल्‍ह्‌सा ग्‍याइली स्‍यो मान्‍ताकोः हाव्‌नयः तय्‍ह्‌माःत झ्‍यान्‍ते ओउःकःसै क्रव्‌नै” त दाय्‍ह्‌ती येसुइ ओउःकुस् मुओलम्‌कायः स्‍यान्‌थासतो 6ओउःमयःइ ओउःकोः स्‍यान्‌राय् चीःसा खाय्‌नीली। 7ओहाङःसैको फेरीलेः येसुइ स्‍यान्‌ती तोआथास “दोङ्‌सी दाय्‍ह्‌भनाङ् ङापाय् भेदाकोः गोत्‌कोः धोकालो लेखा लेःआः ङ। 8ङाकोः ङ्‌हासै वाङ्ओलम् स्‍योलो लेखा खेःइतो ओउःमयःकोः हाव्‌नयःपाय् भेदालम्इ तय्‍ह्‌नीली। 9ङापाय् भेदाकोः गोत्‌कोः दोङ् धोका लेःआः ङ। सुसु ङाकःताङ् वाङ्‌ती पोक्‌चै ओउःलेः दल्‌तो स्‍याव्‌नै। ओउःमयःपाय् पेओ थाव्‌हाङःमा आल्‌सा दोःनै। 10ओउः पेमालो स्‍योखे कुःलाङ् वाङ्‌नाः अरुकायः सात्‌ती ह्र्योङःचानाःथास। ङाखे अरुकायः रौ जीङः दोःताक्‌लाङ् वाङ्आलाङः माः न्‍हाङ्‌तोलेः दोःताक्‌लाङ् वाङ्आलाङः। 11फेरी ङालेः पेओ गोथालालो लेखा खेःनाङः। पेओ ह्रामःओ गोथालाखे लयःकोः भेदालम् दल्‌ताक्‌साकायः लयः सीसा ग्‍यालेःनाः 12बुरु भेदा ह्रामःओ नोकरीखे अरु मान्‍ताकोः भेदालम् ह्रामःनौ। जाः वाङ्ओ बेलाहाङः ओउःपाय् क्रव्‌नाः बा। क्रव्आक्‌तीको ओउः जाःइ सबै भेदालम् रुनःधनाःथास यात्‌नीस्‌कायः ज्‍युह्र्ती सात्‌नौ। 13ओउः भेदालम्‌पाय् लयःकोःलेः खेःल त झ्‍यान्‍ते ओउः ह्रामःओ नोकरी भेदालम्‌कायः दोह्‌मा म्‍हर्‌माःत लयः दल्‌साकायः ह क्रव्‌लेःनाः। 14-15लौ ङापाय् पेओ ह्रामःसा गोथालालो लेखा खेःनाङः बा। ङाइ आपाकायः तय्‍ह्‌लेःनाङः ओउःइ ङाकायः तय्‍ह्‌नाःताङः। ओउःलो लेखालेः ङाइ लयःकोःमयः तय्‍ह्‌नाङःसु ओउःमयःइ ङाकायःमा तय्‍ह्‌नाःताङः। फेरी ङाइ लयःकोःमयःकायः दल्‌ताक्‌सा थेङा सीसामा ग्‍यालेःनाङः। 16ओहाङःसै ङाकोःपाय् अरु मान्‍ता मुनै इ ङाकुस् मुओलम् झुङ्आले खेःल ओउः अरु मान्‍तालम्‌कायःमा ङा वानःसा खेःनाङः। ओउःमयःइ ङाकोः हाव्‌नयः सायःती वाङ्‌ती इमयःकुस् ल्‍याव्‍ह्‌ती यातैज्‍योः स्‍याव्‌नै। ङाझुङ् ह सबैकोः ह्रामःओ चाक्‌लेः स्‍याव्‌नाङः। 17ङाकोः आपाइ ङाकायः राप्‌नाःताङः दोह् हायःती दाय्‍ह्‌सा ङा सीसा ग्‍यानाङः सीआक्‌तीको ङा उह्‌ती च्‍योक्‌लेःनाङः। 18सुखेइमा ङाकायः सीताक्‌सा खाय्‌ताङःल ङा लयः झाक्ओ सीतोलेः स्‍याव्‌नाङः ह ङा लयः झाक्‌ती च्‍योक्‌नाङः। इत हायःसाकोः ग्‍वम्‌पाय् ङाकोः आपाइ तोती बयःआताङः बा” त दाय्‍ह्‌ती येसुइ तोआथास। 19एत तोआक्‌तीको ओउः यहुदीलम्इ फेरीलेः काय्‌काय्‌ती नोःकाय्आकाय् 20“लौ ओउःकायःपाय् लान्इ आन ब्रःताक्ओ लेःआः बा। ओउःकोः कुरा सायःलाम्” त यात्‌नीस् दाय्‍ह्‌ती 21“खेःल इपाय् ब्रःओ मान्‍ताइ तोओ कुरा खेःल। लान्इ ब्रःताक्ओ मान्‍तापाय् गत हायःती मीक् लोक्ओ स्‍याक्‌ताक्‌सा खाय्‌चौ र” त अरुइ दाय्‍ह्‌ती नोःआकाय्। 22ओहाङःसैको यरुसालेम्‌हाङः ओउः यहुदीकोः मन्‍दीर्‌कोः छय्‍ङ्‌ताक्ओ त तोओ दीन् पुत्आ य्‍हुदा बेलाहाङः खेःतो। 23येसुपाय् मन्‍दीर्‌हाङः सुलेमान् राजाइ जाङ्‌ह्ओ आङ्‌गन्‌हाङः वाह्ओ खेःतो। 24ओहाङः वाह्‌तोक्‌हाङः यहुदीलम् ओउःकःताङ् हुम्‌लाङ् वाङ्‌ती “लौ नाङ्इ गलखा पेतो तोतेःनाःताङी दोङ्‌सीलेः नाङ् परमेस्‍वर्‌कोः वाङ्‌सा खेःओ ख्रीस्‌लेःतेः खेःतेःनाःया खेःतेःलया तोताङी दै” त दाय्‍ह्‌ती व्‍हत्‌थातो 25“लौ ङाइ तोबाय्‌नाङ्‌सतो ङाकायः ङ्‌हाम्‌तेःनाङ्‌सल। ङाइ आपाकायः जाङ्‌ह्ओ काम्‌लम्‌पाय् ओउःलेः च्‍यवःती ङा ‘सुलो’ त चीःसा खाय्‌तेःनीतो 26नीङ्‌पाय् ङाकोः मान्‍तालेः खेःतेःइली ओउःत झ्‍यान्‍ते ङाइ तोओ कुरापाय् सायःसा ग्‍यातेःइली। 27ङाकोःमयःइ भेदालो लेखालेः ङाकोः हाव्‌नयः सायःती ङाकायः गुल्‍ह्‌नाःताङः। 28ओउःमयःकायः ङाइ रौ जीङः दोःताक्‌नाङःसु। दोःआक्‌तीको ओउःमयःपाय् गलमा वाय्‌तो स्‍याव्इली ओउःमयःकायः सुखेइमा ङाकःसै लाती आलःसा खाय्‌नीली। 29ङाकोः आपापाय् सबैसै ताङ्‌ह्‌लेःनै बा। ओउःइ ङाकायः बयःओलम्‌पाय् सुइमा ङाकोः आपाकःसै लासा खाय्‌नीली। 30ओहाङःसै ङामा ङाकोः आपामा यातैज्‍योः लेःआः ङच” त दाय्‍ह्‌ती येसुइ तोआथास। 31एत तोआक्‌तीको ओउः यहुदीलम्इ बाङ् रोत्‌ती ओउःकायः आप्‌ती सात्‌सा बोङःनीतो 32“लौ ङाकोः आपाइ बयःओ पेओ काम्‌लम्‌पाय् ङाइ नाःतो जाङ्‌ह्आलाङः। ओउः काम्‌कोःपाय् गाव्‌खेकायःतेः बाङ्इ आप्‌सातेः बोङःनानाङ्‌स” त दाय्‍ह्‌ती येसुइ व्‍हत्‌ती 33“पेओ काम् जाङ्‌ह्‌साकायः आप्‌नेःनाङ्‌सुलु। नाङ्इ परमेस्‍वर्‌कायः रेव्‌तोलेः तोओकायः नाङ्‌पाय् मान्‍ता झुङ्आले ‘ङागार्‌ परमेस्‍वर्‌गार्‌’ ततेः ताःती तोतेःनौ ओउःत हायःओकायः बाङ्इ सात्‌सा बोङःनेःनाङ्‌सु” त दाय्‍ह्‌ती त्‍याङ्आकाय्। 34“लौ नाङ्‌कोः आखरःहाङःपाय् ‘लौ नीङ्‌पाय् देवालम् लेःतेःइ’ त दाय्‍ह्‌ती परमेस्‍वर्‌इ तय्‌छनःती योसा मान्‍ताकायः तोआथास। 35एतलेः नीङ्‌कोः आखरःहाङः लेखती मुलेःनाः फेरी ओउः आखरःकोः कुरा दोङ् कुरा लेःआः बा। ओउः मान्‍तालम्‌खेकायः ‘लौ नीङ्‌पाय् देवालम् लेःतेःइ’ त परमेस्‍वर्‌इ दाय्‍ह्‌ती तोआकान् माःर। 36ओउःत झ्‍यान्‍ते ङा परमेस्‍वर्‌इ छ्युङ्‌ह्‌ती ल्‍हाव्‍ह्‌दैबाङ्‌ताङ् ल्‍होक्ओ चाक्‌खेइ ‘ङा परमेस्‍वर्‌कोः चोः लेःआः ङ’ त तोसा स्‍याव्‌नाङः। ङाकायःपाय् दोह् हायःतीतेः ‘लौ नाङ्इ परमेस्‍वर्‌कायः रेव्‌तोलेः तोतेःनौ’ त नीङ्इ गाल्‌तुम्‌ती नोःनेःनाङ्‌स। 37ङाकोः आपाइ बयःओ काम् ङाइ जाङ्‌ह्‌ङल त खेःया ङाकायः ङ्‌हाम्‌सा परल। 38खेःल ङाइ ओउःकोः काम् पेतो जाङ्‌ह्‌नाङः त खेःया ङाकोः नोःराय्‌खेकायः खेःल ङाइ जाङ्‌ह्ओ काम्‌खे च्‍यवःओकायः ङ्‌हाम्‌नु दा। ओहाङःसैको ङा ङाकोः आपाकुस् ब्राङ्‌नाङः ओउःमा ङाकुस्‌लेः ब्राङ्‌नाः। ओउःत नीङ्इ चीःआक्‌तीको ङ्‌हाम्‌तेःनानी” त दाय्‍ह्‌ती येसुइ तोआथास। 39ओउःत तोआक्‌तीको ओउःमयःइ फेरी चुम्‌सा बोङःनीतो ओउःमयःकः बेत्‌ती 40ओउः योर्‌दन् खोलाकोः उःसै त्‍यात्‌ती युहनाइ ङ्‌हासै बाप्‍तीस्‍मा बयःओ थाव्‌हाङः दाह्‌ती वाङ्आकाय्। ओउःहाङः मुतोक्‌हाङः 41नाःतोलम् येसुकःताङ् वाङ्‌ती “लौ ओउः बाप्‍तीस्‍मा बयःओ युहनापाय् लयःइलेः ग्‍याङ्‌ह्‌राय् दोह्‌मा जाङ्‌ह्उलु। जाङ्‌ह्‌सापाय् जाङ्‌ह्उलु दोह् दोह् ओउःइ इ येसुकोः कुरा तोआकान् ओउःलेः सबै दोङ् कुरा स्‍याव्ओ खेःतो” त दाय्‍ह्‌ती नोःकाय्‌ती 42ओहाङःपाय् नाःतोलम्इ येसुकायः ङ्‌हाम्आकानी।

युहना 11
1ओहाङःसैको बेथानी त तोओ गाव्‌हाङः यात्‌चाक् लाजरुस् त तोओ जीक्‌ती मुओलेः खेःतो। ओउःकोः हौद्याङ्‌नीस् मरीयम् त तोओमा मार्‌था त तोओमा बेथानी गाव्‌हाङः याक्ओ खेःचतो। 2ओउः मरीयम्‌खेइ यात् बेलाहाङः येसुकायः पेओ सातीइ ल्‍यानःती ओउःकोः लयःकोः म्‍याङ्इ येसुकोः दोम् थ्‍युर्‌आकान्। 3ओउःनीस्‌कोः पुःपाय् क्‍लोःतोलेः जीक्‌नाः त खेःया येसुकः काःहाल्‌लाङ् ल्‍होक्आथै “लौ प्रभुय नाङ्इ राप्ओ मान्‍तापाय् आन क्‍लोःतो जीक्आ” त दाय्‍ह्‌ती कुरा ल्‍होक्आथै। 4ओहाङःसैको इ कुरा सायःती “लौ लाजरुस् जीक्‌सापाय् जीक्‌तीलेः मुनाः ओउः जीक्ओपाय् जुगाङ् सीओ खाल् खेःल। परमेस्‍वर्‌इ लयःकोः चोःकोः ग्‍वम् सबैकायः छ्यानःती ओउःकायः ताङ्‌ह्‌ताक्‌साकायः ओउः द्याह् जीक्‌ती मुनाः” त दाय्‍ह्‌ती येसुइ तोआकान्। 5येसुइ मार्‌थामा ओउःकोः हौद्याङ् मरीयम्‌मा ओउःनीस्‌कोः पुः लाजरुस्‌कायःमा आन राप्‌थासतो 6“लाजरुस् आन जीक्‌नाः” त सायःआक्‌तीको नीस् दीन्‌च्‍युक्‌कायः लयःकोः मुओहाङः येसु आल्‌मामाःत मुआकाय्। 7ओहाङःसैको नीस् दीन् पुत्आक्‌तीको “लौ द्याह् फेरी यहुदीयाताङ् द्यान्‍ह्‌ती आल्इ” त दाय्‍ह्‌ती लयःकुस् वाह्ओमयःकायः तोती 8“अ गुरुय ओउः यहुदीलम्इ योह् चीत्‌नम् नाङ्‌कायः बाङ् आप्‌ती सात्‌सा बोङःनीतो द्याह् द्यान्‍ह्‌तीतेः आल्‌नाःया” त दाय्‍ह्‌ती व्‍हत्इतो 9“लौ न्‍हीदीङ्‌हाङः काम् पेतो जाङ्‌ह्‌साकायः बार घन्‍ता मुनाः। फेरी न्‍हीदीङ्‌हाङः ल्‍हाव्‍ह्‌दैबाङ्‌हाङः न्‍याम् थोङ्‌ताक्‌ती सबै च्‍यवःताक्‌ती झ्‍यान्‍ते न्‍हीदीङ्‌हाङः वाह्ओ चाक् तोन्इली। 10ओउः मान्‍तापाय् याःदीङ्‌हाङः वाह्‌चै त खेःया लयःकःहाङः थोङ्ओ नाःमाःत झ्‍यान्‍ते ओउःपाय् तोन्आनै” त दाय्‍ह्‌ती येसु दाय्‍ह्आ। 11“लौ ङीकोः साथी लाजरुस् त तोओपाय् एनःतीलेः मुनाः ङा ओउःकायः म्र्याताक्‌लाङ् आल्‌नाङः” तमा येसु दाय्‍ह्‌ती तोथासतो 12“लौ प्रभु ओउः एनःनाः त खेःया ओउःपाय् स्‍याक्आनाः” त दाय्‍ह्‌ती ओउःकुस् वाह्ओमयःखे दाय्‍ह्आकाय् 13दोह् हायःती दाय्‍ह्‌सा ओउःमयःखेइ “लाजरुस् न्‍यास्‌ती एनःताङःनाः” त ताःनीतो येसुखेइ सीओ कुरा तोती मुओ खेःतो 14ओउःत खेःओ “लौ लाजरुस्‌पाय् सीओ लेःआः” त दाय्‍ह्‌ती येसुइ दोङ्‌ह्‌ती छ्यान्‍ह्आथास 15“ङा लाजरुस्‌कुस् मुमाःत झ्‍यान्‍ते ओउःपाय् सीआ। सीसापाय् सीओ लेःआः नीङ्इ लोन्‍ते स्‍याव्‌सा ग्‍याङ्‌ह्‌राय् च्‍यवःआक्‌तीको नीङ्इ पेतोलेः ङ्‌हाम्‌तेःनानी ओउःत झ्‍यान्‍ते ङा चोङाय्‌लेःती मुनाङः। लौ द्याह् आल्इ उया” त दाय्‍ह्‌ती येसुइ ओउःमयःकायः तोआथास। 16“लौ उया ङीमा येसुकुस् आल्इ ओहाङःसै ङीमा ओउःकुस् सीपाःतय्‍ही” त दाय्‍ह्‌ती दीदीमुस् त हाल् मय्‍ङ्ओ थोमाइ अरुकायः तोआथास।
17ओहाङःसैको इत नोःआक्‌तीको येसु बेथानी गाव्‌ताङ् आल्आकाय्। आल्‌ती बेथानी गाव्‌ताङ् दाह्‌तोक्‌हाङः “लौ लाजरुस् द्याह् चार्‌ दीन्‌कायः पाम्‍ह्‌ती स्‍याव्आ” त दाय्‍ह्‌ती तोआकानी 18ओउः बेथानी गाव्‌पाय् यरुसालेम्‌सै सुम् कीलोमीतर्‌ मुओ खेःतो द्याङ्‌तो लेःआः। 19फेरी यरुसालेम्‌सै नाःतो यहुदीलम् मार्‌था मरीयम् नीस् नाःचाःकायः ल्‍हुङ् द्युमःताक्‌सा तोलाङ् वाङ्आकाय्। 20ओहाङःसैको “येसु वाङ्‌नाः” त दाय्‍ह्ओ सायःआक्‌तीको मार्‌थाखे ओउःकायः क्रुस्‌लाङ् वाङ्‌तो मरीयम्‌खे कीम्‌खा मुआ। 21ओहाङःसै येसुकायः क्रुस्‌ती “लौ प्रभुय नाङ् ङ्‌हा दाह्आ त खेःया ङाकोः पुःपाय् सीजेःआक्‌ल खेःतो 22तय्‌मा ‘दोह्‌लोतेः नाङ् द्याह् तेतेःनाः ओउःलेः परमेस्‍वर्‌इ बयःतेःनाः बा’ त ङाइ चीःनाङः” त दाय्‍ह्‌ती येसुकायः तोआकान्। 23“लौ दोङ्‌सीलेः नाङ्‌कोः पुः लोने उह्‌ती च्‍योक्‌नाः” त दाय्‍ह्‌ती येसु दाय्‍ह्आ। 24“ओउः सबै सीओलम्‌कायः च्‍योक्‌ताक्‌सा दीन् ओउःमा च्‍योक्‌नाः त ङाइ चीःनाङः” त दाय्‍ह्‌ती मार्‌थाइ तोआथै। 25“लौ सीओकायः च्‍योक्‌ताक्‌सामा रौ जीङः बयःसामा ङालेः खेःनाङः बा। 26सुसुइ ङाकायः ङ्‌हाम्‌ती रौ जीङः दोःनै ओउःपाय् दोङ् सीतोलेः स्‍याव्इली। लौ इ ङाइ तोओ कुरा ङ्‌हाम्‌तेःनौया ङ्‌हाम्‌तेःउलुया” त दाय्‍ह्‌ती येसुइ मार्‌थाकायः व्‍हत्‌थातो 27“माः रैस ओउः ल्‍हाव्‍ह्‌दैबाङ्‌हाङः वाङ्‌सा खेःओ ख्रीस्‌लेः परमेस्‍वर्‌कोः चोः लेःतेःआः इत तोओ ङाइ ङ्‌हाम्‌नेःनाङ्” त दाय्‍ह्‌ती मार्‌था त्‍याङ्आ।

28त्‍याङ्आक्‌तीको कीम्‌ताङ् पाय्‍ह्‌ती ओउःकोः मरीयम् हौद्याङ्‌कायः अरुइ चीःमाःत गोत्आकान्। “लौ हौय नीचीकोः गुरु इहाङः दाह्‌ती नाङ्‌कायः गोत्‌तेःनाः” त दाय्‍ह्‌ती तोआथै। 29ओहाङःसै ओउःकोः नाःइ तोओपाय् सायःती मरीयम्‌पाय् रेन्‍ह्‌तोलेः चीङ्‌ती येसुकःताङ् आल्आ। 30आल्‌तोक्‌हाङः येसुपाय् बेथानी गाव्‌ताङ् दाह्‌धाङ्‌ल मार्‌थाइ क्रुस्ओहाङः न्‍यास्‌ती मुओ खेःतो। 31ओहाङःसैको ओउः मरीयम्‌कुस् मुओ यहुदीलम्इ ओउःपाय् रेन्‍ह्‌तोलेः बाहीर ग्‍ल्‍युङ्‌ह्‌ती आल्ओ च्‍यवःती ओउःकायः गुल्‍ह्आथै “लौ मरीयम्‌पाय् पुःकोः तेस्‌ताङ् क्रेस्‌लाङ् आल्‌नाः” त ताःती दाय्‍ह्‌ती गुल्‍ह्आथै। 32ओहाङःसैको मरीयम्‌खे आल्‌ती येसुकःताङ् दाह्‌ती च्‍यवःआक्‌तीको ओउःकायः स्‍यवआकान् “लौ प्रभुय नाङ् ङ्‌हा ङीकुस् मुयाकायः ङाकोः पुः सीआक्‌ल खेःतो” त दाय्‍ह्‌ती तोआथै 33येसुइ मरीयम्‌मा ओउःकोः साथीलम्‌मा र्‍याःओ च्‍यवःती ल्‍हुङ्‌हाङः आन लीह्आकान्। 34“लौ ओउःकायः गाःहाङःतेः पाम्‍ह्‌ती गम्‌तेःआकानी” त दाय्‍ह्‌ती येसुइ व्‍हत्आथास। “लौ प्रभुय योलाङ् वाङ्अ दै” त दाय्‍ह्‌ती त्‍याङ्आकाय् 35येसुमा र्‍याःओ। 36येसु र्‍याःओ च्‍यवःती “लौ योउ दा। ओउःकायः गुच्‍युक् राप्उतो” त दाय्‍ह्‌ती नोःकाय्इतो “ओउःइपाय् मीक् लोक्ओखेकायः स्‍याक्‌ताक्ओआः ओउःत झ्‍यान्‍ते लाजरुस्‌कायःमा सेलः स्‍याव्‌ताक्‌सा खाय्ओ खेःतो यादो” त यात्‌नीस् दाय्‍ह्‌ती दाय्‍ह्आकाय्। 37येसुलेः फेरी आन ल्‍हुङ् लीह्‌तो ङान्‍ह्‌ती लाजरुस्‌कोः तेस्‌ताङ् वाङ्आ।
38ओउः तेस्‌पाय् चेनःबाङ्‌हाङः मुओ धाङ्‌लेः खेःतो यात्‌ज्‍योः अरु बाङ्इ बोमःओ खेःतो। 39ओहाङःसैको येसु वाङ्‌ती “लौ इ बाङ् अक्‌ती ल्‍होक्‌नु दा” त दाय्‍ह्‌ती तोउतो “अ प्रभुय ओउःपाय् चार्‌ दीन्‌कायःच्‍युक् पाम्‍ह्‌ती स्‍याव्आ। द्याह् सय्‍ङ्‌ती वाय्आ बा” त दाय्‍ह्‌ती मार्‌थाइ तोआथै। 40“लौ नाङ्इ ङ्‌हाम्‌तेःनाःची त खेःया परमेस्‍वर्‌कोः ताङ्‌ह्ओ ग्‍वम्‌तेः च्‍यवःतेःनौ त ङाइ ङ्‌हा तोनेःआलाङ्” त येसुइ दाय्‍ह्‌ती तोआक्‌तीको 41ओउः बोमःती गम्ओ बाङ् ल्‍होक्आकानी। बाङ् ल्‍होक्आक्‌तीको येसु लाङ्‌काताङ् त्‍याव्‌ती “लौ आपाय ङाइ तेती तोओ कुरा नाङ्इ ग्‍याती सायःतेःनाःची ओउःत खेःओ ङाइ ‘च्‍युता’ त तोनेःनाङ्। 42नाङ्इ गलकायःमातेः सायःतेःआची। इ ङाकुस् मुओलम्‌कायः नाङ् परमेस्‍वर्‌ आपाकःसै ‘वाङ्ओआः’ त ङ्‌हाम्‌ताक्‌साकायः तोनेःनाङ् द्याह्” त येसुइ परमेस्‍वर्‌कायः दाय्‍ह्‌ती नोःती 43“अ लाजरुस्‌य ग्‍ल्‍युङ्‌ह्अ दा” त सोतो दाय्‍ह्‌ती येसुइ गोत्उतो 44ओउः ङ्‌हा सीओ मान्‍तापाय् पाम्‍ह्‌सा नाय्इ आङ्‌मा खेन्‌मा जुदा पोतोलःती लावतीलेः ग्‍ल्‍युङ्‌ह्‌ती वाङ्आ। “लौ ओउःकायः फास्‌ती फेन्‌नु दा” त येसुइ दाय्‍ह्‌ती तोआथास।
45ओहाङःसैको येसुइ जाङ्‌ह्ओ कुरा च्‍यवःआक्‌तीको नाःतो ओउः मरीयम्‌कुस् वाङ्ओ यहुदीलम्इ येसुकायः ङ्‌हाम्आकानी। येसुकायः कोय्‌खेइ ङ्‌हाम्‌नीतो 46अरुखेइ आल्‌ती फरीसीकःताङ् वाङ्‌ती “लौ ओउः येसुइ इतलेः हायःआकान्” त ल्‍हाक्‌ती छ्यान्‍ह्आकानी। 47ओहाङःसैको ओउः ल्‍हाक्‌ती छ्यान्‍ह्ओ कुरा सायःआक्‌तीको ओउः ताङ्‌ह्ओ पुरोहीत्‌लम्‌मा फरीसीलम्‌मा लयःमयः हुम्‌काय्‌ती “लौ द्याह् ङीइ दोह् हायःचाङःसु। ओउः येसु त तोओइ नाःतो ग्‍याङ्‌ह्‌राय् जाङ्‌ह्‌ताङःनौ। 48ओउःकायः ङी दोह्‌मा हायःङुसुलु त खेःया सबै मान्‍तालम्इ ओउःकायः ङ्‌हाम्‌चानी। ओहाङःसैको ओउः रोमी त तोओ मान्‍तालम् ङीकः ल्‍हुङ् मल्‍ह्‌ती ङीकोः मन्‍दीर्‌मा ङी सबैकायःमा ह्र्योङःती वाय्‌नाःतय्‍ही” त दाय्‍ह्‌ती नोःकाय्आकाय्। 49ओउःमयःकःहाङः यात्‌चाक् कयाफात तोओ ओउः साल्‌हाङः प्रधान् पुरोहीत्‌लेः खेःतो। ओउःपाय् “लौ नीङ्इ दोह्‌मातेः चीःतेःनीली। 50दोह् स्‍याव्‌नाः दाय्‍ह्‌सा लौ यात्‌चाक् सबै दल्‌ताक्‌साकायः सीसा खेःनाः ओहाङःसै ङीकोः मान्‍तालम् सबै वाय्‌तो स्‍याव्‌तय्‍हीली” त दाय्‍ह्‌ती ओउः कयाफाइ अरु हुम्ओलम्‌कायः तोआकान्। 51ओउःपाय् लयः ल्‍हुङ्‌सै तोओ खेःल प्रधान् पुरोहीत् स्‍याव्ओ त झ्‍यान्‍ते लोने ताप्‌तो स्‍याव्‌सा कुरा परमेस्‍वर्‌कःसै चीःती तोओआः। 52लोने येसुलेः सबैकायः सीसा खेःतो लयःकोः यहुदी मान्‍तालम्‌कायः झुङ्आले खेःल गाःहाङः खेःयामा परमेस्‍वर्‌कोः चोः मुइतो ओउःमयःकायः सबै हुम्‌ताक्‌ती वानःती यातैज्‍योः स्‍याव्‌ताक्‌साकायःपाय् येसु सीसा खेःतो। इतलेः कयाफाइ तोओ कुरा ताप्‌तो स्‍याव्आ।
53ओहाङःसैको ओनम् दीन्‌हाङःसै ओउः ताङ्‌ह्ओ यहुदीलम्इ “इ येसुकायः गत हायःती सात्‌चाङःसु” त नोःकाय्‌लाङ् आन हुम्‌काय्‌ती वाङ्‌झुङ्आकाय्। 54“ङाकायः सात्‌सा बोङःनाःताङः” त येसुइ चीःती यहुदीकोः देस्‌हाङः फुती वाह्‌सा ग्‍याल अरु मान्‍ता याक्‌गार्‌सीःमालो थाव् द्याङ्‌तो वाङ्‌ती इफ्राइम् त तोओ सहर्‌हाङः लयः वाह्ओमयःकुस् मुआकाय्। 55ओहाङःसैको ओउः यहुदीलम्‌कोः च्‍योल्ओ दीन्‌कोः छ्यात् दाह्‌खेःआ ओउः बेलाहाङः गाव् गाव्‌सै नाःतो मान्‍तालम् यरुसालेम्‌ताङ् आल्आकाय् छ्यात्‌कोः ङ्‌हासै लयः छय्‍ङ्‌ताक्‌सा थेङा। 56ओहाङःसैको यरुसालेम्‌कोः मन्‍दीर्‌ताङ् दाह्‌ती वाङ्आक्‌तीको “लौ गततेः ताःतेःचै येसुपाय् इ छ्यात् जाङ्‌ह्‌साकायः यरुसालेम्‌ताङ् वाङ्‌नाःया वाङ्‌लया” त दाय्‍ह्‌ती नोःकाय्‌ती येसुकायः बोङःआकानी। 57ओउः ताङ्‌ह्ओ पुरोहीत्‌मा फरीसीलम्इमा हुकुम् बयःती “लौ सुसुइ येसु गाःहाङः मुनाः त चीःनानी ओउःइपाय् ङीकायः छ्यान्‍ह्‌सा खेःतो” त दाय्‍ह्‌ती तोआकानी

युहना 12
1ओहाङःसैको ओउः छ्यात्‌दीन्‌कोः छ दीन् ङ्‌हासै येसु बेथानी गाव्‌ताङ् फेरी आल्आकाय्। ओउः बेथानी गाव्‌हाङः येसुइ लाजरुस्‌कायः च्‍योक्‌ताक्ओ खेःतो। 2ओहाङः वाङ्आक्‌तीको येसुकायः आम्‍ह् खाङ्‌ती बयःआकानी ओउः बेलाहाङः लाजरुस्‌मा येसुकुस् जेःती मुआ। 3मार्‌थाखेइ आम्‍ह् बोथासतो ओउःकोः हौद्याङ् मरीयम्‌खेइ आन महङ्‌गो पेतो सय्‍ङ्ओ साती वानःती येसुकायः दोम् ल्‍यानःआथै। ओउःकोः दोम् ल्‍यानःआक्‌तीको मरीयम्इ लयःकोः म्‍याङ्इ ओउःकोः दोम्‌सै साती थ्‍युर्‌आथै। थ्‍युर्‌तोक्‌हाङः ओउः कीम् तोमःती आन पेतो सय्‍ङ्आ। 4ओहाङःसैको एत हायःओ च्‍यवःती यात्‌चाक् येसुकुस् वाह्ओ मान्‍ता यहुदस् इस्‍करीयोत् त तोओ मरीयम्‌कायः जान्आकान्। लोने यहुदस्इ येसुकायः सात्‌लाङ् दाक्आथै। 5“लौ इ साती यात् हजार्‌ रुपीया वीनःती ओउः पैसा ह्र्यात्‌लम्‌कायः बयःचाः खेःतो” त दाय्‍ह्‌ती यहुदस्इ जान्‌थातो 6ह्र्यात्‌कायः योनःती तोउलु लयःकोः ल्‍हुङ् कुःरेव् खेःतो त झ्‍यान्‍ते तोआकान्। ओउःइ सबैकोः पैसाकोः थैलो लात्ओ खेःतो ओउः थैलोसै पैसा कुःझुङ्उतो ओउःत खेःओ मरीयम्‌कायः जान्आथै। 7एत जान्ओ येसुइ सायःती “लौ ओउःत तोलाम्। ङाकोः पाम्‍ह्‌सा दीन्‌कायः ओउःइ गम्‌सा खेःतो बा। 8ह्र्यात् मान्‍तालम्‌खे गलमा नीङ्‌कुस् मुनै गलकायःमा पैसा बयःसा खाय्‌नाः। ङाखे नीङ्‌कुस् गलकायःमा मुङल” त दाय्‍ह्‌ती येसुइ तोआकान्। 9ओहाङःसैको येसुपाय् यरुसालेम्‌ताङ् दाह्‌ती वाङ्‌नाः त नाःतो यहुदीलम्इ चीःती बेथानी गाव्‌ताङ् वाङ्आकाय्। येसुकायःमा ओउः ङ्‌हा सीओ लाजरुस्‌कायःमा योलाङ् वाङ्आकाय्। 10-11ओउःमयःखेइ योलाङ् वाङ्इतो ओउः ताङ्‌ह्ओ पुरोहीत्‌लम्‌खे हुम्‌ती “लौ ओउः ङ्‌हा सीओ लाजरुस् त तोओ द्याह् सेलः मुओ च्‍यवःआक्‌तीको नाःतो मान्‍ताइ येसुकायः ङ्‌हाम्‌नानी ओउःत झ्‍यान्‍ते लाजरुस्‌कायःमा सात्‌साआः” त दाय्‍ह्‌ती नोःकाय्आकाय्।
12ओहाङःसैको ओनम्‍ह्‌कोः स्‍याङ्‌ह्‌लोहाङः “लौ येसुपाय् यरुसालेम्‌ताङ् वाङ्‌नाः” त दाय्‍ह्ओ नाःतो छ्यात् जाङ्‌ह्‌लाङ् वाङ्ओलम्इ सायःआकानी। 13सायःआक्‌तीको ल्‍ह्यय्ओ सीङःकोः मात् लात्‌ती येसुकायः रोम्‌ती क्रुस्‌लाङ् वाङ्आकाय्। वाङ्‌तोक् बेलाहाङः ओउःमयः आन गोःती “होसाना भालातेः वाङ्‌तेःआ नाङ् प्रभुकोः मय्‍ङ् लात्ओ चाक्‌तेःआः। प्रभु परमेस्‍वर्‌इ ल्‍होक्ओ यहुदीकोः राजामा ताङ्‌ह्‌तो स्‍याव्‌पाः” त दाय्‍ह्‌ती दाय्‍ह्आकाय्। 14ओहाङःसैको येसुपाय् गधाकोः चोः लेःती लन्‍ह्‌ती वाङ्आ। ओउःत हायःओपाय् परमेस्‍वर्‌कोः आखरःहाङः लेखती मुनाः। 15“लौ नीङ् सीओन् सहर्‌कोः मान्‍तालम्‌य रैलाम्। नीङ्‌कोः राजापाय् गधाकोः चोःहाङः लन्‍ह्‌ती वाङ्आनाः” त लेखती मुनाः। 16ओउः बेलाहाङः येसुकुस् वाह्ओमयःइ “इ आखरःकोः कुरा द्याह् ताप्‌नाः” त चीःआक्‌नीली लोनेः येसु च्‍योक्आक्‌तीको ताङ्‌ह्‌तो स्‍याव्ओ बेलाहाङः ओउःमयःइ ओउः आखरःहाङः लेखओ कुरापाय् “दोह्‌कायः तोओलेः” त पेतो चीःआकानी। 17ओहाङःसैको ओउः ङ्‌हा सीओ लाजरुस्‌कायः येसुइ तेस्‌सै गोत्‌ती च्‍योक्‌ताक्ओ च्‍यवःओलम्इ इ कुरा सबैकायः ल्‍हाक्‌ती छ्यान्‍ह्आकानी 18ओउःत झ्‍यान्‍ते ओउः ग्‍याङ्‌ह्‌राय्‌कोः कुरा सायःआक्‌तीको अरु अरु मान्‍तालम् येसुकायः क्रुस्‌लाङ् वाङ्आकाय्। 19फेरी “नाःतो मान्‍तालम् येसुकःताङ् वाङ्ओ” त ओउः फरीसीलम्इ चीःआक्‌तीको “लौ ङीइ दोह्‌मा हायःसा खाय्‌तय्‍ह्‌नीली। योउ दा ल्‍हाव्‍ह्‌दैबाङ्‌कोः मान्‍तालम् सबै ओउःकायः क्रुस्‌लाङ् आल्‌नै बा” त दाय्‍ह्‌ती नोःकाय्आकाय्।
20ओहाङःसैको ओउः छ्यात् जाङ्‌ह्ओलम्‌कःहाङः यात्‌नीस् एलेनी भासा नोःओ मान्‍ता खेःइतो। 21ओउःमयः बेथ्‌सैदा सहर्‌सै वाङ्ओ फीलीप्‌कःताङ् वाङ्‌ती “लौ ङी येसुकायः क्रुस्‌सा झाक्‌नाङी” त दाय्‍ह्‌ती ओउःकायः तोआकानी 22ओउःमयःकोः कुरा फीलीप्इ अन्‍द्रीयस्‌कायः छ्यानःआकान्। ओहाङःसैको ओउः नीस्‌चाक् येसुकायः छ्यानःलाङ् वाङ्आकाय्। 23ओउःत छ्यानःआक्‌तीको “लौ ओउः मान्‍ताकोः चोः त तोओकोः ताङ्‌ह्‌ताक्‌सा बेला दाह्ओआः 24दोङ्‌सीलेः दाय्‍ह्‌भनाङ् गहुङ्‌कोः बीया चोया साःताङ् ग्‍लेःती आःताः सीमाःत ओउःपाय् ब्‍याव्‌ल। साःहाङः सीआ त खेःया दुङ्आक्‌तीको आन ब्‍याव्‌नाः। 25इतलेः सुखेलो लयःकोः जीङः राप्‌चानी ओउःकोः जीङः वाय्‌तो स्‍याव्‌चाः सुखे इ ल्‍हाव्‍ह्‌दैबाङ्‌हाङः दोःओ जीङः राप्‌नीली ओउःपाय् गलमा वाय्‌मालो रौ जीङः दोःनै। 26सुलो ङाकोः काम् जाङ्‌ह्‌सा ग्‍याचै ओउःपाय् ङाकुस् वाह्‌पै। ङा गाःहाङः गाःहाङः मुचाङः ओहाङः ङाकोः काम् जाङ्‌ह्ओलम्‌मा मुनै। सुसुइ ङाकोः काम् जाङ्‌ह्‌चानी ओउःकायःलेः ङाकोः आपाइ ताङ्‌ह्‌ताक्‌नाःथास” त दाय्‍ह्‌ती येसुइ तोआथास। 27“लौ ङापाय् द्याह् ल्‍हुङ् र्‍याङःआलाङः। द्याह् दोह्‌त तेती तोचाङः र। इ ङाइ लीह्‌सीःओ च्‍यवःसा बेलाहाङः ‘वाङ्‌ताक्‌लाम् आपाय’ त तेती तोचाङःया। खेःल इत लीह्‌सीःओ गोरःलाङ्‌पाय् वाङ्आलाङः बा। 28लौ उया आपाय नाङ्‌कोः मय्‍ङ् ताङ्‌ह्‌तोलेः स्‍याव्‌पानाः” त दाय्‍ह्‌ती येसुइ परमेस्‍वर्‌कायः तोआकान् तोतोक्‌हाङः लाङ्‌कासै हाव्‌नयः वाङ्आ “लौ ङाकोः मय्‍ङ् ताङ्‌ह्‌तो स्‍याव्‌ताक्आलाङः बा। लोनेः फेरीलेः ताङ्‌ह्‌तो स्‍याव्‌ताक्‌नाङः” त दाय्‍ह्‌ती नोःओ। 29ओउः लाङ्‌कासै वाङ्ओ हाव्‌नयः सायःती “लौ न्‍याम् मुक्‌नाः बा” त यात्‌नीस्‌चाक् दाय्‍ह्‌ती नोःइतो “खेःल परमेस्‍वर्‌कोः ल्‍होक्ओमयःइ ओउःकायः तोआथै” त दाय्‍ह्‌ती अरु नोःआकाय्। 30“लौ ओउः लाङ्‌कासै नोःओ कुरापाय् ङाखेकायः खेःल नीङ्इ सायःसाखेकायः वाङ्ओआः बा। 31लौ इ ल्‍हाव्‍ह्‌दैबाङ्‌कोः मान्‍तालम्‌कायः तय्‌छनःती योसा बेला वाङ्आ। ओउःमयःकोः सैतान् राजाखे द्याह् क्‍लाःती ल्‍होक्‌नाःथै। 32ङाखे त्‍यावःअ योकोःती गम्ओ बेलाहाङः सबै मान्‍तालम्‌कायः ङाकःताङ् वानःनाङःसु” त दाय्‍ह्‌ती 33येसुइ लयः क्‍ल्‍याय्ओ सीङःहाङः सात्‌सा कुरा छ्यानःती तोआथास। 34एत तोआक्‌तीको “लौ ‘ओउः वाङ्‌सा खेःओ ख्रीस्‌लेः सीमाःत गलकायःमा मुलेःनाः’ त ङीकोः ऐन्‌कोः आखरःहाङः लेखती मुताङःनाः। ओउःत खेःया ओउः मान्‍ताकोः चोःकायः ‘सीताक्‌साकायः योकोःती गम्‌सा खेःतो’ त दोह् हायःतीतेः नोःतेःनाः। इ मान्‍ताकोः चोः त तोओपाय् सुलो” त दाय्‍ह्‌ती ओउः हुम्ओलम्इ येसुकायः व्‍हत्आथै। 35“लौ नीङ्‌कःहाङः ङा मुओहाङः थोङ्‌तो स्‍याव्‌ती मुधाङ्‌नाः लोनेः च्‍याक्‌तोलेः स्‍याव्‌नाः। ओउः थोङ्‌तो मुओहाङः पेओ काम् जाङ्‌ह्‌ती वाह्‌न दा लोनेः च्‍याक्‌तो स्‍याव्ओहाङः च्‍यवःती वाह्‌सामा दोःल काम् जाङ्‌ह्‌सामा दोःल। 36ङाइ थोङ्‌ताक्ओ कुरा स्‍यान्‌तोक्‌हाङः ङाकायः ङ्‌हाम्‌नाङ्‌स ओहाङःसैको नीङ्‌मा थोङ्ओहाङः वाह्ओ मान्‍तालम् स्‍याव्‌तेःनै” त दाय्‍ह्‌ती येसुइ तोआथास। एत तोआक्‌तीको येसु आल्‌ती ओउःमयःइ चीःमालो थाव्‌हाङः वाङ्आकाय्।
37ओहाङःसै येसु ओउः हुम्ओ मान्‍ताकुस् मुतोक्‌हाङःपाय् नाःतो ग्‍याङ्‌ह्‌राय् जाङ्‌ह्‌थासतो ओउःमयःइ ओउःकायः ङ्‌हाम्‌थाल। 38ओउःतलेः परमेस्‍वर्‌कोः आखरःहाङःलेः लेखती मुनाः “लौ प्रभुय ङीइ तोओ कुरा सुइ ङ्‌हाम्‌ती सायःचानी र। नाङ्‌कोः ग्‍वम् सुइ च्‍यवःचानी” त दाय्‍ह्‌ती परमेस्‍वर्‌कोः कुरा छ्यानःओ एसायाइ लेखआकान् ओउःइ लेखओ द्याह् ताप्‌तोलेः स्‍याव्आ। 39-40फेरी “परमेस्‍वर्‌इ ओउःमयःकायः मीक् लोक्ओमा ल्‍हुङ् व्‍हक्‌मालो स्‍याव्‌ताक्आथास ओउःमयःइ मीक्इ च्‍यवःसामा खाय्‌नीली ल्‍हुङ्‌हाङः चीःसामा खाय्‌नीली ओउःत झ्‍यान्‍ते ओउःमयः ङाकःताङ् दल्‌ताक्‌साकायः द्यान्‍ह्‌ती वाङ्‌सा खाय्‌नीली” त दाय्‍ह्‌ती परमेस्‍वर्‌ दाय्‍ह्ओ कुरापाय् एसायाइ लेखआकान्। 41एतलेः एसायाइ ङ्‌हासैलेः येसुकोः ताङ्‌ह्ओ ग्‍वम् च्‍यवःती छ्यान्‍ह्आकान्। 42ओउःत एसायाइ लेखउतो ओउः यहुदीलम्‌कोः ताङ्‌ह्ओ मान्‍तालम्‌कःहाङः नाःतोलेः येसुकोः कुरा ङ्‌हाम्आकानी। ओउःमयःइ ङ्‌हाम्‌सापाय् ङ्‌हाम्‌नीतो ओउः फरीसीलम्‌कः रैती झ्‍यान्‍ते अरुकायः छ्यान्‍ह्‌नीली “ङीइ येसुकायः ङ्‌हाम्ओ त ओउः फरीसीलम्इ चीःचानी त खेःया ङीकायः थनःओ कीम्‌सै क्‍लाःती ल्‍होक्‌नाःतय्‍ही यादो” त म्‍हर्‌ती रैआकाय्। 43ओउःमयःपाय् परमेस्‍वर्‌कोः लुङ्‌ती नोःओसै मान्‍ताकोः लुङ्‌ती नोःओ कुरा सायःसा झाक्आकाय्। 44ओहाङःसैको “लौ सुसुइ ङाकायः ङ्‌हाम्‌चानानी ओउःइ ङाकायः ल्‍होक्ओ आपाकायःमा ङ्‌हाम्‌नानी। 45सुसुइ ङाकायः च्‍यवःचानानी ओउःइ ङाकायः ल्‍होक्ओ आपाकायःमा च्‍यवःनानी। 46ङापाय् सबै थोङ्‌ताक्‌साकायः इ ल्‍हाव्‍ह्‌दैबाङ्‌ताङ् वाङ्ओआः ङ। ओहाङःसैको सुसुइ ङाकायः ङ्‌हाम्‌चानानी ओउःलेः च्‍याक्ओहाङः मुइली। 47सुखेइ ङाइ तोओ कुरा सायःआक्‌तीको ङाकायः ङ्‌हाम्‌ताङःल ओउःकायः ङाखेइ न्‍युम्‍ह्‌ताक्‌ङल। ङापाय् सबै दल्‌ताक्‌साकायः ल्‍हाव्‍ह्‌दैबाङ्‌ताङ् वाङ्आलाङः तय्‌छनःती न्‍युम्‍ह्‌ताक्‌साकायः वाङ्‌ङल। 48ङाकायः ङ्‌हामालो मान्‍ताकायःमा ङाकोः कुरा सायःसा ग्‍यामालो मान्‍ताकायःमा ओउः लोनेः वाङ्‌सा दीन्‌हाङः ङाइ तोओ कुराखेइ ओउःमयःकायः गाल्‌तुम्‌ती तोनौ बा। 49ङा लयः नोःओ खेःङल। ङाइ नोःओ कुरा ङ्‌हाहाङःलेः ङाकायः ल्‍होक्ओ आपाइ स्‍यान्‌ती बयःआताङः। 50फेरी ओउःइ बयःओ कुरा ङ्‌हाम्ओलम्इ रौ जीङः दोःनै बा एत ङाइ चीःनाङः ओउःत झ्‍यान्‍ते दोह् दोह् तोसा कुरा ङाकोः आपाइ बयःचाःताङः ओउःलेः ङाइ तोनाङः बा” त दाय्‍ह्‌ती येसु स्‍यान्‌ती तोआथास।

युहना 13
1ओहाङःसैको ओउः च्‍योल्ओ दीन्‌कोः योह्‌नम् दाह्आ। “लौ ङा ल्‍हाव्‍ह्‌दैबाङ्‌सै आल्‌ती आपाकःताङ् वाङ्‌सा खेःनाङः। द्याह् ओउः आल्‌सा दीन् दाह्‌खेःआ” त येसुइ चीःउतो ओउःइ ल्‍हाव्‍ह्‌दैबाङ्‌हाङः मुतोक्‌हाङः लयःकुस् वाह्ओमयःकायः गलकायःमा राप्‌ती मुआ। 2ओहाङःसैको ओनम् दीन्‌कोः राम्‍हसै आम्‍ह् जेःओ बेलाहाङः “द्याह् येसुकायः फरीसीलम्‌कःताङ् दाक्उ” त सैतान्इ यहुदस् इस्‍करीयोत्‌खेकायः होम्आकान्। 3येसुखेइ “लौ ङाकायःपाय् ङाकोः आपाइ सबै ग्‍वम् बयःओआः बा। ङा ओउःकःसै वाङ्ओ लेःआः ङ ओउःकःताङ् पाय्‍ह्‌सा” त चीःआकास। 4ओहाङःसैको आम्‍ह् जेःतोक्‌हाङः येसु चीङ्‌ती लयःकोः नाय् ल्‍ह्युन्आक्‌तीको रुमाल् रोत्‌ती आङ्‌हाङः तोङःआकास। 5रुमाल् तोङःआक्‌तीको भान्‍दाहाङः तीः थेःती येसुइपाय् नोकरीलो लेखा लयःकुस् वाह्ओमयःकोः दोम् जेस्आथास। जेस्आक्‌तीको रुमाल्इ ओउःमयःकोः दोम् थ्‍युर्‌आथास। 6ओहाङःसैको सीमोन् पत्रुस्‌कोः दोम् जेस्‌खेःतोक्‌हाङः “लौ प्रभुय ङाकोः दोम् नाङ्इ जेस्‌तेःनाःची र” त दाय्‍ह्‌ती व्‍हत्‌थातो 7“ङाइ द्याह् दोह् हायःओ त नाङ्इ चीःधाङ्‌तेःउलु लोने चीःतेःनौ” त दाय्‍ह्‌ती येसु त्‍याङ्आ। 8“खेःल ङाकायः दोम्‌मा दोम् जेस्‌सा स्‍याव्‌नाः जुगु” त सीमोन् दाय्‍ह्‌ती दाय्‍ह्‌तो “ङाइ नाङ्‌कायः जेस्‌ल त खेःया नाङ् ङाकुस् मुसा दोःतेःल” त दाय्‍ह्‌ती येसु तोआथै। 9“ओउःत खेःया प्रभु ङाकायः दोम् ह जेस्‌सा खेःल ङाकायः क्रुत्‌मा तालाङ्‌मा आङ् जुदालेः जेस्‌चाक्‌ची दा” त दाय्‍ह्‌ती पत्रुस् तेआ। 10“जुगाङ् छय्‍ङ्‌तो मुओ मान्‍ता वाह्आक्‌तीको दोम् ह जेस्‌सा खेःतो ओउःकोः आङ् जय्‌तोलेः मुनाः। नीङ्‌पाय् सबै जय्‌तोलेः मुतेःनै यात्‌चाक् ह जय्‌माःत मुनाः” त दाय्‍ह्‌ती 11“यहुदस्इ ङाकायः सात्‌ताक्‌साकायः दाक्‌नाःताङः” त येसुइ चीःती ओउःतलेः तोआथास। 12ओहाङःसैको ओउःमयःकोः दोम् जेस्आक्‌तीको लयःकोः नाय् लावआक्‌तीको येसु ओउःमयःकुस् च्‍युङःती मुआ। “लौ ङाइ मेस् दोह् हायःतीलेः दोम् जेस्‌नेःआलाङ्‌स त नीङ्इ चीःतेःनानीया चीःतेःनीलीया। 13ङाकायःपाय् गुरु तमा तोतेःनानाङ्‌स प्रभु तमा तोतेःनानाङ्‌स ओउःत तोसापाय् स्‍याव्‌लेःनाः नीङ्‌कोः गुरुमा प्रभुमा खेःलेःआनाङः। 14ङा नीङ्‌कोः प्रभुइलेः नीङ्‌कोः दोम् जेस्‌बत्‌नेःआलाङ्‌स। नीङ्इमा लःलयःकायः दोम् जेस्‌काय्‌सा खेःतेःनै। 15ङाकायः तेःती ङाइ गतलो नीङ्इमा ओउःतलेः हायःसा खेःतेःनै। 16दोङ्‌सी दाय्‍ह्‌भनाङ् ओउःकोः मालीक्‌सै नोकरी ताङ्‌ह्ओ खेःबाय्‌ल फेरी ओउःकायः ल्‍होक्ओचाक्‌सै समचार्‌ वानःओ मान्‍ताखे ताङ्‌ह्ओमा खेःलेःल। 17लौ इ ङाइ स्‍यान्ओ कुरा नीङ्इ जाङ्‌ह्‌तेःचानानी त खेःया नीङ् पेतोलेः स्‍याव्‌तेःनै।
18नीङ् सबैकायः तोनेःनाङ्‌सल नीङ्‌कःहाङः सुसुकायः ङाइ छ्युङ्‌ह्‌लेःनेःनाङ्‌स ओउःमयःकायःलेः ङाइ तय्‍ह्‌नेःनाङ्‌स बा। ‘यात्‌चाक् ङाकुस् जेःओ मान्‍ताइ ङाकायः पेमालो हायःसा बोङःनौ’ त परमेस्‍वर्‌कोः आखरःहाङः लेखती मुनाः। ओउः कुरा द्याह् ताप्‌सा खेःतो। 19लौ इ लोने स्‍याव्‌सा कुरापाय् ताप्‌तो स्‍याव्‌धाङ्‌माखाहाङः ङाइ छ्यान्‍ह्‌नेःनाङ्‌स ओहाङःसैको ओउः कुरा ताप्‌तो स्‍याव्आक्‌तीको ‘लौ ओउःपाय् दोङ्‌सीःओ चाक् लेःआः बा’ त चीःती ङाकायः ङ्‌हाम्‌तेःनानाङ्‌स। 20दोङ्‌सीलेः सुखेइ ङाइ ल्‍होक्ओ चाक्‌कायः रोम्‌नाःथै ओउःइ ङाकायःमा रोम्‌नाःताङः। सुखेइ ङाकायः रोम्‌नाःताङः ओउःइ ङाकायः ल्‍होक्ओ आपाकायःमा रोम्‌नाःथै” त दाय्‍ह्‌ती येसुइ तोआथास।
21इत तोआक्‌तीको येसु ल्‍हुङ्‌हाङः आन लीह्‌तो स्‍याव्‌ती “लौ दोङ्‌सी दाय्‍ह्‌भनाङ् नीङ्‌कःहाङः यात्‌चाक्इ ङाकायः सात्‌ताक्‌साकायः दाक्‌लेःनाःताङः” त फेरी दाय्‍ह्‌ती झ्‍यान्‍ते 22ओउःकुस् मुओलम् “लौ ओउः सुखेलो तय्‍ही” त ग्‍याङ्‌ह्‌तीलेः म्‍हर्‌ती लयःमयः योकाय्आकाय्। 23ओहाङःसैको यात्‌चाक् येसुइ आन राप्ओ मान्‍ता येसुकुस् द्याङ्‌काय्‌तो मुओ 24ओउःकायः पत्रुस्इ क्‍वेःतेक्‌ती “येसुकायः ‘ओउःपाय् सुखेलो’ त व्‍हत्उ दा” त दाय्‍ह्‌ती तोआथै। 25ओउः मान्‍तापाय् येसुकोः नोहाङः “लौ प्रभुय ओउःपाय् सुखेलो” त दाय्‍ह्‌ती येसुकायः व्‍हत्आकान्। 26“लौ सुकायःलेः ङाइ आम्‍ह् न्‍योःती बयःनाङः ओउःपाय् ङाइ मेस् तोओ मान्‍ता लेःआः बा” त दाय्‍ह्‌ती येसु त्‍याङ्‌ती आम्‍ह् न्‍योःती यहुदस्‌कायः ल्‍हाआकान्। 27ओहाङःसैको येसुइ ल्‍हाओ आम्‍ह् त्‍याक्आक्‌तीको यहुदस्‌कायः सैतान्इ ल्‍हुङ्‌हाङः थ्‍योन्‍ह्‌ती होम्आथै। एत चीःती येसु ल्‍हेःती “लौ नाङ्इ हायःसा खेःओ काम्‌पाय् द्याह् रेन्‍ह्‌तोलेः हायःउ” त दाय्‍ह्‌ती यहुदस्‌कायः तोआकान्। 28येसुइ यहुदस्‌कायः दोह् दोह्‌त तोओ अरुइ चीःनीली 29यहुदस्‌पाय् सबैकोः पैसा गम्ओ मान्‍ता खेःतो ओउःत झ्‍यान्‍ते “ ‘लौ ङीकायः जेःगा लेःलाङ् आल्अ’ त येसुइ तोओ यादो” त यात्‌नीस्‌चाक्इ म्‍हर्‌इतो अरुलम् “ ‘लौ ह्र्यात्‌लम्‌कायः पैसा बयःउ’ त ओउःइ तोओ” त म्‍हर्‌आकाय्। 30ओहाङःसैको यहुदस्इ ओउः आम्‍ह् त्‍याक्‌ती जेःआक्‌तीको बाहीर ग्‍ल्‍युङ्‌ह्‌लाङ् आल्आ। आल्‌तोक् बेलाहाङःपाय् न्‍याम् जुगाङ् च्‍याक्ओ खेःतो।
31यहुदस् बाहीरताङ् आल्आक्‌तीको “लौ द्याह् ङा मान्‍ताकोः चोःपाय् ताङ्‌ह्‌तो स्‍याव्‌नाः। ओउः बेलाहाङः ओउःइ परमेस्‍वर्‌कायःमा ताङ्‌ह्‌ताक्‌नौ 32ओहाङःसैको परमेस्‍वर्‌इ ओउः मान्‍ताकोः चोःकायःमा ताङ्‌ह्‌ताक्‌नाःथै। इत हायःओ देङीलेः स्‍याव्‌नाः। 33लौ ङाकोः हौलम्‌य नीङ्‌कुस्इ ङा द्याह् ज्‍याङःतो मुङल। आल्आक्‌तीको ङाकायःतेः बोङःतेःनाङ्‌सतो ङा आल्ओहाङः नीङ्‌खे आल्‌सा दोःतेःइली। ओउःतलेः ङाइ यहुदीलम्‌कायःमा तोआलाङः। 34द्याह् ङाइ नया हुकुम् बयःनेःनाङ्‌स। लःलयःकायः राप्‌काय्‌ती मुन गतलो ङाइ नीङ्‌कायः राप्‌नेःआलाङ् ओउःतलेः लःलयःकायः राप्‌काय्‌नाःइसी। 35नीङ् लःलयःकायः राप्‌काय्‌तेःनाःइसी त खेःया अरुइ ‘लौ इमयः येसुकुस् वाह्ओमयःलेः’ त चीःनानी” त दाय्‍ह्‌ती येसुइ तोआथास। 36ओहाङःसैको “लौ प्रभुय गाःताङ्‌तेः आल्‌तेःनाः” त दाय्‍ह्‌ती पत्रुस्इ व्‍हत्आथै “लौ ङा आलःओहाङः नाङ् गुल्‍ह्‌ती वाङ्‌सातेः दोःधाङ्‌तेःल लोने गुल्‍ह्‌सा दोःतेःनाः” त दाय्‍ह्‌ती येसु त्‍याङ्‌ती 37“दोह् हायःती ङा गुल्‍ह्‌सा दोःधाङ्‌ताङःङल नाङ्‌कायः ङा सीसामा ग्‍यानाङः” त दाय्‍ह्‌ती पत्रुस्इ तोउतो 38“ङाकायः सीसा ग्‍याताङःतेःनाः र। दोङ्‌सीलेः दाय्‍ह्‌भनाङ् वाः गोःधाङ्‌माखाहाङः ङाकायः सुम् पेन्‍ह्‌कायः ‘लौ ओउःकायः तय्‍ह्‌बाय्‌ङल’ त नाङ्इ तोतेःनौ बा” त दाय्‍ह्‌ती येसुइ तोआथै।

युहना 14
1“लौ ताःताः ल्‍हुङ् र्‍याङःताःनल। परमेस्‍वर्‌कायः ङ्‌हाम्‌तेःनानी ङाकायःमा ङ्‌हाम्‌नाङ्‌स दा। 2ङाकोः आपाकोः कीम्‌हाङः नाःतो याक्‌सा थाव्‌लम् दोःलेःनाः। नीङ्‌कायःपाय् थाव् नाःल त खेःया ङाइ तोचेःनाङ्‌स खेःतो बा। 3लौ नीङ्‌कायः थेङा ङाइ थाव् जाङ्‌ह्‌ती गम्‌लाङ् आल्‌नाङः। आल्आक्‌तीको ङा नीङ्‌कायः रोम्‌लाङ् फेरी द्यान्‍ह्‌ती वाङ्‌नाङः। रोम्आक्‌तीको ङा गाःताङ् मुचाङः नीङ्‌मा ओहाङः मुसा दोःतेःनै। 4ङा आल्‌सा खेःओ ल्‍याम् नीङ्इ तय्‍ह्‌तेःनानी बा” त दाय्‍ह्‌ती येसु तोआथास। 5“अ प्रभुय नाङ् आल्‌सा खेःओहाङः ङीइ तय्‍ह्‌ङुसुलु गत हायःती ओहाङःकोः ल्‍याम् तय्‍ह्‌सा खाय्‌चाङःसु र” त दाय्‍ह्‌ती थोमा दाय्‍ह्आ। 6“लौ ओउः ल्‍याम्‌पाय् ङा लेःआः। दोङ् स्‍यान्ओमा जीङः दोःताक्‌सामा ङा लेःआः ङ। ङाइ आःताः आलःमाःतो सुइमा ङाकोः आपाकःताङ् आल्‌सा दोःइली। 7लौ ङाकायः तय्‍ह्‌तेःचानाङ्‌स त खेःया ङाकोः आपाकायःमा तय्‍ह्‌तेःचानी खेःतेःइतो। द्याह्‌हाङःसै ओउःकायः तय्‍ह्‌तेःनानी ओउःकायः च्‍यवःतेःआकानी बा” त दाय्‍ह्‌ती येसुइ तोथासतो 8“अ प्रभुय नाङ्‌कोः आपा छ्यानःताङी दा ओउःत ह ङी झाक्‌नाङी” त दाय्‍ह्‌ती फीलीप्इ तोआथै। 9“लौ फीलीप्‌य नीङ्‌कुस् ङा इच्‍युक् ज्‍याङःतोलेः मुङोतो ङाकायःतेः तय्‍ह्‌तेःधाङ्‌चीली र। ङाकायः च्‍यवःओ मान्‍ताइ ङाकोः आपाकायःमा च्‍यवःओ लेःआः खेःनाः। नाङ्इ उया दोह् हायःतीतेः ‘लौ नाङ्‌कोः आपा छ्यानःताङी’ ततेः तोतेःनाःची। 10ङा आपाकुस् ब्राङ्‌तोलेः मुनाङः ओउः ङाकुस्‌मा ब्राङ्‌तोलेः मुनाः। ओउःत ङ्‌हाम्‌तेःउलुया। लौ ङाइ तोओ कुरा लयःकोः ल्‍हुङ्‌सै खेःल ङाकुस् ब्राङ्‌ती मुओ आपाइ इ कुरा जाङ्‌ह्‌नौ बा। 11ङा आपाकुस् ब्राङ्‌तोलेः मुनाङः ओउः ङाकुस्‌मा ब्राङ्‌तोलेः मुनाः। ओउःत तोओपाय् ङ्‌हाम्‌नु दा उया ङाइ जाङ्‌ह्ओ पेओ काम्‌लम् लयः मीक्इ च्‍यवःती झ्‍यान्‍ते ङाकायः ङ्‌हाम्‌नाङ्‌स। 12दोङ्‌सी दाय्‍ह्‌भनाङ् ङाकायः ङ्‌हाम्ओलम्इपाय् ङाइ जाङ्‌ह्ओ काम्‌लम् ओउःइमा जाङ्‌ह्‌लेःनानी। माः रैस ङा लोने आपाकुस् मुनाङः त झ्‍यान्‍ते ओउःसै ताङ्‌ह्ओ काम्‌लम्‌मा जाङ्‌ह्‌सा खाय्‌नानी। 13फेरी दोह्‌लोकायः ङाकोः मय्‍ङ् पेह्‌ती नीङ्इ तेती तोतेःचानाङ्‌स ओउःलेः ङाइ जाङ्‌ह्‌नेःनाङ्‌स ओउःत हायःती ङाकोः आपाकायः ङाइ ताङ्‌ह्‌ताक्‌नाङः। 14लौ उया दोह्‌कायःलोतेः ङाकोः मय्‍ङ् पेह्‌ती तेती तोचानाङ्‌स ओउःलेः ङाइ जाङ्‌ह्‌नेःनाङ्‌स बा। 15नीङ्इ ङाकायः राप्‌तेःनानाङ्‌स त खेःया ङाइ तोओ कुरा ग्‍याती जाङ्‌ह्‌नु दा।
16ओहाङःसै ङाइ आपाकः तेती तोनाङः ओउःइ नीङ्‌कायः अरु लव्‍ह्‌ती जाङ्‌ह्‌सा साथी बयःतेःनै। 17ओउःपाय् ओउः दोङ् कुरा छ्यान्‍ह्ओ ग्‍वालामः लेःआः नीङ्‌कुस् गलकायःमा मुलेःनाः। अरु ल्‍हाव्‍ह्‌दैबाङ्‌हाङः मुओ ङाकायः ङ्‌हाम्‌मालो मान्‍तालम् ओउः ग्‍वालामः दोःइली। ओउःकायः ओउः मान्‍तालम्‌खेइ च्‍यवःमानीली तय्‍ह्‌मानीली ओउःत झ्‍यान्‍ते दोःमाइली। ओउःपाय् नीङ्‌कःगन ब्राङ्‌तोलेः मुनाः ओउःत झ्‍यान्‍ते नीङ्‌खेइ ओउःकायः तय्‍ह्‌तेःनानी। 18नीङ्‌कायः ङाइ जुगाङ् फेनेःनाङ्‌सल ङा लोने द्यान्‍ह्‌ती वाङ्‌नाङः। 19अरु ल्‍हाव्‍ह्‌दैबाङ्‌कोः मान्‍तालम्‌खेइ ङाकायः यात् चीच्‍योक्‌कायः ह च्‍यवःधाङ्‌नाःताङः नीङ्‌खेइ ज्‍याङःतोकायः च्‍यवःतेःनेःनेःनाङ्‌स। ङा सीओसै उह्‌ती च्‍योक्‌नाङः त खेःया नीङ्‌मा च्‍योक्‌तेःनै। 20ओउः दीन्‌हाङः ङाकायः ‘आपाकुस् ब्राङ्‌तीलेः मुनाःच’ तमा चीःतेःनानी ‘ङी ओउःकुस् ब्राङ्‌नाःतय्‍ही’ तमा चीःतेःनानी। 21लौ ङाइ तोओ कुरा ग्‍याती जाङ्‌ह्ओलम्इ ङाकायः राप्‌नाःताङः। फेरी ङाकायः राप्ओलम्इ ङाकोः आपाइ राप्‌नाःथास ङाइमा राप्‌नाङःसु। ओउःमयःकःहाङः ङा लयः छ्यानःती थालाङ् दाह्‌नाङः” त दाय्‍ह्‌ती येसुइ ओउःकुस् वाह्ओमयःकायः तोआकान्। 22“लौ प्रभुय नाङ् अरुखेइ च्‍यवःमाःत गत हायःती ङीखेकःहाङः थातेःचाःताङी” त दाय्‍ह्‌ती यहुदस्इ व्‍हत्आथै। ओउःपाय् इस्‍करीयोत्‌कोः यहुदस् खेःल अरु येसुकुस् वाह्ओ यहुदस्‌त तोओ लेःआः। 23“लौ सुसुइ ङाकायः राप्‌नाःताङः ओउःइलेः ङाइ तोआ कुरा ग्‍याती जाङ्‌ह्‌नानी। ओउःकायः ङाकोः आपाइ राप्‌ती नीची नीस् आपाचाः ओउःकःताङ् मुलाङ् वाङ्‌नाङःच। 24सुसुइ ङाकायः राप्‌ताङःल ओउःइलेः ङाइ तोओ कुरा जाङ्‌ह्‌नीली। फेरी ङाइ तोओ कुरा ङाकोः ल्‍हुङ्‌तुक्‌कोः खेःल ङाकायः ल्‍होक्ओ आपाकोः कुरा लेःआः। 25लौ इ कुरा ङाखेइ नीङ्‌कुस् मुधाङ्ओहाङः स्‍यान्‌ती तोनेःआलाङ्‌स। लोने ङा आल्आक्‌तीको ङाकोः आपाइ ओउः लव्‍ह्‌ती बयःसा साथीखे ल्‍होक्‌तेःनै। 26ओउःपाय् ङाकोः आपाइ ल्‍होक्‌सा खेःओ दोङ् ग्‍वालामः लेःआः। ओउःइ सबै कुरा स्‍यान्‌तेःनै फेरी ङाइ तोओ कुरापाय् सबै ल्‍हुङ्‌हाङः गीलताक्‌तेःनै। 27लौ ङा आल्‌तोक्‌हाङः नीङ्‌कायः स्‍याङ्ओ ल्‍हुङ् बयःनेःनाङ्‌स। ङाइ बयःओ स्‍याङ्ओ ल्‍हुङ्‌पाय् अरु ल्‍हाव्‍ह्‌दैबाङ्‌कोः मुओलम्इ बयःसा खाय्‌नीली। लौ ल्‍हुङ् र्‍याङःमामाःत रैमामाःत मुन दा। 28ङाधाङ् आल्‌धाङ्‌चाङः फेरी द्यान्‍ह्‌तीलेः वाङ्‌नाङः त ङाइ तोओ सायःतेःआकानी। ङाकायः राप्‌तेःनानाङ्‌स त खेःया ‘ओउःपाय् आपाकःताङ् आल्‌नाः’ त सायःआक्‌तीको नीङ् चोङाय्‌तो स्‍याव्‌तेःनै दोह् हायःती दाय्‍ह्‌सा ङाकोः आपा ङासै ताङ्‌ह्‌लेःनाः। 29लौ इ कुरा स्‍याव्‌धाङ्‌माःखाहाङः तोनेःनाङ्‌स ओहाङःसैको लोने स्‍याव्आक्‌तीको नीङ्इ ङाकायः ङ्‌हाम्‌तेःनानाङ्‌स। 30द्याह्‌हाङःसै ङा नीङ्‌कः नाःतो नोःसा नोःङल इ ल्‍हाव्‍ह्‌दैबाङ्‌कोः सैतान् राजा त तोओ वाङ्‌खेःनाः। वाङ्‌सापाय् वाङ्‌लेःनाः ङा झाक्‌माःत ओउःइ ङाकायः दोह्‌मा हायःसा खाय्‌ताङःल वाय्‌सामा खाय्‌ताङःल। 31ङाइ आपाकायः राप्‌नाङः त सबै ल्‍हाव्‍ह्‌दैबाङ्‌हाङः मुओलम्‌कायः छ्यानःसा थेङा ङाइ ओउःकोः हुकुम् जाङ्‌ह्‌लेःनाङः बा। लौ द्याह् चीङ्‌ती इसै आल्इ” त दाय्‍ह्‌ती येसु दाय्‍ह्आ।

युहना 15
1“लौ ङापाय् दोङ् धाक्‌सायःकोः बोत्‌लो लेखा लेःआः ङ। ङाकोः आपाइ बोत् स्‍यास्ओ चाक्‌लेः खेःनाः। 2जुदा ङाकोः सायःमालो केङ्‌कालम्‌खे ओउःइ ह्राह्‌ती वाय्‌नौ सायःओलम्‌खे ओउःइ न्‍हाङ्‌तो सायःताक्‌साकायः त्‍यङ्‌ह्‌नौ। 3ङाइ तोओ कुरा सायःआक्‌तीको नीङ्‌पाय् सायःओ केङ्‌कालो लेखा छय्‍ङ्‌तोलेः मुतेःनै। 4केङ्‌कालम्‌पाय् बोत् नाःमाःत स्‍याव्‌ती सायःसा खाय्‌नीली सायःसाकायः बोत्‌हाङः मुसा खेःतो। ओउःलो लेःखा नीङ्‌मा ङाकःहाङः मुसा ङामा नाङ्‌कःहाङः मुसा खेःनाःतय्‍ही। खेःल नीङ् ङाकःहाङः मुमालो त खेःया पेओ जाङ्‌ह्‌सा खाय्‌तेःनीली। 5लौ ङाखेपाय् दोङ् धाक्‌सायःकोः बोत् लेःआः ङ नीङ्‌खे केङ्‌कालम् लेःतेःइ। सुखे ङाकःहाङः मुनाःचै ङा ओउःकःहाङः मुचाङः ओउःलेः न्‍हाङ्‌तो सायःनानी। ङा आःताः मुमाःतो नीङ्इ दोह्‌मा हायःसा खाय्‌तेःनीली। 6सुखे ङाकःहाङः मुइली पेमालो केङ्‌कालो लेखा ओउःलेः ताती वाय्‌तो स्‍याव्‌नाः लोने झ्‍यार्‌आक्‌तीको ओउः केङ्‌कापाय् त्‍युम्‍ह्‌ती म्‍हेःहाङः तुस्‌ती वाय्‌नाः। 7लौ नीङ् ङाकःहाङः मुती ङाकोः कुरा ल्‍हुङ्‌हाङः सेती गम्‌तेःनानी त खेःया दोह् दोह्‌तेः नीङ् लयः झाक्‌ती तेतेःचै ओउःलेः दोःतेःनै। 8नीङ्‌पाय् ग्रान्‍ह्‌ती सायःओ त खेःया ङाकोः आपाकायः ताङ्‌ह्‌ताक्‌तेःनानी। फेरी ङाकुस् वाह्ओमयःतेः दोङ्‌सीलेः स्‍याव्‌तेःनै। 9लौ गतलो ङाकोः आपाइ ङाकायः राप्‌नाःताङः ओउःतलेः नीङ्‌कायः राप्‌नेःनाङ्‌स। 10ङाइ तोओ कुरा जाङ्‌ह्‌तेःनानी त खेःया ङाइ राप्‌नेःनाङ्‌स। ओउःत झ्‍यान्‍ते ओउः कुरा जाङ्‌ह्‌नु दा। ङाकोः आपाइ तोओ कुरापाय् ङाइमा जाङ्‌ह्‌नाङः ओउःत झ्‍यान्‍ते ओउःइ ङाकायः राप्‌नाःताङः। 11ङालो लेखालेः नीङ्‌मा ‘गलकायःमा जुगाङ् चोङाय्‌तोलेः मुपै’ त म्‍हर्‌ती इ कुरा तोनेःनाङ्‌स बा। 12लौ ङाइ नीङ्‌कायः तोओ हुकुम्‌पाय् इलेःआः। गतलो ङाइ नीङ्‌कायः राप्‌नेःआलाङ्‌स ओउःतलेः लःलयःमयः राप्‌काय्‌नीङ्‌सी। 13यात्‌चाक्इ लयःकोः क्‍वालम्‌कायः सीबत्‌नाःथै त खेःया ओउःइ आन राप्ओ काम् जाङ्‌ह्‌नौ बा। इसै अरु न्‍हाङ्‌तोलेः राप्ओ काम्‌पाय् दोह्‌मा नाःबाय्‌ल। 14लौ नीङ्इ ङाइ बयःओ हुकुम्‌लम् जाङ्‌ह्‌तेःचानानी त खेःया ङाकोः क्‍वातेः स्‍याव्‌तेःनै। 15द्याह्‌हाङःसै नीङ्‌कायःपाय् ‘नोकरी’ त तोनेःनाङ्‌सल दोह् हायःती दाय्‍ह्‌सा मालीक्इ नोकरीकायः लयःकोः कुरापाय् जुदालेः छ्यानःथाल। नीङ्‌कायः द्याह् ‘क्‍वा’ त तोनेःनाङ्‌स दोह् हायःती दाय्‍ह्‌सा ङाकोः आपाइ छ्यानःओ कुरा ङाइ जुदालेः नीङ्‌कायः ल्‍हाक्‌ती तोनेःआलाङ्‌स। 16नीङ्‌खेइ ङाकायः छ्युङ्‌ह्‌तेःनाङ्‌सल ङाखेइ नीङ्‌कायः छ्युङ्‌ह्‌नेःआलाङ्‌स। नीङ् अरुकःताङ् आल्‌ती ङाकोः काम् गलमा स्‍युताक्‌साकायः छ्युङ्‌ह्‌ती ल्‍होक्‌नेःआलाङ्‌स। ओहाङःसै दोह् दोह्‌तेः ङाकोः मय्‍ङ् पेह्‌ती ङाकोः आपाकः तेती तोतेःचनै ओउःलेः बयःतेःनै। 17इतलेः ङाइ तोनेःनाङ्‌स लःलयःमयः राप्‌काय्‌नीङ्‌सी।
18लौ नीङ्‌कः अरु ल्‍हाव्‍ह्‌दैबाङ्‌कोः मान्‍तालम् अह्र्नै त खेःया ओउःमयः ङाकः ‘ङ्‌हासै अह्र्नै’ त चीःतेःनानी। 19नीङ्‌पाय् ल्‍हाव्‍ह्‌दैबाङ्‌कोः लेःतेःइ त खेःया नीङ्‌कायः मान्‍तालम्इ ‘ङीकोः मान्‍तालम्’ त दाय्‍ह्‌ती राप्‌तेःचै खेःतो। खेःल नीङ्‌पाय् ओउः खाल्‌कोः मान्‍तातेः खेःतेःइली। ङाइ ल्‍हाव्‍ह्‌दैबाङ्‌कोः मान्‍तालम्‌कःसै छ्युङ्‌ह्‌नेःआलाङ्‌स ओउःत झ्‍यान्‍ते ओउःमयः नीङ्‌कः झाक्इली। 20ङाइ ङ्‌हा तोओलेः गीलतेःनानी। मालीक्‌सै नोकरी ताङ्‌ह्ओ खेःल ओउःत झ्‍यान्‍ते ङाकायःपाय् मान्‍तालम्इ लीह्‌सीःओ बयःनाःताङः त खेःया नीङ्‌कायःमा ओउःतलेः लीह्‌सीःओ बयःतेःनै। फेरी ङाकोः तोओ कुरा ओउःमयः ग्‍यानै त खेःया नीङ्‌कोः कुराकः ग्‍यानै। 21ओउःमयःइ ङाकायः ल्‍होक्ओ आपाकायः तय्‍ह्‌माःत झ्‍यान्‍ते नीङ्‌कायः पेमालो हायःतेःनै। 22ङाइ ओउःमयःकायः पेतो स्‍यान्‌ती तोलाङ् वाङ्आलाङः ओउःत झ्‍यान्‍ते ओउःमयःइ चीःतीलेः रेव्ओ जाङ्‌ह्‌धै मुनै। ङा तोलाङ् वाङ्ओ खेःल त खेःया पेओ काम् चीःमाःत रेव्ओ जाङ्‌ह्‌चानी खेःतो ओहाङःसै ओउःमयःकायः गाल्‌तुम्‌ती तोसा स्‍याव्‌ल। 23ङाकः अह्र्ओलम्‌पाय् ङाकोः आपाकःमा अह्र्नै। 24ओउःमयःकायः ङाइ अरुइ जाङ्‌ह्‌सा खाय्‌मालो ग्‍याङ्‌ह्‌राय्‌लम् छ्यानःआलाङःसु ओउः च्‍यवःआक्‌तीको ङाकःमा ङाकोः आपाकःमा अह्र्धै मुधाङ्‌नै ओउःत झ्‍यान्‍ते ओउःमयःकायः गाल्‌तुम्‌ती तोसा स्‍याव्‌नाः। ओउः ग्‍याङ्‌ह्‌राय्‌लम् छ्यानःआक्‌ङुसुलु त खेःया ओउःमयःकायः गाल्‌तुम्‌ती तोसा स्‍याव्‌ल। 25इतलेः ओउःमयःकोः आखरःहाङः लेखती मुनाः ‘ङाइ दोह्‌मा हायःमाःत ङाकः ओउःमयः अह्र्नै’ त दाय्‍ह्‌ती लेखओ ओउः कुरा द्याह् ताप्‌तो स्‍याव्ओ लेःआः 26लोने ङाकोः आपाकःसै ओउःकोः लव्‍ह्‌ती बयःसा ग्‍वालामः ल्‍होक्‌नेःनाङ्‌स। ओउःइ आपाकःसै वाङ्‌ती दोङ् कुरा चीःती ङाकायः पाःती तोचाःताङः। 27नीङ्‌मा ङाकुस् ङ्‌हाहाङःसै मुती झ्‍यान्‍ते ङाकायः पाःती तोनेःनाङ्‌स”

युहना 16
1“इ कुरा नीङ् क्रम्‌माःत ग्रमःत मुसाकायः तोनेःनाङ्‌स। 2लोने यहुदीकोः थनःओ कीम्‌सै क्‍लाःतेःनै। माः रैस नीङ्‌कायःपाय् मान्‍तालम्इ ‘लौ ङाइ परमेस्‍वर्‌कोः काम् जाङ्‌ह्‌नाङः’ त दाय्‍ह्‌ती लोने सात्‌तेःनै बा 3दोह् हायःती दाय्‍ह्‌सा ओउःमयःइ ङाकायःमा ङाकोः आपाकायःमा तय्‍ह्‌ताङःचल। 4ओहाङःसैको ओउः पेमालो हायःतोक्‌हाङः ‘लौ एतलेः तोआतय्‍ही बा’ त नीङ्इ गीलसा थेङा ङाइ द्याह् तोनेःनाङ्‌स। ङ्‌हासै ङा नीङ्‌कुस् मुधाङ्ओ बेलाहाङः ओउः कुरा तोआक्‌नाङ्‌सल। 5द्याह् ङाकायः ल्‍होक्ओ आपाकःताङ् पाय्‍ह्‌ती आल्‌नाङः। ‘आल्‌सापाय् आल्‌नाङः’ त ङाइ तोनेःनाङ्‌सतो ङाकायःपाय् ‘लौ गाःताङ्‌तेः आल्‌तेःनाः’ त सुइमा व्‍हत्‌तेःनाङ्‌सल। 6ओउः कुरा तोआक्‌तीको नीङ् ल्‍हुङ्‌हाङः लीह्‌तेःनानी। 7दोङ्‌सी दाय्‍ह्‌भनाङ् ङा आल्‌नाङः त खेःया नीङ्‌कायः पेलेःनाः दोह् हायःती दाय्‍ह्‌सा ङा आल्‌ङल त खेःया परमेस्‍वर्‌कोः ग्‍वालामः नीङ्‌कायः लव्‍ह्‌लाङ् वाङ्‌ल। ङा आल्आक्‌तीको ओउःकायः नीङ्‌कःताङ् ल्‍होक्‌नाङः। 8फेरी परमेस्‍वर्‌कोः ग्‍वालामः वाङ्आक्‌तीको ओउःइ ल्‍हाव्‍ह्‌दैबाङ्‌हाङः मुओलम्‌कायः ‘दोह् दोह्‌खे रेव्ओलेः दोह् दोह्‌खे पेओलेःमा रेव्‌झ्‍याङ्‌कोः दोह् न्‍युम्‍ह्‌तो स्‍याव्‌नाः’ तमा छ्यानःनाःथास। 9दोह् रेव्‌तो दाय्‍ह्‌सा ओउःमयःइ ङाकायः ङ्‌हाम्‌ताङःल ओउःपाय् रेव्‌तो लेःआः त दाय्‍ह्‌ती छ्यानःनाःथास। 10फेरी ङा आपाकःताङ् आल्‌तोक्‌हाङः नीङ्इ च्‍यवःतेःनाङ्‌सल ओउः बेलाहाङः परमेस्‍वर्‌कोः ग्‍वालामः ‘दोह्‌लो पेओलेः’ तमा छ्यानःनाःथास। 11ओहाङःसै इ ल्‍हाव्‍ह्‌दैबाङ्‌कोः सैतान् राजा न्‍युम्‍ह्‌ताक्ओहाङः रेव्‌झ्‍याङ्‌कोः न्‍युम्‍ह्ओपाय् दोह्‌लो तमा छ्यानःनाःथास।
12लौ नीङ्‌कायः अरु स्‍यान्‌ती तोसा खेःतो ओउःलेः नीङ्इ द्याह् चीःसा खाय्‌तेःधाङ्‌तेःनीली 13लोने परमेस्‍वर्‌कोः दोङ् कुरा स्‍यान्ओ ग्‍वालामः वाङ्ओहाङः ओउःइ सबै दोङ् कुरा स्‍यान्‌तेःनै। लयःकोः ल्‍हुङ्‌सै चीःओ कुरा खेःल दोह्‌लो ओउःइ सायःनौ ओउःलेः स्‍यान्‌ती तोनौ फेरी लोने ताप्‌ती स्‍याव्‌सा कुरामा छ्यान्‍ह्‌नौ। 14ङाइ छ्यानःओ कुरा ओउःइ नीङ्‌कायः छ्यानःतेःनै इत हायःतीलेः ओउःइ ङाकायः ताङ्‌ह्‌ताक्‌नाःताङः। 15दोह्‌लो ङाकोः आपाकोः मुनाः ओउःलेः ङाकोःमा मुनाः ओउःत झ्‍यान्‍ते ङाइ छ्यानःओ कुरापाय् ‘परमेस्‍वर्‌कोः ग्‍वालामःइ नीङ्‌कायः छ्यानःतेःनै’ त तोनेःआलाङ्‌स। 16लौ देङी ङा आपाकःताङ् आल्‌नाङः ओउःत झ्‍यान्‍ते यात् चीच्‍योक्‌कायः च्‍यवःतेःनाङ्‌सल ओहाङःसै ङाकायः फेरी च्‍यवःतेःनानाङ्‌स” त दाय्‍ह्‌ती लयःकुस् वाह्ओमयःकायः तोआकान्। 17ओउःत तोआक्‌तीको “लौ दोह् हायःती ओउःइ ‘यात् चीच्‍योक्‌कायः च्‍यवःतेःनाङ्‌सल ओहाङःसै फेरी च्‍यवःतेःनानाङ्‌स’ त दाय्‍ह्‌तीमा फेरी ‘ङा आपाकःताङ् आल्‌नाङः’ तमा दाय्‍ह्‌ती तोआताङी” त दाय्‍ह्‌ती ओउःमयः नोःकाय्आकाय् 18“इ यात् चीच्‍योक्‌कायः च्‍यवःमालो दोह् कुरा त चीःतय्‍ह्‌नीली” तमा नोःकाय्‌ती मुइतो 19ओउःमयः व्‍हत्‌सा कुरा येसुइ चीःती “लौ ओउः ङाइ मेस् तोओ ‘यात् चीच्‍योक्‌कायः च्‍यवःतेःनाङ्‌सल लोने फेरी च्‍यवःतेःनानाङ्‌स’ दोह् कुरालो त नोःकाय्‌तेःनै माःर। 20लौ दोङ्‌सी दाय्‍ह्‌भनाङ् ङा आल्‌ती झ्‍यान्‍ते नीङ् र्‍याःती क्रेस्‌तीलेः मुतेःनै। नीङ्‌खे र्‍याःती क्रेस्‌ती मुतोक्‌हाङः अरु ल्‍हाव्‍ह्‌दैबाङ्‌कोः मान्‍तालम्‌खे चोङाय्‌तोलेः मुनै। ओउः बेलाहाङःपाय् नीङ् लीह्‌तो मुतेःनै लोने चोङाय्‌तेःनै। 21ओउःलो लेखालेः आमाइ चोः ओत्‌तोक्‌हाङः जीक्‌ती र्‍याःनाः ओत्आक्‌तीको ओउः जीक्ओ म्‍हेःती चोङाय्‌ती स्‍याव्‌नाः चोः दोःती झ्‍यान्‍ते चोङाय्‌नाः। 22ओउःलो लेखा नीङ्‌मा द्याह् लीह्‌तेःनानी लोने ङा फेरी क्रुस्‌नेःनाङ्‌स ओहाङःसैको नीङ् आन चोङाय्‌तेःनै सुइमा नीङ्‌कायः लीह्‌ताक्‌तेःइली। 23ओउः बेलाहाङः ङाकायः दोह्‌तमा व्‍हत्‌सा परतेःइली। दोङ्‌सी दाय्‍ह्‌भनाङ् दोह् दोह्‌तेः ङाकोः मय्‍ङ् पेह्‌ती परमेस्‍वर्‌ आपाकः तेतेःचै ओउःलेः बयःतेःनै बा। 24द्याह्‌च्‍युक्‌हाङः ङाकोः मय्‍ङ् पेह्‌ती तेतेःधाङ्‌तेःइली द्याह्‌हाङःसै ङाकोः मय्‍ङ् पेह्‌ती तेन दा ओहाङःसै नीङ् दोःती झ्‍यान्‍ते जुगाङ् चोङाय्‌तोलेः मुतेःनै। 25ङाइ ङ्‌हा तोओ कुरा चीःसाकायः चाक्‌तो लेःआः लोने वाङ्‌सा बेलाहाङः ङाइ आपाकोः कुरा दोङ्‌ह्‌तोलेः तोनेःनाङ्‌स। 26ओहाङःसै ओनम्‌कोः दीन्‌हाङः ङाकोः मय्‍ङ् पेह्‌ती लयःकायः तेतेःनै। नीङ्‌कायः ङा आपाकः पाःती तेसा परङल 27दोह् हायःती दाय्‍ह्‌सा ङाकोः आपाइमा नीङ्‌कायः राप्‌तेःनै। ङाकायः राप्‌ती ‘लौ ओउःपाय् परमेस्‍वर्‌कःसै वाङ्ओआः’ ततेः ङ्‌हाम्‌तेःनेःनाङ्‌स ओउःत झ्‍यान्‍ते ङाकोः परमेस्‍वर्‌ आपाइ राप्‌तेःनै। 28ङा आपाकःसै आल्‌ती ल्‍हाव्‍ह्‌दैबाङ्‌ताङ् दाह्आलाङः। द्याह् इ ल्‍हाव्‍ह्‌दैबाङ् फेती आपाकःताङ् पाय्‍ह्‌नाङः” त दाय्‍ह्‌ती येसुइ तोआथास। 29“लौ द्याह् नाङ्इ दोङ्‌ह्‌तोलेः तोतेःनाःताङी इ कुरापाय् चीःसा चाक्‌तो खेःल। 30‘नाङ्इ मान्‍ताकोः ल्‍हुङ्‌कोः कुरामा सबै कुरामा चीःती झ्‍यान्‍ते सुइमा नाङ्‌कायः व्‍हत्‌सा परइली’ त ङीइ द्याह् चीःनाङःसु ओउःत हायःती नाङ्‌पाय् ‘दोङ्‌सीलेः परमेस्‍वर्‌कःसै वाङ्ओतेःआः’ त ङीइ ङ्‌हाम्‌नाङःसु” त दाय्‍ह्‌ती येसुकुस् वाह्ओमयःइ तोआथै। 31“लौ नीङ्इ द्याह् ङ्‌हाम्‌तेःनेःनाङ्‌स र। 32देङी नीङ् रुनःधती क्रव्‌सा बेलाहाङः दाह्‌खेःआ माः रैस दाह्ओआः बा। ओउः बेलाहाङः नीङ् सबै ङाकायः फेती लःलयःकोः कीम्‌ताङ् पाय्‍ह्‌तेःनै। ङाकायःपाय् नीङ्‌खेइ फेतेःनेःनाङ्‌स फेआक्‌तीको ङा लयःझुङ्आले मुङल ङाकुस् ङाकोः परमेस्‍वर्‌ आपाखे मुनाङःच। 33नीङ् ल्‍हुङ् र्‍याङःमाःतोलेः धोमाय्‌तो मुसाकायः इ कुरा तोनेःनाङ्‌स। ल्‍हाव्‍ह्‌दैबाङ्‌हाङः मुतोक्‌हाङः आन लीह्‌सीःओ च्‍यवःतेःनानी। ओउःततेः च्‍यवःतेःनानी ग्रमःत मुन दा ङाइ ल्‍हाव्‍ह्‌दैबाङ्‌कोः मुओलम्‌कायः क्‍लीमःआलाङः” त दाय्‍ह्‌ती येसु दाय्‍ह्आ।

युहना 17
1ओहाङःसैको ओउःत दाय्‍ह्आक्‌तीको येसु लाङ्‌काताङ् त्‍याव्‌ती “लौ आपाय ओउः बेला दाह्ओआः बा। नाङ्‌कोः चोःकायः ताङ्‌ह्‌ताक्उ दा ओहाङःसै ओउःइ नाङ्‌कायः ताङ्‌ह्‌ताक्‌तेःनाः। 2नाङ्‌कोः चोःकायःपाय् सबै मान्‍तालम् रौ जीङः दोःताक्‌सा ग्‍वम् बयःतेःआकान्। ओहाङःसै सुसु चोःकायः बयःतेःआकान् ओउःकायःलेः ओउःइ रौ जीङः दोःताक्‌नाःथास। 3दोःआक्‌तीको ओउः जीङः दोःओलम्इ नाङ् दोङ् परमेस्‍वर्‌कायःमा नाङ्इ ल्‍होक्ओ येसु ख्रीस्‌कायःमा पेतो तय्‍ह्‌नानी। 4लौ नाङ्इ बयःओ काम् दप्‌तोलेः जाङ्‌ह्‌ती नाङ्‌कायःपाय् ल्‍हाव्‍ह्‌दैबाङ्‌हाङः ताङ्‌ह्‌ताक्‌नेःआलाङ्। 5द्याह् ङा ङ्‌हासै ल्‍हाव्‍ह्‌दैबाङ् जाङ्‌ह्‌धाङ्‌माःखाकोः नाङ्‌कुस् मुओ बेलाहाङःलो लेखालेः द्याह् ङाकायः ताङ्‌ह्‌ताक्‌ची दा। 6इमयःलेः नाङ्इ ल्‍हाव्‍ह्‌दैबाङ्‌हाङः मुओलम्‌कःसै छ्युङ्‌ह्‌ती बयःतेःआची। इ बयःओलम्‌कायःपाय् ङाइ नाङ्‌कोः कुरा छ्यान्‍ह्आलाङःसु। ओउःमयः ङ्‌हा नीङ्‌कोःलेः खेःइतो ओहाङःसैको ङाकायःतेः बयःतेःआची। 7ओहाङःसैको ङाकायः बयःओ कुरापाय् ‘सबैलेः आपाकःसै वाङ्ओआः’ त चीःनानी। 8दोह् हायःती दाय्‍ह्‌सा नाङ्इ बयःओ कुरा ङाइ सबै तोआलाङःसु तोआक्‌तीको ओउःमयःइ ङ्‌हाम्‌ती सायःती झ्‍यान्‍ते ङाकायःपाय् ‘आपाकःसै ल्‍होक्ओआः’ तमा ‘ओउःकोः कुरा आपाकोः लेःआः’ तमा द्याह् पेतोलेः चीःनानी। 9ओउःमयःकायः ङाइ नाङ्‌कः तेती तोनेःनाङ्। सबै ल्‍हाव्‍ह्‌दैबाङ्‌कोः मान्‍तालम्‌कायः तोनाङ्‌ल ङाकायः बयःओ मान्‍तालम्‌कायः ह ङाइ नाङ्‌कः तेती तोनेःनाङ्। 10नाङ्इ बयःओलम् नाङ्‌कोः लेःआः ङाकोःपाय् जुदालेः नाङ्‌कोः लेःआः नाङ्‌कोःमा जुदालेः ङाकोःआः। फेरी ओउःमयःइ ङाकायः ताङ्‌ह्‌ताक्‌नाःताङः। 11द्याह् ङाखे नाङ्‌कःताङ् वाङ्‌ती ल्‍हाव्‍ह्‌दैबाङ्‌हाङः ज्‍याङःतो मुङल ओउःमयःखे ल्‍हाव्‍ह्‌दैबाङ्‌हाङः मुधाङ्‌नै। लौ छय्‍ङ्‌तो आपाय ओउःमयःकायः नाङ्‌कोः ग्‍वम्इ पेतो ओम्‌पायःती गम्उसु दा। ओहाङःसै नीचीलो लेखा ओउःमयः ल्‍हुङ् ब्राङ्‌तो मुनै। 12ओउःमयःकुस् मुतोक्‌हाङः ङाइ नाङ्‌कोः मय्‍ङ्‌कोः ग्‍वम्इ ओम्‌पायःती गम्‌ङुसुतो ओउःमयःकोः सुमा वाय्इली ओउः वाय्‌सा खेःओ चाक् ह वाय्ओआः बा। आखरःहाङः लेखओ कुरा ताप्‌तो स्‍याव्‌साकायः ओउः मान्‍ता वाय्‌तोलेः स्‍याव्आ। 13लौ नाङ्‌कःताङ् द्याह् वाङ्‌नाङः। नाङ्इ बयःओलम् ङालो लेखा जुगाङ् ल्‍हुङ् चोङाय्‌ती स्‍याव्‌साकायः ङाइ ल्‍हाव्‍ह्‌दैबाङ्‌हाङः मुधाङ्‌तोक्‌हाङः इ कुरा तोनाङःसु। 14ओउःमयःकायः नाङ्‌कोः स्‍यान्ओ कुरा तोङुसुतो ओउःमयःपाय् ङालो लेखा ल्‍हाव्‍ह्‌दैबाङ्‌कोः खेःइली। ङालो लेखालेः ल्‍हाव्‍ह्‌दैबाङ्‌कोः मान्‍तालम् ओउःमयःकः अह्र्नै। 15ङाकायः बयःओमयःकायः ‘ल्‍हाव्‍ह्‌दैबाङ्‌सै आलःउसु दा’ त तेती तोनाङ्‌ल ‘ओउःमयःकायः ओउः रेव्ओचाक्‌सै ओम्‌पायःतीलेः गम्उ दा’ त तोनेःनाङ्। 16ङालो लेखा ओउःमयःमा ल्‍हाव्‍ह्‌दैबाङ्‌कोःलेः खेःइली। 17नाङ्‌कोः दोङ् कुरा स्‍यान्‌ती ओउःमयःकायः नाङ्‌कोः छय्‍ङ्‌तो मान्‍तालम् स्‍याव्‌साकायः पेङ्‌कलःती गम्उसु दा। 18नाङ्इ ङाकायः ल्‍हाव्‍ह्‌दैबाङ्‌कोः मान्‍तालम्‌कःताङ् ल्‍होक्‌तेःआची ओउःतलेः ङाइ ओउःमयःकायः ल्‍हाव्‍ह्‌दैबाङ्‌कोः मान्‍तालम्‌कःताङ् ल्‍होक्आलाङःसु। 19ओउःमयःइ नाङ्‌कोः दोङ् कुरा चीःती ‘नाङ्‌कोः छय्‍ङ्‌तो मान्‍तालम् स्‍याव्‌साकायः पेङ्‌कलःती गम्‌पाःथास’ त दाय्‍ह्‌ती ङामा पेङ्‌कलःती मुनाङः। 20फेरी इहाङः मुओलम्‌कायः ह ङा तेङल लोने इमयःकोः थोल्‍ह्‌ती तोओ कुरा सायःआक्‌तीको अरुइ ङाकायः ङ्‌हाम्‌नाःताङः ओउःमयः लोने ङ्‌हाम्ओलम्‌कायःमा तेती तोनेःनाङ्। 21इतलेः तेनाङः बा आपाय नीची ल्‍हुङ् ब्राङ्‌नाःतय्‍ह्‌च ओउःतलेः ओउःमयः सबै यातैज्‍योः ल्‍हुङ्‌तुक् स्‍याव्‌ती नीचीकुस् ब्राङ्‌पै। ओहाङःसै एत च्‍यवःती अरु ल्‍हाव्‍ह्‌दैबाङ्‌कोः मान्‍तालम्इ ङाकायःपाय् ‘परमेस्‍वर्‌कःसै ल्‍होक्ओआः’ त ङ्‌हाम्‌नाःताङः। 22ओहाङःसैको गतलो नाङ्इ ङाकायः ताङ्‌ह्‌ताक्‌तेःआची ओउःतलेः ङाइ ओउःमयःकायःमा ताङ्‌ह्‌ताक्‌नाङःसु। नीचीपाय् ब्राङ्‌तोलेः मुनाःतय्‍ह्‌च ओउःतलेः ओउःमयःमा ब्राङ्‌तोलेः मुपै। 23ङा ओउःमयःकुस् ब्राङ्‌तीमा मुनाङी नाङ् ङाकुस् ब्राङ्‌तीमा मुनाःतय्‍ह्‌च ओउःत झ्‍यान्‍ते ओउःमयः जुगाङ् यातै ल्‍हुङ् स्‍याव्‌पै। ओहाङःसैको एत च्‍यवःती ङाकायःपाय् ‘परमेस्‍वर्‌इ ल्‍होक्ओआः’ त ल्‍हाव्‍ह्‌दैबाङ्‌कोः मान्‍तालम्इ चीःनानी। फेरी नाङ्इ ङाकायः राप्ओलो लेखालेः ‘ओउःमयःकायः परमेस्‍वर्‌इ राप्‌नाःथास’ तमा चीःनानी। 24लौ आपाय ङाकायः बयःओ मान्‍तालम्‌पाय् ‘ङाकुस् मुपै’ त ङा झाक्‌ती तेनाङः ओहाङःसै नाङ्इ ङाकायः ताङ्‌ह्‌ताक्ओहाङः ओउःमयःइ च्‍यवःसा खाय्‌नानी। ल्‍हाव्‍ह्‌दैबाङ्‌कोः जाङ्‌ह्‌धाङ्‌माःखाहाङःसै नाङ्इ राप्‌तेःआची ओउःत हायःतीतेः ङाकायः ताङ्‌ह्‌तेःताक्‌नाःची। 25लौ नाङ् जय्‌कुमःओ आपाय ओउः ल्‍हाव्‍ह्‌दैबाङ्‌हाङः मुओलम्‌खेइ नाङ्‌कायः तय्‍ह्‌तेःल ङाखेइ तय्‍ह्‌नेःनाङ्। ङाकायःपाय् नाङ्इ ‘ल्‍होक्ओआः’ त इ ङाकुस् वाह्ओमयःइ चीःनानी। 26ओउःमयःकायः नाङ्‌कोः कुरा ङाइ छ्यानःआलाङःसु लोनेमा छ्यानःलेःनाङःसु। ओहाङःसैको गतलो नाङ्इ ङाकायः राप्‌तेःनाःची ओउःतलेः ओउःमयःकोः राप्ओ ल्‍हुङ् मुपै। ओहाङःसै ङा ओउःमयःकुस् ब्राङ्‌नाङी” त दाय्‍ह्‌ती येसुइ परमेस्‍वर्‌ आपाकः तेती तोआकान्।

युहना 18
1ओहाङःसैको एत तोआक्‌तीको येसुमा ओउःकुस् वाह्ओमयःमा ग्‍ल्‍युङ्‌ह्‌ती कीद्रोन् त तोओ तीः त्‍यात्‌ती यात्‌ज्‍योः फुल्‌बारी पोक्‌ती वाङ्आकाय्। 2ओउः फुल्‌बारीताङ् येसु लयःकोः वाह्ओमयःकुस् ङ्‌हा आन वाङ्‌झुङ्आकाय् ओउःत झ्‍यान्‍ते येसुकायः सात्‌लाङ् दाक्‌सा बोङःओ यहुदस् इस्‍करीयोत्इ “येसु गाःताङ् आल्आकाय्” त चीःआकान्। 3“येसु ओउःताङ् आल्आकाय्” त चीःती यहुदस्इ सीपाहीलम्‌मा ताङ्‌ह्ओ पुरोहीत्‌कोः मान्‍तालम्‌मा फरीसीलम्‌कोः मान्‍तालम्‌मा गोत्‌ती चेर्‌कोः बत्तीमा च्‍युपेमा लात्‌ती येसुकःताङ् वाङ्आकाय्। 4वाङ्‌तोक्‌हाङः येसुइ लयःकायः “दोह्‌तलो स्‍याव्‌नाः” त चीःसतो ओउः यहुदस्‌कुस् वाह्ओलम्‌कायः क्रुस्‌लाङ् आल्‌ती “लौ सुकायःतेः बोङःतेःनानी” त दाय्‍ह्‌ती व्‍हत्आकान् 5“नासरेत् गाव्‌कोः येसुकायः” त दाय्‍ह्‌ती त्‍याङ्इतो “ओउःपाय् ङा लेःआः” त दाय्‍ह्‌ती येसुइ ओउःकायः चुम्‌लाङ् वाङ्ओमयःकायः तोआथास। ओउःमयःकुस् येसुकायः दाक्‌सा बोङःओ यहुदस् मुओ। 6ओहाङःसैको ओउःपाय् “ङा लेःआः” त येसु दाय्‍ह्आक्‌तीको ओउःकायः चुम्‌लाङ् वाङ्ओमयः सबै सीरी ध्‍यव्‌तो स्‍याव्‌ती साःताङ् तोन्आकाय्। 7“लौ सुकायःतेः बोङःनानी” त येसुइ फेरी दाय्‍ह्‌ती व्‍हत्‌थासतो “नासरेत्‌कोः येसुकायःलेः” त दाय्‍ह्‌ती त्‍याङ्आकाय् 8“ओउःपाय् ‘ङा लेःआः खेःनाङः’ त ङ्‌हा तोनेःनाङ्‌सतो। नीङ्इ ङाखेकायःतेः बोङःतेःनानानाङ्‌स त खेःया इ ङाकुस् वाह्ओमयःखेकायः चुम्‌माःत आल्‌पै” त दाय्‍ह्‌ती येसुइ तोआथास। 9ओउःइ ङ्‌हालेः आपाकायः तोओ “ङाकायः बयःओलम्‌कोः सुमा वाय्इली” त दाय्‍ह्ओ ताप्‌साकायः ओउःतलेः तोआथास। 10ओउः बेलाहाङः यात्‌चाक् प्रधान् पुरोहीत्‌कोः नोकरी सीपाहीकुस् मुओ ओउःकोः मय्‍ङ् “माल्‍कुस्” त तोओ खेःतो। ओहाङःसैको येसुइ तोतोक्‌हाङः पत्रुस्इ लयःकोः च्‍युपे प्‍युक्‌ती ह्रीह्‌ती माल्‍कुस्‌कायः ङोय्‌सैकोः नो ग्रेह्‌ती वाय्आथै। 11माल्‍कुस्‌कोः नो ग्रेह्‌ती वाय्ओ त येसुइ च्‍यवःती “लौ नाङ्‌कोः च्‍युपे दाप्‌ताङ् द्यान्‍ह्‌ती काउ दा। ङाकोः आपाइ बयःओ लीह्‌सीःओ गोरःसा खेःतो बा” त दाय्‍ह्‌ती पत्रुस्‌कायः तोआकान्। 12एत तोआक्‌तीको ओउः सीपाहीलम्‌कोः हवल्‌दार्‌इमा ओउः यहुदीकोः मान्‍तालम्इमा येसुकायः चुम्‌ती पानःआक्‌तीको 13ङ्‌हा कयाफा त तोओकोः तो आनास्‌कःताङ् आलःआकानी। ओउः बेलाहाङः कयाफा त तोओपाय् यहुदीलम्‌कोः प्रधान् पुरोहीत्‌लेः खेःतो। 14ओउःइ अनम्‍ह्‌लो यहुदीकोः हुम्ओ मान्‍तालम्‌कायः “लौ यात्‌चाक् सबै दल्‌ताक्‌साकायः यात्‌चाक् सीसा खेःतो” त तोआथास। 15ओहाङःसैको येसुकायः लात्‌ती आलःतोक्‌हाङः सीमोन् पत्रुस्‌मा यात्‌चाक् अरु येसुकुस् वाह्ओमयःइमा येसुकायः गुल्‍ह्आकाचु। ओउः अरु गुल्‍ह्ओ मान्‍ताइखे ओउः प्रधान् पुरोहीत्‌कायः तय्‍ह्‌ती झ्‍यान्‍ते येसुकुस् ओउः पुरोहीत्‌कोः आङ्‌गन्‌हाङः पोक्‌तो 16पत्रुस्‌खे आङ्‌गन्‌कोः बाहीरहाङः मुआ। एत चीःती ओउः प्रधान् पुरोहीत् तय्‍ह्ओ मान्‍ता आङ्‌गन्‌कोः धोका राक्‌सा मोमःचोःकःताङ् वाङ्‌ती “लौ ओउःमा पोक्‌पाः” त दाय्‍ह्‌ती पत्रुस्‌कायः पोक्‌ताक्आकान्। 17ओहाङःसैको पत्रुस् पोक्‌ती वाङ्‌तोक्‌हाङः “लौ ओउः पानःती वानःओ मान्‍ताकुस् नाङ्‌मा वाह्ओ खेःतेःनाः माःर” त दाय्‍ह्‌ती ओउः मोमःचोःइ पत्रुस्‌कायः व्‍हत्‌थातो “अहः खेःङल” त दाय्‍ह्‌ती पत्रुस् त्‍याङ्आ। 18फेरी न्‍याम् झ्‍युङ्‌ती झ्‍यान्‍ते यात्‌नीस् सीपाहीलम्‌मा नोकरीलम्‌मा म्‍हेः मुत्आक्‌तीको म्‍हेः गारःती मुओ खेःइतो पत्रुस्‌मा ओउःमयःकःताङ् गारःलाङ् वाङ्आ।
19ओहाङःसैको ओउः प्रधान् पुरोहीत्इ “लौ नाङ्इ तोओ स्‍यान्‌राय् दोह्‌लो। नाङ्‌कुस् वाह्ओमयः सुलो” त दाय्‍ह्‌ती येसुकायः व्‍हत्‌थातो 20“ङाइ स्‍यान्ओ कुरा सबैकःहाङः फुती तोआलाङः बा। थनःओ कीम्‌हाङःमा मन्‍दीर्‌हाङःमा गाःहाङःमा यहुदीलम् हुम्‌लाङ् वाङ्‌नै ओहाङः ङाइ गलमा स्‍यान्आलाङः। मान्‍ताइ चीःमाःत अरु कुरापाय् गलमा स्‍यान्‌ती नोःङल। 21ओउःत झ्‍यान्‍ते दोह् हायःतीतेः ङाखेकायः व्‍हत्‌तेःनाःची ङाइ स्‍यान्ओ कुरा सायःओलम्‌खेकायः व्‍हत्उसु दा। ओउःमयःइ ङाकोः स्‍यान्‌राय् चीःनानी बा” त दाय्‍ह्‌ती येसु त्‍याङ्आ। 22ओउःत त्‍याङ्आक्‌ती यात्‌चाक् पुरोहीत्‌कोः सीपाहीइ येसुकायः खेन्‌हाङः क्रुत्इ यात् प्र्याक् घान्‌ती “लौ प्रधान् पुरोहीत्‌कायः एतलेः त्‍याङ्‌ती नोःसा स्‍याव्‌नाः र जुगु” त दाय्‍ह्‌ती जान्आथै। 23“ङाइ रेव्ओ कुरा नोःओ त खेःया ओउः कुरालेः खुनःती छ्यानःची उया। खेःल ङाइ पेओ तोओ त खेःया ङाकायः घान्‌सा दोःतेःल” त दाय्‍ह्‌ती येसुइ तोआथै। 24ओउःत तोआक्‌तीको येसुकायः पानःती आनास्इ ओउः अरु प्रधान् पुरोहीत् कयाफा त तोओकःताङ् येसुकायः ल्‍होक्आथै। 25ओहाङःसैको ओउःत नोःकाय्‌तोक्‌हाङः पत्रुस्‌पाय् आङ्‌गन्‌हाङः म्‍हेः गारःती चीङ्‌ती मुओ खेःतो ओउःकुस् मुओलम्इ ओउःकायः योती “लौ नाङ्‌पाय् यात्‌चाक् ओउः पानःओ मान्‍ताकुस् वाह्ओमयः खेःलेःतेःनाः माःर” त दाय्‍ह्‌ती व्‍हत्‌थातो “खेःङल है” त पत्रुस् दाय्‍ह्‌ती त्‍याङ्आ। 26ओउःत तोतोक्‌हाङः ओउः पुरोहीत्‌कोः नोकरीलम्‌कःगन यात्‌चाक् ओउः ङ्‌हा नो वाय्ओ माल्‍कुस्‌त तोओकोः लयःमयःचोङ्‌पाय् ओहाङः सायःती मुओ खेःतो। ओउःइ पत्रुस्‌कोः कुरा सायःती “लौ नाङ्‌कायःपाय् फुल्‌बारीहाङः ओउःकुस् वाह्ओ च्‍यवःनेःआलाङ् माःर” त दाय्‍ह्‌ती तोआथै। 27“अहः मुङल बा” त दाय्‍ह्‌ती पत्रुस् फेरीलेः माःती त्‍याङ्आ। ओउःत माःती त्‍याङ्‌माकादे वाः गोःमाकादे। 28ओहाङःसैको न्‍याम् थोङ्‌खयःओहाङः येसुकायः कयाफाकःसै आलःती ओउः रोमी त तोओ मान्‍तालम्‌कोः अन्‍चलादीस्‌कोः दर्‌बाल्‌ताङ् दाक्‌ती वानःनीतो ओउःकायः लात्‌ती वानःओ यहुदीयालम्‌पाय् दर्‌बाल्‌ताङ् पोक्इली “छ्यात् जाङ्‌ह्ओ बेलाहाङः रोमी मान्‍ताकोः कीम्‌ताङ् पोक्‌सा स्‍याव्‌ल क्रीसीःनाः” त दाय्‍ह्‌ती जवआकानी ओउःत झ्‍यान्‍ते “च्‍योल्ओ दीन्‌कोः भोस् जेःसा दोःपाङी” त दाय्‍ह्‌ती ओउःमयः पोक्‌सा ग्‍याइली। 29ओउःत खेःओ ओउः रोमी अन्‍चलादीस् पीलातस्‌त तोओ ओउःमयःकुस् नोःलाङ् ग्‍ल्‍युङ्‌ह्आ। “लौ इपाय् दोह् रेव्‌तो हायःती झ्‍यान्‍ते नीङ्इ गाल्‌तुम्‌तीतेः तोतेःनानी” त दाय्‍ह्‌ती पीलातस्इ व्‍हत्आथास। 30“ओउःपाय् पेमालो खेःल त खेःया ङीइ नाङ्‌कःताङ् दाक्‌माआक्‌ङुसुलु खेःतो” दाय्‍ह्‌ती ओउः यहुदीकोः मान्‍तालम्इ त्‍याङ्आकाय्। 31“लौ उया ओउःकायः आलःनु दा। लयःकोः ऐन्‌हाङः मुओ कुरा तोती ओउःकायः तय्‌छनःती योनु” त दाय्‍ह्‌ती पीलातस्इ तोआथास “खेःल नीङ् रोमी मान्‍तालम्इ ङीकायःपाय् रेव्‌तो हायःओ मान्‍तालम् सात्‌सा ताक्‌ताङीली” त दाय्‍ह्‌ती दाय्‍ह्आकाय्। 32ओउःमयःखेइ येसुकायः क्‍ल्‍याय्ओ सीङःहाङः सात्‌सा बोङःआकानी येसुकोः ङ्‌हा तोओ कुरालो लेखालेः। 33ओहाङःसैको पीलातस्‌खे भीत्र आल्‌ती येसुकायः नोःताक्‌साकायः गोत्आकान्। “लौ नाङ्‌पाय् यहुदीकोः राजालेःतेः खेःतेःनाःया खेःतेःलया” त दाय्‍ह्‌ती येसुकायः व्‍हत्‌थातो 34“इ कुरापाय् नाङ्इ लयः व्‍हत्ओतेःया अरुइ तोती झ्‍यान्‍ते व्‍हत्ओतेःया” त दाय्‍ह्‌ती येसु दाय्‍ह्आ। 35“ङापाय् यहुदी मान्‍ता खेःङल बा। नाङ्‌कोः लयःकोः मान्‍तालम् लयःकोः ताङ्‌ह्ओ पुरोहीत्‌लम्इ ङाकःताङ् दाक्‌तेःआ। लौ नाङ्इ दोह् दोह्‌तेः हायःतेःआकान् ओउःतलेः तोधाङ्‌ची धाङ्” त दाय्‍ह्‌ती पीलातस् फेरी व्‍हत्आथै। 36“ङाकोः राजीपाय् इ ल्‍हाव्‍ह्‌दैबाङ्‌कोः खेःल ङापाय् ल्‍हाव्‍ह्‌दैबाङ्‌कोः राजा त खेःया ङाकायः दल्‌ताक्‌सा थेङा ङाकोः नोकरीलम् मीन्‍ह्‌काय्ओ खेःइतो। खेःल ङाकोः राजी इहाङःकोः खेःल बा” त दाय्‍ह्‌ती येसु त्‍याङ्आ। 37“लौ उया नाङ् राजातेः खेःतेःनाः यादो” त पीलातस् दाय्‍ह्‌ती “ङाकायःपाय् ‘राजा’ त नाङ्इ लयः तोतेःआची ओउःत स्‍याव्‌साकायः ङा मान्‍ताकोः चोः स्‍याव्‌ती ल्‍हाव्‍ह्‌दैबाङ्‌हाङः वाङ्आलाङः। वाङ्आक्‌तीको दोङ् कुरा स्‍यान्‌ती तोआलाङः। सुसुइ दोङ् कुरा चीःसा झाक्‌चानानी ओउःलेः ङाइ स्‍यान्ओ कुरा सायःनानी” त दाय्‍ह्‌ती येसुइ तोती 38“दोङ् कुरापाय् दोह्‌तलो” त पीलातस् दाय्‍ह्आ। इत दाय्‍ह्आक्‌तीको पीलातस्‌पाय् फेरीलेः यहुदीलम्‌कःताङ् बाहीरताङ् ग्‍ल्‍युङ्‌ह्‌ती वाङ्आ। वाङ्आक्‌तीको “लौ ओउःपाय् पेमालो काम् जाङ्‌ह्ओ त दोह्‌मा सायःङल। 39लौ नीङ्‌कोः छ्यात् वाङ्ओ बेलाहाङः यात्‌ज्‍योः झ्‍याल्‍खानहाङः गम्ओचाक्‌कायः ङाइ फेसा त जवओ मुनाः ओउःत झ्‍यान्‍ते ङाइ नीङ् यहुदीलम्‌कोः राजा फेचेःनाङ्‌सया” त दाय्‍ह्‌ती पीलातस्इ तोआथास 40ओउःत तोतोक्‌हाङः “खेःल ओउःखेकायः फेलाम् बरबाखेकायः फेताङी” त दाय्‍ह्‌ती गोःआकानी। ओउः बरबा त तोओ दाकु खेःतो।

युहना 19
1ओहाङःसैको येसुकायः लात्‌ती आलःती पीलातस्इ लाइ स्राप्‌ताक्आथै। 2स्राप्‌तोक्‌हाङः ओउः सीपाहीलम्इ चुःकोः पगरी क्‍याह्‌ती “लौ नाङ्‌कोः मुकुत्” दाय्‍ह्‌ती येसुकायः ल्‍हुप्आकानी। फेरी राजालो लेखा दुओ क्रमःनाय् लावताक्‌थातो 3“लौ यहुदीकोः राजाय” त दाय्‍ह्‌ती ङीःती गाक्‌ती ओउःकायः आन घान्आकानी। 4सीपाहीलम्इ येसुकायः घान्आक्‌तीको पीलातस् यहुदीलम्‌कःताङ् ग्‍ल्‍युङ्‌ह्‌ती “लौ ओउःपाय् फेरीलेः वानःनेःनाङ्‌स ‘ओउःइ दोह्‌मा रेव्‌तो हायःउलु’ त ङाइ सायःती झ्‍यान्‍ते नीङ्‌कायः छ्यानःनेःनाङ्‌स” त दाय्‍ह्‌ती येसुकायः वानःआकान्। 5ओउः चुःकोः फोङ्ओमा दुओ नाय्‌मा लावती वानःआकानी “लौ योउ दा। ओउः मान्‍तापाय् इलेःआः” त दाय्‍ह्‌ती पीलातस्इ हुम्ओलम्‌कायः छ्यानःउतो 6येसुकायः च्‍यवःआक्‌तीको “ओउःकायः क्‍ल्‍याय्ओ सीङःहाङः सात्उ क्‍ल्‍याय्ओ सीङःहाङः योकोःती सात्‌पाःथै” त दाय्‍ह्‌ती ओउः ताङ्‌ह्ओ पुरोहीत्‌मा ओउःकोः मान्‍तालम्इमा गोःआकानी “लौ उया ओउःकायः नीङ्इ क्‍ल्‍याय्ओ सीङःहाङः सात्‌लाङ् आलःउ। आल्‌सापाय् आलःउ दा ङाखेइ ‘ओउःइ दोह्‌मा रेव्‌तो जाङ्‌ह्ओ’ त सायःङल” त दाय्‍ह्‌ती पीलातस्इ तोथासतो 7“ओउःपाय् ‘ङा परमेस्‍वर्‌कोः चोः लेःआः ङ’ त तोआकास। ङीकोः ऐन्‌हाङः ओउःत तोओ मान्‍ताकायः ‘सात्‌साआः’ त जवनाङःसु” त दाय्‍ह्‌ती ओउः यहुदीलम् दाय्‍ह्आकाय्। 8ओउःत सायःआक्‌तीको पीलातस् न्‍हाङ्‌तोलेः रैती 9फेरीलेः दर्‌बाल् भीत्रहाङः पोक्‌ती येसुकायः “लौ नाङ् गाःहाङःसैकोःतेः ती” त दाय्‍ह्‌ती व्‍हत्उतो ती येसु दोह्‌तमा त्‍याङ्‌ल। येसुपाय् त्‍याङ्‌माःत झ्‍यान्‍ते 10“दोह् हायःतीतेः ङाकायः त्‍याङ्‌तेःचीली। नाङ्‌कायः ङाइ सात्‌सामा खाय्‌नाङः फेसामा खाय्‌नाङः एत चीःतेःउलुया” त दाय्‍ह्‌ती पीलातस्इ तोआथै। 11“अ परमेस्‍वर्‌इ आःताः दोःताक्‌माःत नाङ्इ ङाकायः दोह्‌मातेः हायःसा खाय्‌तेःचीली ओउःत झ्‍यान्‍ते ङाकायः नाङ्‌कःताङ् ल्‍हालाङ् दाक्ओ मान्‍तापाय् नाङ्‌सै न्‍हाङ्‌तोलेः रेव्ओ लेःआः बा” त दाय्‍ह्‌ती येसुइ तोआकान्। 12ओहाङःसैको एत सायःती पीलातस्‌खेइ येसुकायः फेसा बोङःउतो ओउः यहुदीलम्‌खे जुगाङ् ग्‍यामाःत “इकायः फेतेःचौ त खेःया नाङ्‌कोः माहाराजा नाङ्‌कः अह्र्तेःनाः। सुलो ‘ङा राजालेः खेःनाङः’ त दाय्‍ह्‌चाः ओउःलेः माहाराजाकोः दुस्‍मान् स्‍याव्‌नै” त दाय्‍ह्‌ती सबै गोःआकाय्। 13एत गोःओ सायःआक्‌तीको पीलातस्इ येसुकायः बाहीरताङ् बाङ्इ न्‍हाप्ओ थाव्‌ताङ् वानःती लयःकोः आधीकारीकोः थतीहाङः च्‍युङःआ। ओउः थाव्‌पाय् हेब्रैनीकोः नोःओहाङः “गबाथा” त तोओ लेःआः। ओहाङःसै ओउः बेलाहाङः न्‍याम् तोकोतोय्‍ह् त स्‍याव्आ छ्यात्‌कोः सुक्रबार्‌ दीन्‌हाङः। 14ओहाङःसैको येसुकायः यहुदीलम्‌कःताङ् फेरी वानःती “लौ योनु दा नीङ्‌कोः राजालेः” त दाय्‍ह्‌ती तोउतो ती 15“ओउःकायः सात्‌लाङ् आलःउ ओउःकायः क्‍ल्‍याय्ओ सीङःहाङः सात्‌लाङ् आलःउ” त दाय्‍ह्‌ती आन गोःआकाय्। “नाङ्‌कोः राजाकायः सीङःहाङः सात्‌सा झाक्‌तेःनैया” त दाय्‍ह्‌ती पीलातस्इ व्‍हत्‌थासतो “ङीकोः राजापाय् यातैज्‍याङ् रोमी माहाराजा ह खेःनाः” त दाय्‍ह्‌ती ओउः ताङ्‌ह्ओ पुरोहीत्‌लम् त्‍याङ्आकाय्। 16ओउःत हायःआक्‌तीको पीलातस्इ “लौ उया ओउःकायः आलःपाःथै” त दाय्‍ह्‌ती येसुपाय् हुम्ओ मान्‍तालम्‌कायः सात्‌साकायः ल्‍हाआकान्।
17ओहाङःसैको येसुकायः आलःआकानी आल्‌तोक्‌हाङः ओउःकोः योकोःती सात्‌सा सीङःपाय् ओउःइ लयः पास्‌ती लात्‌ती आलःती “पुह्‌रुमः” त तोओ राङ्‌ताङ् वानःआकानी। हेब्रैनी नोःओहाङः “गोल्‍गोथा” त तोआ खेःतो। 18ओहाङः दाह्‌ती वाङ्आक्‌तीको ओउः क्‍ल्‍याय्ओ सीङः पोत्आक्‌तीको सीङःहाङः खील् थाक्‌ती येसुकायः पालाहाःती योकोःताक्‌ती गम्आथै। ओउःकोः ङोय्‌सैमा यात्‌चाक् वेःसैमा यात्‌चाक् अरु नीस्‌चाक्‌कायःमा ओउःतलेः सीङःहाङः सात्‌साकायः गम्आथाच येसुखे पीस्‌हाङः गम्ओ खेःतो। 19येसुकायः योकोःती गम्‌तोक्‌हाङः पीलातस्इ “इ नासरेत्‌कोः येसु यहुदीकोः राजा” त लेखती येसुकोः क्‍ल्‍याय्ओ सीङःहाङः गम्आकान्। 20ओहाङःसैको ओउः येसुकायः सात्ओ राङ्‌पाय् यरुसालेम् द्याङ्‌तो मुती झ्‍यान्‍ते नाःतो यहुदीलम् वाङ्‌ती पीलातस्इ लेखओ कुरा योआकानी। ओउः कुरापाय् सुम् भासाहाङः लेखओ खेःतो हेब्रैनीकोः भासामा एलेनीकोः भासामा रोमीकोः भासाहाङःमा लेखओ खेःतो। 21ओउः कुरा च्‍यवःआक्‌तीको ओउः ताङ्‌ह्ओ पुरोहीत्‌लम् पीलातस्‌कःताङ् वाङ्‌ती “इ मान्‍ताकायः ‘यहुदीकोः राजा’ त लेखलाम् ‘इइ “ङा यहुदीकोः राजा लेःआः ङ” त लयःकायः तोओआः’ ओउःत लेखउ दा” त दाय्‍ह्‌ती तोथातो ती 22“लौ गतलो ङाइ लेखआलाङः ओउःलेः मुपाः” त दाय्‍ह्‌ती पीलातस् दाय्‍ह्आ। 23ओहाङःसैको येसुकायः क्‍ल्‍याय्ओ सीङःहाङः गम्आक्‌तीको ओउः चार्‌जन सीपाहीलम्इ येसुकोः नाय्‌लम् त्‍याक्‌ती लयःमयःकुस् वेःकाय्आकाय्। ओउःकोः क्रमःनाय्‌खे वेओ मुआ। ओउः क्रमःनाय्‌पाय् यातैज्‍योः क्‍याह्ओ खेःतो गाःहाङःमा द्योप्‌ती रुप्ओ खेःआक्‌ल। 24ओउःत च्‍यवःती ओउः सीपाहीलम् “लौ इकायः क्रत्‌लाम्। ‘सु दोःनाःतय्‍ही’ त दाय्‍ह्‌ती बाङ् ताती योनी” त दाय्‍ह्‌ती नोःकाय्आकाय् ओउः उय्‍ह्‌लेकोः आखरःहाङः लेखओ कुरा ताप्‌ताक्‌ती “लौ ङाकोः नाय्‌लम् वेःसाकायः बाङ् ताती योआकानी” त दाय्‍ह्‌ती आखरःहाङः लेखती मुनाः। फेरी एत होम्‌काय्‌ती नोःआक्‌तीको ओउः सीपाहीलम्इ ओउःतलेः हायःआकानी। 25ओहाङःसैको येसु क्‍ल्‍याय्ओ सीङःहाङः मुतोक्‌हाङः येसुकोः आमा द्याङ्‌तोलेः चीङ्‌ती मुआ। येसुकोः मोम् आमामा क्‍लोफास् त तोओकोः बुधी मरीयम्‌मा माग्‍दालाकोः मरीयम्‌मा येसुकोः आमाकुस् मुआकाय्। 26येसुइ लयःकोः आमामा ओउःइ आन राप्ओ लयःकुस् वाह्ओमयः च्‍यवःती झ्‍यान्‍ते आमाकायः “लौ योउ दा। इपाय् नाङ्‌कोः चोःलेः स्‍याव्‌पाः” त दाय्‍ह्‌ती 27फेरी ओउःकुस् वाह्ओचाक्‌कायः “लौ इ नाङ्‌कोः आमालेः” त दाय्‍ह्‌ती तोआथै। एत तोआक्‌तीको ओउः मान्‍ताइपाय् येसुकोः आमाकायः लयःकोः कीम्‌हाङः स्‍यास्‌ती गम्आकान्।
28ओहाङःसैको लयःकोः काम् दप्‌खेःआ त चीःती येसुइ आखरःहाङः लेखओ कुरा ताप्‌ताक्‌ती “ङापाय् तीः अप्‌नाङः अ” त दाय्‍ह्‌ती नोःआ। 29ओहाङः यात्‌ज्‍योः तुमुकाहाङः स्रोक्‌तो धाक्‌सायःकोः तीः गम्ओ खेःतो ओउःत झ्‍यान्‍ते ओउः धाक्‌सायःकोः तीःहाङः नाय् ज्‍योःती तीतेपतीकोः सीङःहाङः भ्‍योती येसुकायः म्‍होतोङ्‌हाङः बयःआकानी। 30ओउः दोःआक्‌तीको येसु “लौ द्याह्‌पाय् दप्ओआः” त दाय्‍ह्‌ती कय्‍क् क्‍लय्‍ह्‌ती लयःकोः रुआङ्इ फेआथै। 31ओहाङःसैको ओःनम् दीन् ओउः छ्यात्‌कोः ङ्‌हाकोः दीन्‌लो खेःतो ओउःत झ्‍यान्‍ते “लौ ङीकोः ताङ्‌ह्ओ धोओ दीन्‌हाङः ओउः सीसा खेःओलम्‌कोः म्‍हाङ् पाम्‍ह्‌माःत सीङःहाङः मुसा स्‍याव्‌ल” त दाय्‍ह्‌ती ओउः यहुदीलम् पीलातस्‌कःताङ् वाङ्‌ती “लौ ओउः क्‍ल्‍याय्ओ सीङःहाङः गम्ओलम्‌कोः दोम् क्‍लय्‍ह्‌ताक्‌सा खेःतो ओउःमयः रेन्‍ह्‌तो सीताक्‌साकायः एत हायःताक्‌नु दा ओहाङःसैको ङीइ तेन् पाम्‍ह्‌ती वाय्‌सा खाय्‌नाङःसु” त दाय्‍ह्‌ती तेआकाय्। 32ओउःमयः तेआक्‌तीको सीपाहीलम्इ वाङ्‌ती ओउः येसुकुस् सात्‌ती गम्ओ नीस्‌चाक्‌कायः ङ्‌हा यात्‌चाक्‌कायः लोने ओउः अरुकायः दोम् क्‍लय्‍ह्‌नीतो 33येसुकःताङ् वाङ्‌ती ओउःपाय् मेस् सीओ त च्‍यवःती ओउःकोः दोम् क्‍लय्‍ह्‌नीली। 34ओउःकोः दोम् क्‍लय्‍ह्‌नीली यात्‌ज्‍योः सीपाहीइ येसुकायः भालोइ पाम्‌हाङः ह्रोङ्‌ह्‌ती पोन्‍ह्‌ताक्आथै पोन्‍ह्आक्‌तीको वयःमा तीःमा ओउःकोः आङ्‌सै होती ग्‍ल्‍युङ्‌ह्आ। 35लौ इ कुरापाय् च्‍यवःओ मान्‍ताइलेः नीङ्‌कायः ङ्‌हाम्‌ताक्‌साकायः लेखती गम्ओआः ओउःइ ल्‍हाक्ओ कुरापाय् दोङ् कुरा लेःआः बा। 36फेरी आखरःहाङः लेखओ कुरामा ताप्‌ताक्आकान्। आखरःहाङः “ओउःकायः यातैज्‍योः ह्रुस्‌मा क्‍लय्‍ह्‌नीली” तमा लेखती मुनाः 37अरु आखरःहाङः “ओउःमयःइ पोन्‍ह्‌ताक्ओ चाक्‌कायः मान्‍तालम्इ लोने योनानी” तमा लेखती मुनाः।
38ओहाङःसैको अरीमाथीया त तोओ गाव्‌सै यात्‌चाक् युसेफ् त तोओ खेःतो। ओउःपाय् येसुकायः ङ्‌हाम्उतो ओउः यहुदीलम्‌कः रैती झ्‍यान्‍ते अरुकायः छ्यान्‍ह्उलु। ओउः मान्‍तापाय् पीलातस्‌कःताङ् वाङ्‌ती “लौ येसुकोः म्‍हाङ् बयःची दा द्याह् पाम्‍ह्‌साआः” त दाय्‍ह्‌ती तेआ। तेतोक्‌हाङः पीलातस्इ “लौ ओउःकोः म्‍हाङ् आलःउ” त दाय्‍ह्‌ती दाय्‍ह्आक्‌तीको युसेफ्इ येसुकोः म्‍हाङ् पाम्‍ह्‌साकायः आलःआकान्। 39ओउः बेलाहाङः ओउः अनम्‍ह् याह्‌दीङ्‌हाङः येसुकःताङ् वाङ्ओ नीकोदेमस् त तोओमा युसेफ्‌कुस् आल्आ। यात्‌सै मानाकोः म्‍हाङ्‌कायः पेओ सय्‍ङ्‌ताक्‌सा सातीमा लात्‌ती आलःआकाचु। 40ओहाङःसैको येसुकोः म्‍हाङ् लात्‌ती आलःती म्‍हाङ्‌हाङः साती ल्‍यानःती नाय्इ पोतोलःती पानःआकाचु यहुदीलम्इ जवओलो लेखा हायःआकाचु। 41ओहाङःसैको येसुकायः सात्ओ राङ् द्याङ्‌तोलेः फुल्‌बारीहाङः यात्‌ज्‍योः तेस्‌कोः घाङ् व्‍हात्‌ती जाङ्‌ह्ओ खेःतो। ओउःहाङःपाय् अरु म्‍हाङ् गलमा काधाङ्‌ल। ओउः तेस्‌हाङः येसुकोः म्‍हाङ् काती गम्आकाचु। 42ओनम् दीन्‌कोः स्‍याङ्‌ह्‌लोहाङः ओउःमयःकोः छ्यात्‌कोः दीन् स्‍याव्आ ओउःत झ्‍यान्‍ते द्याङ्‌तो मुओ तेस्‌हाङः गम्‌सा खेःतो।

युहना 20
1ओहाङःसैको चीत्‌सैलोकोः आइतेबार्‌दीन्‌हाङः न्‍याम् थोङ्‌खयःओहाङः माग्‍दालाकोः मरीयम् त तोओ येसुकोः तेस्‌ताङ् दाह्‌ती वाङ्आ। तेस्‌ताङ् दाह्‌ती वाङ्आक्‌तीको ओउः तेस्‌कायः राक्ओ बाङ् फोल्‌ती मुओ च्‍यवःती ओउः मोमःचोः द्यान्‍ह्‌ती पाय्‍ह्आ। 2तन्‌ती पाय्‍ह्‌तोक्‌हाङः सीमोन् पत्रुस्‌मा ओउः येसुइ राप्ओ मान्‍ताकःताङ्‌मा वाङ्‌ती मेस्‌लो च्‍यवःओ कुरा छ्यानःआकान् “लौ ङीकोः प्रभुकायः तेस्‌सै आलःआकानी बा। द्याह् ‘गाःहाङः गम्ओ लेःआः’ त चीःङुसुलु” त दाय्‍ह्‌ती छ्यानःआक्‌तीको 3पत्रुस् ओउः अरु मान्‍ताकुस् येसुकोः तेस्‌ताङ् तन्‌ती वाङ्आकाच। 4ओउः अरु येसुकुस् वाह्ओ मान्‍ताखे रेन्‍ह्‌तोलेः तन्‌ती झ्‍यान्‍ते ङ्‌हासै दाह्आ। 5दाह्आक्‌तीको तेस्‌हाङः पोक्‌माःत बाहीरसै हैती योती योतोक्‌हाङःपाय् ओहाङः म्‍हाङ्‌नाय् पेतो गम्ओ च्‍यवःआकान्। म्‍हाङ्‌नाय् मुओ च्‍यवःआकान् 6ओउःखे पोक्‌ल सीमोन् पत्रुस्‌खे दाह्‌ती वाङ्‌ती न्‍यास्‌माःत तेस्‌कोः घाङ् पोक्‌ती येसुकोः म्‍हाङ्‌नाय्‌मा 7तालाङ्‌हाङः फोङ्ओ नाय्‌मा लःलयःकोः थाव्‌हाङः बेन्‌द्यावःतो मुओ खेःतो। 8सीमोन् पोक्आक्‌तीको ओउः अरु मान्‍तामा पोक्‌ती पेतो योती “माः रैस येसुपाय् आल्ओआः” त ङ्‌हाम्आकान्। 9ओउः बेलाहाङः “ओउः वाङ्‌सा खेःओ ख्रीस्‌पाय् सीआक्‌तीको उह्‌ती च्‍योक्‌सा खेःतो” त आखरःहाङः लेखओ कुरापाय् येसुकुस् वाह्ओमयःइ पेतोलेः ल्‍हुङ्‌हाङः चीःआक्‌धाङ्‌नीली।
10ओहाङःसैको तेस् योआक्‌तीको ओउःनीस्‌खे पाय्‍ह्‌चतो 11माग्‍दालाकोः मरीयम्‌खे ओउः तेस् बाहीरताङ् र्‍याःती मुओ खेःतो। 12र्‍याःतोक्‌हाङः मरीयम्‌पाय् खुङःती घाङ् भीत्र योतो ती येसु ङ्‌हा मुआक्ओ थाव्‌हाङः नीस्‌चाक् परमेस्‍वर्‌कोः ल्‍होक्ओमयः च्‍यवःआकान्। यात्‌चाक्‌खे येसुकोः तालाङ् मुआक्ओ थाव्‌हाङः अरुखे ओउःकोः दोम् मुआक्ओ थाव्‌हाङः खेःतो। 13एत च्‍यवःतोक्‌हाङः “अ मोमःचोः दोह् हायःतीतेः र्‍याःतेःनाः” त दाय्‍ह्‌ती ओउःनीस्इ व्‍हत्आथै “ङीकोः प्रभुकायः आलःआकानी। ओउःपाय् द्याह् ‘गाःहाङः गम्ओ’ त ङाइ चीःङल” त दाय्‍ह्‌ती त्‍याङ्‌तोक्‌हाङः लोय्‌ती 14मरीयम्इपाय् येसुलेः काह्‌सै चीङ्ओ च्‍यवःउतो ओउःकायः तय्‍ह्आक्उलु। 15येसुइमा “लौ हौद्याङ् दोह् हायःतीतेः र्‍याःतेःनाः सुकायःतेः बोङःतेःनौ” तमा दाय्‍ह्‌ती व्‍हत्‌थातो मरीयम्‌पाय् “ओउः मान्‍ता इहाङःकोः माली यादो” त म्‍हर्‌ती “अ पुःय ओउःकायः आलःतेःआकान् त खेःया गाःहाङः गम्‌तेःआकान् तोची दा। ओहाङःसै ङाइ ओउःकायः आलःनाङः” त दाय्‍ह्‌ती तोआकान् 16“अ मरीयम्” त दाय्‍ह्‌ती येसु दाय्‍ह्आ। ओउःत दाय्‍ह्‌तोक्‌हाङः मरीयम् ओउःकःताङ् ल्‍हेःती “गुरुय” त दाय्‍ह्‌ती दाय्‍ह्आ। 17“ङाकायः चुम्‌लाम् त्‍यावःअ ङाकोः आपाकःताङ् आल्‌धाङ्‌ङल। लौ ङाकोः हौचोङ्‌पाय् इत ल्‍हाक्‌ती तोलाङ् आल्अ। ङा देङी त्‍यावःअ ङाकोः परमेस्‍वर्‌ आपाकःताङ् आल्‌नाङः। ओउःपाय् नीङ्‌कोः परमेस्‍वर्‌ आपामा लेःआः। लौ ओउः कुरापाय् ओउःमयःकायः ल्‍हाक्‌ती तोउसु दा” त दाय्‍ह्‌ती येसुइ तोआकान्। 18इत तोआक्‌तीको मरीयम्‌पाय् येसुकुस् वाह्ओमयःकःताङ् आल्‌ती येसुइ तोओ कुरा ल्‍हाक्‌ती छ्यानःआथास। 19ओहाङःसैको ओउः आइतेबार्‌कोः द्याह्‌मयःलोहाङः येसुकुस् वाह्ओमयः यहुदीलम्‌कः रैती झ्‍यान्‍ते यात्‌ज्‍योः कीम्‌हाङः आल्‌ती ओहाङःकोः धोका राक्‌ती मुआकाय्। ओउःत मुतोक्‌हाङः येसुलेः ओउःमयःकःताङ् वाङ्आ “लौ पेतो ल्‍हुङ् धोमाय्‌तोलेः मुन” त दाय्‍ह्‌ती नोःती 20येसुइ लयःकोः क्रुत्‌मा पाम्‌मा छ्यानःआथास। एत छ्यानःआक्‌तीको “लौ ङीकोः लयःकोः प्रभु द्यान्‍ह्‌ती वाङ्ओआः” त चीःती येसुकुस् वाह्ओमयः आन चोङाय्‌ती मुआकाय्। 21“लौ पेतो ल्‍हुङ् धोमाय्‌तोलेः मुन। ङाकायःपाय् ङाकोः आपाइ ल्‍होक्ओआः बा ओउःतलेः ङाइ नीङ्‌कायः ल्‍होक्‌नेःनाङ्‌स” त दाय्‍ह्‌ती 22येसुइ ओउःमयःकःगन फोह्र्ती “लौ परमेस्‍वर्‌कोः ग्‍वालामः दोःतेःपै। 23ओहाङःसैको सुसुखेकायःतेः ‘लौ नाङ्‌कोः रेव्‌झ्‍याङ्‌कोः क्‍युम्‍ह्‌ती वाय्ओआः’ त दाय्‍ह्‌तीतेः तोतेःचनै ओउःकोः रेव्‌झ्‍याङ्‌कोः दोङ्‌सीलेः क्‍युम्‍ह्ओ लेःआः। सुसुखेकायः ‘क्‍युम्‍ह्‌ती वाय्‌ल’ त दाय्‍ह्‌तीतेः तोतेःचनै ओउःकोः रेव्‌झ्‍याङ्‌कोः क्‍युम्‍ह्‌माःत मुलेःआ” त दाय्‍ह्‌तीमा येसुइ तोआथास।
24ओहाङःसै येसु इत वाङ्‌तोक्‌हाङः यात्‌चाक् येसुकोः बार छ्युङ्‌ह्ओमयः अरुकुस् मुल। ओउःकोः मय्‍ङ् “थोमा” त तोओ ओउःकोः हाल् मय्‍ङ् “ग्रेङ्‌ह्ओ चोः” खेःतो। 25ओहाङःसैको थोमा लोने अरुकःताङ् पाय्‍ह्‌ती क्रुस्आक्‌तीको “ङीकोः प्रभुकायः च्‍यवःआलाङःसु” त दाय्‍ह्‌ती ओउःमयःइ ल्‍हाक्‌ती तोथातो “ओउःकोः क्रुत्‌हाङः खील्‌कोः घाङ् च्‍यवःआताःमाःतो लयःकोः ब्रय्‍ह्इ ओउःकोः क्रुत्‌कोः घाङ्‌मा पाम्‌कोः घाङ्‌मा दीन्‍ह्आताःमाःतो ङाइ नीङ्‌कोः कुरा ङ्‌हाम्‌ङल” त दाय्‍ह्‌ती थोमाइ तोआथास। 26ओहाङःसैको लोनेकोः आइतेबार्‌हाङः येसुकोः वाह्ओमयः फेरीलेः हुम्‌ती मुआकाय्। ओउः बेलाहाङः थोमामा मुआ। ओउःमयः हुम्ओ कीम्‌कोः धोका पेतो राक्‌ती मुओ खेःतो येसुपाय् ओउःमयःकःताङ् फेरीलेः वाङ्आ। “लौ पेतो ल्‍हुङ् धोमाय्‌तो मुन” त दाय्‍ह्‌ती ओउःमयःकायः तोआक्‌तीको 27थोमाकायः ल्‍हेःती “लौ नाङ्‌कोः ब्रय्‍ह्इ इहाङः साम्‍ह्‌ती ङाकोः क्रुत्‌लम्‌मा योची दा। नाङ्‌कोः क्रुत् प्‍योती ङाकोः पाम्‌हाङः गम्‌ची ओहाङःसै पेतोलेः ङ्‌हाम्‌ची दा” त ओउःकायः दाय्‍ह्‌ती तोउतो 28“लौ ङाकोः प्रभुय ङाकोः परमेस्‍वर्‌य” त दाय्‍ह्‌ती थोमा दाय्‍ह्आ। 29“लौ थोमा नाङ्‌खेइ च्‍यवःती झ्‍यान्‍ते ङ्‌हाम्‌तेःनाःची अरुखेइ ङाकायः च्‍यवःमाःत ङ्‌हाम्‌नानी ओउःमयःपाय् गुच्‍युक् पेओ लेःआः बा” त दाय्‍ह्‌ती येसु तोआथै। 30ओहाङःसैको येसुइ नाःतो अरु ग्‍याङ्‌ह्‌राय् ओउःकुस् वाह्ओमयःकायः छ्यान्‍ह्आथास ओउः कुरापाय् इ कीताप्‌हाङः लेखल। 31दोह् दोह् इहाङः लेखती मुनाः “येसुपाय् ओउः वाङ्‌सा खेःओ ख्रीस् लेःआः परमेस्‍वर्‌कोः चोः” त छ्यानःती नीङ्‌कायः ङ्‌हाम्‌ताक्‌साकायः लेखओ मुनाः। ओहाङःसैको ङ्‌हाम्आक्‌तीको रौ जीङःतेः दोःतेःनै।

युहना 21
1ओहाङःसैको लोने तीबेरीयस् त तोओ ताङ्‌ह्ओ दुम्‌हान्‌हाङः येसुपाय् लयःकुस् वाह्ओमयःकःताङ् फेरी थाती वाङ्आ। ओउःपाय् गत थाओआः दाय्‍ह्‌सा 2यात् दीन्‌हाङः सीमोन् पत्रुस्‌मा ओउः ग्रेङ्‌ह्ओ चोः त मय्‍ङ्ओ थोमामा कानाकोः नथानएल् जबदीकोः चोःनीस्‌मा अरु नीस्‌चाक् येसुकुस् वाह्ओमयःमा हुम्‌तो मुओ खेःतो। 3“लौ ङापाय् ङाः सात्‌लाङ् आल्‌नाङः” त पत्रुस् दाय्‍ह्‌ती “लौ उया ङीमा नाङ्‌कुस् वाङ्‌नाङी” त अरु दाय्‍ह्‌ती सबैलेः ङाः सात्‌लाङ् आल्आकाय्। आल्‌ती तीःहाङः दाह्‌ती दोङ्‌गा पोक्‌ती ङाः सात्‌साकायः जुदा याह्‌दीङ्‌च्‍युक्‌लेः लाङः वार्‌दा वार्‌दा मुइतो दोह्‌मा ङायःनीली। 4ओहाङःसैको न्‍याम् थोङ्‌खयःओहाङः येसु तीःकोः चीनःसै चीङ्ओ च्‍यवःआकानी। च्‍यवःसापाय् च्‍यवःनीतो “येसु लेःआः” त तय्‍ह्आक्‌नीली। 5ओउःमयःइ तय्‍ह्‌नीली त झ्‍यान्‍ते “लौ हौय मायःतेः खाय्‌तेःआकानीया खाय्‌तेःनीलीया” त दाय्‍ह्‌ती येसुइ गोःती तोउतो 6“दोह्‌मा खाय्‌ङुसुलु है” त दाय्‍ह्‌ती त्‍याङ्आकाय् “लौ उया दोङ्‌गाकोः ङोय्‌सै वार्‌नु दा। ओहाङः ङायःतेःनानी” त दाय्‍ह्‌ती येसुइ तोआथास। एत तोआक्‌तीको ओउःमयः दोङ्‌गाकोः ङोय्‌सै वार्‌ती ङायःजम् ङायःओ खेःमाल है। ओउःच्‍युक् ङायःती झ्‍यान्‍ते दोङ्‌गाहाङः लाङःपाय् ह्र्युत्‌सामा खाय्‌नीली। 7“लौ ओउःपाय् ङीकोः प्रभु लेःआः बा” त दाय्‍ह्‌ती येसुइ आन राप्ओ ओउःकुस् वाह्ओचाक् दाय्‍ह्ओ। दाय्‍ह्आक्‌तीको “ङीकोः प्रभु लेःआः” त सायःती सीमोन् पत्रुस्‌खे लयःकोः नाय् रोत्‌ती क्रमःआक्‌तीको तीःहाङः ज्‍योस्‌ती पोक्आ ओउःपाय् ङ्‌हा सोह् मुओ खेःतो। 8ओउः अरु मान्‍तालम्‌खे येसु द्याङ्‌काय्‌तो मुती झ्‍यान्‍ते दोङ्‌गाहाङः ओउः ङाः ब्‍लीङ्‌ती मुओ लाङः ह्र्युत्‌ती वाङ्आकाय्। 9ओउःमयः वाङ्‌ती साःताङ् दाह्‌ती ओहाङः मुत्ओ म्‍हेःहाङः ङाःमा लाङ्‌मा फुओ च्‍यवःआकानी। 10दाह्‌ती वाङ्आक्‌तीको “लौ नीङ्इ मेस् ङायःओ ङाःकोः यात्‌नीस्‌ज्‍याङ् वानःधाङ्‌नु दा” त दाय्‍ह्‌ती येसुइ तोआथास 11ओउःत तोआक्‌तीको पत्रुस्इ दोङ्‌गाताङ् आल्‌ती लाङःहाङः ओउः ङाःपाय् साःताङ् ह्र्युत्‌ती वानःआकान्। सबै यात्‌सै त्रीपन्‍न ताङ्‌ह्ओ ङाः खेःतो। ओउःच्‍युक् नाःतो ह्र्युत्‌ती वानःउतो लाङःपाय् तेत्‌ल। 12ओहाङःसैको ङाः वानःआक्‌ती “लौ जेःलाङ् वाङ्‌न दा” त दाय्‍ह्‌ती येसुइ तोथासतो सुमा “नाङ् सुखेलोतेः” त दाय्‍ह्‌ती व्‍हत्‌सा ग्‍याइली “ओउःपाय् ङीकोः प्रभु लेःआः बा” त चीःआकानी। 13ओउःमयःकःताङ् येसु वाङ्‌ती लाङ् ङाः रोत्‌ती वेःआथास। 14ओउः बेलाहाङःकुस् येसु सीओसै च्‍योक्आक्‌तीको सुम् पेन्‍ह्‌कायः लयःकुस् वाह्ओमयःकःताङ् थाती वाङ्ओ खेःतो।
15ओहाङःसैको जेःआक्‌तीको “लौ यहोनास्‌कोः चोः सीमोन्‌य इमयःसै नाङ्इ ङाकायः न्‍हाङ्‌तोलेः राप्‌तेःनाःचीया राप्‌तेःचीलीया” त दाय्‍ह्‌ती येसुइ व्‍हत्‌थातो “माः प्रभुय ङाइ नाङ्‌कायः राप्ओ त नाङ्इ चीःतेःनौ बा” त दाय्‍ह्‌ती पत्रुस् त्‍याङ्‌ती “लौ उया ङाकोः हौलम्‌कायः मीओ भेदाकोः चोःलो लेखालेः स्‍यास्उ दा” त दाय्‍ह्‌ती येसुइ तोआथै। 16ओहाङःसै फेरीलेः “लौ यहोनास्‌कोः चोः सीमोन्‌य ङाकायःतेः राप्‌तेःनाःचीया राप्‌तेःचीलीया” त दाय्‍ह्‌ती व्‍हत्‌ती “माः प्रभुय नाङ्‌कायः राप्ओ त नाङ्इ चीःतेःनौ बा” त दाय्‍ह्‌ती त्‍याङ्ओ “लौ उया ङाकोःमयः भेदालो लेखालेः स्‍यास्‌ती योउसु दा” त दाय्‍ह्‌ती येसुइ तोआथै। 17ओहाङःसै फेरीलेः “लौ सीमोन्‌य यहोनास्‌कोः चोः ङाकायःतेः राप्‌तेःनाःचीया राप्‌तेःचीलीया” त दाय्‍ह्‌ती व्‍हत्‌माथातो “ङाकायःपाय् सुम् पेन्‍ह् व्‍हत्आताङः” त म्‍हर्‌ती पत्रुस् ल्‍हुङ् घ्‍युम्‌ती “अ प्रभुय नाङ्इ सबै कुरा चीःतेःनौ नाङ्‌कायः ङाइ राप्ओआः ङ त चीःतेःनौ” त दाय्‍ह्‌ती त्‍याङ्‌ती “लौ उया ङाकोःमयः भेदालो लेखालेः स्‍यास्‌ती योनु दा। 18दोङ्‌सी दाय्‍ह्‌भनाङ् लाव्‌मयः मुतोक्‌हाङः नाङ् लयःकोः क्रुत्इ नाय् लावती लयः झाक्ओहाङः ब्‍याह्‌ती वाह्‌तेःतो लोने थालवःपा स्‍याव्आक्‌तीको नाङ् क्रुत् प्‍योआक्‌तीको अरुइ नाङ्‌कायः पानःती नाङ् झाक्‌मालोहाङः लात्‌ती आलःतेःनाः” त दाय्‍ह्‌ती येसुइ तोआथै। 19एत तोती परमेस्‍वर्‌कायः ताङ्‌ह्‌ताक्‌सा थेङा पत्रुस् गत हायःती सीसा खेःतो त येसुइ छ्यान्‍ह्आकान्। ओउःत तोआक्‌तीको “लौ ङाकुस् वाह्अ” त पत्रुस्‌कायः तोआकान्। 20ओहाङःसैको पत्रुस् ल्‍हेःती ओउः येसुइ राप्ओ मान्‍ता गुल्‍ह्‌ती वाङ्ओ च्‍यवःआकान्। ओउः मान्‍तापाय् भोस् जेःतोक्‌हाङः येसु द्याङ्‌काय्‌ती मुती “नाङ्‌कायः दाक्‌सा बोङःओ सुखेलो” त दाय्‍ह्‌ती व्‍हत्आकान्। 21ओउःकायः च्‍यवःआक्‌तीको “लौ प्रभुय ओउःपाय् दोह् दयःनाः तोची दा” त दाय्‍ह्‌ती येसुकायः व्‍हत्‌थातो 22“लौ ङा वाङ्‌धाङ्‌माःखा च्‍युक्‌कायःलेः ‘ओउः तुतो स्‍याक्‌पाः’ त ङा झाक्‌चाङः त खेःया ओउःपाय् नाङ्‌कायः दोह्‌मा दयःतेःल। नाङ् ङाकुस् वाह्अ दा” त दाय्‍ह्‌ती येसु त्‍याङ्आ। 23येसुइ तोओ कुरा सायःती अरुइ “लौ ओउःपाय् गलमा सील” त दाय्‍ह्‌ती ओउः कुरा थोल्‍ह्‌ती तोनीतो येसु “ओउःपाय् गलमा सील” त तोउलु बा। “ओउःपाय् ‘ङा वाङ्‌धाङ्‌माःखा च्‍युक्‌कायः तुतो स्‍याक्‌पाः’ त दाय्‍ह्‌ती दाय्‍ह्‌चाङः त खेःया ओउःपाय् नाङ्‌कायः दोह्‌मा दयःतेःनाः” त दाय्‍ह्ओआः ह खेःतो बा। 24इ कुरा सबै च्‍यवःआक्‌तीको ओउः येसुइ आन राप्ओ मान्‍ताइलेः लेखआकान् ओउःकोः कुरा दोङ् कुरालेः त ङीइ चीःनाङःसु। 25येसुइपाय् नाःतो अरु काम्‌लम् जाङ्‌ह्ओआः बा। ओउः कुरा सबैलेः कीताप्‌हाङः लेखनाः त खेःया ओउःच्‍युक् नाःतो कीताप् इ ल्‍हाव्‍ह्‌दैबाङ्‌हाङः य्‍होक्‌बाय्‌ल।