1 Kété ɓita kade Nube unde nang nè nga, tà ndi tutu. Tà nè ndi nan’t se Nube kété mari. Tà nè nga kuwe è Nube a tɔ. 2 E ndi nan’t se Nube loo kunde gir nang’t. 3 Nube ra nyange malang se takul’n. Nyan karé bè ke tò se dè ra’n anje’n è goto. 4 Takul’n è á nyange malang ndii kumgajer. Ndikumgajer nè nga è lookar le dooge. 5 Lookar nè nga ade loo ar dè tilkus’t, nè tilkus ase suin tà’n lé. 6 Nube ule doo karé bè ke ri’n nè Jean. 7 Doo nè ree le kɔrgo tà le lookar kade dooge malang undei kêm de dè tà ke è ɔrgo. 8 Jean nga è lookar lé ɓai, nè è ree le kɔrgo tà le lookar. 9 Lookar ke get-get nga ree dè nang nè. Nanan géa è ade loo ar dènn’t. 10 Lookar nè nga ndi dè nang nè kété mari. Nube ra nyange malang ke dè nang nè takul’n, nè né è bè géa dooge ke dè nang nè geri nin lé. 11 E ree ɓéee le njé ke le’n, nè njé ke lé’n uwei nin ke ra de’t lé. 12 Nè dooge malang ke uwei nin ke ra de’t undei kêm de dènn’t ɓaa, ade de tɔgmong le kade teli ei ngann le Nube. 13 Ei nè nga teli ei ngann le Nube se go girkoje le de ke dè nang nè lé. Nè girkoje le de in ra Nube’t ke njè kade de kebe ke kige. 14 Tà nè nga, tel è danra doo. E ra ɓee dann jéi’t j’an-in ndubra le’n tite ndubra le Ngonn dagi ke in ra Bɔ dooge’t. Kêmnoje se ngarankum tà taa ra’n pel-pel. 15 Jean ɔrgo tà ɔje’n dè Ngonn nè nga se ndu’n ke bòi ede nè: – An-in! è ke ndɔ ke m’tam tà le’n m’ede sei m’ede nè: «Doo karé ke è nonm’t kété à ree goom’t gugu non, tede è ndi tutu kété ɓita d’oje’m ɓai.» 16 Jèi malang j’ingei nyan-noje ɔse gonan-gonan takul nyanbaw le’n ke dum dè loo. 17 Nube ade jéi gute-ndu se rebe ke ra Moise’t, nè kêm-maje se ngarankum tà reei takul Jésu-Krist. 18 Doo karé bè géa an Nube se kum’n ndan lé ɓai. Nè Ngonn kêm’n ke dagi á ɔr gir’n ke nata ade jè geri. 19 E ke nè á è tà ke Jean ɔrgo loo ke Juipge ke kêm ɓee-bò ke Jérusalem ulei njékuje nyan-mesege se njé ke girkà’t le Lévi le kade dejii edi nè: – Ké i nga i nan wa? 20 Jean ede de ndàt ede nè: – Man m’ee Krist nga lé ɓai. 21 Dé tel dé deje’n d’ede nè: – A ɓaa ké i nan ta wa? Ké i Elie wa? Jean ile de dè’t ede nè: – Man m’ee è lé. Dé tel dé deje’n d’ede’n nè: – A ɓaa ké i njèribe-dè-tà ke tà Nube’t wa? Jean ile de dè’t kuwe ɓai ede nè: – Ḿ-m̀, man m’ee è lé ɓai. 22 Dé tel dé deje’n kuwe ɓai d’ede nè: – A ɓaa ke gete nga ké i nan ta wa? Jè ndige le koo ke tài’t tede le tel kaw kede njé ke ulei jè. Ké tà ri á i kuwe i tam ɔje’n dèi wa? 23 Jean ede de ede nè: – Man ɓaa m’ee ndu njèkile mber kêm dile’t. «Njèkile mber kêm dile’t nga tam ede nè: I rai rebe le Kuwe-ɓee adi nda danné jap» titeke ndɔ ke Esaie njèribe-dè-tà ke tà Nube’t tam’n kété nga. 24 Dooge ke ndɔ ke d’ule de ra Jean’t nga ei Pharisienge. 25 Ei deji Jean njèkule dooge manné njonm tà kum de ke kété-kété edi nè: – Ke nè á i Krist lé a, i Elie lé a, éké njèribe-dè-tà ke tà Nube’t lé a tɔ ɓaa, ké bain á i ule dooge manné njonm wa? 26 Jean tel ile de dè’t ede nè: – Man ɓaa, mann á m’ule dooge tutu njonm karè. Nè doo karé ke sei gerii lé nda dann si’t laa. 27 Doo nè nga à ree goom’t non, nè man m’asekum tɔr gabang’t ke njann’t lé. 28 Nyange nè teei kêm ɓee ke Béthanie gide ba ke Jourdain’t. E loo nè á Jean ule dooge manné njonm tutu. 29 Barè lookar’n, loo ke Jean an Jesu à ree ke rann’t ɓaa, è tam ede nè: – An-in! Ngonn Bate le Nube ke njèkɔr kaiya dè dooge’t dè nang nè nga. 30 E nè nga kété m’tam tà m’ɔje’n dè’n m’ede nè: «Doo karé ke è nonm’t kété à ree goom’t gugu non, tede è ndi tutu kété ɓita d’oje’m ɓai.» 31 Man géa m’ger’n kété lé, nè m’ree m’ule dooge manné njonm tede kade kum ngannkà Israel gang’n dènn’t njai. 32 Jean ɔrgo tà nè nga ede nè: – M’an Ndil-Kêmnda tò asenan se der-nda bè in danrán ree ndi dènn’t. 33 Man m’ger’n kété lé ɓai, nè è ke njèkule’m kade m’ule dooge manné njonm nga ede’m ede nè: «E ke Ndil à in dɔ le ree ndi dènn’t nga á è njèkɔr dooge kunde de se ninn’n gai takul Ndil-Kêmnda.» 34 Man m’an nyan nè nga se kum’m; gir’n ke nè á ndɔ ke m’tam’n titeke è nè nga è Ngonn Nube kerɔte kuwe. 35 Barè lookar’n, Jean se pajage le’n joo teli ndai loo’t nè nga ɓai. 36 Loo ke Jean tête kum’n pan an Jesu loo njiye’t ɓaa, è tam ede nè: – An-in! Ngonn Bate le Nube nga. 37 Loo ke pajage le Jean ke joo nè nga ooi tà ke kété è tam nè nga ɓaa, ei unni rebe go Jésu’t. 38 Jésu mer goo’n. Loo ke è an de d’unn rebe goon’t ɓaa, è deje de ede nè: – Ké i sangi ri wa? Dé tel d’ile’n dè’t d’ede nè: – Rabbi (tel se tà koje jéi ɓaa, è Kuwe jé) ké loo ndii è ra wa? 39 Jesu ede de ede nè: – I reei a i an-in. Kêm ndɔn’t nè nga pajage le Jean awi se’n an-in loo ndi’n ɓaa ndii se’n. E tite kàde ke loo sɔlé bè. 40 Pajage le Jean ke joo in-in unni rebe go Jésu’t se go tàge ke Jean tam kété nga. E ke karé è André, ngokon Simon Pierre. 41 André aw inge Simon ngokon’n ke le’n kuwe kété ede’n ede nè: – Jè j’inge Messie ke dé ɓar’n Krist nga ɓá. 42 E ɔr’n aw se’n ra Jésu’t. Loo ke Jésu tête kum’n pan an’n ɓaa, è tam ede nè: – I i Simon ngonn le Jean. D’a ɓari Céphas (tel se tà koje jéi è kuberi her ke mong). 43 Barè lookar’n, Jésu ndige tel kaw ɓeekon ke Galilée. E inge Philippe ɓaa ede’n ede nè: – Unn rebe goom’t. 44 Philippe nga è doo ke Bethsaida ɓee le André se ngokon’n Pierre. 45 Philippe aw inge Nathanael ede’n ede nè: – Doo ke magtub gute-ndu le Moise se magtubge le njéribe-dè-tàge ke tà Nube’t tami tà ɔjii dè’n nga, j’inge’n ɓá ta. Doo nè nga è Jésu ke Nazareth ngonn le Joseph. 46 Nathanael tel deje Philippe ede nè: – Ké nyan ke maje à kin kêm ɓee ke Nazareth tɔ wa? Philippe tel ede Nathanael ede nè: – I kuwe i ree an se kumi. 47 Loo ke Jésu an Nathanael à ree ke rann’t ɓaa, è tam tà ɔje’n dè’n ede nè: – An! ngonnkà Israel ke è ngarankum doo nga. E njè sú kum loo lé. 48 Nathanael deje Jésu ede nè: – Ké i ger’m loo ke ra’t wa? Jésu tel ile’n dè’t ede nè: – Kété ɓita kade Philippe ɓari loo ke ndɔ ke i ndii’n gir kage koté’t nga, m’an-in mari bere. 49 Nathanael tel tam ede nè: – Kuwe jé, i i Ngonn Nube a, i i Ngar le dooge ke kêm ɓeekon ke Israel a tɔ. 50 Jésu ile Nathanael dè’t ede nè: – Ké um kêmi dèm’t tede tam ke m’tam sei kété m’ede nè m’an-in gir kage koté’t nga wa? A an nyange ke dum dè ège ke nè ɓai. 51 Jésu ede Nathanael se njé ke rang malang ede nè: – Kerɔte kuwe, man m’ede sei ndàt, unn gir’n ɗarinè kum danran à teen. Sei a kan-in dooge ke danrán le Nube à ali kawi dɔ a, à risi nang a tɔ tede rai nyan kadi man Ngonn doo.
1 Loo ke Jésu ede Nathanael tà nè nga, ra ndɔ mute go’t ɓaa, dé ra nan taa nan kêm ɓee ke Cana ɓeekon ke Galilée. Kon Jésu è tutu tɔ. 2 Jésu se njékuwe girnge géa, dé ɓar de loo ra nan taa nan’t nè nga tɔ. 3 Loo ke yibe nduu mbate dè dooge’t ɓaa, kon Jésu ree ede’n ede nè: – Yibe nduu le de goto lang ɓá ta. 4 Jésu tel ile’n dè’t ede nè: – Dinye ké i ndige ri ram’t wa? Kàde’n le’m nain ɓai. 5 Kon Jesu ede ngann njéra kulege ede nè: – Nyan malang ke n’a n’deje sei nga i rai. 6 Jó-rebege mute-mute ke d’ube se her ɔje dè kɔr se-ra le Juipge tooi tutu. Mann kêm litre kɔr-sɔsɔ éké aru se kɔr-joo ɓita à rusu jó-rebe karé ɓai. 7 Jesu ede ngann njéra kulege ede nè: – Ɔdi mann adi rusu jóge nè nga neĵ-neĵ. Ngann njéra kulege ɔdi mann adi rusu jóge nè nga ribe nang. 8 Jesu tel ede de ede nè: – Ɔdi mann nè nga ndêin ɗarinè, awi adi njèkan dè nyankuse adi nan an. Ke loon’t nè kuwe d’ɔde d’aw’n d’ade’n tɔ. 9 Loo ke njèkan dè nyankuse taa mann ke tel yibe nduu nè nga ɔde tànn’t ɓaa, è ger loo ke d’in’n tutu lé. Nè ngann njéra kulege ke ɔdi mann nè nga geri mbak. Ke loon’t nè kuwe, njèkan dè nyankuse ɓar njè taa dinye kige nè nga ede’n ede nè: 10 – Nanan géa ade dooge yibe nduu ke maje an-in kété. Loo ke dooge enni pa ɓita è ade de yibe nduu ke majelé ade an-in dè’t ɓai. Nè i ɓaa, i ngonm yibe nduu ke maje sár ɗarinè. 11 E á è kunn gir nyankɔbe ke desêin ke Jésu ra kêm ɓee ke Cana, ɓeekon ke Galilée. Jésu tɔje tɔgmong le’n ke nata ade njékuwe-girnge umi kêm de dènn’t. 12 Go’t gugu, Jésu in aw se kon’n se ngakonnge kêm ɓee-bò ke Capernaum. Njékuwe-girnge géa awi se’n tɔ. Nè dé ndi tutu ndɔ bule ngain lé. 13 Ndɔ ra nan Paque le Juipge nain ngɔr. Jésu in aw kêm ɓee-bò ke Jérusalem. 14 E inge njé kige mangege se batege se der-ndage a, se njé mbel narge ndii nang kêm kei le Nube nga. 15 Jésu pete kule nan’t ra ke ndêin. E rɔ de kêm kei le Nube nata malang se batege, se mangege a tɔ. E sanrin nar le njé mbel narge kɔke a, tile tablege le de kɔke piring-piring a tɔ. 16 Jésu tur ra’n dè njékige der-ndage’t ede nè: – I teei se nyange nè nga malang nata kɔke loo ke nè’t. I teli kei le Bɔ’m nga ke kei ra gate lé. 17 Ke loon’t nè kuwe, kêm njékuwe-girnge olé dè tà ke dé ndang kêm magtub’t d’ede nè: «Ngur kei lei ra’m pênn-pênn.» 18 Nè Juipge deji Jésu edi nè: – Ké nyankɔbe ri á a i ra le kade j’an titeke i aw se tɔgmong le ra’n nyange nè nga titeke bè wa? 19 Jésu tel ile de dè’t ede nè: – I tuji gile kei ke tò se ninn’n le Nube nga kɔke ɓaa, m’a m’tel ra’n gugu kêm ndɔ mute karè. 20 Juipge tami se Jésu edi nè: – Kei ke tò se ninn’n nè nga, dé ra’n ase ɓal kɔr-sɔ-gidé-mute-mute ɓita dé tɔl’n ɓai. Nè i ɓaa, i tam ede nè ayé tel ra’n gugu kêm ndɔ mute bere. 21 Kei ke tò se ninn’n ke Jésu tam tà ɔje’n dè nga, è danra’n è kuwe. 22 Ndɔ ke rang Nube à ade Jésu à unde loo tee dann njé ke koo’t. Ndɔ’n nè ɓita kêm njékuwe-girnge à olé dè tà ke ndɔ ke ede de kété. Gir’n ke nè á umi kêm de dè tà ke tò kêm magtub’t ke tò se ninn’n a, dè tà ke ndɔ ke kété Jésu tam a tɔ. 23 Loo ke Jésu ndi kêm ɓee-bò ke Jérusalem loo ra nan Paque ɓai nga, dooge bule undei kêm de dènn’t tede nyankɔbege ke è ra ade an-in. 24 Nè Jésu taa kêm de lé tede ger ngarankêm de malang. 25 E aw ndoo kade doo karé ɔrgo tà le doo ade’n lé. Tede è ger nyan ke tò dè ɓengre doo’t.
1 Dingem karé bè dann Pharisienge’t ri’n nè Nicodème. E è njèkɔr non Juipge ke karé dann madennge’t. 2 Dingem nè nga ree inge Jésu ndɔɔ ede’n ede nè: – Ngar, jè ger titeke Nube ulei kade i ndó jè nyan. Tede ke nè á Nube è der gir doo lé ɓaa, è asekum ra nyankɔbege titeke i ra’n nga lé. 3 Jesu tel ile Nicodème dè’t ede nè: – Kerɔte kuwe, man m’edi ndàt, ke nè á dé tel d’oje doo gugu kige lé ɓaa, è asekum kan Konɓee le Nube se kum’n lé. 4 Nicodème tel deje Jésu ede nè: – Ké loo ke doo ɓuge ɓá nga, d’a tel koje’n gugu kige titeke bain taɓai wa? Ké è asekum tel kaw kêm konn’t kade oje’n gugu nja joo ɓai wa? 5 Jesu tel ile Nicodème dè’t ede nè: – Kerɔte kuwe, man m’edi ndàt: ke nè á d’ule doo manné njonm d’ade Ndil oje’n lé ɓaa, è asekum kule dè’n kêm Konɓee’t le Nube ndan lé. 6 Nyan ke danra oje nga è le danra kuwe, nyan ke Ndil oje nga è le Ndil kuwe tɔ. 7 Ade tà igi sêl dè tà ke m’edi’t nga lé. Gar-gar adi d’oje sei gugu kige tá. 8 Nel ule loo ke kêm’n ndige’t. Ká’n ke ɓar á i oo, nè i ger loo kin’n éké loo kaw’n lé. Nanan ke Ndil oje’n nga géa è titeke bè tɔ. 9 Nicodème tel deje Jésu ede nè: – Ké doo asekum ra nyange nè nga titeke bain wa? 10 Jesu tel ile Nicodème dè’t ede nè: – I ke njèndó dooge nyan ke kɔbi oso se loo mbit-mbit kêm ɓeekon ke Israel’t nga, ké i ger nyange nè lé taɓai wa? 11 Kerɔte kuwe man m’edi ndàt, jè tam tà nyan ke jè ger a, j’ɔrgo tà nyan ke j’an se kum jé a tɔ. Nè sei taai tà ke j’ɔrgo j’ade sei nga lé. 12 Nyan ke nang nè ke m’ede sei tà’n nga, ke nè á umi kêm si dè’t lé ɓaa, loo ke m’a m’ede sei tà nyange ke danrán nga, ké a umi kêm si dè’t titeke bain wa? 13 Doo karé bè géa in nang nè aw danrán lé ɓai. Nè man Ngonn doo á m’in danrán m’ree nang nè. 14 Ndɔ ke kété Moise ra li nan tà kage’t dɔ kêm dile’t. Man Ngonn doo nga géa, gar-gar d’a ɓer’m dɔ titeke bè tɔ. 15 D’a ɓer’m dɔ le kade nanan ke unde kêm’n dèm’t ɓaa à ndi kumgajer se non. 16 Nube tár dooge malang ke dè nang nè, gir’n ke nè á ule’n Ngonn’n ke dagi le kade nanan ke unde kêm’n dènn’t ɓaa à udu lé nè à ndi kumgajer se non. 17 Kerɔte kuwe, Nube ule Ngonn’n dè nang nè le kade gangtà dè dooge’t lé ɓai, nè le kade dooge ke dè nang nè ingei kaje takul’n è. 18 Doo ke unde kêm’n dènn’t ɓaa, dé gangtà dènn’t lé. Nè doo ke unde kêm’n dènn’t lé ɓaa, dé gangtà dènn’t ɓá tede è unde kêm’n dè Ngonn Nube ke dagi’t nga lé. 19 An-in! tà ke uwe dè dooge á tò nè: lookar ree dè nang nè, nè dooge ndigi tilkus tá ngain dum lookar tede nyanra dege majelé. 20 Nanan ke nyan rannge majelé se ndɔge malang ɓaa, è ɔr lookar nè nga njêt mbate ree tutu, nè bainléa lookar à kuje gir nyan rannge ke nata. 21 Nè doo ke nyan rannge uwe made nan se ngarankum tà ɓaa à ree dann lookar’t. E à ree dann lookar’t le kade kuje gir nyan rannge ke uwe made nan se le Nube nga ke nata kade d’an kuwe. 22 Go nyange’t nè nga, Jésu aw se njékuwe-girnge kêm ɓeekon ke Judée’t. E ndi se de tutu ase tà’t a, è ule dooge manné njonm a tɔ. 23 Jean géa nda kêl karé à ɔdenan kule dooge manné njonm dann ngur mann ke ri’n nè Enon, tò kɔte Salim’t ngɔr. Ngur mann nè nga, mann è tutu ngain. Dooge reei ra Jean’t adi ule de manné njonm. 24 Kêm ɓaln’t nè nga d’ile Jean dangai’t lé ɓai. 25 Ndɔ karé bè, tà naje ke ɔje dè kɔr se-ra oso dann pajage’t le Jean se Juip karé bè. 26 Pajage le Jean reei rann’t edi nin edi nè: – Kuwe jé, doo ke ndɔ ke è ndi sei gide ba’t nú ke i tam tà le’n maje nè nga, an! è géa unn gir kule dooge manné njonm ke le’n tɔ ta. Dooge malang ɓungei nan awi rann’t. 27 Jean ede de ede nè: – Doo asekum kinge nyan se dè ra’n lé. Nyan ke Nube kuwe ade doo tá doo asekum kinge. 28 Sei kuwe géa asikum kɔrgo tà le’m titeke dɔ-dɔ m’tam’n m’ede nè: «Man m’ee Krist nga lé ɓai, nè d’ule’m kété nonn’t ke kule karè.» 29 Doo ke dinye njè ngaw kige ɔje dè’n nga, è ngaw’n. Nè made njè taa dinye kige nda kɔtenn’t oo tà le’n. Ndu njè taa dinye kige ke made’n oo nga ade’n made’n ranel ngain. Man géa, m’ɔr son ranel le’m ɓila titeke bè tɔ. 30 Gar-gar maje kade riɓar le’n oso se loo mbit-mbit ke kété-kété, gar-gar maje kade man ɓaa, riɓar le’m ger gugu. 31 E ke in danrán nga dum dè nyange malang. E ke girkoje’n in dè nang nè tam tà ɔje’n dè nyange ke dè nang nè. E ke in danrán dum dè dooge malang. 32 E ɔrgo tà nyange ke è an se kum’n a, oo se mbi’n a tɔ. Nè doo karé bè géa taa tà le’n ke è ɔrgo nga lé. 33 Doo ke taa kɔrgo tà le’n ɓaa, ndige se’n titeke Nube tam ngarankum tà kuwe. 34 E ke Nube ule’n nga ɔrgir tàge le Nube, tede Nube ade’n Ndil se girson’n bere mbak. 35 Bɔ Ngonn tár ngonn’n ngain. E tel se nyange malang um jinn’t. 36 Nanan ke unde kêm’n dè Ngonnenn’t nè nga ɓaa, à ndi kumgajer se non. Nè nanan ke unde kêm’n dè Ngonnenn’t nè nga lé ɓaa à ndi kumgajer ndan lé, nè wong le Nube ndi dènn’t ndeĵ ɓá ta.
1 D’ede Pharisienge titeke Kuwe-ɓee Jesu aw se njékuwe-girnge ngain dum pajage le Jean a, dooge ke ule de manné njonm géa bulei ngain dumi njé ke le Jean a tɔ. 2 Nè ei njékuwegir-Jesuge á ndɔ ke ulei dooge manné njonm m è Jésu kuwe lé. 3 Loo ke Jésu oo tà nè nga bè ɓaa, è sure ɓeekon ke Judée inye tel aw kêm ɓeekon ke Galilée gugu. 4 Nè gar-gar è à unde kêm ɓeekon ke Samarie dɔ gang. 5 E aw tee kêm ngonn ɓee karé ke ɓeekon ke Samarie ke ri’n nè Sychar. Ngonn ɓee nè tò kɔte loo ndɔr ke ndɔ ke Jacob gang ade ngonn’n Joseph nga. 6 Loo nè nga bolè mann le Jacob tò tutu. Jésu tel tête ra’n ndi nang tà bolè mann’t nè tede è njiye rebe sár ɔr. Kàde nda dann ɓee bɔp. 7 Dinye karé ke ɓeekon ke Samarie ree tede le kɔde mann. Jésu deje’n ede nè: – Dinye, ade’m mann ndêin m’an-in. 8 Njékuwe-girnge awi kêm ɓee-bò’t le sang nyankuse ndogo. 9 Dinye ke Samarie tam se Jésu ede nè: – Hai! dingem i i Juip, à ké a kaw kaw ri á i deje’m man ke m’ee dinye ke Samarie mann kain wa? Dinye tam tà nè nga titeke bè tede Juipge se dooge ke ɓeekon ke Samarie nga tà le de uwe nan lé. 10 Jésu tel ile dinye nè nga dè’t ede nè: – Ke nè á i ger noje ke Nube uwe sei karè nè nga a, i ger doo ke deji ede nè: Ade’m mann m’an-in a tɔ nga ɓaa, né i kuwe a in kété le deje’n mann kain, ayé kadi mann ke an-in kutch-kutch kade an-in i ndii’n kumgajer. 11 Dinye nè nga tel deje Jésu ede nè: – Dingem, ka-dɔ kɔde mann goto jii’t a, bolè mann nga géa heb ngain a tɔ. Ké a inge mann lei ke an-in kutch-kutch nga loo ke ra’t wa? 12 Kà jé Jacob se ngannenge a, se nyankulge le’n kuwe an-in mann nè kété ɓita inyei adi jè nga, ké i bòi i dum dè’n wa? 13 Jésu tel ile dinye nè de’t ede nè: – Nanan ke an-in mann nè nga, kunde a tel ra’n ɓai. 14 Nè doo ke an-in mann ke m’a m’ade’n nga ɓaa, kunde a tel ra’n gugu ndan lé sár. Mann ke m’a m’ade’n nga à tel ngire mann ndikumgajer ke an-in kutch-kutch kêmn’t. 15 Dinye nè nga tel deje Jésu ede nè: – Kuwe-ɓee, ade’m mann nè nga tede kade kunde tel ra’m gugu lé a, kade m’tel ree nè m’ɔde mann nè nga gugu lé ta. 16 Jésu edé ede nè: – Aw i ɓar ngawi ɓita i tel i ree nè ɓai. 17 Dinye nè nga tel ede Jésu ede nè: – Ngaw’m goto. Jésu tel edé ede nè: – Tam ke i tam ede nè: Ngaw’m goto nga è kum. 18 Oiyo, kété i taa ngaw gir mi, dingem ke i ndi se’n ɗarinè nga è ngawi lé ta. Tam ke i tam ede nè: Ngaw’m goto nga è kum kerɔte kuwe. 19 Dinye nè nga tel ede Jésu ede nè: – Dingem, m’an titeke i njèribe-dè-tà ke tà Nube’t. 20 Kà jé jè dooge ke Samarie nga kété ɔji tà se Nube dè mbal’t nè. Nè sei Juipge ɓaa, i tami edi nè: Jérusalem kuwe karé á kei kɔje tà se Nube tò tutu. 21 Jésu tel ile dinye nè dè’t ede nè: – Dinye, um kêmi dè tà’t le’m, kàde’n ree kade awi dè mbal’t nè éké Jérusalem tá a kɔji tà se Nube tutu lé. 22 Sei dooge ke Samarie nga, i ɗɔyi Nube i geri nin lé. Nè jè Juipge ɓaa, jè ɗɔi Nube ke jè ger’n tede kaje in ra jé jè Juipge’t. 23 Kàde kade Nube ule se Ndil ree ɗarinè ɓá. Ngarankum njé ɗɔi Nubege à ɗɔyi Bɔ’m Nube takul tɔgmong le Ndil-Kêmnda ta titeke Ngonn’n tɔje’n de rebe’n ke get. Njé ke ɗɔyi Bɔ’m Nube titeke bè á è sang de. 24 Nube è Ndil, gir’n ke nè á njé ke ɗɔyi nin nga, gar-gar à ɗɔyi nin se go tɔgmong le Ndil-Kêmnda a, se ngarankum tà a tɔ. 25 Dinye nè nga tel ede Jésu ede nè: – M’ger titeke Messie ke dé ɓar’n Krist nga à ree. Loo ke à ree ɓaa, à ɔrgir nyange malang kade jè dooge ke Samarie. 26 Jésu tel edé ede nè: – Man ke m’nda m’tam sei tà nè kuwe á man m’ee Krist nga. 27 Ke loon’t nè kuwe njékuwe-gir-Jésuge reei teei pan. Tà ige de sêl tede kan ke an-in nin nda ɔje tà se dinye nè nga. Nè né è bè géa doo karé dann de’t tel deje’n ede nè: «Ké ri á i sang ra dinye nè?» éké «Tà ri á ɔje se’n wa?» bè lé. 28 Ke loon’t nè kuwe dinye nè inye ku mann le’n nang, è tel aw ɓéee ede dooge ede nè: 29 – I reei an-in dingem karé ke ɔrgir nyan ramge malang ke m’ra kété nga ndát-ndát. Ké dingem nè è Krist nga lé ɓai wa? 30 Dooge undei loo kêm ɓee-bò’t teei dik-dik awi ke ra Jésu’t. 31 Loo ke nja de nain rebe ɓai-ɓaa, njékuwe-gir-Jésuge awi se’n kabr-kabr edi nè: – Ngar, use nyan ndêin ɓita. 32 Nè è ede de ede nè: – Man m’aw se nyankuse’m laa nè sei á i geri lé. 33 Njékuwe-gir-Jésuge deji nan edi nè: – Ké nan ree se nyankuse ade n’use gugu laa wa? 34 Jésu tel ile de dè’t ede nè: – Ra nyan ke kêm njèkule’m ndige a, kɔr son kule le’n ke um jim’t a tɔ á è mur le’m man. 35 Ɗarinè nan sa ko nain sɔ ta, ké i tami bè lé wa? Nè man m’ede sei: Unni kum si an-in koge idi kum sa ɓá ta. 36 Njè sa ko inge nyan kuge dè ji’n ɓá a, è kebe njar nyan ke ɔje dè ndikumgajer se non a tɔ. Titeke bè á njè dubu nyan se njè sa nyan ali ra de nan’t mbak. 37 Gostà ke dé tam d’ede nè: «Njèndɔr è karé nè njékusege bulei» nga, è kum kerɔte kuwe. 38 Man m’ule sei kêm ndɔr ke sei ulei ra si ndibe tutu lé. Njé ke rang á ulei ra de ndibe tutu ɓita sei ubei maje’n ɓai. 39 Dooge bule ke kêm ngonn ɓee ke Sychar ɓeekon ke Samarie umi kêm de dè Jésu’t tede tà ke dinye tam ede nè: «Dingem nè nga ɔrgir nyan ramge malang ke m’ra kété ndát-ndát.» 40 Loo ke dooge ke ɓeekon ke Samarie reei teei ra Jésu’t ɓaa, ei deji nin le kade ndi se de ndêin ɓita in aw rang ɓai. E ndi se de ndɔ joo ɓita in aw kété ɓai. 41 Dooge ke rang ngain kêm ɓeekon ke Samarie umi kêm de dè Jésu’t tede tà le’n ke ei ooi se mbi de. 42 Dooge ke reei ra Jésu’t nga edi dinye nè edi nè: – Jè j’um kêm jé dènn’t tede tà tami nga lé ta. Nè j’um jé dènn’t tede tà tam’n ke jè kuwe j’oo se mbi jé. Jè ger titeke è nga è njé kaje dooge dè nang nè kerɔte kuwe. 43 Loo ke Jésu ra ndɔ joo kêm ɓee ke Sychar nè ɓaa, è tel aw kêm ɓeekon ke Galilée gugu. 44 E Jésu kuwe ndɔ ke tam se tà’n ede nè: «Njèribe-dè-tà ke tà Nube’t nga, d’a d’ile koje dènn’t kêm ɓee kojenn’t lé.» 45 Nè né è bè géa, loo ke è ree tee kêm ɓeekon ke Galilée ɓá ɓaa, njé ke Galilée uwei nin ke ra de’t. Ei rai titeke bè tede ndɔ ke ei géa awi loo ra nan’t Jérusalem an-in nyange malang ke ndɔ ke Jésu ra se kum de. 46 Jésu tel ree kêm ɓee ke Cana ɓeekon ke Galilée ke ndɔ ke kété è ade mann tel yibe nduu tutu nga. Njèkan dè njérɔge le ngar karé bè ndi kêm ɓee-bò ke Capernaum. Ra ngonn’n ke dingem tur’n ngain. 47 Loo ke doo nè oo titeke Jésu in kêm ɓeekon ke Judée ree kêm ɓeekon ke Galilée ɓaa, è aw rann’t deje’n le kade ree aje ngonn’n ke tò tà yo’t. 48 Jésu tel ede’n ede nè: – Ke nè á sei an-in nyankɔbege se nyange ke dum kan lé ɓaa a undei kêm si dèm’t lé. 49 Njèkan dè njérɔge le ngar tel ede Jesu ede nè: – Kuwe-ɓee i ree pa ɓita ade tà ngonn’m tête ɓai. 50 Jésu ede doo nè nga ede nè: – Ɔte aw, ngonni ndi kumgajer ɓai. Doo nè nga um kêm’n dè tà ke Jésu ede’n ɓaa ɔte aw. 51 Loo ke è ɔte à aw ɓai ɓaa, ngann njéndige le’n tilei non’n edi nin edi nè: 52 – Ngonni ndi kumgajer ɓai. E deje de ede nè: – Ké kàde ke bain á ra’n ke taa por làm-làm nga inye’n wa? Dé tel d’ile’n dè’t d’ede nè: – Ra’n ke taa por làm-làm nga, inye’n tagela se kàde ke ɔte ra’n ɓêtch. 53 Bɔ ngonn nè nga ger titeke è kàde ke Jésu ede’n ede nè: «Ngonni ndi kumgajer karè.» E se njékêm kei le’n malang undei kêm de dè Jésu’t. 54 E ke nè á è nyankɔbe ke njékon’t joo ke Jésu ra loo ke ndɔ ke in-in’n kêm ɓeekon ke Judée ree’n beekon ke Galilée.
1 Go nyange’t nè nga, Jésu in aw kêm ɓee-bò ke Jérusalem tede è ndɔ ra nan le Juipge karé bè. 2 Mann-gar karé tò Jérusalem ngɔr se tàbit kei rebe le batege. Mann-gar nè nga dé ɓar’n se tà hébreu d’ede nè: Béthesda. Dé ra palge mi tà mann’t nè. 3 Njératurge, se njékumtɔge, se njédɔgemetege, se njé ke kêl ra de wei tonrin a tɔ, tooi nang rip-rip gir palge’t nè. Njératurge ndii nginei mann-gar ke à tal bungus-bungus, 4 tede doo ke danrán ke Nube ule’n ree ra mann nè nga dɔ-dɔ ade tal bungus-bungus. Njèratur ke inye ji’n dɔ oso danné kété loo ke dé ra’n mann d’ade unn gir tal bungus-bungus nga ɓaa, né ratur le’n è ratur ke bain-bain géa ra’n tel mong maj-maj karè. 5 Dingem karé ke ratur ra’n ɓal kɔr-mute-gidé-sɔsɔ è dann njératurge’t nè nga tɔ. 6 Jésu an’n tò nang pɔbel. E ger kété ɓá titeke ratur nè nga ra’n mari ngain. Jésu deje dingem ke njèratur nè nga ede nè: – Ké i ndige kade ratur ɔr dèi’t wa? 7 Njèratur nè nga tel ile jésu dè’t ede nè: – Ngar, loo ke dé ra mann-gar d’ade unn gir tal bungus-bungus nga, doo le’m ke kade unn’m ile’m danné goto. Loo ke m’age nang m’a m’aw sêt ɓai ɓaa, doo karé ke rang inye ji’n dɔ oso dann mann-gar’t nè kété nonm’t ɓá ta. 8 Jésu tel ede njèratur nè nga ede nè: – Ɔse nang in dɔ unn tuwe lei aw. 9 Ke loon’t nè kuwe, ratur le dingem nè nga ɔr dènn’t ndát-ndát ade unn tuwe le’n unde dènn’t aw. Nè ndɔ ke nè nga è ndɔ taa kebe. 10 Juipge ɓari go dingem ke ratur ɔr dènn’t nga tami se’n edi nè: – Ɓila è ndɔ taa kebe. Ké nan á unn ndu’n adi kade oto tuwe tooi i ringe’n wa? 11 Dingem nè nga ile de dè’t ede nè: – E ke njè kade ratur ɔr dèm’t nga kuwe ede’m ede nè: «Unn tuwe lei aw.» 12 Juipge teli deji dingem nè nga edi nè: – Ké doo ke njè kedi kede nè unn tuwe lei aw nga è nan wa? 13 Nè dingem ke d’ade ratur ɔr dènn’t nga ger doo ke njè kade ratur ɔr dènn’t nga lé, tede Jésu ɔte ur dann doobulege’t ke ndai loo’t nè nga kák . 14 Ndɔ ke rang, Jesu inge dingem nè nga kêm kei le Nube. E ede’n ede nè: – An! ratur ɔr dèi’t ade rai tel mong maj-maj ɓá ta. I ra kaiya kumi ke kété-kété lé ta, nè bainléa nyan ke tur ngain dum dè ratur nè à rai ɓai. 15 Dingem nè nga unde loo tee aw ede Juipge titeke njè kɔr ratur rann’t se ndɔ taa kebe nga, è Jésu. 16 E gir’n ke nè á Juipge awi se Jésu se tà, tede nyange ke ndɔ ke ra se ndɔ taa kebe. 17 Nè Jésu ede de ede nè: – Bɔ’m ndi ra kule kum’n ke kété-kété sár tee ɗarinè ɓai. Man géa m’ndi m’ra kule kum’m ke kété-kété tɔ. 18 Unn gir kêm ndɔn’t nè, Juipge sangi loo ngain dum ke kété le tɔl Jésu. E tede kal ke è al tà tà gute-ndu’t á karé lé, nè è tede ɓar ke ɓar Nube Bɔ koje’n a, an ra’n ke Nube a tɔ. 19 Jesu tel unn tà tam ede de ede nè: – Kerɔte kuwe, man m’ede sei ndàt, Ngonn asekum ra nyan karé bè se dè ra’n lé, nè nyan ke è an ra Bɔn’t á è ra. Tede nyan malang ke Bɔ ngonn ra nga, ngonn’n géa à ra titeke bè tɔ. 20 Bɔ ngonn tár ngonn’n ngain. Gir’n ke nè á è tɔje’n nyan malang ke è ra. E à tɔje’n kule rage ke bò dum dè ège ke nè le kade tà ige’n sei sêl. 21 Titeke Bɔ Ngonn ade njé ke koo undei loo teei teli ndii kumgajer nga, Ngonn géa ade nanan ndikumgajer titeke kêm’n ndige tɔ. 22 Taɓai Bɔ Ngonn gangtà dè doo karé’t bè lé, nè è tel se gangtà malang um ji Ngonnenn’t. 23 Titeke bè á dooge malang à ilei koje dè Ngonnenn’t titeke ilei koje dè Bɔn’t nga tɔ. Doo ke rara ke ile koje dè Ngonn’t nga lé ɓaa, è ile koje dè Bɔ’n ke njèkulenn’t nga lé tɔ. 24 Kerɔte kuwe, man m’ede sei ndàt, nanan ke oo tà le’m, unde kêm’n dè è ke njèkulem’t nga ɓaa ndi kumgajer se non nga ɓá ta. Nube à gangtà dènn’t lé. E doo nè nga tee tà yo’t aw loo ndikumgajer se non ɓá ta. 25 Kerɔte kuwe, man m’ede sei ndàt, kàde kade njé ke koo ooi ndu Ngonn Nube nga ree ɗarinè ɓá ta. Njé ke à ooi ndu Ngonn Nube nga à ndii kumgajer. 26 Titeke Bɔ Ngonn è ngire ndikumgajer nga, Ngonn’n géa è ngire ndikumgajer tite Bɔ’n bè tɔ. 27 Bɔ Ngonn ade’n tɔgmong le gang’n tà tede k’ee ke è Ngonn doo nga. 28 Adi tà ige sei sêl dè tà’t nè nga lé, tede kàde kade dooge ke tooi ɓada à ooi ndu Ngonn doo nga ree ɓá ta. 29 Njé ra nyan majege à undei loo teei kawi loo ndikumgajer’t. Njé ra nyan majelége à undei loo teei kawi loo gangtà’t a tɔ. 30 Man m’asekum ra nyan karé se dè ra’m lé. M’gangtà se go tà ke m’oo. Gangtà le’m nga è se go rebe’n tede m’sang le ra nyan ke kêm man á ndige lé, nè nyan ke kêm’m ke njèkule’m á ndige. 31 Ke nè á m’ɔrgo tà m’ɔje’n dè ra’m man kuwe ɓaa, kɔrgo tà le’m nga è ngarankum kɔrgo tà lé ɓai. 32 Nè doo karé ke rang ɔrgo tà le’m. M’ger titeke tà ke è ɔrgo ɔje’n dè’m nga, è ngarankum kɔrgo tà kuwe. 33 Sei ɔri dooge ulei de ra Jean’t; Jean ɔrgo tà le ngarankum tà nè nga ade sei. 34 Man ɓaa, m’aw ndoo kade doo tá ɔrgo tà le’m lé. Nè man m’ede sei tà nyan nè nga le kade d’aje’n sei. 35 Jean nga kété è tite lampe ke on ndogó kotong. Nè sei ndigi kali ra si dann lookar’t le’n nè nga ndêin. 36 Nè man m’aw se njèkɔrgo tà ke bòi dum Jean. Tede kule ke Bɔ’m ade m’ra m’ɔr son’n nga ɔrgo tà le’m titeke Bɔ’m kuwe ule’m. 37 Bɔ’m ke njèkule’m nga è kuwe ɔrgo tà ɔje’n dè’m. Sei ooi ndu’n nja karé éké sei an-in kum’n nja karé ndan lé ɓai. 38 Tà le’n urkei kêm si’t lé tede sei umi kêm si dè è ke ulenn’t nga lé. 39 Sei teri kêm Magtub ke tò se ninn’n tede sei geri kêm si’t titeke takul de á a ingeii ndikumgajer se non. Nè Magtubge nè nga ei njékɔrgo tàge ke ɔje dè’m. 40 Nè sei ndigi reei ram’t le kinge’n ndikumgajer se non nga lé. 41 Man m’aw ndoo riɓar ke in ra dooge’t lé. 42 Nè sei nga, m’ger sei mbak, sei tári Nube lé. 43 Man m’ree se ri Bɔ’m nè sei uwei man ke ra si’t lé. Nè ke nè á doo karé ke rang kuwe in se dè’n ree ɓaa, è nè tá uweii ke ra si’t. 44 Sei awi ndoo riɓar ke in ra nan’t dadann si sei’t kuwe. Nè riɓar ke in ra Nube’t kuwe karé nga, sei sangi nin lé. Ké sei asi kundei kêm si dèm’t titeke bain wa? 45 An-in tá nè a i giri titeke è man á m’a m’ile tà dè si’t non Bɔm’t, nè è Moise ke sei undei kêm si tchên dènn’t nga á è njèkile tà dè si’t. 46 Ke nè á ndɔ ke umi kêm si dè Moise’t ɓaa, né a umi kêm si dè’m man’t tɔ. Tede è ndang magtub kété ɔje’n dè’m. 47 Nè ke nè á umi kêm si dè tàge ke è ndang kêm magtubge’t le’n nga lé ɓaa, ké a umi kêm si dè tàge’t le’m titeke bain wa?
1 Go’t gugu, Jésu ɔte aw gide ba ke ɓeekon ke Galilée. Ba nè nga ri’n nè Tibériade. 2 Doobulege ngain ndolèi goo’n tede an-in nyankɔbege ke kété è ra se njératurge. 3 Gir’n ke nè á Jésu se njékuwe-girnge ali awi nú dè mbal’t ndii tutu. 4 Nè ndɔ ra nan Paque le Juipge nain ngɔr. 5 Loo ke Jésu tête kum’n an kosdoo-bulege à reei ke rann’t ɓaa, è deje Philippe ede nè: – Ké j’à j’in-in se mapa ra le ndogo kade kosdoo-bulege nè nga usei wa? 6 Jésu ger nyan ke ayé ra nga ɓá, nè è tam tà nè nga bè le nan’n kêm Philippe kan. 7 Philippe ile jésu dè’t ede nè: – Né doo ndogo’n mapa kum nar kule ke ndɔ aru joo tá le tête mes-mes nobo de géa ayé kase de ndan lé. 8 Njèkuwe-gir-Jésu karé dann madennge’t ri’n nè André, ngokon Simon Pierre, ede Jésu ede nè: 9 – Ngonn basa karé ndi nè, aw se tutu mapa se tutu kanje joo laa. Nè né è bè géa, ké è nyan ri karé tede le kosdoo-bulege nè nga wa? 10 Jésu unn ndu’n ade njékuwe-girnge ede nè: – Adi dé ndi nang malang. Loo nè nga walè ke tebe è ngain tutu. Doo ke dingemge malang ke teli ndii nang nga asi aru dɔg loo mi. 11 Jésu ɔi mapa nè nga, ra Nube oiyo pa ɓita ade njékuwe-girnge noboi dooge ke ndii nang rip-rip ɓai. Kanje géa è ra titeke bè tɔ ɓita nobo de ade d’use titeke kêm de ndige. 12 Loo ke dooge usei nyan ndanni ɓá ɓaa, Jésu ede njékuwe-girnge ede nè: – I tanni gute nyon-nyon mapa ke nain le kade karé géa tuju lé. 13 Mapa mi ke dooge usei nga, njékuwe-gir-Jésuge ɔyi nyon-nyon’n ke nain kêm janga dɔg-gidé-joo. 14 Loo ke dooge nè an-in nyankɔbe ke Jésu ra nga bè ɓaa, ei tami edi nè: – Doo nè nga è ngarankum njèribe-dè-tà ke tà Nube’t ke ndɔ ke ayé kule’n kade ree dè nang nè nga kuwe gar-gar á nda nè. 15 Nè loo ke Jésu ger titeke d’ade ree kɔr’n kunde’n ngar ɓaa, è ɔr ra’n njêl se kar’n aw dè mbal’t gugu. 16 Loo ke kàde ur ɓá ɓaa, njékuwe-gir-Jésuge risi awi tà ba’t. 17 Dé d’al kêm ngonn bato’t d’aw gide ba’t kum de ke ɓee-bò ke Capernaum. Loo tuge ndul ɓá, nè Jésu tel ree inge de lé ɓai. 18 Nel bò in ule ade kɔr mann ba tal bungus-bungus. 19 Loo ke d’aw dann ba’t bɔp, ase kurloo mi éké mute-mutege bè ɓaa, d’an Jésu njiye dè ba’t ree ngɔr se bato. Ɓel unde de ndàt gang de. 20 Nè Jésu ede de ede nè: – Ebi’t ɓel, è man kuwe. 21 Ra de ndam ngann-ngann ade dé ndige le kunn’n kêm bato’t ɓaa, ke loon’t nè kuwe bato nda nang gek tu loo ke d’a d’aw ke tutu nga. 22 Doobulege nain-in gide ba’t nú. Loo ke loo ar ɓá ɓaa, doobulege ke nain-in gute de’t gide ba’t nú an-in titeke tagela ngonn bato kuwe karé luk-luk á njékuwe-gir-Jésuge ali kêmé se kar de bere awi. Jésu al kêmé se de lé. 23 Nè né è bè géa, ngann batoge ke rang in-in kêm ɓee-bò ke Tibériade reei. Dé ree ngɔr kɔte loo ke tagela Jésu ra’n Nube oiyo pa ɓita ade dooge mapa usei ɓai nga. 24 Loo ke doobulege an-in titeke Jésu se njékuwe-girnge gotoi loo’t nè ɓaa, ali kêm ngann batoge’t nè nga ɓungei nan awi kêm ɓee-bò ke Capernaum sangi Jésu. 25 Loo ke d’inge’n gide ba’t nú ɓaa, dé deje’n d’ede nè: – Ngar, ké i ree nè lot bain wa? 26 Jésu ile de dè’t ede nè: – Kerɔte kuwe, man m’ede sei ndàt, sei sangi man tede nyankɔbege ke ndɔ ke an-in nga lé, nè tede mapa ke sei usei i ndanni. 27 I rai kule tede nyankuse ke dè’n à ngei karè nga lé. Nè i rai kule tede nyankuse ke à tò sár-sár se non. Nyankuse ke à tò sár se non nga, è Ngonn doo á à ade sei, tede Ngonn doo nga nyankorji le Nube Bɔ dooge tò rann’t. 28 Doobulege deji Jésu edi nè: – Ké j’à ra bain le ra’n nyange ke kêm Nube ndige nga wa? 29 Jésu tel ile de dè’t ede nè: – Nyan ke kêm Nube ndige nga, è le kade undei kêm si dè è ke Nube ulenn’t nga. 30 Dé tel dé deje Jésu d’ede nè: – A i, ké nyankɔbe ri á a i ra le kade j’an, j’unde’n kêm jé dèi’t wa? Ké kule rai è ri wa? 31 Kà jége ke kété mari usei mapa ke ri’n nè manne kêm dile’t titeke dé ndang’n kêm Magtub’t d’ede nè: «Ndɔ ke Nube ade de mapa ke in danrán ade d’use.» 32 Jésu tel ile de dè’t ede nè: – Kerɔte kuwe, man m’ede sei ndàt, è Moise á ade sei mapa ke ndɔ ke in danrán nga lé. Nè è Bɔ’m á ade sei ngarankum mapa ke in danrán nga. 33 Tede mapa ke ade dooge ke dè nang nè ndii kumgajer nga, è mapa ke in danrán ra Nube’t. 34 Dé tel d’ede Jésu d’ede nè: – Kuwe-ɓee, ade jè mapa nè nga se ndɔ karé-karé malang. 35 Jésu ede de ede nè: – Mapa ndikumgajer nè nga è man. Doo ke ree ram’t ɓaa, ɓo a ra’n ndan lé. Doo ke unde kêm’n dèm’t ɓaa, kunde mann à ra’n ndan lé a tɔ. 36 Nè m’ede sei tà nè nga kété ɓá, sei an-in man se kum si kuwe, nè undei kêm si dèm’t lé. 37 Njé ke Bɔ’m ade’m se de malang nga à reei ram’t. Doo ke ree ram’t nga, m’a m’ute’n mbeng kile’n nata ndan lé. 38 Tede man nga m’in danrán m’ree le ra nyan ke kêm’m man á ndige lé, nè m’ree le ra nyan ke kêm njèkule’m á ndige. 39 Njé ke Bɔ’m ke njèkule’m ade’m se de malang nga, è ndige le kade doo karé bè géa dann de’t tuju lé. Nè è ndige le kade m’ade undei loo teei dann njé ke koo’t ndɔ ke ngeinn’t. 40 Nyan ke kêm Bɔ’m ndige á tò nè: Nanan ke oré kum’n dè’m man Ngonnnen’t a, unde kêm’n dèm’t a tɔ ɓaa, è à ndi kumgajer se non. Taɓai man m’ade à unde loo tee dann njé ke koo’t ndɔ ke ngeinn’t a tɔ. 41 Kêm ndɔn’t nè nga Juipge unni gir murin tà ɔji dè Jésu tede tam ke kété tam ede nè: «Mapa ke in danrán ree nga, è man.» 42 Dé tel d’ede nan d’ede nè: – Ké è nè nga è Jésu ngonn le Joseph ke jè geri bɔ’n se kon’n mbak nè nga lé wa? Dé tam bè tede tà ke Jésu tam kété ede nè: «Mapa ke in danrán nga, è man.» 43 Jésu tel ede de ede nè: – Ebi ra si murin tà ke kété-kété dann si’t. 44 Ke nè á Bɔ’m ke njèkule’m ndɔr doo ke ram’t lé ɓaa, doo karé géa ase kin se dè’n ree ram’t lé. Doo ke ree ram’t nga, m’a m’ade à unde loo tee dann njé ke koo’t ndɔ ke ngeinn’t. 45 Njéribe-dè tàge ke tà Nube’t ndangi tà kêm Magtub’t le’n edi nè: «Nube kuwe á è njèndó dooge malang nyan.» Doo ke rara ke ur mbi’n oo’n tà le Bɔ’m a, inyei ra’n ade ndó’n nyan a tɔ ɓaa, doo nè nga à ree ram’t. 46 Doo karé bè ke an Bɔ’m Nube nga goto. Nè man ke m’in rann’t kuwe karé á m’an’n. 47 Kerɔte kuwe, man m’ede sei ndàt, doo ke unde kêm’n dèm’t ɓaa, ndi kumgajer se non ɓá ta. 48 Mapa ndikumgajer nga è man. 49 Ndɔ ke kà sige usei mapa ke ri’n nè manne kêm dile’t. Nè né è bè géa yo tɔl de mbeng kɔke. 50 E ke nè á è mapa ke in danrán. Nanan ke use mapa nè ɓaa à wei ndan lé. 51 Mapa ndikumgajer ke in danrán nga è man. Doo ke use mapa nè nga ɓaa à ndi kumgajer se non. Mapa ke m’a m’ade le kade dooge ke dè nang nè ndii kumgajer nga, è danra’m man kuwe. 52 Juipge naji nan tà ngain dann de’t edi nè: – Ké n’ee nga n’asekum kade jèi danrayé kade j’usei titeke bain wa? 53 Jésu tel ede de ede nè: – Kerɔte kuwe, man m’ede sei ndàt, ke nè á sei usei danra’m man Ngonn doo lé a, an-in mese’m lé a tɔ ɓaa, ndikumgajer nga goto ra si’t ɓá ta. 54 Nanan á ke use danra’m a, an-in mese’m a tɔ ɓaa, ndi kumgajer se non ɓá. Ndɔ ke ngeinn’t ɓaa, m’a m’ade à unde loo tee kɔke dann njé ke koo’t. 55 Danra’m nga è ngarankum nyankuse a, mese’n è ngarankum nyankain a tɔ. 56 Doo ke use danra’m a, an-in mese’m a tɔ ɓaa, um se’m nan’t bɔk a, man géa m’um se’n nan’t bɔk a tɔ. 57 Bɔ’m ke njèkule’m nga ndi kumgajer. Man m’ndi kumgajer takul’n è. Doo ke use danran’m ɓaa à ndi kumgajer titeke bè tɔ takul’m man. 58 An-in! mapa ke in danrán: Mapa nè nga è tite è ke ndɔ ke kà sige ke weii usei kété nga lé. Nè doo ke use mapa nè nga ɓaa à ndi kumgajer se non. 59 E ke nè á è tàge ke Jésu ndó dooge kêm kei kebe nan’t kêm ɓee-bò ke Capernaum. 60 Loo ke d’oo tàge le Jésu nè nga bè ɓaa, njékuwe-girnge bule tami edi nè: – Tà nè nga ngang ngain. Ké nan asekum ndi kur mbi’n koo’n ɓai-ɓai wa? 61 Jésu ger kêmn’t mbak titeke njékuwe-girnge murin tà ɔji dè tà nè nga. Gir’n ke nè á, è deje’n de ede nè: – Ké tà nè nga tuge sei jig’t ile sei wa? 62 Ke nè á ndɔn’t a an-in Ngonn doo loo tel kaw loo ndii’n ke kété in tutu ree nga ɓaa, ké a i tami kedi nè ri ta wa? 63 Ndil á ade doo ndi kumgajer. Doo se dè ra’n ase ra nyan karé lé. Tàge ke man m’ede sei nga in ra Ndil’t. E tàge nè á à ade a i ndii kumgajer. 64 Nè njé ke nange dann si’t undei kêm de dèm’t lé. Njé ke undei kêm de dè Jésu’t lé nga, è ger de kété mari loo kunn gir kule’t le’n. E ke ayé kule’n ji dooge’t nga géa è ger’n mbak ɓá a tɔ. 65 Jésu tam ede nè: – Gir’n ke nè á, ndɔ ke m’ede’n sei kété m’ede nè: Doo karé bè asekum kin se dè ra’n ree ram’t lé. Ke nè á doo karé ree ram’t ɓaa, è Bɔ’m kuwe inye rebe ade’n ree ram’t. 66 Unn gir kêm ndɔn’t nè nga, njékuwe-gir-Jésuge bule teli tɔri ra de goon’t m njiyei se’n lé ta. 67 Jésu tel deje njé ke dɔg-gidé-joo ede nè: – A ɓaa sei, ké i ndigi kaw tɔ wa? 68 Simon Pierre tel ilé dè’t ede nè: – Kuwe-ɓee, ké nan le jé á j’ayé kinyei kaw rann’t ɓai wa? I kuwe se kari bere á aw se tàge ke doo à ndii’n kumgajer sár se non. 69 Jè ɓaa, j’unde kêm jé dèi’t tede jè ger titeke i i doo ke Nube ɔri undei se ninn’n gai. 70 Jésu tel deje de ede nè: – Sei ke dɔg-gidé-joo nè nga, ké è man kuwe á m’tɔr sei lé wa? Nè né è bè géa, è ke karé dann si’t tel è doo le sú ke njèkêmyêr. 71 E tam tà nè nga titeke bè ɔje’n dè Judas ngonn le Simon Iskariot. Judas nga, è njèkuwe-gir Jésu ke karé dann madennge’t ke dɔg-gidé-joo. E è á ayé kule’n ji dooge’t kade tɔli nin.
1 Go’t gugu Jésu aw se loo-loo kêm ɓeekon ke Galilée. E ndige le tel kaw kêm ɓeekon ke Judée lé tede Juipge sangi rebe le kade dé tɔl’n. 2 Nè ndɔ ra nan kei kamge le Juipge nain ngɔr. 3 Ngakon Jésuge ke dingem edi nin edi nè: – Ɔte loo ke nè’t kɔke aw kêm ɓeekon ke Judée tede kade njékuwe-girige teri kule raige ke i ndi i ra nga tɔ. 4 Doo ke sang le kade dooge geri nin njung ɓaa à ra nyan se go ngein lé. Ke nè á a i ra nyange titeke bè nga ɓaa, maje kade i kuwe i tɔje rai ke nata tàkum dooge’t malang. 5 Ngakon Jésuge ke dingem ke mbain kuwe géa undei kêm de dènn’t lé. 6 Jésu ede de ede nè: – Man ɓaa, ndɔ le’m ke kanm nain ɓai, nè sei ɓaa i ndii tchên se ndɔge malang. 7 Sei ɓaa, dooge ke dè nang nè asikum kɔr sei njêt lé, nè man ɓaa dooge ke dè nang nè ɔri man njêt tede kɔr ke m’ɔr gir nyanra de ke majelé ke nata se ndɔ’m-ndɔ’m. 8 Sei ɓaa, tà le si goto, in-in awi loo ra nan’t nga. Man ɓaa, m’a m’aw tutu lé tede ndɔ le’m ke kanm ase lé ɓai. 9 Loo ke Jésu ede de tàge nè nga titeke bè ɓaa, è tel nain gugu ɓeekon ke Galilée. 10 Nè né è bè géa, loo ke ngakon Jésuge ke dingem in-in awi loo ra nan kei kamge’t nga ɓá ɓaa, Jésu géa in aw loo ra nan’t nè nga tɔ. E aw se go ngein m aw tàkum dooge’t njung lé. 11 Juipge sangi Jésu loo ra nan kei kamge’t nè nga. Ei deji nan edi nè: – Ké n’ee nga n’ee ra wa? 12 Doobulege naji nan tà ngain dann de’t ɔji dè Jésu. Njé ke karége tami edi nè: – Jésu è doo ke njèra maje. Njé ke nange tami edi nè: – Ḿ-m̀, Jésu è njè libe kum doobulege. 13 Nè né è bè géa, doo karé ke tam tà ndàt ɔje’n dè Jésu goto tede dé ɓel kum Juipge. 14 Loo ke dé ra nan d’aw danné bɔp ɓá ɓaa, Jésu aw kêm kei’t le Nube unn gir ndó dooge nyan. 15 Tà ige Juipge sêl adi tami edi nè: – N’ee nga, n’ndó nyan lé, à ké se go rebe ke ra n’ger’n magtub bè wa? 16 Jésu tel ile de dè’t ede nè: – Nyan le’m ke m’ndó dooge nga in ram’t lé, nè in ra è njèkulem’t nga. 17 Ke nè á doo karé ndige ra nyan ke kêm njèkule’m Nube ndige ɓaa, à ger tite nyan-ndó nè nga in ra Nube’t. E man kuwe á m’in se dè’m m’ndó nyan dooge lé. 18 Doo ke in se dè’n tam tà nga, sang riɓar ke ɔje dè’n è kuwe. Nè doo ke sang riɓar ke ɔje dè njèkule’n nga ɓaa, è ngarankum doo kerɔte kuwe. Nyanra ke nal naje’n karé bè géa goto rann’t. 19 Ké è Moise kuwe á ade sei magtub gute-ndu Nube nga lé wa? Nè doo karé dann si’t ra nyan ke gute-ndu ɔje nga se ndɔge-ndɔge lé. A ɓaa, ké bain á sei sangi le kade dé tɔl’m wa? 20 Doobulege teli ilei Jésu dè’t edi nè: – I kumen, ké nan dann jé’t á sang le kade dé tɔli wa? 21 Jésu tel unn tà tam ede de ede nè: – Ndɔ ke kété m’ra nyan karé bere luk-luk kuwe ɓai á ndil si tee an-in soin-soin malang nè lé wa? 22 Moise ade sei ndukunnn ke ɔje dè kuje tà mɔte. Ndukunn nè nga in ra Moise’t lé, nè in ra kà sige’t. Nè né è bè géa, sei a ɔdi nan kuje tà mɔte se ndɔ taa kebe. 23 Sei ujei tà mɔte doo se ndɔ taa kebe tede kile’n koje dè gute-ndu Moise’t. A ɓaa, ké bain á i rai wong se’m tede kaje ke ndɔ ke m’aje danra doo bere mbak se ndɔ taa kebe nga wa? 24 Ebi ra si gangtà tede tàkum doo. Nè i gangi tà ke se dè naje’n tá. 25 Loo ke dooge ke nange ke Jérusalem an-in Jésu ɓaa, ei tami edi nè: – Ké è n’ee nga dé sang le kade dé tɔlé nè lé wa? 26 An-in! n’ee nga n’nda kêmé kang n’a n’tam tà nata ndái-ndái, nè doo karé bè géa edé tà lé. Ké njékɔr non jéige geri titeke n’ee nga n’ee Krist kerɔte kuwe wa? 27 N’ee nga jè geri loo ke n’in tutu mbak; nè Krist nga, loo ke ndɔn’t à ree ɓaa, doo karé géa à ger loo ke in tutu nga lé. 28 Kêm ndɔn’t nè nga, Jésu in ndó dooge nyan kêm kei’t le Nube se ndu’n ke bòi ede nè: – Sei geri man mbak, loo ke m’in tutu nga géa i geri mbak a tɔ. E man kuwe m’in se dè’m m’ree lé. Nè Nube ke è njèkule’m ke get-get nga ɓaa, i geri nin lé mbeng kɔke. 29 Man ɓaa, m’ger’n tede m’in rann’t. E è kuwe á ule’m. 30 Loo ke Jésu tam tà nè titeke bè ɓaa, dé sang le kuwe’n, nè doo karé bè géa ule ji’n ɔde’n lêm lé tede kàde le’n nain ɓai. 31 Dooge ngain dann doobulege’t umi kêm dè Jésu’t. Ei tami edi nè: – Loo ke ndɔn’t Krist à ree nga, ké à ra nyankɔbege ngain dum ège ke doo nè ra nga wa? 32 Tàge ke doobulege kɔti nan ɔje dè Jésu nga oso mbi Pharisienge’t. Maw njékuje nyan-mesege se Pharisienge ulei njérɔge le kade uwei nin. 33 Jésu tam ndàt ede nè: – M’a m’nain se si mbɔr ɓita m’a m’tel kaw ra njèkulem’t ɓai. 34 Ndɔn’t a i sangi man, nè a ingei man lé, tede loo ke m’a m’ndi tutu nga, sei asi kaw tutu lé. 35 Juipge deji nan edi nè: – Ké loo ke ra n’a n’aw tutu á j’à j’asi kingei n’ee gugu lé wa? Ké n’a n’in le kaw ɓéee le dooge ke ei Juipge lé le tel rayé ke njè ndó de nyan ta wa? 36 Ké tà ke n’tam n’ede nè: ndɔn’t a i sangi man nè a ingei man lé tede loo ke m’a m’ndi tutu nga, sei asi kawi tutu lé nga, ké gir’n è ri wa? 37 Ngei ndɔ ra nan kei kamge nga, è ndɔ ke bò dum madege. Jésu in nda dɔ non doobulege’t kêm kei le Nube ede de tà se ndu’n ke bòi ede nè: – Ke nè á kunde mann ra doo ɓaa, maje kade ree ram’t taa mann an-in. 38 Doo ke unde kêm’n dèm’t titeke Magtub ke tò se ninn’n tam’n nga ɓaa, mann à in kêmn’t kan-in kutch-kutch. 39 E tam tà nè nga titeke bè ɔje’n dè Ndil-Kêmnda ke njé ke undei kêm de dènn’t ayé kingei. Kêm ndɔn’t nè nga Ndil-Kêmnda ree lé ɓai tede d’ule ndubra dè Jésu’t lé ɓai. 40 Loo ke njé ke nange dann doobulege’t ooi tàge nè nga bè ɓaa, ei tami edi nè: – Loo naje’n goto, doo nè nga è njèribe-dè-tà ke tà Nube’t kuwe. 41 Njé ke nange ke rang tami edi nè: – Doo nè nga è Krist nga kuwe. Nè njé ke karége tami edi nè: – Ké Krist nga à in kêm ɓeekon ke Galilée wa? 42 Bethléhem nga è ngonn ɓee kɔje ngar David. Ké magtub ke tò se ninn’n tam titeke Krist nga à in Bethléhem girkà’t le ngar David nga lé wa? 43 Gir’n ke nè á, doobulege kayai nan danné loo joo tede tà le Jésu. 44 Njé ke nange dann de’t ndigi le kuweii, nè doo karé bè géa ule ji’n ɔde’n lêm lé. 45 Njérɔge teli reei ra maw njékuje nyan-mesege se Pharisienge ji de karè. Ei deji de edi nè: – Ké bain á uwei n’ee i reei seyé lé wa? 46 Njérɔge ilei de dè’t edi nè: – Doo karé ke tam tà tite doo nè nga, j’inge’n nja karé ndan lé ɓai. 47 Pharisienge teli deji de edi nè: – Ké sei kuwe géa adi dé libe kum si tɔ wa? 48 Dann ngar ɓeege’t le jéi éké dann jé jèi Pharisienge’t nga, ké doo karé ke luk-luk unde kêm’n dè doo nyan le doo’t nè nga adi an-in wa? 49 Nè è majelé dooge ke geri gute-ndu le Moise lé kuwe karé á undei kêm de dè doo’t nè nga. Dé nè nga, kure’n à ɔde kum de ɓai. 50 Nicodème, è dann Pharisienge’t ke ulei njérɔge le kade uwei Jésu. E á ndɔ ke è aw inge Jésu. E deje de ede nè: 51 – Ké se go gute-ndu le jéi ke inye loo ade jèi nga, j’asi gangtà dè doo’t anje koo tà le’n kété éké anje ger gir nyanra’n wa? 52 Dé deje Nicodème d’ede nè: – Ké i kuwe géa i tel rai doo ke Galilée tɔ wa? Ke nè á i nder gir tà kêm Magtub’t le Nube maje an ɓaa, njèribe-dè-tà ke tà Nube’t à in kêm ɓeekon ke Galilée lé. 53 Nanan géa ɔte mênênn-mênênn aw ɓee le’n.
1 Jésu tel aw dè mbal ke kage olivierge ndai tutu. 2 Nè loo ke loo à ar ɓai ɓaa, è tel aw kêm kei’t le Nube. Kosdooge malang reei rann’t. E tête ra’n ndi nang unn gir ndó de nyan. 3 Njékɔrgir gute-nduge se Pharisienge uwei dinye karé dè tò se dingem ke rang’t reei se’n undei nin non dooge’t malang. 4 Go’t gugu ei edi Jésu edi nè: – Njèndó dooge nyan, dinye nè nga d’uwe’n mêtch dè tò se dingem ke rang’t. 5 Kêm magtub gute-ndu le jéi ke Moise ndang nga, è unn ndu’n ade jèi le tile dinyege ke titeke bè se kuberi her tɔl de kɔke. Ké tà ri á a i tam dè’t wa? 6 Dé tam tàge nè nga titeke bè d’an-in’n kêm Jésu tede kile’n tà dènn’t. Nè è ule dè’n nang, tuje nyan nang se ngonn ji’n. 7 Titeke njékɔrgir gute-nduge se Pharisienge deji Jésu tà ke kété kété nga, è in ndi dè rann’t ede de ede nè: – Maje kade doo karé dann si’t ke ra majelé nja karé lé unn kuberi her ile’n dinye nè nga kété ade j’an-in. 8 Jésu ule dè’n nang tel unn gir tuje nyan nang se ngonn ji’n. 9 Loo ke dooge ooi tà nè bè ɓaa, in-in go nan’t mênênn-mênênn. Njé ke tɔgege kuwe ɔsi nang in-in kété ɓita njé ke rang uti go de ɓai. Jésu kuwe se kar’n bere á nain-in tà nan’t se dinye ke kété d’unde’n dann de’t nga. 10 Loo ke Jésu ɔr dè’n dɔ ɓaa, è an doo ke rang karé lé. E deje dinye nè nga ede nè: – Ké njé kile tà dèi’t nga ei ra wa? Ké doo karé bè géa ile tà dèi’t lé njing wa? 11 Dinye nè ile jésu dè’t ede nè: – Kuwe-ɓee, doo goto. Nè Jésu tel ede’n ede nè: – Man kuwe géa m’ile tà dèi’t lé tɔ. Ɔte aw loo lei. Nè unn gir’n ɗarinè ɓaa, i ra majelé kumi ke kété lé ta. 12 Jésu tel unn tà tam ede doobulege ede nè: – Man nga m’a m’ee lookar le dooge ke dè nang nè. Nanan ke unn rebe goom’t ɓaa à njiye dann loo ndul’t lé, nè à ndi dann lookar’t. Lookar nè nga, à ɔr non’n kaw se’n loo ndikumgajer se non. 13 Pharisienge tami se Jésu edi nè: – I tam tà ɔje’n dè rai i kuwe. Kɔrgo tà lei ke i ɔr nga, è kɔrgo tà ke get lé. 14 Jésu tel ile Pharisienge dè’t ede nè: – Né m’tam tà m’ɔje’n dè ra’m man kuwe géa, kɔrgo tà le’m man nga, è ngarankum kɔrgo tà kuwe tede m’ger loo ke m’in tutu á m’ree a, m’ger loo ke m’a m’aw ke tutu a tɔ. Nè sei ɓaa, i geri loo kin-in’m éké loo kaw’m lé a tɔ. 15 Sei gangi tà se go kum kan loo le doo, nè man ɓaa, m’gangtà dè doo karé’t bè lé ɓai. 16 Ke nè á m’gangtà géa, tà gang le’m è tà gang ke get tede man se kar’m lé nè Bɔ’m ke njèkule’m nga è se’m nan’t . 17 Dé ndang kêm magtub gute-ndu’t le si d’ede nè: Ke nè á dooge joo ɔri tà ade aw go nan’t ɓaa, è ngarankum kɔrgo tà kuwe. 18 Man m’ɔrgo tà m’ɔje’n dè’m man kuwe: Bɔ’m ke njèkule’m nga géa ɔrgo tà le’m tɔ. 19 Pharisienge teli deji Jésu edi nè: – Ké Bɔi nga è ra wa? Jésu tel ile de dè’t ede nè: – Sei geri man lé a, Bɔ’m géa i geri nin lé a tɔ. Ke nè á né i geri man ɓaa, ayé geri Bɔ’m nga tɔ. 20 Jésu ndi ngɔr se ke kɔg-loo ngonm nar’t. E tam tàge nè nga loo ke ndi à ndó’n de nyan kêm kei le Nube. Nè doo karé bè géa uwe’n lé tede kàde’n le’n nain ɓai. 21 Jésu tel ede Pharisienge ɓai ede nè: – M’a m’ɔte kaw, sei a sangi man pi, nè a weii dann kaiya’t le si. Loo ke m’a m’aw ke tutu nga, sei asikum kawi tutu lé. 22 Juipge deji nan edi nè: – Tam ke n’tanm n’ede nè: «Sei asikum kawi loo ke m’a m’aw tutu lé» nga, ké n’ee kuwe n’ayé tɔl rayé ta wa? 23 Jésu tel ile de dè’t ede nè: – Sei ɓaa, sei dooge ke dè nang nè, nè man m’in dɔ danrán. Sei ɓaa, sei le nang nè, nè man ɓaa m’ee le nang nè lé. 24 Gir’n ke nè á kété m’ede’n sei m’ede nè a weii dann kaiya’t le si. Ke nè á umi kêm si dèm’t titeke man m’ee Krist nga lé ɓaa, a weii dann kaiyage’t le si kerɔte kuwe. 25 Juipge teli deji Jésu edi nè: – Ké i nga i nan wa? Jésu tel ile de dè’t ede nè: – Tà ke m’ede sei kété loo kunn gir’t kule’t le’m nga kuwe, m’nda dè’t njáng sár ɗarinè ɓai. 26 M’aw se tàge ngain ke ɔji dè si le tam a, m’aw se tàge ngain le gang dè si’t a tɔ. Nè njèkule’m nga tam ngarankum tà. Tàge ke m’oo tann’t á m’ede dooge ke dè nang nè. 27 Juipge geri titeke Jésu tam tà nè nga ɔje’n dè Bɔ’n lé. 28 Jésu tel ede de ede nè: – Loo ke ndɔn’t a i ɓeri Ngonn doo dɔ kàde kage-ke-dese’t pa ɓita a i geri titeke man nga m’ee Krist. Kêm ndɔn’t nè tá a i geri titeke man kuwe m’in se dè’m m’ra nyan karé lé, nè nyange ke Bɔ’m ndó’m á m’tam tà’n m’ede sei. 29 E ke njèkule’m nga, è se’m nan’t. E inye’m se kar’m lé tede m’ra nyange ke taa kum’n se ndɔ’m-ndɔ’m. 30 Dooge bule undei kêm de dè Jésu’t loo ke ndi à tam’n tàge nè. 31 Jésu ede Juipge ke undei kêm de dènn’t ede nè: – Ke nè á sei nain-in dann tà’t le’m ɓaa, sei njékuwe-girmge kerɔte kuwe. 32 Sei a i geri ngarankum tà nga a, ngarankum tà nga ade a i ndii dè si pal a tɔ. 33 Dé tel d’ede Jésu d’ede nè: – Jè jè ngannkà Abraham. Ndɔ karé jè ra ɓer le doo ndan lé ɓai. Ké bain á i tam ede nè: J’a tel ndi dè jè pal wa? 34 Jésu tel ede de ede nè: – Kerɔte kuwe, man m’ede sei ndàt, nanan á ke inye ra’n nyein dann kaiya’t se ndɔ’n-ndɔ’n ɓaa, è ɓer le kaiya kuwe. 35 Ɓer nga à ra ɓee se njénojege le’n sár se non lé. Nè ngonn ɓaa à ra ɓee se njénojege le’n sár se non. 36 Ke nè á man Ngonn á m’ade i ndii dè si pal ɓaa, a i ndii dè si pal kerɔte kuwe. 37 Sei ngannkà Abraham ade m’ger kuwe. Nè i sangi le kade dé tɔl’m tede tà le’m ke urkei kêm si’t lé. 38 Man m’ede sei tà nyange ke m’an ra Bɔm’t, nè sei ɓaa, i rai nyange ke an-in ra bɔ si’t. 39 Juipge teli edi Jésu edi nè: – Kà jé jè nga è Abraham. Jésu tel ede de ede nè: – Ke nè á sei ngannkà Abraham kerɔte ɓaa, né ayé rai nyanra Abraham. 40 Nè man njè kede sei ngarankum tà ke m’oo tà Nube’t nga, ɗarinè sei sangi kade dé tɔl’m. Abraham nga ndɔ ke ra nyan titeke bè lé. 41 Nè sei i rai nyan ra bɔ si tcha-tcha. Juipge teli edi Jésu edi nè: – Jè nga, dé tò se nan ke kaiya’t á d’oje’n jè lé. Nè Nube kuwe karé bere luk-luk á è Bɔ jé. 42 Jésu ede de ede nè: – Ke nè á Nube è Bɔ si kerɔte ɓaa, né ayé tári man tede man m’in ra Nube’t á m’ree. E man kuwe m’in se dè’m m’ree lé, è è á ule’m ra si’t. 43 Sei unni mbi si dè nyange ke m’ndó sei, gir’n ke nè á sei asikum ger girtàge le’m lé. 44 Sei ɓaa, bɔ si ke le si è sú. Nyange ke ngur’n ra bɔ si pênn-pênn á sei ndigi rai. E nga, è njè tɔ koo dooge ká-ká, kété mari ke desêin sár tee ɓila. E nga, nda dè njann’t njáng dè ngarankum tà’t lé, tede ngarankum tà goto kêmn’t. Tà lanm ke è tam se ndɔge malang nga in-in kêm’n è’t kuwe tede è njè tà lanm a, è bɔ njé tà lanmge a tɔ. 45 Nè man ɓaa, undei kêm si dèm’t lé tede ngarankum tà ke m’tam. 46 Ké nan dann si’t asekum tɔje’m majelé ra’m wa? Ke nè á m’tam ngarankum tà ɓaa, ké bain á undei kêm si dèm’t lé wa? 47 Nanan ke è le Nube ɓaa à ur mbi’n le koo’n tàge le Nube. Nè sei uri mbi si ooi tàge le Nube lé, tede sei sei lennge lé. 48 Juipge teli deji Jésu edi nè: – Tam ke jè tam kété j’ede nè i doo ke kêm ɓee-bò ke Samarie karè a, kumen tò kêmi’t a tɔ nga, ké è loon’t lé wa? 49 Jésu ile de dè’t ede nè: – Ḿ-m̀, kumen goto kêm’t. Man m’ile koje dè Bɔm’t, nè sei á ilei koje dèm’t lé. 50 Man m’sang riɓar ke ɔje dè’m lé. Nè njèsang riɓar se njègangtà ke ɔje dè’m ndi non. 51 Kerɔte kuwe, man m’ede sei ndàt, ke nè á doo karé an dè tà le’m sêw-sêw ɓaa, à wei ndan lé. 52 Juipge edi Jésu edi nè: – Ɗarinè jè ger titeke kumen tò kêmi’t kerɔte kuwe. Abraham wei ɓá, njéribe-dè-tàge ke tà Nube’t géa weii ɓá a tɔ. Nè i ɓaa i tam ede nè: «Ke nè á doo karé an dè tà le’m sêw-sêw ɓaa, yo à tɔl’n ndan lé.» 53 Ké i nga i bòi i dum kà jé Abraham ke ndɔ wei nè nga wa? Njéribe-dè-tàge ke tà Nube’t ke ndɔ ke weii nga, ké i bòi i dum de wa? Ké i nga i ra rai ke nan wa? 54 Jésu ile de dè’t ede nè: – Ke nè á man kuwe m’ndi sang riɓar se dè ra’m ɓaa, riɓar le’m è nyan ke raikarè. Bɔ’m ke sei tami edi nè: «E Nube le si» nga á è njèkule ndubra dèm’t. 55 Sei ɓaa i geri Nube lé, nè man ɓaa m’ger’n. Ke nè á m’tam m’ede nè m’ger’n lé ɓaa, m’ayé k’ee njè tà lanm titeke sei bè tɔ. Nè man ɓaa, m’ger’n, gir’n ke nè á m’an’n dè tà le’n sêw-sêw. 56 Kà si Abraham nga ndɔ ke ra ranel kêmn’t tede le kan ndɔ ree le’m. Ndɔ ke è an ndɔ nè nga se kum’n a, ra ranel dè’t ngain a tɔ. 57 Juipge deji Jésu edi nè: – I nga, ɓali ase kɔr-mi lé ɓai, à ké an Abraham ra wa? 58 Jésu ede de ede nè: – Kerɔte kuwe, man m’ede sei ndàt, man m’ndi tutu kété ɓita kade d’oje kà si Abraham nga ɓai. 59 Ke loon’t nè, Juipge ɔyi kuberi her raw tede le tile’n Jésu tɔl’n, nè è ɓɔyɔ ra’n dann doobulege’t unde loo njêl tee kêm kei le Nube aw.
1 Loo ke Jésu à dere le kaw ɓaa, è an dingem karé bè ke d’oje’n ke njèkumtɔ. 2 Njékuwe-gir-Jésuge deji nin edi nè: – Ngar, ké nan ra majelé á ade d’oje’n dingem nè nga ke njèkumtɔ wa? E è éké njékojennge wa? 3 Jésu ile de dè’t ede nè: – E è á ra majelé éké njékojennge lé a tɔ. Nè d’oje dingem nè nga ke njèkumtɔ kade dooge an-in tɔgmong le Nube tede tà le’n. 4 Loo ke kàde nain ɓai nè kuwe, gar-gar ade jè rai kule le njèkule’m. Loo ke ndɔ à il ɓaa, doo karé bè asekum ra kule lé ta. 5 Ndɔge malang ke m’nain’n dè nang nè ɓai nga, m’ee lookar le dooge ke dè nang nè. 6 Loo ke Jésu tam tàge nè nga bè ɓá ɓaa, è tibe yoro loin’n nang uje kum njèkumtɔ’t labat. 7 Go’t gugu Jésu ede njèkumtɔ nè ede nè: – Aw i togo kumi se mann gar ke ri’n nè Siloé (tel se tà koje jéi ɓaa, è njèkawkule le Nube). Njèkumtɔ nga ɔte aw tà mann gar’t togo kum’n. Loo ke à tel ɓaa, an loo. 8 Dingem nè nga kété è njèkumtɔ. Njémade-tà-keige le’n se dooge ke kété an-in nin ke njèkɔ nyan nga unni gir tami kedi nè: – Ké è doo nè kuwe á kété ndi nang kɔ nyan se ndɔge malang nè lé wa? 9 Njé ke nange edi nè: – E n’ee nga kuwe. Njé ke rang edi nè: – Ḿ-m̀, è doo ke rang á tanan seyé karè. Nè njèkumtɔ nè kuwe tam ndàt dè rann’t ede nè: – E man nga kuwe. 10 Dé deje’n d’ede nè: – A ɓaa, i ra titeke bain á kumi teen ade an’n loo wa? 11 Njèkumtɔ ile dooge dè’t ede nè: – Dingem ke dé ɓar’n Jésu á loin nang uje kum’t ɓaa, è ede’m ede nè: «Aw i togo kumi se mann ke ri’n nè Siloé.» Ke loon’t nè kuwe m’ɔte m’aw danné m’togo kum’m ɓaa, kum’m an loo njai-njai. 12 Dooge teli deji njèkumtɔ nè nga edi nè: – Ké dingem nè nga è ra wa? E ile de dè’t ede nè: – Man m’ger loo ke è tutu lé. 13 Dé kali dingem ke kété è njèkumtɔ nga d’aw se’n ra Pharisienge’t. 14 Ndɔ ke Jésu loin nang uje’n kum dingem’t ade an’n loo nga, è ndɔ taa kebe. 15 Pharisienge ke le de tɔ, deji dingem ke kété è njèkumtɔ nga edi nè: – Ké i ra titeke bain á kumi teen ade an’n loo wa? E ile de dè’t ede nè: –Dingem nè nga loin nang uje kum’t labat. Taɓai loo ke m’aw togo kum’m ɓaa, ɗarinè m’an loo njai-njai ta. 16 Dooge ke nange dann Pharisienge tami edi nè: – Dingem ke njè ra nyan nè nga in ra Nube’t lé, tede ile koje dè ndɔ taa kebe’t nga lé. Njé ke rang tami edi nè: – Ké doo ke njè ra majelé asekum ra nyankɔbege ke titeke bè ra wa? Kɔbe kasenan lé in dann de’t ade dé kai nan danné. 17 Pharisienge teli deji doo ke kété è njèkumtɔ nga edi nè: – Njè kade kumi teen ade an’n loo nga, ké tà ri á i tam ɔje’n dè’n wa? Dingem ke kété è njèkumtɔ tel ile de dè’t ede nè: – E njèribe-dè-tà ke tà Nube’t kerɔte kuwe. 18 Dingem ke kété è njèkumtɔ á ɗarinè tel an loo nga, Juipge mbati kumi kêm de dè tà’t le’n. Gir’n ke nè á adi dé ɓar’n njékojennge d’ade reei ɓaa, 19 ei deji de edi nè: – Ké è ke nda nè, è ngonn si ke ndɔ ke sei tami edi nè oji nin ke njèkumtɔ nga lé wa? Ké se rebe ke ra an’n loo ɗarinè wa? 20 Njékojennge ilei Pharisienge dè’t edi nè: – Jè ger maje titeke è ngonn jé ke j’oje’n ke njèkumtɔ nga kuwe. 21 Nè se go rebe ke ra an’n loo ɗarinè, jè jè ger lé. Doo ke njèkade kum’n teen ade an’n loo nga géa jè ger’n lé a tɔ. I dejii è kuwe adi ɔrgir nyan ke ɔje dè’n ade ooi tede è doo ke tɔge kang-kang ɓá ta. 22 Njékojennge tami titeke bè tede ei ɓeli Juipge. Juipge nga umi tà le de nan’t kété edi nè: Nanan ke tam ndàt titeke Jésu nga è Krist ɓaa, j’à rɔi nin kɔke kêm kei kebe nan’t. 23 Gir’n ke nè á njékojennge tami edi nè: «I dejii è kuwe tede è doo ke tɔge kang-kang ɓá ta.» 24 Pharisienge tel ɓari doo ke kété è njèkumtɔ nga dejii tà nja karé ɓai edi nè: – I tam kerɔte non Nube’t. Dingem nè nga, jè ɓaa jè ger titeke è njè ra majelé. 25 Doo ke kété è njèkumtɔ tel ile de dè’t ede nè: – Doo nè nga, bainléa è njè ra majelé géa m’ger lé. Nè nyan karé ke m’ger á tɔ nè: kété m’ee njèkumtɔ, nè ɗarinè m’an loo njai-njai. 26 Pharisienge teli deji dingem ke kété è njèkumtɔ edi nè: – Ké ri á ndɔ ke doo nè ra sei wa? Ké n’ade kumi teen ade an’n loo titeke bain wa? 27 E tel ile de dè’t ede nè: – Kété kuwe m’ede sei tà nè nga ɓá, nè sei unni mbi si dè’t. Ké bain taɓai i ndigi kooi ɓai wa? Ké sei géa awi ndoo teli k’ei njékuwe-girnge tɔ wa? 28 Ke loon’t nè kuwe, Pharisienge unni gir taji doo ke kété è njèkumtɔ edi nè: – I á i njèkuwe-gir doo nyan le doo nè nga! Nè jè ɓaa, jé pajage le Moise. 29 Jè ɓaa, jè ger titeke Moise á ndɔ ke Nube ede’n tà. Nè doo nyan le doo nè nga, jè ger loo ke in tutu lé. 30 Doo ke kété è njèkumtɔ ile de dè’t ede nè: – Dingem nè nga, sei edi nè i geri loo ke in tutu lé. Nè né è bè géa, è ade kum’m teen ade m’an’n loo. Tam ke sei i tami edi nè: i geri loo ke in tutu lé nga, è nyan ke ade tà ige’m sêl. 31 Jè geri titeke Nube ur mbi’n oo’n tà le njé ra majelége lé. Taɓai è ile de dè tà ke d’ɔje senn’t nga lé a tɔ. Nè ke nè á doo karé ile koje dè Nube’t a, ra nyan ke kêm’n ndige ɓaa, Nube ur mbi’n oo’n tà le doo nè nga kerɔte. 32 Doo ke d’oje’n ke njèkumtɔ nga, doo ade kum’n teen ade j’oo tà’n nja karé bè ndan lé ɓai. 33 Ke nè á dingem ke njè kade njèkumtɔ an loo nè in ra Nube’t lé ɓaa, ayé k’asekum ra nyan karé lé. 34 Pharisienge in-in se doo ke ndɔ ke è njèkumtɔ nga edi nè: – I ke d’oji dann majelé’t bere mbak taa i ndige le tel k’ee njè ndó jè nyan wa? Ke loon’t nè dé rɔ’n kêm kei kebe nan’t d’ile’n nata. 35 Jésu oo titeke dé rɔ doo ke kété è njèkumtɔ nè d’ile’n nata. E ree inge’n deje’n ede nè: – I nga, ké unde kêmi dè’m man Ngonn doo’t nga kuwe wa? 36 Doo ke kété è njèkumtɔ deje Jésu ede nè: – Ngar, ké Ngonn doo nga è nan wa? Ede’m kade m’unde kêm’m dènn’t. 37 Jésu tel ede doo ke kété kum’n tɔ nga ede nè: – Ngonn doo nga i an’n ɓá, è è nga kuwe á nda ɔje sei tà nè. 38 Njèkumtɔ ke kété nga ɔse keje’n nang non Jésu’t ede’n ede nè: – Kuwe-ɓee, m’unde kêm’m dèi’t kuwe. 39 Jésu unn tà tam ede nè: – Man nga m’ree dè nang nè le kɔr ninn dooge gai-gai: Njé ke kété an-in loo à teli njé kum libege a, le kade njé ke kété ei njé kum libege teli an-in loo a tɔ. 40 Pharisienge ke nange ndii ra Jésu’t. Loo ke ooi tàge ke è tam nè nga bè ɓaa, ei deji nin edi nè: – Ké jè géa jè njé kum libege tɔ wa? 41 Jésu ile de dè’t ede nè: – Ke nè á kété sei njé kum libege kerɔte ɓaa, né tà kaiya ayé kuwe dè si lé. Nè sei tami ɗarinè edi nè: «Jè jè njé kum kan looge.» Gir’n ke nè á tà kaiya uwe’n de si ɗêng-ɗêng ɓai.
1 Kerɔte kuwe, man m’ede sei ndàt, doo ke ree se tà rebe gar batege lé, nè al se tà rebe ke rang tá ree’n go batege ɓaa, è njèɓog a, è gon-ɓog a tɔ. 2 Nè doo ke aw kei go batege se tà rebe gar batege nga, è njèkul batege kuwe. 3 Njè ngonm tà rebe gar batege teen tà rebe ade’n. Batege uri mbi de ooi ndu njèkul de nga. Batege ke ei lennge nga, è ɓar de se ri de karé-karé tee se de nata. 4 Loo ke è tee se batege ke kinge’n malang nata ɓá ɓaa, è oso non de’t kété. Batege geri ndu’n. Gir’n ke nè á umi nan goon’t. 5 Doo ke in rang ke batege geri ndu’n lé nga, à umi nan goon’t ndan lé. Nè loo an-in doo ke in rang ɓaa, à an-in nan kawi ndai heb se’n, tede dooge ke in-in rang nga ei mbage m dé ger ndu de lé. 6 Jésu ede Pharisienge tà nè nga se gos titeke bè, nè geri gir tà ke è ede de nga lé. 7 Jésu tel ede de ede nè: – Kerɔte kuwe, man m’ede sei ndàt, man nga m’ee tàbit kei rebe gar batege. 8 Njé ke reei kété nonm’t malang ei njéɓog-ge se gon-ɓogege a tɔ. Nè batege uri mbi de ooi ndu de lé. 9 Man nga m’ee tàbit kei rebe. Ke nè á doo ree se rebe ke ram’t ɓaa, d’a d’aje’n. Doo nè nga à aw kei a, à unde loo tee nata a tɔ. Taɓai doo nè nga à inge nyan kul ra’n a tɔ. 10 Njèɓog nga ree tede ɓoge batege a, tɔl de a, le tuju de a tɔ. Nè man ɓaa, m’ree le kade dooge se batege ndii kumgajer adi ase de nák-nák. 11 Man m’ee njèkul batege ke get. Njèkul batege ke get ile ra’n kɔke tede batege le’n. 12 Doo ke batege ei le’n lé nga, è ul de tede kinge’n nar karè. Loo ke an heng à ree ɓaa, inye batege an-in aw, ade heng ree yal batege karé-karé. 13 E tee an-in tede è njèkul batege lé. 14 Man m’ee njèkul batege ke get. Man m’ger batege le’m a, batege le’m géa geri man a tɔ. 15 Bɔ’m ger’m tede man géa m’ger’n a tɔ. Gir’n ke nè m’ile’n ra’m kɔke tede le batege le’m. 16 M’aw se batege ke rang ke ndai kêm gar’t nè nga lé ɓai. Dé nè nga, gar-gar è tà le kade m’ɔse nja de nan’t tɔ. D’a d’oo ndu’m, d’a dé kos batege ke karé luk-luk, njèkul de géa à è karé luk-luk a tɔ. 17 M’ile ra’m kɔke ɓila nè m’a m’tel ndi kumgajer gugu ɓai. Gir’n ke nè á Bɔ’m tár’m ngain. 18 Doo karé ke asekum tɔl’m se dè ra’n goto, nè man kuwe m’inye ra’m m’ade yo. M’aw se tɔgmong le kinye ra’m kade yo a, m’aw se tɔgmong le tel ndi kumgajer gugu a tɔ. E ke nè á è nyan ke Bɔ’m unn’n ndu’n ade’m le kade’m m’ra. 19 Tà tin nan oso dann Juipge’t tede tàge ke Jésu tam ɗarinè nga. 20 Njè ke nange bule dann de’t tami edi nè: – N’ee nga, kumen tò kêmé’t a, bile rayé a tɔ. Ké uri mbi si ooi ta leyé tede ri wa? 21 Njé ke rang tami edi nè: – Tàge nè nga è tà tam doo ke bile ra’n lé. Ké doo ke njè bile ase kum kade njékumtɔge an-in loo wa? 22 Kei le Nube ke tò kêm ɓee-bò ke Jérusalem nga, dé ra nan’n. E nan ke ɔje dè kɔr kei nè a, se ɗinger loo nyankuje-mese gonm a tɔ. Dé ra nan nè nga tà kuli. 23 Jésu ringe gile kei’t le Nube ke dé ɓar’n pal le Salomon. 24 Juipge an-in dè Jésu girm ulei nan’t ɓaa, deji nin edi nè: – Ké ndɔ ke ra a ade kêm jé à oso nang pon wa? Ke nè á i Krist nga ɓaa, ede jè ndàt ade j’oo. 25 Jésu ile de dè’t ede nè: – Tà nè nga m’ede sei kété ɓá, nè unni mbi si dè’t. Nyankɔbege ke Bɔ’m ade’m m’ra se ri’n nga, ɔri go tàge le’m titeke m’ee Krist nga kuwe. 26 Nè sei undei kêm si dè’t lé, tede sei dann batege’t le’m nga lé titeke m’tam’n kété. 27 Batege le’m nga uri mbi de ooi ndu’m. Man m’ger de mbak, à umi nan goom’t a tɔ. 28 Man m’ade à ndii kumgajer se non m à weii ndan lé sár doo karé bè géa asekum kuwe de hont kɔr de jim’t lé a tɔ. 29 Bɔ’m ke njè kade’m se de nga, tɔgmong le’n dum dè le dooge malang. Doo karé bè ke asekum nanr de taa de jinn’t goto. 30 Man se Bɔ’m jè karé. 31 Juipge teli ɔyi kuberi her raw le tilei Jésu tɔlii kɔke. 32 Jésu tel ile de dè’t ede nè: – M’ra nyange ke maje bule se tɔgmong le Bɔ’m m’ade an-in ɓá. Ké è tede è ke ra taɓai á a i tilei man se kuberi her tɔli man wa? 33 Juipge teli ilei Jésu dè’t edi nè: – E tede nede ke i nede Nube. Taɓai i i doo ndul karè, nè i ra rai ke Nube. Gir’n ke nè á jè ndige tilei se kuberi her tɔli m è tede nyan rai ke maje nga lé. 34 Jésu tel deje de ede nè: – Kété kuwe man m’ede sei m’ede nè: «Sei sei kum gute tà Nube.» Ké dé ndang tà nè nga kêm Magtub mann-ra le si ke mari’t lé wa? 35 Njé ke tà le Nube oso mbi de’t nga, loo ke nange Magtub mann-ra ke mari ɓar de kum gute tà Nube. Tà ke tò kêm Magtub ke tò se ninn’n nga, doo asekum kɔr kile kɔke tuju’n lé. 36 Man nga, Bɔ’m Nube ɔr’m unde’m se ninn’n kété ɓita ule’m dè nang nè ɓai. Ké bain á m’ede nè man Ngonn’n ɓaa sei tami edi nè m’nede’n taɓai wa? 37 Ke nè á m’ra nyange se tɔgmong le Bɔ’m lé ɓaa, undei kêm si dèm’t lé. 38 Ke nè á undei kêmi si dè’m man’t lé géa, undei kêm si dè nyange ke ndɔ ke m’ra se tɔgmong le Bɔ’m. Titeke bè á a i geri nja karé ke ngang’n titeke Bɔ’m um se’m nan’t bɔk a, man géa m’um se’n nan’t bɔk a tɔ. 39 Nja karé ɓai, Juipge teli sangi le kuwei Jésu kuwe ɓai, nè è tee dann de’t njêl aw. 40 Jésu tel aw gugu gide ba ke Jourdain nú ndi tutu. E loo ke ndɔ ke kété Jean unn gir kule dooge manné njonm tutu. 41 Dooge ngain reei ra Jésu’t edi nin edi nè: – Jean nga ndɔ ke ra nyankɔbe karé bè lé. Nè tàge malang ke ndɔ ke tam ɔje’n dèi i Jésu nga, è ngarankum tà kerɔte. 42 Dooge ngain ke gide ba ke Jourdain undei kêm de dè Jésu’t.
1 Dingem karé bè ri’n nè Lazare ndi kêm ɓee ke Béthanie. Ngakon nange ke dinye joo, Marthe se Marie ndii se’n kêm ɓee’t nè nga tɔ. Ndɔ karé bè ratur ra Lazare ngain ade tò tà yo’t. 2 E Marie nè nga kuwe á ndɔ ke tête wubu ke dé ra se myrrhe dè Kuwe-ɓee Jésu’t a, tel bɔr njà’n se bin dè’n a tɔ. E ngokon’n Lazare á tò tà yo’t. 3 Marthe se Marie ulei kule ra Jésu’t edi nin edi nè: – Kuwe-ɓee, an! madi ke i tár’n ngain nga tò tà yo’t. 4 Loo ke Jésu oo tà nè ɓaa, è tam ede nè: – Ratur nè nga è ratur ke à tɔl Lazare lé, nè è tede kade dooge an-in tɔgmong le Nube. Takul ratur nè á d’a d’an’n tɔgmong ke Nube ade’m man Ngonn doo nga. 5 Jésu tár Marthe se Marie ngain. Ngokon de Lazare géa è tár’n ngain tɔ. 6 Jésu oo mbak titeke Lazare tò tà yo’t, nè né è bè géa, è tel è nain loo ke è ndi tutu nga ase ndɔ joo ɓai. 7 Go’t gugu ɓita è ede njékuwe-girnge ede nè: – Adi jè teli j’awi kêm ɓeekon ke Judée gugu. 8 Njékuwe-girnge deji nin edi nè: – Ngar, i a Juipge sangi tilei nin se kuberi her le tɔli nin ɗarinè ɓai nè kuwe, ké a i tel kaw kêm ɓeekon le de ke Judée nga ɓai wa? 9 Jésu tel deje de ede nè: – Loo ke loo ar sár ɓita kade loo ndul nga, ké kàde karé-karé ke kêmé è dɔg-gidé-joo lé wa? Ke nè á doo karé njiye dann kada ɓaa, nyan à tuge’n kade aw tebel-tebel lé tede an lookar le dooge ke dè nang nè. 10 Ke nè á doo karé njiye dann loondul’t ɓaa, nyan à tuge’n kade aw tebel-tebel tede lookar goto rann’t. 11 Loo ke Jésu tam tàge nè nga gir gang ɓá ɓaa, è ede njékuwe-girnge ede nè: – Made jéi Lazare nga tò ɓi karè, nè m’a m’aw le ndel’n. 12 Njékuwe-gir-Jésuge edi nin edi nè: – Kuwe-ɓee, ke nè á n’tò ɓi karè ɓaa d’a ndelé ɓai. 13 Jésu tam tà ɔje’n dè kwei le Lazare, nè ei njékuwe-girnge ɓaa ei giri kêm de’t titeke è tam tà ɔje’n dè ɓi ke tɔl Lazare ɗêk-ɗêk. 14 Loo ke Jésu an bè ɓaa, è tel ede de ndàt ede nè: – Made jéi Lazare nga wei. 15 M’ra ranel tede tà le si. Goto ke m’goto kêm ɓee ke Béthanie loo kwei’t le Lazare nga, è tede kade undei kêm si dèm’t. Nè adi j’awi dènn’t j’an-in nin. 16 Thomas ke ri tɔy’n è ndunge ede njékuwegir-Jésu madennge ede nè: – Jèi géa, adi j’awi j’weii se Jésu nan’t. 17 Dé dubu Lazare ra ndɔ sɔ ɓita Jésu ree ɓai. 18 Ngonn ɓee ke Béthanie nga tò ngɔr ase kurloo mutege bè se ɓee-bò ke Jérusalem. 19 Gir’n ke nè á Juipge reei ngain ra Marthe se Marie le sɔli kêm de tede ngokon de ke wei. 20 Loo ke Marthe oo titeke Jésu à ree ɓaa, in aw tile non’n. Nè Marie ɓaa ndi nang kêm kei ɓéee. 21 Marthe ede Jésu ede nè: – Kuwe jé, ke nè á ndɔ ke i nè ɓaa, ngokon’m ayé kwei bè lé ɓai. 22 Nè ɗarinè géa, m’ger kêm’t titeke nyan malang ke a i deje Nube nga à adi kuwe. 23 Jésu tel ede Marthe ede nè: – Ngokoin à unde loo tee dann njé ke koo’t karè. 24 Marthe tel ede Jésu ede nè: – M’ger maje titeke à unde loo tee dann njé ke koo’t ndɔ ke ngeinn’t. 25 Jésu tel ede Marthe ede nè: – Man nga m’ee njèkade dooge undei loo teei dann njé ke koo’t. Man nga, m’ee njèkade dooge ndii kumgajer a tɔ. Nanan ke unde kêm’n dèm’t, ke nè á wei géa à tel ndi kumgajer ɓai. 26 Nanan ke unde kêm’n dèm’t loo ke è ndii’n kumgajer ɓai nga à wei ndan lé. Ké um kêmi dè tà’t nè nga kuwe wa? 27 Marthe tel ile jésu dè’t ede nè: – Oiyo Kuwe-ɓee, m’um kêm dè’t titeke i i Krist Ngonn Nube ke ndɔ ke ule’n ade ree dè nang nè nga kuwe mbain. 28 Loo ke Marthe tam tà nè nga titeke bè ɓá ɓaa, ɔte aw ɓar ngokon’n Marie ede’n mêt ede nè: – Kuwe jé ree nda rebe non, è ɓari kade aw inge’n. 29 Loo ke Marie oo tà nè bè ɓaa, ɔse nang kalang in aw tile non Jésu tɔ. 30 Jésu ree kêm ɓee’t lé ɓai, nè è nda loo ke kété Marthe aw inge’n tutu nga kuwe ɓai. 31 Juipge danni nan pê-pê ra Marie’t kei le sɔli kêm’n. Loo ke ei an-in titeke è ɔse nang rat in le tee nata ɓaa, umi nan goon’t. Ei giri titeke à aw dè ɓada le non. 32 Loo ke Marie ree tee loo ke Jésu nda tutu tête kum’n an’n ɓaa, unde burmba nonn’t ede’n ede nè: – Kuwe jé, ke nè á ndɔ ke i nè ɓaa, ngokon jé ayé kwei bè lé ɓai. 33 Jésu an Marie non a, Juipge ke danni nin géa noin a tɔ. Ke loon’t nè kuwe, Jésu an kumndoo le Marie ɓaa, ɔr tà’n deje de ede nè: 34 – Ké è loo ke ra á i dubi Lazare tutu wa? Dé tel d’ile’n dè’t d’ede nè: – Kuwe-ɓee, i ree aw an. 35 Ke loon’t nè kuwe, Jésu ur non sut. 36 Juipge tami edi nè: – An-in! tár ke n’tár’n non. 37 Njé ke nange ke dann de’t tami edi nè: – N’ee ke ndɔ ke n’ade njèkumtɔ an loo nga, ké bain á n’ase kɔge yo tɔl Lazare nga lé wa? 38 Kêm Jésu tel tɔse’n se non mbik-mbik ade ɔte aw dè ɓada. Ɓade nè nga è bolè mbal ke dé son ɓaa, d’utu tà se kuberi her ke bòi. 39 Jésu ede de ede nè: – I ndubri kuberi her nè nga kɔke. Marthe kon nann njèyo Lazare ede Jésu ede nè: – Kuwe-ɓee, ninn Lazare in ndum ɓá tede ɓila ra ndɔ sɔ ta. 40 Jésu tel ede’n ede nè: – Ke nè á unde kêmi dèm’t ɓaa a an tɔgmong le Nube se kumi. Ké kété m’edi bè lé wa? 41 Dé ndubri kuberi her ke bòi nga d’ile rang. Jésu an loo ke dɔ danrán tam ede nè: – Bɔ’m, m’rai oiyo tede i oo ndu kɔ le’m. 42 Kerɔte kuwe man ɓaa, m’ger mbak tite oo ndu kɔ le’m se ndɔge malang. Nè m’tam tà nè nga tede tà le doobulege ke an-in dè’m girm nè, tede kade undei kêm de dèm’t titeke è i kuwe ule’m dè nang nè. 43 Loo ke Jésu tam tà nè nga titeke bè ɓá ɓaa, è tam tà se ndu’n ke bòi beng ede nè: – Lazare unde loo i tee nata. 44 Njèyo nga unde loo tee se tà kubu ke dé ɓir’n njannge se jinnge se kum’n bere mbak. Jésu ede dooge ede nè: – I tuti n’ee adi n’aw. 45 Dooge bule dann Juipge’t reei ra Marie’t. Loo ke ei teri nyange ke Jésu ra an-in ɓaa, undei kêm de dènn’t. 46 Nè njé ke nange dann de’t in-in awi ra Pharisienge’t ɔri ser nyange ke Jésu ra ade ooi. 47 Maw njékuje nyan-mesege se Pharisienge ɔsi nja njégangtàge nan’t deji de edi nè: – Ké ri á j’à rai ta wa? Doo nyan le doo ke dé ɓar’n Jésu nè nga ra nyankɔbege ngain. 48 Ke nè á j’inyei nin j’adi ra nyankɔbege nè kum’n ke kété-kété ɓaa, dooge malang à undei kêm de dènn’t. Taɓai njékonɓeege ke Rome géa à reei le tuji kei le Nube se girkoje le jéi. 49 E ke karé dann de’t ri’n nè Caiphe. E maw njèkuje nyan-mese kêm ɓaln’t nè nga, è ede de ede nè: 50 – Sei geri nyan karé lé. Kwei le doo karé tede le kosdooge le jéi è soo’t dum kade Juipge bere mbak tuji. Ké sei giri an-in bè lé wa? 51 E Caiphe á in se dè’n tam tà nè nga lé. Nè è Nube kuwe á ule tà nè tànn’t tede k’ee ke è maw njèkuje nyan-mese kêm ɓaln’t nè nga. Gir’n ke nè è tam’n ede nè: Gar-gar Jésu à wei tede le girkoje le Juipge. 52 Jésu à wei tede girkoje le Juipge á go karé lé, nè le kɔse nja ngann le Nube ke ɗarinè yali nan se loo-loo nan’t tede kade teli umi nan’t bɔk tite kosdooge ke karé bere. 53 Unn gir kêm ndɔn’t nè nga njékɔr non Juipge ɔji njáng le kade dé tɔl Jésu. 54 Gir’n nè á Jésu ringe’n tàkum Juipge’t malang se kêmnda káng titeke kété lé ta. E ɔr ra’n se njékuwe-girnge awi kêm ɓeekon karé’t awi ndii kêm ɓee-bò ke ri’n nè Ephraim. Ɓee-bò nè nga è ngɔr se kêm dile . 55 Ndɔ ra nan Paque le Juipge nain ngɔr. Dooge ngain in-in se kêm ɓee-ɓee reei kêm ɓee-bò ke Jérusalem kété tede kɔr ra de gonm. 56 Dé sang Jésu kêm kei’t le Nube ke dé ndi tutu nga. Loo ke d’an’n lé ɓaa, dé deje nan d’ede nè: – Ké tà ri á i giri wa? Ké n’ee Jésu nga n’a n’ree loo ra nan’t nè lé njing ta wa? 57 Maw njékuje nyan-mesege se Pharisienge unni ndu de edi nè: – Ke nè á doo karé ger loo ke n’ee Jésu nga n’ee tutu ɓaa, maje kade tɔje jè looyé le kade j’ade d’aw d’uwé.
1 Jésu aw kêm ɓee ke Béthanie, ra ndɔ mute-mute ɓita ndɔ ra nan Paque ase deje ɓai. Béthanie nga, è ɓee le Lazare ke ndɔ ke Jésu ade tɔse ndel in gir yo’t. 2 Dé ra nyankuse se ri Jésu. Marthe è njè kai dooge nyankuse. Lazare géa è nan’t se dooge ke ndi à usei nyan se Jésu. 3 Marie unn wubu ke dé ra se walé nyan karé ke ri’n nè nard. E ree se wubu ke nar’n è ngain nè nga ngɔr se litre karé, ɔr tà tête nja Jésu’t, taɓai bɔr nja Jésu se bin dè’n. Kete wubu nè nga taa loo ke kêm kei nè pel-pel. 4 Wong ra Judas Iskariot njèkuwe-gir-Jésu ke karé dann madennge’t ke ayé kunn dè’n. Judas tam ede nè: 5 – Ké bain á d’ige wubu itir nè nga kum nar kule ke ndɔ aru mute le kai nar’n njéndooge lé wa? 6 Judas nga usu’n nyan dè njéndooge’t lé, nè è tam tà nè nga titeke bè tede k’ee ke è njè koto mbu nar nyankuse ke dé tann d’ade ngonm. E mêndé nar nè nga ndêin-ndêin. 7 Jésu ede nè: – Inyé ade n’tête wubu nè nga dèm’t kété ɓita ndɔn’t dé dubu’m ɓai. 8 Njéndooge nga à ndii se si se ndɔge malang. Nè man ɓaa, m’a m’ndi se si se ndɔ’m-ndɔ’m lé. 9 Juipge bule ngain ooi titeke Jésu ndi kêm ɓee ke Béthanie. Ei reei som-som tede le kan Jésu á se kar’n lé. Nè ei reei le kan-in Lazare ke Jésu ade tɔse ndel in gir yo’t nga tɔ. 10 Unn gir kêm ndɔn’t nè nga, maw njékuje nyan-mesege ɔji njáng le kade dé tɔl Lazare kɔke. 11 E tede tà le Lazare nè á Juipge bule inyei go maw njékuje nyan-mesege ɓaa undei kêm de dè Jésu’t tá ta. 12 Jésu ree loo ra nan’t kêm ɓee-bò ke Jérusalem. Barè lookar’n kuwe doobulege ooi tà ree le’n. 13 Dooge têti balkum kage marge ji de’t kêl-kêl tilei kum’n gide ɓee-bò’t nata. Dé ra nyan bòi beng-beng d’ede nè: – I ɗɔyi Nube! Ngar le Israel ke ree se ri Kuwe-ɓee nga, maje kade dè’n mong kang-kang. 14 Jésu inge ngonn koro al ndi dènn’t se go tà ke dé ndang kêm Magtub’t d’ede nè: 15 «Sei dooge ke kêm ɓee-bò ke Sion i ɓeli lé! An-in! Ngar le si al ngonn koro à ree’n non.» 16 Nyan ke Jésu ra nè nga, njékuwe-girnge geri gir ke loon’t nè lé ɓai. Nè ndɔ ke d’ule ndubra dènn’t pa ɓita kêm de à olé dè’t titeke tà nè nga dé ndang d’ɔje’n dè’n. Unn gir kêm ndɔn’t nè nga ɓita njèkuwe-gir-Jésuge geri titeke nyange ke dooge rai se’n nga awi nan’t deĵ se tà ke dé ndang d’ɔje’n dè’n ɓai. 17 Doobulege ke ndɔ ke ei nan’t se Jésu loo ke ndɔ ke ɓar’n Lazare ade tɔse’n ndel in gir yo’t nga, ɔri ser nyan ke an-in se kum de adi dooge ke rang ooi ke kété-kété. 18 Gir’n ke nè á doobulege in-in tilei kum Jésu tede ooi ser nyankɔbe ke ndɔ ke è ra nga. 19 Pharisienge edi nan ede nè: – An-in! nyan karé bè ke soo jéi’t goto ta tede dooge malang ndɔmin nan goyé’t ɓá ta. 20 Dooge reei kêm ɓee-bò ke Jérusalem loo ra nan’t tede le ɗɔi Nube. Grec ke nange ei se de tɔ. 21 Grecge nè nga awi ra Philippe’t ke ɓee le’n è Bethsaida, ɓeekon ke Galilée ei deji edi nè: – Dingem, jè ndige le kan Jésu. 22 Philippe in se tà nè aw’n ede André ɓita in-in nan’t joo mbak awi edi Jésu ɓai. 23 E ile de dè’t ede nè: – Gar-gar kàde kule ndubra dè’m man Ngonn doo’t nga ase ɓá ta. 24 Kerɔte kuwe, man m’ede sei ndàt, ke nè á njar ko ke doo dubu nang nga wei lé ɓaa à è kum’n ke karé bere kɔke nè kuwe. Nè ke nè á wei ɓaa, ko’n à il ngain ke kété-kété. 25 Nanan ke ndige ra’n ɓaa à ile ra’n kɔke salang ɓai. Nè nanan ke an ra’n ke nyan lé tede le Nube dè nang nè ɓaa à ngonm ra’n ndii’n kumgajer se non. 26 Ke nè á doo karé ndige ra nyan kade’m ɓaa, gar-gar à unn rebe goom’t. Loo ke m’ndi tutu nga, ngonn njèndi le’m géa à ndi se’m tutu tɔ. Ke nè á doo karé ra nyan ade’m ɓaa, Bɔ’m à uge dè ji’n. 27 Ɗarinè kêm’m tò kekek. Nè ké ri á m’a ra wa? Ké m’a deji Bɔ’m le kade taa’m tà yo’t kêm kàdenn’t nè wa? M’ree tede le kwei ɓaa, m’a m’wei kuwe. 28 Bɔ’m, i kile tɔgmong lei ke nata ade dooge geri! Ke loon’t nè kuwe ndu Nube ɓar danrán ede nè: – M’kile tɔgmong le’m ke nata kété ɓá. Nè m’a m’tel kile tɔgmong le’m ke nata kade d’an nja karé ɓai. 29 Doobulege ke ndai loon’t nè ooi ɓaa, njé ke nange tami edi nè: – E ndi á ndang. Njé ke rang tami edi nè: – E doo ke danrán á ɔje seyé tà. 30 Jésu tel unn tà tam ede nè: – Ndu Nube ke ɓar nè nga è tede le’m man lé, nè è tede le si sei. 31 Tà ke Nube à gang dè dooge ke dè nang nè nga, ɗarinè unn gir’n ɓá ta. Ngar le njé ke dè nang nè nga, Nube à sure’n kile’n nata ɗarinè ta. 32 Man nga, loo ke ndɔn’t d’a d’unn’m lat kɔke dè nang nè ɓaa, m’a m’ndɔr dooge malang ke ram’t. 33 Jésu tam tà nè nga titeke bè ɔje’n dè ɓer ke d’ayé ɓer’n kade kage-ke-dese’t. 34 Doobulege ilei Jésu dè’t edi nè: – Magtub gute-ndu ede jè kété titeke Krist nga à ndi kumgajer se non dè nang nè. A ɓaa, ké bain taɓai á i tam ede nè: «Gar-gar d’a d’unn Ngonn doo nga lat kɔke dè nang nè» ɓai wa? Ké Ngonn doo nè nga è nan wa? 35 Jésu ile de dè’t ede nè: – Sei awi se lookar dann si’t laa mbɔr ɓai. I njiyei awi se gir kàde m adi tilkus sebe dè si’t rebe lé. Titeke bè á tilkus à ree kube’n sei nang bɔp lé. Doo ke njiye dann tilkus’t nga ger loo ke aw ke tutu lé. 36 Ɗarinè sei awi se lookar ɓai. Undei kêm si dènn’t le kade i teli ngann lookarge ke get. Loo ke Jésu tam tàge nè nga gir gang ɓá ɓaa, è ɔr ra’n jêke^ aw ɓɔyɔ ra’n ade doobulege an-in nin lé. 37 Jésu ra nyankɔbege ngain ade Juipge an-in kuwe. Nè né è bè géa unni mbi de dè tà’t le’n. 38 Juipge rai titeke bè le kade tà ke Esaie njèribe-dè-tà ke tà Nube’t tam kété mari aw’n loon’t deĵ. E tam ede nè: «Kuwe-ɓee, ké nange á undei kêm de dè tà’t le jé nga wa? Ké nange á ndɔ ke kété Nube tɔje de tɔgmong le’n wa?» 39 Esaie njèribe-dè-tà ke tà Nube’t tel ɔrgir nyan ke ade Juipge asi kundei kêm de dè Nube’t lé nga ede nè: 40 «Kosdooge nè nga, Nube libe kum de ade an-in loo lé. E ade ngarankêm de tɔ kuju tà mbêt lé. Ke nè á kum kosdooge an loo a, ngarankêm de tɔ kuju tà a tɔ ɓaa, bainléa à ɔsi wan teli ke ra Nube’t kade aje de.» 41 Esaie tam tà nè nga titeke bè tede ndɔ ke kété an ndubra le Jésu se kum’n. Gir’n ke nè á è tam’n tà ɔje’n dè Jésu. 42 Nè nè bè géa, dooge ngain dann njékɔr non Juipge’t undei kêm de dè Jésu’t. Nè rai se go ngein tede rɔ ke Pharisienge à rɔi de kêm kei kebe nan’t. 43 Njékɔr non Juipge rai titeke bè tede undei riɓar ke in ra dooge’t tá ngain dum riɓar ke in ra Nube’t. 44 Jesu tam se ndu’n ke bòi beng ede nè: – Nanan ke unde kêm’n dèm’t ɓaa è man á unde kêm’n dèm’t lé, nè è njékule’m kuwe á è unde kêm’n dènn’t non. 45 Nanan ke ter’m maje ɓaa, è an njékule’m nga ɓá ta. 46 Man nga m’ee lookar ke m’ree dè nang nè. Nanan ke unde kêm’n dèm’t ɓaa à ndi dann tilkus’t se ndɔ’n-ndɔ’n lé. 47 Ke nè á doo karé oo tàge le’m á an go sêw-sêw lé ɓaa, è man á m’a m’gangtà dènn’t lé. Man ɓaa, m’ree tede gangtà dè dooge ke dè nang nè lé, nè tede kaje de. 48 Nanan ke ute’m mbeng taa tàge le’m lé ɓaa, njègangtà dènn’t ndi tutu ɓá ta. Tà le’m ke m’tam nga kuwe à gangtà dènn’t ndɔ ke ngeinn’t. 49 E man kuwe á m’in se dè ra’m m’tam tàge nè nga lé, nè Bɔ’m ke njèkule’m kuwe á unn ndu’n ade’m ɔje dè tàge ke kum tam se kile mber’n a tɔ. 50 Man m’ger titeke ndukunn le’n nga, è ndikumgajer se non. Tà ke m’ndi m’tam nga, è gute-ndu Bɔ’m kuwe á m’tam.
1 Kété ɓita kade ndɔ ra nan Paque ase ɓai nga, Jésu ger titeke kàde ndɔte ɓee dè nang nè tel ke ra Bɔn’t nga ase ɓá. Njé ke le’n ke kinge’n ke ayé ndii dè nang nè ɓai nga, è tár de ngain. E tár de ade al dè loo’n. 2 Loo ke Jésu se njékuwe-girnge ndii tà nyankuse’t ɓaa, sú ree dubu tà kunn dè Jésu kêm ɓengre Judas Iskariot ngonn Simon. 3 Jésu ger titeke Bɔ’n um nyange malang jinn’t. E ger titeke in ra Bɔ’n Nube’t a, à tel kaw rann’t gugu a tɔ. 4 Jésu ɔse nang in tà nyankuse’t, ɔr kubu le’n ke bòi yul kàdenn’t ɓaa, unn kubu ra kule dɔ’n ɓede’n. 5 Go’t gugu è kai mann kêm nyan’t togo’n nja njékuwe-girnge ɓita bɔr se tà kubu ke dɔ’n ɓede’n ɓai. 6 Loo ke Jésu ree à tee dè Simon Pierre’t ɓaa, Pierre ede’n ede nè: – Ké i Kuwe-ɓee kuwe a i togo nja’m wa? 7 Jésu ede Pierre ede nè: – Nyan ke m’ndi m’ra ɗarinè nga, i ger gir lé ɓai. Nè go’t gugu ɓita a i ger gir ɓai. 8 Pierre ede Jésu ede nè: – Ḿ-m̀, i a i togo nja’m ndan lé. Jésu ede Pierre ede nè: – Ke nè á m’togo njai lé ɓaa, tà bande le jé jè sei à gang nan’t lé njing ta. 9 Pierre tel ede Jésu ede nè: – Kuwe-ɓee, ke nè á è bè ɓaa, i togo nja’m se kar’n lé ta, nè maje kade i togo jimge se dè’m nan’t bere mbak ta. 10 Jésu tel ede Pierre ede nè: – Doo ke ndogo mann ɓá nga, aw ndoo togo nja’n kuwe karé bere tede ra’n bere mbak è ke unju nyang-nyang ɓá. Sei nga ra si unju ɓá, nè unji malang lé. 11 Jésu ger doo ke ayé kunn dè’n nga mbak. Gir’n ke nè è tam’n ede nè: «Sei nga unji malang lé.» 12 Loo ke è togo nja de gir gang ɓá ɓaa, è tel unn kubu le’n ke bòi yul ule rann’t gugu, tel aw ndi tà nyankuse’t. Jésu deje njékuwe-girnge ede nè: – Nyan ke m’ra se si nga, ké i geri gir’n kuwe wa? 13 Sei ɓari man njèndó dooge nyan a, Kuwe-ɓee a tɔ. Sei ɓari man loon’t kuwe tede man nga m’ee njèndó dooge nyan a, man Kuwe-ɓee a tɔ. 14 Man ke m’ee Kuwe-ɓee a, njèndó dooge nyan nga, ke nè á m’togo nja si ɓaa, gar-gar sei géa è tà le si le kade i togoi nja nan titeke bè tɔ. 15 E nyan-tɔje á m’tɔje sei tede kade sei géa i rai titeke man m’ra’n se si bè tɔ. 16 Kerɔte kuwe, man m’ede sei ndàt, ngonn njèndi à bòi dum dè kuwe’n lé a, ngonn njèkule à dum dè njèkule’n lé a tɔ. 17 Ɗarinè sei geri nyange nè nga ɓá. Ke nè á i rai de se ndɔ si-ndɔ si ɓaa, ra si à nel sei kuwe. 18 Tà ke m’tam nè nga m’ɔje’n dè si malang lé. Njé ke man kuwe m’tɔr de nga m’ger de mbak. Nè nyan nè nga tee titeke bè tede kade tà ke Magtub ke tò se ninn’n tam ede nè: «E ke use se’m mapa nan’t nga kuwe à tel kɔr nja’n kube’m» nga, aw loon’t deĵ. 19 Ɗarinè, man m’ede sei tà nè nga kété ɓita kade nyan’n tee ɓai. Titeke bè á loo ke nyan’n à tee ɓaa, sei a kundei kêm si dèm’t titeke man Ngonn doo nga, m’ee Krist kerɔte kuwe. 20 Kerɔte kuwe, man m’ede sei ndàt, nanan ke uwe doo ke m’ule’n ke rann’t ɓaa, è man kuwe á uwe’m ke rann’t. Nanan ke uwe’m ke rann’t ɓaa, è njèkule’m kuwe á è uwe’n ke rann’t non. 21 Loo ke Jésu tam tà nè bè ɓaa, kêm’n tò kekek ade tam tàkum njékuwe-girnge’t mbeng ede nè: – Kerɔte kuwe, man m’ede sei ndàt, doo karé dann si’t à unn dè’m kade dé tɔl’m. 22 Njèkuwe-girnge an-in kum nan-nan anje ger doo ke è tam tà ɔje’n dè’n. 23 Njèkuwe-gir-Jésu karé ke è tár’n ngain ndune ra’n kàdenn’t. 24 Simon Pierre tuge dè’n ade è ke Jésu tár’n ngain nga ede nè: – I dejé, ké n’tam tà nè nga n’ɔje’n dè nan wa? 25 Njèkuwe-gir-Jésu ke Jésu tár’n ngain nga ile dè’n kàdenn’t tá deje’n ede nè: – Kuwe-ɓee, ké è nan wa? 26 Jésu tel ile’n dè’t ede nè: – Doo ke man m’a m’tête mapa kule kum tar’t kade’n ɓaa, è è nga kuwe. Loo ke Jésu tam tà nè nga bè ɓaa, go’t gugu è tête mapa ule kum tar’t ade Judas Iskariot ngonn Simon. 27 Loo ke Judas taa mapa nè use làng ɓaa, njèkêmyêr ree ur kêmn’t. Ke loon’t nè kuwe, Jésu ede’n ede nè: – Nyan ke a i ra nga, i ra kalang. 28 Dann njékuwe-gir-Jésuge malang ke ndii se’n tà nyankuse’t nga, doo karé bè ke ger gir nyan ke ade tam’n se Judas tà nè titeke bè goto. 29 Judas è njè ngonm mbu nar nyankuse ke dé tann. Dooge ke nange giri edi nè: Jésu ede’n kade aw ndogo nyan ke awi ndoo’n le ra’n nan Paque. Njé ke nange giri edi nè: Jésu ede’n le kade nobo njéndooge nyan. 30 Loo ke Judas taa gaje mapa nè use làng ɓá ɓaa, ke loon’t nè kuwe unde loo tee nata. Loo tuge ndul bigm ɓá ta. 31 Loo ke Judas unde loo tee nata ɓá ɓaa, Jésu tam ede nè: – Ɗarinè d’ule ndubra dè’m man Ngonn doo’t ɓá ta. Nube géa d’ule ndubra dènn’t takul’m man Ngonn doo a tɔ. 32 Ke nè á d’ule ndubra dè Nube’t takul Ngonn doo nga ɓaa, Nube kuwe géa à ule ndubra dènn’t tɔ. Nube à ule ndubra dèm’t ngɔr ta. 33 Jésu ede njékuwe-girnge ede nè: – Ngannemge, m’a m’nain se si dè nang nè mbɔr ɓai. Ndɔn’t a i sangi man par-par. Ndɔ ke m’ede Juipge kété m’ede nè: Loo ke m’ndi m’aw ke tutu nga, sei asi kawi tutu lé. Sei géa, ɗarinè m’ede sei tà nè nga titeke bè tɔ. 34 Man m’ade sei ndukunn ke kige. I tári nan titeke man géa m’tár’n sei bè tɔ. 35 Ke nè á i tári nan ɓaa, dooge malang à geri sei ke njékuwe-girmge kerɔte. 36 Simon Pierre deje Jésu ede nè: – Kuwe-ɓee ké à aw ke ra wa? Jésu tel ile’n dè’t ede nè: – Loo ke m’ndi m’a m’aw ke tutu nga, i asekum kunn rebe goom’t ɗarinè lé ɓai, nè ndɔ ke rang ɓita a unn rebe goom’t ɓai. 37 Pierre tel deje Jésu ede nè: – Ké m’a m’ase k’unn rebe gooi’t ɗarinè lé tede ri wa? Ma m’ile ra’m kɔke tede lei. 38 Jésu tel deje Pierre ede nè: – Ké a ile rai kɔke tede’m wa? Kerɔte kuwe, man m’edi ndàt, a i naje se rai dèm’t nja mute ɓita kuren kunje à non kɔkerɔ kon ɓai.
1 Jésu ede njékuwe-girnge ede nè: – Adi kêm si olé bɔt-bɔt lé. Undei kêm si dè Nube’t a, undei kêm si dè’m man’t a tɔ. 2 Kêm kei le Bɔ’m nga loo ndi tò tutu ngain. Ke nè á è titeke bè lé ɓaa, né m’a kede sei ndàt. 3 M’a m’aw le gɔl loo ndi si. Loo ke m’aw m’gɔl loo ndi si gir gang ɓá ɓaa, m’a m’tel ree le koto si kàdem’t tede kade loo ke m’a m’ndi tutu ɓaa, sei géa a i ndii se’m nan’t tutu tɔ. 4 Loo ke m’ndi m’aw ke tutu nga sei geri rebe’n mbak ɓá ta. 5 Thomas deje Jésu ede nè: – Kuwe-ɓee, jè ger loo ke i ndi a aw tutu nga lé. Ké j’ase ger rebe’n titeke bain wa? 6 Jésu ile Thomas dè’t ede nè: – Man nga m’ee rebe, man nga m’ee ngarankum tà a, m’a nga m’ee ndikumgajer a tɔ. Doo ke unn rebe ke ram’t lé ɓaa à tee ra Bɔm’t ndan lé. 7 Ke nè á i geri man ɓaa a i geri Bɔ’m tɔ. Unn gir ɗarinè sei geri nin ɓá a, sei an-in nin ɓá a tɔ. 8 Philippe deje Jésu ede nè: – Kuwe-ɓee, i tɔje jé Bɔi nga ade j’an’n ɓaa, è kuwe ase jè. 9 Jésu tel ile Philippe dè’t ede nè: – Philippe, man ke m’ndi se si nan’t mari bere nè kuwe i ger’m lé ɓai wa? Doo ke an’m ɓaa, an Bɔ’m tɔ. A ɓaa, ké bain taɓai á i tam se’m ede nè: «I tɔje jè Bɔi wa?» 10 Ké i unde kêmi dè’t titeke man se Bɔ’m jè karé bere lé wa? Ké i ger titeke m’um se’n nan’t bɔk a, è géa um se’m nan’t bɔk a tɔ lé wa? Tàge ke m’ede sei nga, è man kuwe á m’in se dè ra’m m’ede sei lé, nè è Bɔ’m ke um se’m nan’t bɔk kuwe á ra kulege le’n. 11 M’um se Bɔ’m nan’t bɔk, Bɔ’m géa um se’m nan’t bɔk tɔ. Ke nè á umi kêm si dè tà’t le’m lé géa, undei kêm si dè nyange ke m’ra kété m’ade an-in nga. 12 Kerɔte kuwe, man m’ede sei ndàt, doo ke um kêm’n dèm’t ɓaa à ra nyange ke m’a m’ra nè nga tɔ. Doo nè nga à ra nyange ke bò dum dè ège ke nè ɓai, tede m’a m’tel kaw ra Bɔm’t nú ta. 13 Nyange malang ke a i deji nin se ri’m nga, m’a m’ra kade dooge geri tɔgmong le Bɔ’m takul’m. 14 Ke nè á i deji man nyan karé se ri’m ɓaa, m’a m’ra nyan nè nga kade sei kuwe. 15 Ke nè á i tári man ɓaa, an-in dè ndukunnge le’m sêw-sêw. 16 Man m’deje Bɔ’m le kade ade sei njè ra se si ke rang. E nè nga à nain se si sár se non. 17 Njè ra se si ke rang nga è Ndil ke get ke dooge ke dè nang nè asikum kuweii ke ra de’t lé. D’ase kuwe’n ke ra de’t lé tede d’an’n lé a, dé ger’n lé a tɔ. Nè sei ɓaa, i gerii tede è ra ɓee se si a, ndi kêm si’t a tɔ. 18 M’a m’inye sei se kar si tite ngann halge lé, nè m’a m’tel ree ra si’t ɓai. 19 Mbɔr ɓaa dooge ke dè nang nè à teli kan-in man gugu ndan lé ta. Nè sei ɓaa, a an-in man tede m’ndi kumgajer, sei géa a i ndii kumgajer a tɔ. 20 Kêm ndɔn’t nè ɓita a i geri titeke m’um nan’t bɔk se Bɔ’m a, sei umi nan’t bɔk se’m a, man géa m’um se si nan’t bɔk a tɔ. 21 Doo ke aw se ndukunnge le’m an dè de sêw-sêw ɓaa, è nè nga tár’m kerɔte. Nanan ke tár’m ɓaa, Bɔ’m à tár’n tɔ. Nanan ke tár’m ɓaa, man géa m’a m’tár’n a, m’a m’ɔrgir ra’m kade ger’m njai a tɔ. 22 – Kuwe-ɓee, ké bain jè tá a kɔrgir rai kade jè anje kɔr kade dooge ke dè nang nè wa? 23 E Jude á deje tà nè m è Judas Iskariot lé. Jésu ile’n dè’t ede nè: – Ke nè á doo karé tár’m ɓaa à an dè tà le’m sêw-sêw a, Bɔ’m à tár’n ngain a tɔ. Jè se Bɔ’m j’à ree rann’t le kur kei le jé kêmn’t a tɔ. 24 Doo ke tár’m lé nga an dè tà le’m sêw-sêw lé. Tà ke sei ooi nè nga in ra’m man’t lé, nè in ra Bɔ’m ke njèkulem’t nga kuwe. 25 Man m’ede sei tàge nè nga loo ke m’ndii’n se si ɓai. 26 Ndil-Kêmnda ke njè ra se si ke Bɔ’m à ule’n se ri’m nga à ndó sei nyange malang a, à olé kêm si dè nyange malang ke m’ede sei ɓá nga a tɔ. 27 M’inye kêmlom le’m m’ade sei. M’a m’ade sei kêmlom le’m titeke dooge ke dè nang nè d’ade’n nga lé. Adi kêm si tò kekek lé a, adi kêm si tête mann lé a tɔ. 28 M’a m’aw nè m’a m’tel ree ra si’t ɓai. Kété kuwe m’ede sei tà nè nga m’ade ooi ɓá. Ke nè á ndɔ ke i tári man ɓaa né a i rai ranel dè tel ke m’a m’tel kaw ra Bɔm’t nga, tede è bòi dum’m. 29 Ɗarinè m’ede sei tà nè nga kété ɓita kade nyan’n tee ɓai. Titeke bè á, loo ke nyan’n à tee ɓaa, undei kêm si dè’t. 30 M’a m’ɔje se si tà ngain lé ta, tede ngar ke njèkonɓee dè nang nè à ree non ta. Kerɔte kuwe, è ase ra se’m nyan karé bè lé. 31 Nè maje kade dooge ke dè nang nè geri tite m’tár Bɔ’m. Gir’n ke nè á m’ra’n nyan malang se go ndukunn le’n. In-in dɔ ade j’awi loo ke rang’t.
1 – Man nga m’ee kage nduu ke get. Bɔ’m è kuwe-ndɔr nduu. 2 Balkum nduu ke rara ke ube kàdem’t á ann’n lé ɓaa, d’a tuge’n gang’n kɔke. Nè balkum nduu ke rara ke ann ɓaa, Bɔ’m ra’n náng-náng kade ann ɗàk-ɗàk dum ke kété. 3 Sei nga unji nyang-nyang ɓá tede tà ke man m’ede sei kété nga. 4 Umi se’m nan’t bɔk titeke man géa m’um’m se si nan’t bɔk nga tɔ. Balkum kage nduu ke ube kàde kage nduu’t lé nga asekum kann se dè ra’n lé. Sei géa, ke nè á i nanmi kàdem’t lé ɓaa, asi kanni se dè ra si lé tɔ. 5 Man m’ee kage nduu, sei sei balkum kage nduuge. Doo ke nanm kàde’m ade m’nain se’n a tɔ ɓaa, à ann ɗàk-ɗàk. Ke nè á m’nain se si lé ɓaa, sei asi ra nyan karé bè se dè ra si lé. 6 Ke nè á doo nanm kàde’m lé ɓaa, d’a d’ile’n nata kɔke tite balkum nduuge bè kade tutu. Balkum kage nduuge ke tutu nga, d’a d’ɔi de korè dè nan’t le ró de rák-rák. 7 Ke nè á i nanmi kàdem’t a, tàge le’m urkei kêm si’t a tɔ ɓaa, nyan ke sei ndigi á i deji nga a ingei. 8 Ke nè á anni se kann si ɗàk-ɗàk ɓaa, d’a d’ile’n riɓar dè Bɔm’t a, a i teli k’ei njékuwe-girmge a tɔ. 9 Man géa m’tár sei titeke Bɔ’m tár’m nga tɔ. I nain-in dann tár ke m’tár sei’t nga. 10 Man m’an dè ndukunnge le Bɔ’m sêw-sêw á m’nain’n dann tár’t le’n. Sei géa, ke nè á an-in dè ndukunnge sêw-sêw ɓaa, a i nain-in dann tár’t le’m tɔ. 11 Man m’ede sei tàge nè nga tede kade ranel le’m ur’n kei kêm si’t a, tede kade dè ranel le si ɔr’n njêt a tɔ. 12 An-in! ndukunn le’m a tò nè: I tári nan titeke man géa m’tár’n sei bè tɔ. 13 Kade doo karé inye ra’n ade yo tede le madennge nga, è tár ke gar’n goto. 14 Ke nè á i rai nyange ke m’unn ndu’m m’ade sei nga ɓaa, sei kotárge le’m kerɔte kuwe. 15 Ɗarinè man m’ɓar sei ngann njéndige gugu lé ta, tede ngonn njèndi nga ger nyanra kuwe’n lé. Man m’ɓar sei kotárge le’m tede nyan malang ke m’oo tà’n ra Bɔm’t nga, m’ribe se si dè m’ade i geri ɓá. 16 E sei á ɔri man lé, nè è man á m’ɔr sei m’unde sei tede kade awi a, anni se kann si a, tede kade kann si tò tutu a tɔ. Titeke bè á nyan malang ke sei deji Bɔ’m se ri’m nga, à ade sei kuwe. 17 Nyan ke m’unn ndu’m dè’t m’ade sei á tò nè: I tári nan. 18 Ke nè á njé ke dè nang nè d’ɔr sei njêt ɓaa, maje kade i geri titeke man kuwe ɔri man njêt kété ɓita sei ɓai. 19 Ke nè á sei le dè nang nè ɓaa, njé ke dè nang nè ayé ndigi sei tede ei ndigi nyan ke è nyan kinge de tá. Sei nga, sei le dè nè nang lé; nè è man kuwe m’tɔr sei dann de’t kɔke m’unde sei se ninn’n dè nang nè. Gir’n ke nè á njé ke dè nang nè ɔri sei njêt. 20 Adi kêm si olé dè tà ke kété m’ede sei’t nga: «Ɓer bòi dum dè kuwe’n lé.» Ke nè á dooge rai kum’m ndoo ɓaa, sei géa à rai kum si ndoo tɔ. Ke nè á ei an-in dè tà le’m sêw-sêw ɓaa, sei géa à an-in dè tà le si sêw-sêw tɔ. 21 Nè dooge à rai se si nyange nè malang tede ri’m man a, tede ger ke ei geri njèkule’m nga lé a tɔ. 22 Ke nè á kété m’ree lé a, m’ede de tà lé a tɔ ɓaa, né tà kaiya à ɔr dè de’t. Nè ɗarinè, loo kede gos dè kaiya’t le de goto ta. 23 Doo ke ɔr’m njêt ɓaa, ɔr Bɔ’m njêt tɔ. 24 Nyanrage ke doo ke rang ra nja karé lé nè nga, ke nè á ndɔ ke m’ra dann dooge’t lé ɓaa, né tà kaiya à ɔr dè de’t. Nè ɗarinè d’an nyanramge ɓá, nè né è bè géa, d’a d’ɔdenan kɔr jè njêt se Bɔ’m kuwe ɓai. 25 Nè dé ra titeke bè tede kade tà nè ke dé ndang kêm magtub gute-ndu’t le de d’ede nè: «D’ɔr’m njêt karè bè» nga, aw’n loon’t deĵ. 26 Ndil-Kêmnda le ngarankum tà ke à in ra Bɔm’t nga, à è njè ra se si. Loo ke m’a m’ule’n kade ree ɓaa, è kuwe à è njèkɔrgo tà le’m. 27 Sei géa a k’ei njékɔrgo tàge le’m tede sei se’m nan’t kété mari loo kunn gir kule’t le’m.
1 – Man m’ede sei tà nyange nè nga kété tede kade nyan tuge’n nja si ile’n sei lé. 2 D’ade rɔ sei kêm kei kebe nange’t. Kàde ke ndɔn’t nè, dooge malang à in-in tami kedi nè: «sei njé mbate Nubege» à ree non. Gir’n ke nè á, ndɔn’t d’a tɔl’n sei ke nyankuje-mese kede nè n’ilei riɓar dè Nube’t. 3 D’a ra titeke bè tede dé ger Bɔ’m lé a, dé ger’m man lé a tɔ. 4 Nè man m’ede sei tà nyange nè nga kété tede kade loo ke kàde’n le de à tee ɓaa, kêm si olé’n dè tàge ke kété m’ede sei’t nga. Man m’ede sei tà nyange nè nga kété lé tede nain ke m’nain se si ɓai. 5 Ɗarinè m’ndi m’aw ke ra njèkulem’t. Nè doo karé bè géa dann si’t deje’m ede nè: «Ké a aw ke ra wa?» lé. 6 Kêmkon rusu kêm si tede tàge nè ke m’ede sei nga. 7 Nè né è bè géa, man m’ede sei ngarankum tà: Kaw’m è soo’t tede le si. Ke nè á m’aw lé ɓaa, njè ra se si nga à ree ra si’t lé. Nè ke nè á m’aw ɓaa, m’a m’ule’n kade ree inge sei. 8 Loo ke è njè ra se si nga à ree ɓaa, à ade kum dooge ke dè nang nè à gang dè kaiya’t le de se dè nyan ra ke se dè naje’n a, se dè gangtà’t a tɔ. 9 E nè nga à ade kum de gang dè kaiya’t tede kunde ke d’unde kêm de dèm’t lé. 10 Njè ra se si nga à ade kum de gang dè nyanra ke se dè naje’n tede m’ndi m’aw ke ra Bɔm’t. Sei a i teli kan-in man gugu lé ta. 11 Njè ra se si nga à ade kum dooge à gang dè gangtà’t le Nube, tede njèkonɓee ke nang nè nga dé gangtà dènn’t ɓá ta. 12 M’aw se tàge ngain le kede sei ɓai, nè ɗarinè sei asi taai lé. 13 Loo ke Ndil ke get à ree ɓaa, è à ɔr non si dann ngarankum tà’t bere mbak. E à kin se dè ra’n kede sei tà lé. Nè à ede sei tà nyange ke à oo a, tà nyange ke ndii à reei ɓai a tɔ. 14 E nè nga à ule ndubra dèm’t tede à taa tàge le’m kaw’n kede sei. 15 Nyan malang ke Bɔ’m inge nga, è nyankinge’m. Gir’n ke nè á man m’ede’n sei m’ede nè: «Njè ra se si nga à taa tàge le’m kaw’n kede sei.» 16 Jésu tel ede njékuwe-girnge ede nè: – Nain ngɔr ɓaa, a an-in man gugu lé ta; nè mbɔr gugu ɓaa, a i teli kan-in man ɓai. 17 Njékuwe-gir-Jésuge ke nange deji nan edi nè: – Tam ke n’tam n’ede nè: N’a n’tel kaw ke ra Bɔn’t a, nain ndêin ɓaa j’à j’an-in nin gugu lé ta. Nè mbɔr gugu ɓita j’à teli kan-in nin ɓai. Taɓai n’tanm n’ede nè: N’a n’tel kaw ra Bɔn’t nga, ké gir’n è ri wa? 18 Tà ke n’tam n’ede nè nain ndêin a, mbɔr ɓita a nga, ké tooi gai-gai wa? Jè geri gir tà ke n’tam nè nga lé. 19 Jésu ger titeke d’ayé deje’n tà. E in kété ede de ede nè: – Sei deji nan tà dè tà ke kété m’tam m’ede nè: «Nain ndêin ɓaa, a an-in man gugu lé, nè mbɔr gugu ɓita a i teli kan-in man ɓai.» 20 Kerɔte kuwe, m’ede sei ndàt, a i noin a, a undei kade si dai-dai a tɔ. Nè njé ke dè nang nè à ali ra de. Sei a i ndii dann kumndoo’t kuwe, nè kumndoo le si nga à tel k’ee ranel ɓai. 21 Loo ke ndo ra dinye ɓaa, è ndi dann kumndoo’t tede è ndɔ’n le’n. Nè loo ke è oje ngonn ɓá ɓaa, ra’n nel’n ade kêm’n wei nal sêl dè ndo ke kété ule’n ndibe tede doo ke oje’n ile’n nang nga. 22 Sei géa, ɗarinè i ndii dann kumndoo’t titeke bè tɔ. Nè loo ke m’a m’tel ree le kan sei ɓaa, ɓengre si à ndi dann ranel’t. Ranel le si nga doo karé bè ke à uwe’n wont kɔr’n goto. 23 Kêm ndɔn’t nè nga, a i teli deji man tà dè nyan karé’t ndan lé ta. Kerɔte kuwe, man m’ede sei ndàt, ke nè á i deji Bɔ’m nyan karé se ri’m ɓaa, à ade sei nyan nè nga kuwe. 24 Sár ɗarinè sei deji nyan karé bè se ri’m lé ɓai. I deji nyan ɓaa a ingei, titeke bè á dè ranel le si à ɔr’n njêt. 25 Man m’ede sei tà nyange nè nga se gostà. Nè loo ke kàde’n à ree ɓaa, m’a m’ede sei tà se gostà lé ta. M’a m’ribe se si dè tà ke ɔje dè Bɔ’m nga parang kuwe. 26 Kêm ndɔn’t nè nga sei a deji nyan se ri’m. Nè man m’ede sei titeke m’a m’deje nyan Bɔ’m tede le si lé ta. 27 Bɔ’m kuwe tár sei tede sei géa i tári man tɔ. Umi kêm si dèm’t titeke man m’in ra Nube’t. 28 Man m’in ra Bɔm’t nú á m’ree dè nang nè. Ɗarinè man m’inye nang nè le tel kaw ra Bɔm’t gugu. 29 Njékuwe-gir-Jésuge teli edi nin edi nè: – An! ɗarinè ɓaa i tam tà ndàt anje kunn gostà karé bè tam’n tà. 30 Ɗarinè jè ger titeke i ger nyange malang, i aw ndoo kade doo deji tà lé. Gir’n ke nè á j’unde’n kêm jé dèi’t titeke i in ra Nube’t nú kuwe. 31 Jésu tel ede njékuwe-girnge ede nè: – Ké sei umi kêm si dèm’t ɗarinè ta wa? 32 An! kàde’n à ree, è ree ɓá a tɔ. D’ade sanrin sei karé- karé. Nanan géa à aw loo le’n-le’n, a inyei man se kar’m bere. Man se kar’m lé nè Bɔ’m è der-gir’m. 33 Man m’ede sei tàge nè nga titeke bè tede kade ingei kêmlom umi se’m nan’t bɔk. A ingei nyantosowur dè nang nè kuwe, nè oréi tà si njak tede man nga m’tête rɔ njé ke dè nang nè ɓá ta.
1 Loo ke Jésu ede njékuwe-girnge tàge nè gir gang ɓá ɓaa, è unn kum’n ke danrán ede nè: – Bɔ’m, kàde’n ree ɓá ta. Ile riɓar dè ngonni’t, tede kade ngonni géa ile riɓar dèi’t tɔ. 2 I ade ngonni tɔgmong dè dooge malang ke dè nang nè. Dooge malang ke i ade de se’n nga, è ade de ndikumgajer se non. 3 Ndikumgajer se non nga, è le kade dé ger geli i Nube ke get karé bere a, le kade dé ger gel’m man Jésu-Krist ke i ule’m nga a tɔ. 4 Man m’ile riɓar dèi’t dè nang nè ɓá ta. Kule ke i ade’m kade m’ra nga m’ɔr son’n njêt ɓá ta. 5 Bɔ’m, riɓar ke m’inge rai’t nú kété ɓita unde nang nè ɓai nga, i tel ile dèm’t ɗarinè ta. 6 Njé ke i tɔr de dann dooge ke dè nang nè um de jim’t nga, m’ribe se de rii m’ade geri nin ɓá. Dé nè nga, dé leige kuwe kété ɓita ade’m se de ɓai. Tà lei ke m’ndó de nga, d’an dè sêw-sêw. 7 Ɗarinè, dé ger titeke nyan malang ke ade’m nga in rai’t kuwe. 8 Tàge ke i ede’m kété nga, man géa m’ree’n m’ede de a, dé taa a tɔ. Dé ger get titeke man nga m’in rai’t. Kule ke i ule’m nga d’um kêm de dè’t kuwe. 9 Man m’ɔje sei tà tede njé ke ei leige ke ade’m se de. Man m’ɔje sei tà tede njé ke dè nang nè nga lé. 10 Nyan le’m malang è lei a, nyange lei malang è nyan le’m a tɔ. Njé ke ade’m se de nga an-in ndubra le’m ɓá. 11 Nain ngɔr ɓaa man m’inye nang nè ta, tede m’a m’tel kaw rai’t gugu nú. Nè dé ɓaa, dé nain dè nang nè ɓai. Bɔ’m ke njèkêmnda káng, i ngonm de se tɔgmong lei ke ade’m kade d’um nan’t bɔk titeke jè sei j’um’n nan’t bɔk bè tɔ. 12 Njé ke i um de jim’t nga, kété ke m’nain’n se de dè nang nè ɓai m’ngonm de se tɔgmong ke i ade’m. M’ɔge kum’m ɓi m’an-in’n ngang de garar-garar, m’ade doo karé bè géa tuju dann de’t lé; nè è ke ayé tuju ra’n nga kuwe se kar’n bere. E titeke bè tede kade tà ke tò kêm magtub’t ke tò se ninn’n aw’n loon’t deĵ. 13 Ɓɔ’m ɗarinè m’ndi m’a m’aw ke rai’t nú. Nè m’tam tà nè titeke bè loo ke m’nain dè nang nè ɓai tede kade d’inge’n ranel le’m se girson’n bere mbak. 14 M’ribe dè tà lei made de, nè njé ke dè nang nè ɔri de njêt tede dé le nang nè lé titeke man géa m’ee le nang nè lé nga tɔ. 15 M’deji tede kade i tɔr de kɔke dann dooge ke dè nang nè lé, nè le kade ai-in ngang de garar-garar ade Sú ke njèkêmyêr ɔde ra de lé. 16 Dé nga dé le nang nè lé, titeke man géa, m’ee’n le nang nè lé tɔ. 17 Bɔ’m, i tɔr de unde de se ninn’n se go ngarankum tà tede tà lei è ngarankum tà. 18 M’a m’ule de dann dooge ke dè nang nè titeke kété i ule’m dann dooge ke dè nang nè nga tɔ. 19 Man kuwe m’unn ra’m bere mbak m’adi tede le de. Titeke bè á dé kuwe géa, d’a k’ee’n lei se girson bere se go ngarankum tà. 20 M’ɔje sei tà tede le njékuwe-girmge á se kar de lé. Nè m’ɔje sei tà tede le njé ke à undei kêm de dèm’t se go tà ke à edi de. 21 Bɔ’m, m’ɔje sei tà le kade dé malang d’um se jé nan’t bɔk titeke i Bɔ’m um’n se’m nan’t bɔk a, man géa m’um’n sei nan’t bɔk a tɔ. Maje kade dé malang d’um nan’t bɔk tede kade dooge ke dè nang nè geri titeke è i kuwe á ule’m. 22 Ndubra ke kété ule dèm’t nga, man géa m’tel’n m’ule dè de’t tede kade d’um’n nan’t bɔk titeke jè sei j’um’n nan’t bɔk bè tɔ. 23 Man m’um se de nan’t bɔk titeke i um’n se’m nan’t bɔk bè tɔ tede kade dé malang d’um nan’t bɔk-bɔk. Titeke bè á dooge ke dè nang nè à geri titeke è i kuwe á ule’m. Maje kade njé ke dè nang nè geri titeke i tár de titeke i tár’m bè tɔ. 24 Bɔ’m, njé ke um de jim’t nga, loo ke m’a m’ndi tutu ɓaa, m’ndige kade ndii se’m nan’t tutu tɔ. Titeke bè á d’a d’an’n ndubra ke i ule dèm’t nga se kum de. I tár’m kété mari ɓita unde nang nè ɓai. 25 Bɔ’m ke njèkêmkanm, i njè ra nyan se dè naje’n, dooge ke dè nang nè geri nin lé, nè man ɓaa m’geri. Njé ke i ade’m se de nga geri maje titeke è i kuwe á ule’m. 26 M’ribe se de dè rii m’ade geri nin ɓá, nè né è bè géa m’a m’tel ribe se de dè rii kade geri nin njai. Titeke bè á tár ke i tár’m nga, à urkei kêm de’t tede kade man géa m’um’n se de nan’t bɔk a tɔ.
1 Loo ke Jésu tam tàge nè nga gir gang ɓá ɓaa, è se njékuwe-girnge undei loo teei awi gide mba-loo ke mann ba Cédron ɔr. Loo ke ei awi tutu nè nga, è loo man-kagege. 2 Judas njèkule Jésu ji njérɔge’t nga ger loo nè mbak tede Jésu se njékuwe-girnge kebi nan tutu dɔ-dɔ. 3 Judas ɔr non kos njérɔge se pajage le maw njékuje nyan-mesege se Pharisienge aw se de loo’t nè nga. Dé ree se portusge se nyankatege ji de’t tchukuk-tchukuk. 4 Jésu ger nyan malang ke ayé tee dènn’t nga mbak. E njiye ngatat tile kum de, è deje de ede nè: – Ké i sangi nan wa? 5 D’ile’n dè’t d’ede nè: – Jè sang Jésu ke Nazareth. Jésu ede de ede nè: – Man á m’nda nè. Judas ke njékule’n ji kos njérɔge’t nga è se de nan’t. 6 Loo ke Jésu ede de ede nè: «Man á m’nda nè» ɓaa, ke loon’t nè kuwe dé ger se go de, dé toso nang. 7 Jésu tel deje de ede nè: – Ké i sangi nan wa? Dé tel d’ile’n dè’t d’ede nè: – Jè sang Jésu ke Nazareth. 8 Jésu tel ede de ede nè: – M’ede sei ɓá m’ede nè, è man á m’nda nè. Ke nè á è man á i sangi man ɓaa, inyei njé ke nè ade awi. 9 Jésu tam bè le kade tà ke è tam kété ede nè: «Njé ke i um de jim’t nga, m’ɔge kum’m ɓi m’an-in ngang de garar-garar m’ade doo karé bè géa dann de’t tuju lé» nga, aw’n loon’t deĵ. 10 Simon Pierre uwe kuye kaskar kêm sabann’t ɔr tuge’n gir mbi paja le maw njèkuje nyan-mese ke dè jikon yap. Paja nè nga ri’n nè Malkus. 11 Jésu ede Pierre ede nè: – Ḿ-m̀, i tel se kuye kaskar lei ule kêm sabann’t gugu. Nyantosowur ke Bɔ’m ɔje’n dè’m nga, ké i ndige kade ra’m lé wa? 12 Njèkan dè njérɔge ke aru dɔg se njérɔge le’n a, se ngann njé ngonm looge le Juipge uwei Jésu tɔi nin njanm-njanm. 13 Go’t ɓaa, ei in-in se’n awi ra Hanne’t kété pa ɓita. Hanne nga è wum Caiphe ke dingem. Caiphe è maw njèkuje nyan-mese kêm ɓaln’t nè nga. 14 E Caiphe nè nga kuwe á ndɔ ke ede Juipge gostà ede nè: – E soo’t ngain kade doo karé wei tede le kosdooge. 15 Simon Pierre se njèkuwe-gir-Jésu karé ke rang ndolèi go Jésu. Njèkuwe-gir-Jésu karé ke rang nè nga aw se’n nan’t kêm geng’t le maw njèkuje nyan-mese. Njèkuwe-gir-Jésu nè nga, maw njèkuje nyan-mese ger’n kété. 16 Nè Pierre nda nata ngɔr se tà kei. Njèkuwe-gir-Jésu karé ke rang ke maw njékuje nyan-mese ger’n nga tee aw nata ede tà dinye ke njè ngonm tà kei ade inye loo ade Pierre ree kêm kei . 17 Dinye ke è ngonn njèndi ke nda à ngonm tà kei deje Pierre ede nè: – Ké i géa i ke dann njékuwe-gir dingem’t nè nga tɔ lé wa? Pierre tam ede nè: – Ḿ-m̀, man m’ee ke dann de’t lé. 18 Kul on ngain. Njérɔge se ngann njéndige umi kul poro ndii à ndibi. Pierre géa ndi se de à ndibe por tɔ. 19 Maw njèkuje nyan-mese deje Jésu tà ɔje dè njékuwe-girnge a, ɔje dè nyan ke è ndó dooge a tɔ. 20 Jésu ile’n dè’t ede nè: – Man m’ede dooge malang ke dè nang nè tà nata mbeng. M’ndó de nyan se ndɔge malang kêm kei kebe nange’t se kêm kei le Nube ke è loo kebe nan le Juipge malang. Nyan ke ndɔ ke m’ndó de nga è se go ngein lé. 21 Ké bain á i deje’m tà nè titeke bè wa? An! njé ke ndɔ ke ooi tàge ke m’tam nga á ndai nè. I deje de ɓaa, à edi nin tede geri maje. 22 Loo ke njè ngonm tà kei le Nube nda oo tàge ke Jésu tam nè bè baa, unde mbɔr’n se ji’n njanm ede nè: – Ké maw njèkuje nyan-mese kuwe ile’n dè tà’t titeke bè wa? 23 Jésu deje njè ngonm tà kei nè nga ede nè: – Ɔrgir tà ke majelé ke m’tam nga ade d’oo. Ke nè á m’tam tà ke maje ɓaa, unde’m tede ri wa? 24 Hanne in se Jésu ke kété ule se’n ra Caiphe, maw njèkuje nyan-mese’t se kule ke dé tɔ’n nga jinn’t mɔngong ɓai. 25 Simon Pierre ndi gutenn’t à ɔde nan ndibe por kuwe ɓai. Dé deje’n d’ede nè: – Ké i géa i ke dann njékuwe-gir doo nyan le doo’t nè nga tɔ lé wa? Pierre naje se ra’n ede nè: – Ḿ-m̀, man m’ee ke dann de’t lé. 26 Paja le maw njèkuje nyan-mese karé è se de loon’t tɔ. E noje dingem ke ndɔ ke Pierre tuge gir mbi’n yap. E deje Pierre ede nè: – Ké i nga kété m’an-in se Jésu kêm loo man kagege nga lé wa? 27 Pierre tel naje se ra’n kuwe ɓai. Ke loon’t nè kuwe, kuren kunje non kɔkerɔ kon. 28 Njékɔr non Juipge in-in se Jésu ra Caiphe’t se ndɔgé ɓat awi se’n kêm kei le Pilate njèkonɓee. Juipge ke awi se’n nga, ilei nja de kêm kei lé. Ei ndigi le kade ra de mine lé tede le kuse’n nyan nan Paque. 29 Gir’n ke nè á njèkonɓee Pilate tee ree inge’n de nata. E deje de ede nè: – Dingem nè nga, ké tà ri á i sêki nin wa? 30 Juipge ilei nin dè’t edi nè: – Ke nè á doo nyan le doo nè nga è njè ra majelé lé ɓaa, né j’ayé k’ule’n jii’t lé. 31 Pilate ede de ede nè: – Sei kuwe i taai nin, i gangi tà dènn’t se go gute-ndu le si. Juipge teli ilei Pilate dè’t edi nè: – Gute-ndu le jè inye loo ade jè le tɔl doo lé. 32 Tà ke Jésu tam ɔje dè ɓer ke d’ayé ɓer’n kade kage-ke-dese’t nga aw loon’t deĵ. 33 Pilate tel aw kêm kei kɔge-loo gangtà’t. E ɓar Jésu deje’n ede nè: – Ké i nga i Ngar le Juipge wa? 34 Jésu deje Pilate ede nè: – Dooge ke rang á edi nin tà nè nga ɔji dè’m, ké i kuwe in se kêmi i deje’m tà nè wa? 35 Pilate ile jésu dè’t ede nè: – Ké man m’ee Juip wa? E girkoje lei se maw njékuje nyan-mesege á d’ulei jim’t. A ɓaa, ke mbain kuwe è ri á i ra wa? 36 Jésu ile Pilate ede nè: – Konɓee le’m è ke nang nè lé. Ke nè á konɓee le’m è ke dè nang nè ɓaa, pajage le’m ayé kan-in rɔ dèm’t kade d’ule’m ji Juipge’t lé. Kerɔte kuwe, konɓee le’m è ke dè nang nè lé. 37 Pilate tel deje Jésu ede nè: – A ɓaa, ké i ngar wa? Jésu tel ilé dè’t ede nè: – E kuwe i tam non. Man Ngar. Kede dooge ngarankum tà á è gir nyan ke d’oje’m d’ade m’ree’n dè nang nè. Nanan ke è le ngarankum tà ɓaa, à ur mbi’n le koo’n ndu’m. 38 Pilate tel deje Jésu ede nè: – Ké ngarankum tà nga è ri wa? Loo ke Pilate deje Jésu tà nè nga bè ɓaa, tel unde loo tee aw ra Juipge’t nata ede de ede nè: – Man ɓaa, m’an tà karé bè ke uwe dè dingem nè nga lé. 39 Nè m’a m’ɔr dangai karé k’inye’n dɔ kade sei se go nyangirkà le si ndɔ ra nan Paque. Ké i ndigi kade m’ɔr ngar le Juipge nga m’inye’n dɔ m’ade sei wa? 40 Juipge teli rai nyan wuu edi nè: – Ḿ-m̀, è n’ee lé, nè è Barabbas. Barabbas nga è gon-ɓog.
1 Pilate unn ndu’n ade d’aw se Jésu d’unde’n se ndêin maru. 2 Njérɔge ojoi jɔkɔ konn tite jɔkɔ ngar bè ulei dè Jésu’t, taɓai ulei nin kubu ke ker perm-perm. 3 Dé ree ngɔr ke rann’t d’ede’n d’ede nè: – Lapya ta ngar le Juipge. Dé tunde mbɔr’n se ji de njanm-njanm tɔ. 4 Pilate tel unde loo tee aw nata ra Juipge’t ede de ede nè: – An-in! man m’ade d’ade ree se Jésu nata ra si’t le kade i geri titeke man m’an tà karé ke uwe dè’n lé. 5 Go’t gugu, Jésu unde loo tee se jɔkɔ konn ke tite jɔkɔ ngar bè dènn’t a, se kubu ke ker perm-perm ke bòi yul rann’t a tɔ. Pilate ede de ede nè: – An-in! doo nga! 6 Loo ke maw njékuje nyan-mesege se pajage le de an-in Jésu pan ɓaa, ei rai nyan wuu edi nè: – I ɓeré kade kage-ke-dese’t! I ɓeré kàde kage-ke-dese’t! Pilate tel ede de ede nè: – Sei kuwe i taai n’ee awi i ɓeri n’ee kàde kage-ke-dese’t tede man ɓaa, m’an tà karé ke uwe dèyé lé. 7 Juipge teli ilei Pilate dè’t edi nè: – J’aw se gute-ndu karé. Se go gute-ndu le jé nè nga ɓaa, d’a tɔlé gar-gar. Tede n’ee nga n’ra rayé ke Ngonn Nube kuwe njing. 8 Loo ke Pilate oo tà nè nga bè ɓá ɓaa, ɓel ra’n ke kété-kété. 9 E tel aw kêm kei kɔg-loo gangtà’t le’n gugu, è deje Jésu ede nè: – Ké i nga girkà lei è nan wa? Nè Jésu tel ile Pilate dè tà’t lé sár. 10 Pilate tel deje Jésu ede nè: – Ké man kuwe á ile’m dè tà’t lé wa? Ké i ger titeke m’aw se tɔgmong le kinyei dɔ éké le kade dé ɓeri kàde kage-ke-dese’t lé wa? 11 Jésu tel ilé dè’t ede nè: – Ke nè á ndɔ ke Nube adi tɔgmong lé ɓaa, ayé ra se’m nyan karé bè lé. Gir’n ke nè á, è ke njè kade d’uwe’m d’ule’m jii’t nga, tà uwe dè’n dum lei ɓai. 12 Unn gir ke loon’t nè kuwe, Pilate sang rebe le kinye Jésu dɔ, nè Juipge rai nyan wuu edi nè: – Ke nè á inye doo nyan le doo nè nga dɔ ɓaa, i made César lé. Nanan ke ra ra’n ngar ɓaa, è njèkɔse tà se César. 13 Loo ke Pilate oo tàge nè bè ɓaa, è ade dé tee se Jésu d’aw se’n nata. Pilate al aw ndi dè ɗinger loo gangtà ke d’ube se her. Loo nè nga ri’n ke se tà hébreu è «Gabbatha.» 14 E Ndɔ kuwe dè nja nyan ra nan Paque. Kàde nda dann ɓee bɔp. Pilate ede Juipge ede nè: – An-in! ngar le si nga! 15 Juipge teli rai nyan wuu edi nè: – I tɔlé ke tɔl kuwe bè! I ɓeré kàde kage-ke-dese’t ade kumé udu kɔke. Pilate tel deje de ede nè: – Ké ngar le si nga kuwe edi nè gar-gar se m’ɓer’n kàde kage-ke-dese’t wa? Maw njékuje nyan-mesege edi nè: – Ngar le jé ke rang goto nè César kuwe karé bere. 16 Pilate ule Jésu ji Juipge’t le kade njérɔge awi se’n ɓeri nin kàde kage-ke-dese’t. Njérɔge uwei Jésu awi se’n. 17 Jésu kuwe unn kage-ke-dese le’n oto. E unde loo tee’n kêm ɓee-bò ke Jérusalem aw’n ngang loo’t nata. E loo «Ngó-non-dooge» ke dé ɓar’n «Golgotha» se tà hébreu. 18 E loo nè á Juipge adi njérɔge ɓeri Jésu tutu se dooge ke rang joo se’n ade ilei nin danné. 19 Pilate ndang tà kêm begre-nyan’t ade dé ɓer kàde kage-ke-dese’t dɔ dè Jésu’t ede nè: «Jésu ke Nazareth ngar le Juipge.» 20 Loo ke dé ɓer Jésu kàde kage-ke-dese’t tutu nga, è ngɔr se ɓee ke Jérusalem. Gir’n ke nè á, Juipge ngain asikum tutei tà ke Pilate ndang ade dé ɓer dɔ dè Jésu’t nè nga. Tà nè nga, è ndang se tà hébreu a, se tà latin a, se tà grec a tɔ. 21 Maw njékuje nyan-mese le Juipge naji se Pilate edi nè: – Ḿ-m̀, i ndang ngar le Juipge lé, nè, i ndang ede nè: «Doo nyan le doo nè nga tam ede nè n’ee ngar le Juipge.» 22 Pilate tel ile de dè’t ede nè: – Nyan ke m’ndang ɓá nga, à tò bè kuwe. 23 Loo ke njérɔge ɓeri Jésu kàde kage-ke-dese’t ɓá ɓaa, ei ɔyi kubuge le’n kayai danné loo sɔ adi ɔje dè de karé-karé. Njérɔge unni kubu le Jésu ke bòi yul ke kum kur’n goto nga tɔ. Kubu nè nga d’ojo ke kojo d’in-in’n dɔ sár dé ree’n nang. 24 Njérɔge edi nan edi nè: – Adi jè tili kubu ke bòi yul nè nga lé, nè adi jè turi jala dè’t j’an-in, ké nan kubu nè à è le’n wa? Titeke bè á tà ke dé ndang kêm magtub’t kété nga aw loon’t deĵ. Dé ndang d’ede nè: «Dé kai nan kubuge le’m, nè kubu le’m ke bòi yul ɓaa, dé tur jala dè’t.» E á è nyan ke njérɔge rai titeke bè. 25 Kon Jésu se ngokon’n Marie, dinye le Clopas, se Marie ke ɓee le’n è Magdala ndai ngɔr kɔte kage-ke-dese’t le Jésu. 26 Jésu tête kum’n an kon’n. Kon’n nda ngɔr se njèkuwe-gir’n ke è tár’n ngain. Jésu ede kon’n ede nè: – Dinye, an ngonni. 27 Go’t gugu, è ede njèkuwe-gir’n nè nga ede nè: – An koin. Unn gir kêm kàdenn’t nè kuwe, njèkuwe-gir-Jésu nè aw se kon Jésu ɓee rann’t ngonm’n. 28 Jésu ger titeke ɗarinè gir nyan malang gang ɓá. Gir’n ke nè á è tam ede nè: – Kunde mann ra’m. E tam titeke bè le kade tà ke tò kêm magtub ke tò se ninn’n aw’n loon’t deĵ. 29 Mann nduu ke mase rusu jó karé bè. Njérɔge ulei kann njan tà kage ninnge’t ulei kum mann nduu ke mase’t nè nga awi ulei tà Jésu’t. 30 Loo ke Jésu njibe mann nduu ke mase nè nga ɓá ɓaa, è tam ede nè: – Gir’n nyan malang gang ɓá ta. Ke loon’t nè kuwe tànn’t tête nyonk ade dè’n tel oso ragm. 31 Ndɔ taa kebe ke nè nga, è ndɔ taa kebe ke bò tede tò gai se madege. E ndɔ kuwe dè nja nyan ra nan Paque. Juipge ɓeli kêm de’t kade ninn Jésu se dooge ke joo ke dé ɓer de se’n nan’t tooi kàde kage-ke-dese’t, tede è ndɔ taa kebe. Gir’n ke nè á Juipge awi deji Pilate le kade ade dé tête nja Jésu se dooge ke dé ɓer de se’n kàde kage-ke-dese’t ɓita dé tɔr ninn de nang ɓai. 32 Nè dooge joo ke njérɔge ɓeri de nan’t se Jésu á dé tête nja de. Njérɔge têti nja è ke karé pa ɓita têti le è ke njèkon madenn’t joo ɓai. 33 Nè loo ke dé ree ra Jésu’t ɓaa, d’an titeke wei ɓá. Gir’n ke nè á dé tête’n nja’n lé. 34 Nè né è bè géa, njèrɔ karé dann madennge’t ɔse kêl kade Jésu se ninge dap. Ke loon’t nè kuwe, mese se mann ubei tà’t tir-tir. 35 Doo ke njèkɔrgo tà nè kede sei nga an nyange nè se kum’n. Tà ke è ɔrgo nga è ngarankum tà. Doo nè nga ger titeke è tam ngarankum tà le kade sei géa undei kêm si dè Jésu’t tɔ. 36 Nyange nè teei titeke bè tede kade tà ke Magtub ke tò se ninn’n tam kété nga aw’n loon’t deĵ. Dé ndang kêm magtub’t d’ede nè: «D’a tête kinge’n karé bè géa dann madege’t lé.» 37 Dé ndang kêm magtub ke rang’t d’ede nè: «E ke d’ɔse kàde’n se ninge nga, d’a d’an’n se kum de ndɔ ke rang ɓai.» 38 Go nyange ke teei’t nè nga, Joseph ke ɓee le’n è Arimathée aw deje Pilate kade inye loo ade ɔr ninn Jésu. Pilate ndige se’n dè’t. Joseph aw ɔr ninn Jésu kàde kage-ke-dese’t. Joseph nè nga, kété è njèkuwe-gir Jésu se go ngein tede è ɓel kum Juipge. 39 Nicodème, ke ndɔ ke aw inge Jésu dann ndɔɔ nga géa ree tɔ. E ree se wubu ke ri’n nè myrrhe ke pɔti nan’t se wubu ke ri’n nè aloès ase kilo kɔr-mute-gidé-joo jinn’t. 40 Joseph se Nicodème unni ninn Jésu awi ɓiri se tà kubu a, têti wubu ke ete ngain ke ri’n nè aromate dènn’t se go nyangirkà le Juipge loo dubu nan’t le de. 41 Loo ke dé ɓer Jésu kàde kage-ke-dese’t tutu nga, è ngɔr se loo man-kagege. Dé son bolè mbal ke kige kàde mbal’t kêm loo man-kagege’t nè nga. Bolè mbal nè nga dé dubu ninn doo tutu nja karé ndan lé ɓai. 42 Joseph se Nicodème unni ninn Jésu awi undei kêm bolè mbal ke dé son, tede è ngɔr se loo ke dé ɓer’n kàde kage-ke-dese’t. E ndɔ kuwe dè nja nyange malang ɔje dè ndɔ taa kebe le Juipge tede nain ngɔr ɓaa, kàde le ndɔ taa kebe à ase. Gir’n ke nè á d’unn’n ninn Jésu le dubu kɔke.
1 Ndɔ ke njè kutu go ndɔ taa kebe, Marie ke ɓee le’n è Magdala tee se ndɔgé aw dè ɓada se loo ke tò gundu-gundu ɓai. E an titeke doo ndubri kuberi mbal ke bòi ke d’utu’n tà be-ɓade nga ile rang. 2 Marie ɔse wan tel se ngɔde ree ra Simon Pierre’t se njèkuwe-gir-Jésu karé ke rang ke Jésu ndige’n ngain. Marie ede de ede nè: – D’ɔr ninn Kuwe-ɓee Jésu kêm bolè mbal’t nga kɔke. Nè jè ger loo ke d’ile tutu lé. 3 Pierre se njèkuwe-gir-Jésu karé ke rang nè nga, teei awi dè ɓada. 4 Ei joo mbak unni gir naji nan ngɔde. Nè njèkuwe-gir-Jésu karé ke rang nè nga an-in ngɔde kalang tee dè ɓada kété non Pierre’t. 5 E ɗuge nang ɓaa an tà kubuge ke dé ɓir’n Jésu á tooi nang njɔk karè. Nè né è bè géa, è aw kêm be-ɓade’t lé. 6 Go’t gugu ɓita Simon Pierre ree ke le’n. E ree dɔ aw kêm be-ɓade’t. Simon Pierre an tà kubuge ke dé ɓir’n Jésu tooi nang njɔk karè tɔ. 7 Tà kubu ke dé dɔ’n dè Jésu nga, d’udu kɔtch-kɔtch d’ile gai loo ke rang’t se tà kubuge ke dé bir’n. 8 Go’t gugu ɓita njèkuwe-gir-Jésu karé ke rang ke an-in ngɔde aw dè ɓada kété non Pierre’t nga aw kêm be-ɓade’t ke le’n tɔ. E an nyange nè se kum’n. Gir’n ke nè á è unde’n kêm’n dè kunde loo tee dann njé ke koo’t le Jésu. 9 Magtub ke tò se ninn’n tam kété mari ede nè: Jésu à unde loo tee dann njé ke koo’t gar-gar. Sár ɓila njékuwe-gir-Jésuge geri gir tà nè njai lé ɓai. 10 Njékuwe gir-Jésuge ke joo nè nga teli awi ɓéee. 11 Marie nda nata ngɔr se dè ɓade Jésu à non. E non nda gon’n kêm bolè mbal ke dé dubu’n Jésu tutu. 12 E an dooge ke danrán joo tulei kubu ke nda káng-káng ndii nang loo ke kété d’unde’n ninn Jésu tutu a, è ke karé ndi loo ke kété dè Jésu sɔbe tutu a, è ke karé ke rang ndi loo ke kété nja Jésu sɔbe tutu a tɔ. 13 Dooge ke danrán ke joo nè nga deji Marie edi nè: – Dinye, ké i non tede ri wa? Marie ile de dè’t ede nè: – D’ɔr Kuwe-ɓee le’m Jésu kêm bolè mbal’t kɔke. M’ger loo ke d’aw d’ile’n tutu lé. 14 Loo ke Marie tam tà nè nga gir gang ɓá ɓaa, tur ra’n warar ɓaa, è an Jésu nda goon’t. Nè è ger titeke è Jésu nga lé. 15 Jésu dejé ede nè: – Dinye, ké i non tede ri wa? Ké i sang nan wa? Marie ke ɓee le’n è Magdala an Jésu ɔje’n njèra kule man-kagege karè. Gir’n ke nè á è ede’n ede nè: – Ngar, ke nè á è i a ɔré ɓaa, ɔje’m loo ke ilé tutu ɓaa, m’a maw le kunné. 16 Jésu ɓar Marie ede nè: – Marie! Marie tel tur ra’n warar ke ra Jésu’t ɓar’n se tà hébreu ede nè: – Rabbuni! tel se tà koje jè ɓaa, è «Kuwe’m!» 17 Jésu tel ede Marie ede nè: – Ɔde ra’m lé tede m’in m’aw ra Bɔm’t lé ɓai. Nè i ɓaa, i tel aw ede ngakonmge ede nè m’ndi m’aw ke ra Bɔ’m Nube’t. Bɔ’m Nube nga, è Bɔ si sei a, è Nube le si a tɔ. 18 Marie ke ɓee le’n è Magdala ree ede njékuwe-gir-Jésuge ede nè: – Man nga m’an Kuwe-ɓee ɓá. Marie ɔr sertàge ke Jésu ede’n ade d’oo. 19 Loo sɔlé kêm ndɔ ke njè kutu go ndɔ taa kebe, loo ke ndɔ il ɓá ɓaa, njékuwe-gir-Jésuge kebi nan kêm kei uti tà rebe dè de’t kák-kák tede ɓeli Juipge. Jésu tee hɔi, nda dann de’t ede de ede nè: – Maje kade kêmlom nain se si. 20 Loo ke è tam tà nè nga bè ɓá ɓaa, è tɔje dè jinnge se kêl kàde’n ade d’an. Ra njékuwegir Kuwe-ɓee Jésuge nel de ngain tede kan ke an-in nin. 21 Jésu tel ede de ede nè: – Maje kade kêmlom nain se si. Ɗarinè, man géa m’ule sei titeke kété Bɔ’m ule’m nga tɔ. 22 Loo ke è tam tà nè nga titeke bè ɓá ɓaa, è tó kebe dè de’t puu ede nè: – I taai Ndil-Kêmnda! 23 Njé ke adi kêm si tin mbit dè kaiyage’t le de nga, Nube à ade kêm’n tin mbit dè de’t tɔ. Njé ke inyei kaiyage le de dè’t nga, Nube à inye kaiyage le de dè’t tɔ. 24 Thomas è ke karé dann njé ke dɔg-gidé-joo’t. Thomas nga d’ile ri tɔy’n nè «Ndunge.» E goto se madennge loo ke ndɔ ke Jésu tel ree’n ra de’t. 25 Loo ke Thomas ree ɓaa, njékuwe-gir-Jésuge ke rang edi nin edi nè: – Jè j’an Kuwe-ɓee ɓá. Thomas tel ede de ede nè: – Ke nè á m’an tà dò pondɔ ke jinn’t, m’ule ngaw ji’m tà dò ninge ke kêl kàdenn’t nga lé ɓaa, m’a m’taa tà le si ndan lé. 26 Ndɔ sɔsɔ gugu ɓai, njékuwe-gir-Jésuge teli kebi nan kêm kei karé’t. Ei uti tà rebege dè de’t kák-kák. Thomas è se de nan’t kêm ndɔn’t nè nga. Nè né è bè géa, Jésu tee hɔi, nda dann de’t ede de ede nè: – Maje kade kêmlom nain se si. 27 Go’t gugu è tur kum’n dè Thomas ede’n ede nè: – An tà dòge ke jim’t. Ule ngonn jii ke kété nè ɔde’n tà dò ninge ke kêl kàdem’t. Ebe’t kunn mbii dè tà’t lei. Unde kêmi dèm’t. 28 Thomas tel ile Jésu dè’t ede nè: – Kuwe-ɓee le’m, Nube le’m. 29 Jésu tel ile Thomas dè’t ede nè: – I unde kêmi dèm’t tede kan ke an’m karè. Njé ke undei kêm de dèm’t anje kan’m nga, ra de à nel de. 30 Jésu ra nyankɔbege ke rang bule ngain tàkum njékuwe-girnge’t. Nyankɔbege nè nga, dé ndang tà’n kêm magtub’t nè malang lé. 31 Nè tà nyankɔbege ke dé ndang tà’n kêm Magtub’t nè nga, è tede le kade awi kum si ke kété dè kunde kêm si dè Krist’t titeke è Ngonn Nube nga kuwe. Ke nè á undei kêm si dènn’t ɓaa, a ingei ndikumgajer se non takul ri’n è.
1 Ndɔ ke gugu rang, Jésu tee hɔi ke ra njékuwe-girnge’t tà ba ke ri’n nè Tibériade. An! dé ke è tɔje de ra’n ade d’an’n nga ri de á tò nè: 2 Simon Pierre, Thomas ke ri tɔy’n nè: «Ndunge», Nathaniel ke ɓee le’n è Cana ɓeekon ke Galilée, ngann le Zébédéege ke joo se njékuwe-girnge ke rang joo tɔ. Ei nè malang ndii nan’t loo karé kêm ndɔn’t nè. 3 Simon Pierre ede madennge ede nè: – Man m’a m’aw le kɔse kanje. Madennge edi nin edi nè: – Jè géa j’à j’aw sei tɔ. Simon se madennge undei loo teei awi ali kêm bato’t. D’ɔse kanje ndɔɔ sár loo ar dè de’t yerer nal kuwe kanje karé ke luk-luk kêm ndɔn’t nè. 4 Loo ke loo ar ɓá ɓaa, Jésu ree nda ngang ba’t. Nè né è bè géa, njékuwe-girnge geri titeke è è lé. 5 Jésu deje de ede nè: – Mademge, ké awi se nyankuse ke rang ji si’t lé wa? Dé tel d’ile’n dè’t d’ede nè: – Ḿ-m̀, nyankuse ke rang goto ji jé’t. 6 Jésu ede de ede nè: – Ilei bure le si se ke dè jikon bato’t ɓaa a ingei kanjege. Loo ke d’ile bure nga ɓaa, kanjege rusi neĵ ade d’ase ndɔr tee’n nata lé. 7 Njèkuwe-gir-Jésu ke Jésu tár’n ngain ede Pierre ede nè: – Doo nga è Kuwe-ɓee le jéi Jésu! Loo ke Pierre oo titeke è Kuwe-ɓee ɓaa, tel ule kubu le’n ke bòi yul rann’t, al bal oso dann ba’t gugu gɔbong tede kété ndi ra’n karè. 8 Njékuwe-gir-Jésuge ke rang teli reei se ngonn bato nga, ei tɔi bure ke kanjege rusi neĵ nga tutu ndɔri à reei ke kàde kong’t. Hebi ngain se kàde kong lé, nè ei ngɔr asenan se kum kil ji doo aru joo. 9 Loo ke ei risi nang ɓá ɓaa, ei an-in kanjege se mapa tooi dè yal por’t. 10 Jésu ede njékuwe-girnge ede nè: – I reei se ngann kanjege ke uwei nga ke laa. 11 Simon Pierre tel al kêm bato’t ndɔr bure ke kanjege rusi neĵ nga ile nata. Kanjege ke bòi-bòi ke kêmé nga ei aru se kɔr-mi-gidé-mute. Kanjege bulei ngain, nè né è bè géa bure gang lé. 12 Jésu ede njékuwe-girnge ede nè: – I reei usei nyan. Dé ree dé ndi nang, nè doo karé bè géa ɔse kum’n deje’n ede nè: «Ké i nan wa?» lé. Dé malang dé ger titeke è Kuwe-ɓee. 13 Jesu ree unn mapa nga tête danné kai de. 14 Taɓai unn tutu kanje nobo de titeke bè tɔ. Nube ade Jésu unde loo tee dann njé ke koo’t. E tɔje ra’n ade njékuwe-girnge an-in nin. Ke nè ɓaa, è njèkon’t mute ɗarinè ta. 15 Loo ke d’use nyan gir gang ɓá ɓaa, Jésu deje Simon Pierre ede nè: – Simon, ngonn le Jean, ké i tár’m dum njékuwe-girmge ke rang malang kuwe wa? Pierre tel ile Jésu dè’t ede nè: – Oiyo, Kuwe-ɓee, i ger titeke m’ndigi kuwe. Jésu edé ede nè: – Ul ngann batege le’m ade’m sei. 16 Jésu tel deje Simon njèkon’t joo ede nè: – Simon ngonn le Jean ké i tár’m kuwe wa? Simon tel ile jésu dè’t ede nè: – Oiyo, Kuwe-ɓee, i ger titeke m’ndigi kuwe. Jésu tel edé ede nè: – I tɔse kumi dè ngann batege le’m ul de ade’m sei. 17 Jésu deje Simon njèkon’t mute ede nè: – Simon, ngonn le Jean, ké i ndige’m kerɔte kuwe wa? Kêm Pierre on’n tede deje ke Jésu tel deje’n njèkon’t mute ede nè: – Ké i ndige’m kerɔte kuwe wa? Taɓai Pierre tel ede Jésu ede nè: – Kuwe-ɓee, i ger nyange malang ɓá, i ger titeke m’ndigi kerɔte kuwe. Jésu tel ede Simon Pierre ede nè: – Bè ɓaa, ul ngann batege le’m ade’m sei. 18 Kerɔte man m’edi ndàt, kété ke i basa ɓai nga i kuwe i tɔ́ ɓedi se ndar aw’n loo titeke kêmi ndige. Nè ndɔn’t a i ɓuge ɓaa, a i sure jii kade doo karé ke rang à tɔ ɓedi se ndar a, à ndɔri kaw sei loo ke i ndige’t lé. 19 Jésu tam tà nè nga titeke bè ɔje’n dè ɓer ke d’ayé ɓer Simon kàde kage-ke-dese’t le kile’n riɓar dè Nube’t. Loo ke Jésu tam tà nè nga gir gang ɓá ɓaa, tel ede Simon Pierre ede nè: – Unn rebe goom’t. 20 Pierre tel mer goo’n. E an njèkuwe-gir-Jésu ke ndɔ ke tò kàde Jésu’t tá use’n nyan. Pierre an’n njiye go de’t se Jésu. Njèkuwe-gir-Jésu nè nga, Jésu tár’n ngain. E è nè á ndɔ ke deje Jésu mêt ede nè: «Kuwe-ɓee, ke nan à ulei ji dooge’t wa?» 21 Loo ke Pierre tête kum’n an’n ɓaa, deje ede nè: – Kuwe-ɓee, à n’ee ke nè, ké ri á à tee dèyé’t wa? 22 Jésu tel ede Simon ede nè: – Ke nè á m’ndige le kade n’ndi bè sár kade m’tel m’ree’n ɓaa, ké usi ri wa? I ɓaa, unn rebe goom’t. 23 Njékuwe-gir-Jésuge turi tà nè ilei gel edi nè: – Njèkuwe-gir-Jésu nè nga, ayé kwei lé. Nè Jésu tam ede nè: «Njèkuwe-girnge nè nga ayé kwei lé» lé. Nè è tam ede nè: « Ke nè á m’ndige kade n’ndi sár le kade m’tel m’ree’n ɓaa, ké usi ri wa?» 24 E njèkuwe-gir-Jésu nè nga kuwe á ɔrgo tà nyange ke ndɔ ke an se kum’n a, se tàge ke ndɔ ke oo se mbin’n a tɔ. E ndang de kêm Magtub’t nè. Jè ger titeke tà ke è ɔrgo nga è ngarankum tà kerɔte kuwe. 25 Kété Jésu ra nyange ke rang bule ngain. Ke nè á ndɔ ke dé ndang tà’n karé-karé malang kêm magtub’t ɓaa, m’gir titeke à ubei loo bang-bang dè nang nè.