Caj uch ti le kinoobo', jok u yaalmajt'an Augusto Cesar ca dzibtaac u kaba' tulacal u cajnaliloob luum. Le yax dzibi-kaba' betaab caaliquil Cirenio u jalachil Siria. Cu binoob caach tulacaloob uti'al ca dzibtaac u kaba'ob, jujuntul ti u cajal. Caj luk Jose tu luumil Galilea ti u cajil Nazaret, caj bin t u luumil Judea tu cajal David cu yaalaal Belen, tumen ti u nail yetel ti u ch'iibal David u tal; uti'al ca dzibtaac u kaba' yetel Maria u yatan, max yetel u nuucmaj caach u dzoocolubel, xleti' kojaan caach ti champal. Caj uch caaliquil tianoob telo', kuch u kinil u sijsaj Maria. Ca tu sijsaj u yax pal, ca tu badz-tep'aj yetel jajay nok, ca tu chicuntaj tuux cu tzentaal wacax, tumen ma' yanji cuchil uti'aloob ti u nail uula'ob. Yan caach aj-cananoob tilie luumo', tan caach u canantcoob u tamanoob ti u p'il-ichiloob le akab. Jetuna' juntul u angel Yumtzil chicpaj ti'ob, yetel ba'pachtaaboob tumen u sasjomeenil u nojbeenil Yumtzil, ca yanchaj nojoch sajquil ti'ob. Baale' le angel tu yaalaj ti'ob: Ma' sajactaleex, tumen jetuna' quin dzic teex u maalob pectzilil nojoch quimacolal uti'al tulacal caj. Dzooc u sijil ati'aleex bejlae' tu cajal David juntul Aj-tocsajil, Cristo Yumtzil. Lela' jump'el u chiculal ti teex, bin a nuptanteex le champal badz-tep'aan yetel jajay nok, chicunsaan tuux cu tzentaal wacax. Tu seblaquil tianji yetel le angel jump'el u nojoch much'cabil u cajnaliloob caan, tan caach u quiqui't'antcoob Jajal Dios, tan u yaalicoob: Nojbeenil ti Jajal Dios tu caaniloob, yetel jedzel yo' luum, maalob olaj ti winicoob. Uch, le caj lukoob le angeloob ticnaloob uti'al u bimbaloob caan, le aj-cananoob tu yaalajoob tu batziloob: Cooneex tun tac Belen uti'al c-ileex le baax dzooc u yuchula', le xan dzooc u betic c-ojeltic Yumtzil. Alcabil talicoob, ca tu nuptantoob Maria yetel Jose, beyxan le champal chicunsaan tuux cu tzentaal wacax. Le ca tu yiljoobe', tu betoob u yojeltaal le baax aalaab ti'ob tio'lal le champal. Tulacal le maxoob tu yuubajoobe' jaak yoloob tio'lal le baax cu yaalaal ti'ob caach tumen le aj-cananoob. Baale' Maria tu taacaj tulacal le baalooba', tan u sen tuclic tu pucsikal. Le aj-cananoob sunajoob, tan u nojbeencunscoob yetel tan u quiqui't'antcoob Jajal Dios tio'lal tulacal le baloob tu yuubajoob yetel tu yilajoob, jebix uchic u yaalaal ti'ob.