Huin'it xii Augusto César pidacy y'ané'min huen tüg'óciy jäy nicxy necypejttaaygixy. Je jayijp'atypi padrón hue' je' yaj'oyiiy Cirenio huidibi anajty gobernador'ajtp jim Siria ñaaxjot. Chi jäy ajcxy nidüg'óciy ñicxtay yajcojayiiybi nidüg nidüg ma yci'mgajp. Chi José chooñ jim Galilea naaxjot ma je cajp huidi yxii Nazaret, ñicxy ajcxy jim Judea naaxjot ma je David ycajp, huidi yxii Belén. Yi José ñicxy jim Belén com ymij'ap'ajtpy ymijteedy'ajtpy je David. Chi José yajcojayiiy padrónjoty miid María, je töxyjäy huidibi anajty ymiid capxytuñ, huidi anajty ung tzim'ijtp. Chi jadu'n yjajty co ajcxy anajty yjímity Belén, chi oyhuaad'aty co María paadipy y'ung. Chi yma'xung'ajty je unggoob, e chi nïbe'ñ nïmüxy miid ymotz, e chi agögiiy ma iyujc pëcxi'ñ, co ca' anajty ti paady jättac. Chi mihuingon je cajp anajty jäy ycöbixycuend'aty. Hue' anajty ajcxy yhuin'iñaayb huntzuumnajxyp je' ycöbixy ajcxy. Chi Huindzin Dios tüg y'ángel ñigidaaci je' ajcxy, e yi Huindzin Dios y'oy'ájtin y'adicxcoody jühuidity ma je' anajty ajcxy ymijc, chi ajcxy ooy chigiiy. Huin'it je ángel yminañ: --Ca' mdzigiigixy, cham iich miich nyajnimaaygixy oybi ayuc huidibi yajjotcugïhuipy tüg'óciy naax cajp. Miid miich ajcxy ycixpi ti ypi'c'aty cham ma je David ycajp tüg jäy huidibi miich ajcxy xyñihuänaam xycohuänaam ma ajcxy mmidzip. Hue' je' je CRISTO, je Huindzin Dios. Yi' je' ijxpéjtip huidi miid m'ijxcabipy. Mbáadipy ajcxy je ung ma'xung ñïmóchity miid ymotz, ycöcnäy ma iyujc pëcxi'ñ. Chi janch mic'amy ñayguëxïci miid je ángel may yi tzajpjotychinaaybi, chach Dios ojadájtcixy ymináangixy: ¡Ooy ycömáyity ooy ymíjity yi Dios tzajpjotypi, ji naaxhuiñ jotcujc'ajt miid jäy ajcxy ycixpi huidibi Dios yjäygidacpy! Jadu'n yjajty co je ángel ajcxy ñicxtay tzajpjoty, chi je cöbixy cuend'ajtpi ajcxy ñayñimayï --Tzoc jámim jim Belén, jaydëbi n'íjxim ti ti ytunyii ti yjadyii huidibi nHuindzin'ájtim Dios ti xyajnimáayim. Chi ajcxy ñicxy jottigoy, chi oy pátcixy María, José etz je ung ma'xung y'agögïyity ma je iyujc pëcxi'ñ. Co ajcxy ijxy je María etz je ung ma'xung, huin'it ajcxy nigapxtay nimiydactay jadu'n nej je ángel ajcxy ñimayi miid je pi'c'anäg ycixpi. Tüg'óciy jäy huidi midou ooy jihuiy huinmay jadu'n nej je cöbixycuend'ajtpi ajcxy yminañ. Chi María mido'mbijctay, e yajhui'my ma yjot yhuinma'ñ. Chi yhuimbijty je cöbixycuend'ajtpi ajcxy cömay jäymech ajcxy yi Dios, etz ooy alabanza ajcxy iiy miid Dios ycixpi miid tüg'óciy jadu'n nej anajty ti íjxcixy ti midóogixy, etz jadu'n nej anajty ti ñimáayigixy.