1 Wosya isya ro randakya; Wos ani isya kuker Allah ma Wos ani Allah dirya. 2 Wos ani isya kuker Allah ro randakya. 3 Roi ḇeḇor nakam i ḇefrur nanya ma rofyor isyaḇa, roi ḇeḇor ḇeḇesya kwar anna kam napok ndariryaḇa kako. 4 Ro i kankenemya isya ma kankenemya ḇyesasna snonkaku. 5 Sasna ani isnai ro pampanya, ma pampanya ipokiḇa. 6 Allah iwan snonkaku oso fa ryama, snonsnon ḇyedi Yohanes; 7 Yohanes ryama imnis saksi fa ḇyesaksi sasna ani, insa snonkakusya kam sikyar. 8 Yohanes iso ḇeḇe isnaiyaḇa, ḇape ḇyuk ḇaḇesaksi ro sasna ani. 9 Sasna kakuya, iso ḇeḇeisnai snonkaku oser-oser, ryama ḇe supswan ine. 10 Isya kwar ro supswan ine ma iso ḇefrur supswan ine, ḇape supswan ine ssmambaḇiriḇa. 11 Ryama faro kawasa ḇyesi, ḇape kawasa ḇyesi simeweri. 12 Ḇape snonkaku ḇemarisen ma ḇekyari syakam ḇyuk papoik farosi, insa seromawa Allah ḇyesi. 13 Seḇeyaḇen kuker ḇaḇesnonkakuḇa, snar kankenem ḇebaboya ryamuma ro Allah. 14 Wosya ḇyesnonkaku kwar, ma ikenem fandu ko, ma komam baba ḇyedi, isoine baba ssḇuk faroi imnis Kmaya Rumkun Mandos ḇyedi, ifo kuker saswar fakamaman ma napnapes. 15 Yohanes ḇyuk ḇaḇesaksi ḇekur i ma ikofen ḇo doḇo: "Snon ine iso yakofen ḇadir ḇo yoḇo: Ḇarpurya ro aya nari oso ryama, ḇape ryama ḇepon kwar ro aya, snar isya kwar rofyor ayaisya ḇaimya." 16 Snar ifo kuker saswarya, ma saswar ḇyedi imnaiḇa ma ḇyeḇok ko. 17 Snar sasoser Refo Yahudi Moses iso ḇeḇuk nani, ḇape saswar fakamaman ma napnapes ndama ro Yesus Kristus. 18 Snonkaku osero ḇaḇeri fa ḇemam Allah kwar; ḇape Allah Rumkun Mandos ḇyedi, ḇemnis kuker kmari ma ḇeroyusi ḇesya kwar, iso ḇefasna Kmaya maḇeko. 19 Ma ine ḇaḇesaksi ro Yohanes, fafisu snon Yahudisya ro Yerusalem siwan imam ma snon Lewi ono faroi ma sifukeni: "Manseiso aw?" 20 Kyarem ma fyamyun epenḇa, ḇo doḇo: "Aya ine Wairek ḇa." 21 Raimnai sifuken faroi: "Au rya ke nabi beramaya?" Kyarem: "Roba!" 22 Inja sikofen faroi: "Manseiso aw? Snar nari nkoḇuk kankarem faro ḇewan inkosya. Rosai wakofen fa ḇekur mankundwaya?" 23 Kyarem, ḇo doḇo: "Aya iso nabi Yesaya ikofen kwarya, snonkaku ḇekaru ro sup ḇeursḇa: Mkokarpyom nyan faro Manseren!" 24 Ma rofandu snonkaku siwan ansi, snon Farisi ono sisya. 25 Sifuken faroi ḇo soḇo: "Rofyor wairek ḇeḇuk koreriya iso awḇa, Elia iso awḇa, ma nabi risawḇa ido, snaro buk masi sren?" 26 Yohanes kyarem farosi ḇo doḇo: "Yaḇuk masasi kuker war; ḇape rofandu mko snon oso isya dores ḇo mkofawiḇa, 27 isoine i, ḇerapapur ro aya. Yaper kaḇrai ḇefes roi ḇesower ḇyesi, yasyusḇa. 28 Roi ḇeḇesya nane ndarirya ro Betania, ro Yordan, ḇar wamurem moḇ Yohanes ḇyuk masi sren roya. 29 Ro meserdi Yohanes myam Yesus ryayoḇi ma ikofen: "Mkomam kada Allah Domba Mkun ḇyedi, ḇepyos sasar supswan ine. 30 Iso yakofen ani: Nari ḇerapapur aya, ikada pyon aya kwar snar isya kwar rofyor ayaisya ḇaim. 31 Ma ayaḇardi randakya yamam ḇaḇiriḇa, ḇape snar i ḇeḇedari yarama yaḇuk masasi kuker war, insa ḇyeḇeḇadir faro Israel." 32 Ma Yohanes ḇyuk ḇaḇesaksi ḇo doḇo: "Yamam kwar Rurya dado ro nanki imnis manjawa, ma kyain roi. 33 Ma aya ine kako yamam ḇaḇiriḇa, ḇape i ḇewan aya fa yaḇuk masi sren kuker war, dawos kwar faro aya: Rofyor mam Rurya dado faro snon oso ma kyain roi, irya nari ḇeḇuk masi sren kuker Rur Ḇesrenya. 34 Ma yamami kwar ma yaḇuk ḇaḇesaksi: Inekada Allah Rumkun ḇyedirya." 35 Ro meserdi Yohanes dores wer rodia kuker manfamyan risuru ḇyesui. 36 Ma fafisu myam Yesus dunuk, ikofen: "Mkomamkada Allah domba Mkun ḇyedi!" 37 Manfamyan ansuya sumnaf rosai ikofen kwar, inja sura suso Yesus. 38 Ḇape Yesus iknenef ḇe ḇarpur, myam susoi inja ikofen faro su, ḇo doḇo: "Rosai musewarya?" Sukofen faroi: "Rabi (isoine guru), moḇ rosai kwain roya?" 39 Ikofen faro su: "Muramuma nari mankun mumame." Susoi ma suyakmam moḇ rosai kyon roya, ma ro ras ani sukain fnoḇeki; fafisu ani indokada oras fiak mandira. 40 Oso rofandu su ḇemnaf Yohanes wos ḇyedi ma ḇeso Yesus snonsnon ḇyedi Andreas, Simon Petrus ḇedar ḇyedirya. 41 Andreas isrow Simon, naek ḇyedi ma ikofen faroi, ḇo doḇo: "Nkosrow kwar Wairek ḇeyun koreri." (Wairek) isoine Kristus. 42 Duni faro Yesus, Yesus myami ma ikofen: "Au Simon, Yohanes romawa ḇyedi, nari snir awḇe Kefas (isoine Petrus = Karui bosen)." 43 Ro meserdi, Yesus kyara namuk fa ryaḇe Galilea, isrow kuker Filipus ma ikofen faroi: "Waso aya!" 44 Filipus mnu ḇyedi Betsaida, Andreas ma Petrus mnu suḇedi. 45 Filipus isrow Natanael ma ikofen faroi: "Nkosrow i kwar, Moses ikofen ro Refo Yahudi ma syap nabi-nabi ansya isoine Yesus, Yusuf romawa ḇyedi ro Nazaret." 46 Natanael ikofen faroi: "Inja roi ḇeḇye oso nari ryama ro Nazaretke?" 47 Filipus ikofen faroi: "Rwama ma wakmam!" Yesus myam Natanael ryamuma yoḇi, inja ikofen: "Mkomam inekada snon Israel kraf oso, kosma ankarkar roiḇa!" 48 Natanael ikofen faroi: "Mambaḇir aya rariso?" Yesus kyarem faroi: "Rofyor Filipus dor aw ḇaim, yamam kwain ro ara knamya baḇdi." 49 Natanael ikofen faroi: "Guru, Allah Rumkun ḇyedi iso au, ma kawasa Israel wairek sediso au!" 50 Yesus kyarem: "Snar yakofen faro au; yamam aw ro ara knamya fuarya eḇedari wakyar ya? Nari mam roi ḇeḇor ḇesyadi wer ro ine." 51 Raimnai Yesus ikofen wer faroi: "Yakofen faro aw, kaku ḇeri nari mam nanki ḇyas ma Allah malaikat-malaikat ḇyesi sado sek faro Rumkun Snonkakuya."
1 Ro ras ḇeḇekiorya munara fakawiwin oso isya ḇyeḇefrur ro mnu Kana sup Galilea, ma Yesus snari isya rodia; 2 Yesus ma manfamyan ḇyesi sakposi kako ro munara fakawawin ani. 3 Rofyor anggur sesi siḇro, Yesus snari ikofen faroi: "Anggur sesya siḇro." 4 Yesus ikofen faroi: "Awine rosai wamarisen ro aya? Fafisu yedi ryama ḇaim." 5 Inja snari ikofen faro ḇeyuffarmyansya: "Rosai ikofen faro mko, mko frurna!" 6 Rodia babewu riwonem naisya sfasos na faro ḇanḇan imnis rari kawasa Yahudi, oser-oser iser fyom risuru oroḇa kior. 7 Yesus ikofen faro ḇeyuffarmyan ansi: "Mkoser babewu nane rao nafo kuker war." Ma siser narao nafo. 8 Raimnai ikofen farosi: "Knikine mko nawna ma mkun faro manfarkin munaraya." 9 Manfarkin munara ani ryepen war ani kwar, ḇefawnai kwar ḇe anggur ani ma ifawiḇa anggur ansi srama kero, ḇape ḇeyuffarmyan, ḇenaw war ani, ḇefawiya dor manfakawin snonya, 10 ma ikofen faroi: "Imnis raris rari Yahudi, snonkakusya ssḇuk anggur ḇeḇye resari isof kawasasya sinem rao sisyopen, insape ssḇuk anggur ḇeḇye mankunba; ḇape wakram anggur ḇeḇesya isof knikine." 11 Ine aḇyair kanandor ḇepon Yesus ifrur ro Kana sup Galilea, ma kuker aḇyair ine fyasna baba ḇyedi. Inja manfamyan ḇyesi sikyar faroi. 12 Raimnai Yesus ryaḇe Kapernaum fnoḇek snari ma naek ḇyesi ma manfamyan ḇyesi, ma skain rodia ḇe ras riḇeso monda. 13 Fafisu ras munara Paskah kawasa Yahudi fyanam kwar, Yesus dekḇe Yerusalem. 14 Ro Allah Rum ḇyedi manfarḇyan sapi, kambing, domba ma manjawa, ma ḇesadwer pipi skain rodia. 15 Inja pyar kaḇrai baken osoḇe ayos, raimnai ḇyuki iyaw sikam ro Allah Rum ḇyedi kuker kambing-domba ma sapi sesi; pipi ḇesadwer isbawer si ḇo pyambar meja-meja sena. 16 Faro manfarḇyan manjawasya ikofen: "Mkun roi ḇeḇor nanekam bur moḇ ine, mkofrur Mami rum ḇyedi awer ḇe moḇ ḇefarḇyan." 17 Inja manfamyan ḇyesi siswar smai fasfas ḇeyoḇo: "Saswar ayedi faro rum bedi, O Allah, ifrur dosam imnis for ḇekun." 18 Kawasa Yahudi sisampum Yesus, ḇo soḇo: "Aḇyair rosai fasna maro nko, mboi wasma papoik fa wafrur rarirya?" 19 Yesus kyarem farosi: "Mkokakok Allah Rum ḇyedine kada, ma ro ras rikior nari yaḇawes i wer." 20 Raimnai kawasa Yahudi sikofen faroi: "Wampasi wambarek samfur rifiak seser riwonem Allah Rum ḇyedine snonkaku sḇawesi ma au nari ḇeḇawesi ro ras rikioryake?" 21 Ḇape roi dawos sarḇer kuker Allah Rum ḇyedi, isoine mankundi baken ḇyedi. 22 Ḇarpurya, rofafisu diḇri ro fandu ḇemarsya, insape manfamyan ḇyesi siswarepen roi ḇeḇesya ani ikofeni kwar, ma sikyar fasfas Refo ma Yesus wos ikofen ani kwar. 23 Ma fafisu isya ro Yerusalem, fyor munara ḇeba Paskahya, kawasa sibor sikyar faroi snar smam aḇyair ifrur kwar na. 24 Ḇape Yesus mankundi ikyar siḇa, snar myamkir sikam, 25 ma fandun fa snonkaku oso ikofen faroi, ro manseirya wer kako snar myamkir rosai isya ro snonkaku sisnes na.
1 Snon farisi oso snonsnon ḇyedi Nikodemus, snon manfarkin ro agama Yahudi. 2 Roḇ oso ryama faro Yesus ma ikofen: "Rabi, nkofawi, mboi rwama imnis Guru Allah wawan ḇyedi; snar snonkaku osero ḇaḇeri fa ifrur aḇyair-aḇyair wafrur nane, rofyor Allah ifnoḇeki ḇa." 3 Yesus kyarem, doḇo: "Yakofen faro aw, kaku ḇeri rofyor snonkakuyo ḇyeḇeyaḇen kaḇer werḇa, ipok myam Allah Ḇaḇesasoser ḇyediḇa." 4 Nikodemus ikofen faroi, ḇo doḇo: "Rariso nari saḇen snon oso, rofyor ḇyemansar kwar? Inja, nari syun wer ro snari sneyuser ḇyena ma ḇyeḇeyaḇen werke?" 5 Yesus kyarem: "Kaku ḇeri yakofen faro au, rofyor snon oso ḇyeḇeyaḇen kuker war ma Rurya ḇa ipok daksun ro Allah Ḇaḇesasoser ḇyediḇa. 6 Rosai saḇen ro krafya, kraf rirya, ma rosai saḇen ro Rurya, Rur rirya. 7 Wakandor awer, snar yakofen faro aw: Nari mkoḇe ḇeyaḇen wer. 8 Wamya iso ḇemoḇ imarisen, ma wamnaf rakrokya, ḇape wafawi moḇ ryamuma royaḇa, roḇaido moḇ iḇe isoyoḇya ḇa. Rarirya kuker snonkaku ḇeyaḇen ro Allah Rur ḇyedi." 9 Nikodemus kyarem, ḇo doḇo: "Rariso nari roi ḇeḇesya ani ryarirya?" 10 Yesus kyarem, doḇo: "Aw guru ro Israel, insape woḇe wafawiḇa? 11 Kaku ḇeri yakofen faro aw, nkowawos ro roi inkofawi ma nkoḇe saksi ro roi nkomam, ḇape mkomewer ḇaḇesaksi nkoḇena. 12 Mkokyarḇa, rofyor yawawos kuker mko ro roi ḇero supswan ine, rariso nari mkokyar, rofyor yawawos kuker mko ro roi ḇero boiyaswa? 13 Snon oso ḇaḇeri ḇeyek kwar ḇe boiyaswa, mboi i ḇeyado kwar ro boiyaswa, isoine Rumkun Snonkakuya. 14 Ma imnis kuker Moses kyaf ikak kansai ro ai oso ro sup ḇeursḇa, rarirya kako Rumkun Snonkakuya nari skafi ro apropya, 15 insa snonkaku ḇekyar faroi sisma koreri ḇekain fyoroya. 16 Snar Allah saswar ḇyedi ibabos faro supswan ine, isof ḇyuk kwar Rumkun Mandos ḇyedi, insa snonkaku ḇekyar faroi sya sroḇa, mboi sisma koreri. 17 Snar Allah iwan Rumkun ḇyedi fa ḇyuk samamyai faro supswan ineḇa, mboi insa fyaspari. 18 Mansei ḇekyar faroi, nari sisma samamyaiḇa; ḇape mansei ḇekyarḇa, isya ro samamyaiya kwar, snar ikyar faro Allah Rumkun Mandos ḇyedi snonsnon ḇyediḇa. 19 Ma samamyaiya isoine: Isnaya ryafes kwar ḇe supswan ine, ḇape snonkakusya simarisen syadi pampanya ro isnaya, snar fararur sena naḇarḇor. 20 Snar mansei ḇefrur ḇarḇor, dayin isna ani ma rya faro isnai aniḇa, insa fararur ḇarḇor ḇyena nbayir awer; 21 ḇape mansei ḇefrur roi ḇenapes, rya faro isnaya, insa ḇyeḇefasna ḇayir, mboi rosai ifrur na namnis kuker Allah marisen ḇyedi." 22 Raimnai Yesus rya kuker manfamyan ḇyesi ḇe sup Yudea ma kyain rodiwa fnoḇeksi ma ḇyuk masi sren. 23 Ḇape Yohanes kako dakḇuk masi sren ro Ainon, fanam Salim, snar rodia war na nabor, ma snonkaku sibor sisrow ro dia fa ḇyuk masi sren farosi, 24 snar rofyor ani Yohanes ḇyeḇesun ro bui ḇaim. 25 Mboi rofafisu ani Yohanes manfamyan ḇyesi sfamfaḇri kuker snon Yahudi oso kuker mnuk fasasren. 26 Inja sra faro Yohanes ma sikofen faroi, ḇo soḇo: "Rabi, snon ḇefnoḇek kuker aw ro war Yordan ḇariwara ma faroi buk ḇaḇesaksi kwar, dakḇuk masi sren kako ma kawasa syakam sra faroi." 27 Yohanes kyarem, ḇo doḇo: "Snonkaku oso ḇaḇeri nari ḇeyun faro mankundi, rofyor neḇeḇuk faroi ro boiyaswaḇa. 28 Mankun mko mkoḇesaksi, mboi yakofen kwar: Aya ine Wairek ḇa, ḇape siwan aya fa yaponi. 29 Ḇena ḇinfakawinya, isoine manfakawinya; ḇape manfakawinya bati ḇyesi ḇeyores fanami ma ḇemnafi, siryaḇ fafayaḇa, snar simnaf mkaren ro manfakawin ani. Irya raryaḇ ayedi iba. 30 Ikada nari iba syadi, ḇape ayakada nari yabaḇa syadi. 31 Mansei ḇeraker boiyaswa isyadi ro nakam; mansei ḇeḇe knam ro supswan ine, i snonkaku ro supswan ine ma dawawos ro wos supswan. Mansei ḇeraker boiyaswa, ikada isyadi ro nakam. 32 Ḇyuk ḇaḇesaksi ro roi myam na ma roi imnaf na, ḇape snonkaku osero ḇaḇeri ikyar ḇaḇesaksi ḇyena. 33 Mansei ḇekyar ḇaḇesaksi ḇyena, ikada kyarem, mboi Allah inapes. 34 Snar mansei Allah iwan ani, iso ḇeḇaryas Allah wos ḇyedi, snar Allah ḇyuk Rur ḇyedi ḇesiper faroi. 35 Kmaya iswar Rumkunya ma ḇyuk roi ḇeḇor nakam faroi kwar. 36 Mansei ḇekyar faro Rumkunya, isma kankenem ḇekain fyoroya, ḇape mansei ḇeḇeuser Rumkunya ḇa, ipok isma koreriḇa, mboi Allah masasor ḇyedi kyuri ḇesya kwar."
1 Rofyor Manseren Yesus ifawi, snon Farisisya simnaf kwar, mboi Yesus isma ma ḇyuk masi sren faro manfamyan sibor syadi wer ro Yohanes -- 2 mboi Yesus mankundi ḇeḇuk masi sren yaḇa, mboi manfamyan ḇyesi, -- 3 Inja ibur Yudea ma kyaḇer ḇe Galilea. 4 Nari iḇe dunuk ro sup Samaria. 5 Ma ryama ro mnu oso ro Samaria, ḇenirḇe Sikhar fanam saprop ḇepon iwara Yakub ḇyuk faro romawa ḇyedi, Yusuf. 6 War ḇeyer Yakub isya rodia. Yesus imor kaku ro mararan ani, inja kyain ro war ḇeyer ani andiirya. Ras ani indokada oras samfur seser risuru. 7 Snar manfamyan ḇyesi sra kwar ḇe mnuya fa skoḇes roḇean. 8 Ḇarpurya bin Samaria oso ryama dukeḇ war. Yesus ikofen faroi: "Buk waroma yinem kada." 9 Ma bin Samaria ani ikofen faroi, ḇo doḇo: "Inja aw, snon Yahudi, ḇesyaḇo wor war ro aya, bin Samaria?" (snar kawasa Yahudi sikenemso Samariasya ḇa.) 10 Yesus kyarem faroi: "Rofyor wafawi Allah fakamama ḇyedi ma mansei ḇeyor faro aw: Buk waroma yinem! Nari wor kwar roi fa ḇyuk kwar faro aw war ḇekenemya." 11 Bin ani ikofen faroi, ḇo doḇo: "Manseren, wasma papos osoḇa ma war ḇeyer ine ikakibos; ro moḇ rosai wasma war ḇekenemya roya? 12 Inja waba syadi ro kma nkoḇedi Yakub, ḇeḇuk war ḇeyer ine maro nko ma mankundi dakinem roi kako, kuker romawa ḇyesi ma rofanfan ḇyesi?" 13 Yesus kyarem faroi: "Mansei ḇeyinem war ine, nari imbrow wer, 14 ḇape mansei ḇeyinem ro war nari yaḇuk faroi, ipok imbrow wer ḇa isof fyoro. Isyadi wer war nari yaḇuk faroi, nari ḇyewar ḇeryuḇer ro kankenem ḇyedi, ma isof kankenem ḇekain fyoroya." 15 Bin ani ikofen faroi, ḇo doḇo: "Manseren, bukma ḇe aya war ani, insa yambrow werḇa ma yarama yukeḇ war ro dine werḇa." 16 Yesus kyarem faroi: "Rwamura, wor swambri ḇo mukaḇer muma rodine." 17 Bin ani ikofen faroi ḇo doḇo: "Ayama yana swa osoḇa." Yesus ikofen faroi: "Wos bedi kyakubos beri, mboi wasma swayoḇa, 18 snar nwa swari rim kwar ma ḇeroyus aw ro baboine, ikada swabediryaḇa." 19 Bin ani ikofen faroi, ḇo doḇo: "Manseren, insape yafawi aw nabi oso. 20 Kpu nkoḇesi sisyom Allah ro bon ine bori, ḇape er besi sikofen ḇo soḇo, kosyom Allah monda ro Yerusalem." 21 Yesus ikofen faroi: "Bin awne wakyar faro aya, fafisuya nari ryama, mboi nari mkosyom Allah ro bon ineḇa, ma ro Yerusalemḇa kako. 22 Mkosyom rosai mkomam ḇaḇirḇa, nkokada nkosyom rosai nkomam ḇaḇir, snar korerya ryama ro er Yahudi. 23 Ḇape fafisuya nari ryama ma ryama kwar, mboi ḇesyom kuker napnapes nari siyom Kmaya kuker Rur ma napnapes; snar Kmaya imarisen samsyom ḇerarirya. 24 Allah Rur rirya ma mansei ḇesyomi nari, sisyomi kuker Rur ma napnapes." 25 Bin ani kyarem faroi, ḇo doḇo: "Yafawi, nari Wairek ryama, sniri kako ḇe Kristus; rofyor ryama kwar, nari ḇyaryas roi ḇeḇor nanekam maro nko." 26 Yesus ikofen faroi: "Aya iso wawos kukerya." 27 Rofyor ani manfamyan ḇyesi srama ma sikandor, mboi isya dawawos kuker bin oso. Ḇape oso rofandusi ifuken ḇaḇeri faro bin ani: "Rosai wamarisenya? Roḇaido: Ḇefuken Yesus, snaro wawawos kuker bin ani?" 28 Rarirya bin ani ibur babewu ḇyedi rodia ma ryaḇe mnu ma ikofen faro snonkaku ḇero mnuya ansi: 29 "Mkorama, mkakmam snonkaku oser isya ikofen ḇadir faro aya ro roi ḇeḇor yafrur kwar nakam. Imbude Kristus iryake?" 30 Inja snonkakusya sisasyarbur mnu ani fa sisrow Yesus. 31 Ro fafisu ani manfamyan ḇyesi sidifi, ḇo soḇo: "Guru, wanan." 32 Ḇape ikofen farosi: "Faro aya roḇean naisya mkomambaḇir naba." 33 Inja manfamyan ansi sawos yaye farosi: "Imbude snonkaku ono sun roḇean ono fa dan kwarke?" 34 Yesus ikofen farosi: "Roḇean ayena isoine yafrur marisen ḇewan ayanya ma yaḇeimnis fararur ḇyuk ḇe ayanya. 35 Mboi mkokofen ḇo mkoḇo: Paik rifiak wer fafisu afufyake? Ḇape yakofen faro mko: Mkomam kada yaf na nambrai kwar fa neḇeyuf. 36 Snonkaku ḇeyufsya sisma sasuref sedi kwar ma sfanjur bon faro kankenem ḇekain fyoroya, isof ḇekekef ma ḇeyufsya sikam simarisen. 37 Wos sarḇer ine kyaku isoine: Ono sḇuḇer mboi ono ḇese suf. 38 Yawan mko fa mkuf roi mkoker ḇa; snonkaku ḇese sesasewar mboi mkorama mkuf bon ro sasewar sena." 39 Ma kawasa Samaria sibor ro mnu ani sikyar kwar faroi snar bin ani wos ḇyena, ḇeḇesaksi: "Ikofen ḇadir faro aya roi ḇeḇor yafrur kwar nakam." 40 Fafisu snonkaku Samaria ansi srafa sisrow Yesus, sor faroi insa ryowus si; ma ryowus si rodia ḇe ras risuru. 41 Ma snonkaku sibor syadi wer ḇekyar snar wos ḇyena, 42 ma sikofen faro bin ani: "Nkokyar, snar wos ḇena wer ḇa mboi snar mankun inko, nkomnaf kwar roi ma nkofawi, mboi kaku ḇeri i ḇeḇuk koreri faro supswan ine." 43 Ma ras risuru susyonde ro Sikhar, Yesus ryaḇe Galilea, 44 snar Yesus mankundi myam kwar, mboi nabi oso sesyowi i ḇa ro mankundi mnu ḇyedi. 45 Ma rofyor ryama kwar ro Galilea, kawasa Galilea siwafi, snar smam roi ḇeḇor kam ifrur kwar ro Yerusalem ro munara ani, snar sikako sakso munara ani. 46 Inja Yesus kyaḇer wer ḇe Kana ro Galilea, ro moḇ ifrur warna fa neanggur ani. Ma ro Kapernaum manfyan wairek oso romawa ḇyedi iduf. 47 Fafisu imnaf, mboi Yesus ryama ker Yudea kwar ro Galilea, rya isrowi ma dor, insa ryama ma ḇyuk pararei faro romawa ḇyedi, snar romawa ḇyedi iduf marḇak. 48 Inja Yesus ikofen faroi: "Rofyor mkomam aḇyair kanandor ḇa, nari mkokyarḇa. 49 Manfyan warek ani ikofen faroi, ḇo doḇo: "Manseren, rwama rofyor romawa ayedi imar ḇaim kada." 50 Yesus ikofen faroi: "Rwamura, romawa bani ikenem!" Snon ani ikyar wos Yesus ikofen faroi ani, inja ryaḇeri. 51 Fafisu isya kaker ro nyanya faduri manfyan ḇyesi srama sisrowi ma sikofen faroi, mboi romawa ḇyedi iprei. 52 Ikofen farosi oras rifis romawa ani ipreiya. Skarem faroi, ḇo soḇo: "Mandoḇinja orkokya oras oser samsam ḇyedi imnai." 53 Rarirya sinan ani iswarepen, mboi rofafisu aniso Yesus ikofen faroi: "Romawa bani iprei." Rarirya i kuker kina ḇyesi sikyar faro Yesus. 54 Ine aḇyair kanandor ḇeḇesuru Yesus ifrur ro fafisu iburker Yudea ḇe Galilea.
1 Raimnai Yahudisya ras ḇeba sedi fyanam, inja Yesus dekḇe Yerusalem. 2 Ro Yerusalem fanam "Kedwai Ḇeba Domba" sawon oso isya, ro wos Ibrani sniriḇe Betesda; ḇye aḇdares ririm 3 ma ro abdares anna kawasa ḇeduf sibor kaku sḇarek ro na: isoine snonkaku ḇepraf, ḇeyapaper ma snonkaku ḇepapipen, ḇewaf sawon ani irḇaren. 4 Snar rofafisu ono Manseren malaikat ḇyedi dado ro sawon ani fa irḇaren war ani; ma mansei ḇesabu ḇepon ro war ani ro fafisu irḇaren kwarya, ikada iprei ro dafduf rosairya wer. 5 Rodia snon oso isya iduf ḇewampasi wambarek samfur rikior seser war kwar. 6 Rofyor Yesus myam snon ani ḇyarek rodia ma snar Yesus ifawi, mboi iduf fyoro kwar, inja Yesus ifuken faroi: "Wamarisen fa wapreike?" 7 Snon ḇeduf ani ikofen faroi, ḇo doḇo: "Manseren, yana snonkakuyo rodineḇa fa ḇesabu aya ḇe sawon ani rofyor warya irḇarenya, ma rofyor yara ḇe sawon ani, snonkaku ḇese sisabu ḇepon aya kwar." 8 Yesus ikofen faroi: "Wakḇoke, wakanow yar ḇena ma wambrane." 9 Ma rofafisu ani beri snon ani iprei inja ikanow yar ḇyena ma imbrane. Fafisu ani ras Mananai Yahudi rirya. 10 Inja snonkaku Yahudisya sikofen faro snon ḇeprei babo ani: "Ras ine ras Mananai Yahudi inja wapok ḇar yar benaḇa." 11 Ḇape kyarem farosi, ḇo doḇo: "Snonkaku ḇeḇuk pararei maro aya kwarya, iso ḇekofen maro aya: wakanow yar ḇena ḇo wambrane." 12 Sifuken faroi, ḇo soḇo: "Snon manseiso ḇekofen faro aw: Wakanow yar ḇena ma wambranya?" 13 Ḇape snon ḇeprei babo ani ifawi mansei ḇeḇesyan yaba, snar Yesus syun ro fadu snonkaku ḇeḇor ro mob ani. 14 Ḇarpurya Yesus isrowi ro Allah Rum ḇyedi dori inja ikofen faroi: "Waprei kwar; wafrur sasar wer awer, imbude roi ḇeḇyeḇa syadi nkur aw wer ri." 15 Snon ani isasyar ma fyar faro kawasa Yahudisya, mboi Yesus iso ḇeḇuk pararei faroi kwarya. 16 Ma eḇedari kawasa Yahudisya sesasewar fa siḇe sewayam Yesus, snar ifrur roi ḇeḇor anna ro ras Mananai Yahudi. 17 Ḇape ikofen farosi: "Mami ifararur isof ras ine, inja aya kako yakfararur." 18 Inja kawasa Yahudisya sesasewar syadi wer insa smuni, snar ifararur ro ras Mananai Yahudiya derer ḇa, ḇape snar dap Allah ḇe kma ḇyedi, rarirya dow mankundi fa imnis kuker Allah. 19 Inja Yesus kyarem farosi: "Kaku ḇeri yakofen faro mko, Rumkunya nari ifrur royo ro mankundi ḇa, ikada ifrur monda rosai myam ro Kmari ifrur na; snar rosai Kmaya ifrurna, naiso Rumkunya dakfrurna. 20 Snar Kmaya iswar Rumkunya inja fyasna faroi roi ḇeḇor kam ifrur ro mankundi, mboi nari fyasna faroi fararur-fararur ḇeba syadi wer ro fararur-fararur anna, isof mkokandor. 21 Snar imnis raris Kmaya ḇyawes snonkaku ḇemarsya ma ḇyuk fa sikenem, rarirya kako Rumkunya dakḇuk kankenem faro mansei imarisenya. 22 Kmaya ḇyemankara oso ḇaḇeri, mboi ḇyuk kwar ḇaḇemankara ani ḇesiper faro Rumkunya, 23 insa kawasa kam sesyowi Rumkunya imnis raris moḇ sesyowi faro Kmaya. Mansei ḇeḇesyowi Rumkunya ḇa, ikako ḇyesyowi Kma ḇewani yaḇa. 24 Yakofen faro mko: "Kaku ḇeri mansei ḇerower wos ayena ma ikyar faro ḇewan ayanya, isma kankenem ḇemnaiḇa ma dakso samamyaiya ḇa, snar ikfisbur marmarya kwar ḇe kankenemya. 25 Yakofen faro mko: Kaku ḇeri fafisuya nari isyama ma ryama kwar, mboi snonkaku ḇemarsya simnaf Allah Rumkun ḇyedi mkarenya, ma ḇemnafi sya, nari sikenem. 26 Snar imnis raris Mami isma kankenemya ro mankundi, rarirya ḇyuk faro Rumkunya fa daksma kankenemya ro mankundi kako. 27 Ma ḇyuk kwar papoik faroi fa ḇyuk mankara, snar i Rumkun Snonkaku rirya. 28 Mkokandor awer roi ḇeḇesya nane, snar fafisu ḇyedi nari ryama, mboi snonkaku ḇeḇor ḇero ureren na dona nari simnaf mkaren ḇyedi, 29 ma faro ḇefrur mnis sya nari siḇersi ro ureren na faro kankenem ḇekain fyoroya, ḇape faro ḇeḇarḇorsya nari siḇersi fa sisma samamyai." 30 "Mankundaya ḇardi yafrur royoḇa; yaḇe mankara imnis kuker rosai yamnaf na, ma ḇaḇemankara yena nanapes, snar yaso marisen ayena ḇa, mboi marisen ro Kma bewan ayanya. 31 Rofyor yaḇe saksi ro roi ḇekur mankundaya, rarirya ḇaḇesaksi yena nanapesḇa; 32 ono ḇese sisya sesaksi ro roi ḇekur aya ma yafawi ḇaḇesaksi ssḇuk fa ḇekur aya mboi nanapes. 33 Mkofarem wawansya kwar faro Yohanes ma ḇyesaksi kwar ro nanapes; 34 ḇape yaḇefandun ḇaḇesaksi ro snonkakuḇa, mboi yakofen roi ḇeḇesya ani, insa mkosma koreri. 35 Yohanes imnis paramrom ḇesak ma ḇesnai ma mkokada mkomarisen knik monda sasnai ḇyedi. 36 Ḇape ḇaḇesaksi ayedi iba syadi ro ḇaḇesaksi Yohanes, isoine fararur ḇeḇor Mami ḇyuk maḇe Aya, insa yafrur na. Fararur ani kako iso yafrur kwar ine, ma iso ḇefasnai aya, mboi Mami iso ḇewan Aya. 37 Mami ḇewan Aya, iso ḇeḇuk saksi ro Aya. Mkopok mkomnaf mkaren ḇyediḇa, moḇ isnai raya kako mkopok fa mkomami ḇa, 38 ma wos ḇyena mkadu na ro mkosnemna ḇa, snar mkokyar faro wawan ani ḇa isoine ayaḇa. 39 Mkokukeḇ Refo, snar mkokara mkoḇe, mboi kuker i nari mkosma kankenem ḇemnaiḇa, ḇape Refoya ḇyuk ḇaḇesaksi ro Aya, 40 rarirya mkomewer mkorama faro aya fa mkosma kankenem ani. 41 Yafandun ḇa kuker samsyom ro snonkaku. 42 Ḇape faro mko, yafawi mboi ro mkosnemna mkona saswar faro Allah ḇa. 43 Yarama kuker snonsnon ro Mami ḇape mkofandun ayaḇa; rofyor snonkaku ḇese srama kuker snonsnon sena, nari mkomarisen si. 44 Nari mkokyar rariso, ne, mko ḇesewar sanandik ro snonkaku ḇese ma ḇesewar syom ḇerama ker Allah oser bakenya ḇa? 45 Mkokara awer nari yaḇuk sof mko ro ḇarpon Mami; ḇeḇuksof faro mkoya iso Moses, mkokyar ani. 46 Snar rofyor mkokyar faro Moses, rarirya nari mkokyar faro Aya, snar roi fyasna nkur Aya. 47 Ḇape rofyor mkokyar roi fyasna ḇa rariso nari mkokyar rosai yakofen na?"
1 Raimnai Yesus imbran ḇe danosen Galilea ḇar iwara, isoine danosen Tiberias. 2 Kawasa ḇeḇor semarani ḇo sisoi, snar smam aḇyair-aḇyair kanandor ḇeḇuk parare, ifrur faro snonkaku ḇedufsi. 3 Ma Yesus dek urek oso ma kyain rodia kuker manfamyan ḇyesi. 4 Ma Paskah, ras ḇeba kawasa Yahudi, fyanam kwar. 5 Fafisu Yesus myam yaryari, myam snonkaku sibor semarani ḇo srama yoḇi, inja ikofen faro Filipus: "Romoḇ rosai nari kokoḇes mamami roya, insa kawasa sine san?" 6 Yesus ikofen rarirya snar imarisen imnasen Filipus, snar mankundi ifawi kwar, rosai nari ifrurya. 7 Filipus kyaren ḇo doḇo: "Mamami ḇeḇemaeja kumpan sarak utin risuru kakoyo, nari namnis farosi ḇa." 8 Snon oso ro manfamyan ḇyesi, isoine Andreas, Simon Petrus naek ḇyedi, ikofen faroi, ḇo doḇo: 9 "Rodine romawa oso isya, nya mamami ririm ma in risuru; ḇape ndarirya ḇo nari namnis snonkaku ḇeḇor sine?" 10 Yesus ikofen: "Mkowansi fa skain." Ro moḇ ani aḇris sibor, inja snonkaku ansi skain, barbor sedi indokada snon syaran ririm. 11 Raimnai Yesus dun mamami anna, ma ikofen kasumasa faro Allah. Posa kwar ḇyerarwas na farosi, rarirya kako in ansuya, ma san rao isof sisyopen. 12 Ma rofyor sarbor kwar ikofen faro manfamyan ḇyesi: "Mkoryur mamami kerker ḇesyadi na, insa sisawen awer na." 13 Inja siryur inoken samfur seser risuru nafo kuker roḇean ḇesyadi ro mamami ririm snonkaku ḇeḇor ansi san na. 14 Fafisu snonkaku ansi smam aḇyair kanandor ifrur kwar ani, sikofen ḇo soḇo: "Kaku ḇeri inekada nabi nari ḇerama ḇe supswan ine." 15 Snar Yesus ifawi, siḇe srama fa sidifi insa ḇye wairek farosi. Inja isusu bursi ḇe urek. 16 Ma fafisu fyanam roḇ kwar, Yesus manfamyan ḇyesi sraḇe danosen, ma sek ro wai 17 ma sunuk ḇe Kapernaum. Fafisu pyampan kwar Yesus ryama ḇaim kaker fa isrowsi, 18 mboi sorenya ikroḇ snar wamya ipok. 19 Skoḇores indokada kilometer risuru kior kwar, skomam Yesus imbran ro warya bori muma fanam wai ani. Inja skomkak kaku. 20 Ḇape ikofen farosi: "Aya irya, mkomkak awer!" 21 Simarisen fa dek ro waiya, ma rofafisu ani beri kako wai ani ifyafer ro moḇ skorayoḇya. 22 Ro meserdi kawasa ḇeḇor ḇekain ro danosenya ḇar iwara ansi, sifawi insanja wai oser monda rodia ma Yesus iso manfamyan ḇyesi ḇa, ḇoi serer siso ḇesyoḇsya. 23 Ḇape rofafisu ani wai ono ndama ker Tiberias napyar fanam moḇ san mamami ro ani, posa ro Yesus ikofen kasumasa kuker roḇean anna. 24 Fafisu kawasa ḇeḇor ansi smam, mboi Yesus isya ro diaḇa ma manfamyan ḇyesi kako roḇa, sek ro wai anyaḇo sisyoḇ ḇe Kapernaum fa ssewar Yesus. 25 Fafisu kawasa ḇeḇor ansi sisrow Yesus ro danosenya ḇar iwara, sikofen faroi, ḇo soḇo: "Rabi, fafisu rosai rwama ro dineya?" 26 Yesus kyarem farosi: "Kaku ḇeri yakofen faro mko, mkosewar aya, snar mkomam aḇyair kanandor yafrur naba ḇoi snar mkan mamami rao mkosyopen. 27 Mkofararur, faro roḇean nari ḇero na awer, mboi faro roḇean ḇekain fyoro faro kenkenem ḇemnai ḇaya kada, nari Rumkun Snonkaku ḇyuk faro mko; snar iso Mami ḇyeasas kwar, isoine Allah." 28 Raimnai sikofen faroi, ḇo soḇo: "Rosaiso nari nkofrurya, insa nkofrur Allah roi imarisen na?" 29 Yesus kyarem farosi: "Allah fararur imarisenya, isoine iḇye syadi mkokyar faro Allah wawan iwan kwarya." 30 Inja sikofen faroi, ḇo soḇo: "Aḇyair rosai wafrurya, insa nkomami ma nkokyar faro au? Fararur rosai nari wafrurya? 31 Kpu nkoḇesi san manna kwar ro sup ḇeḇeursḇa, imnis fasfas oso isya ro Refo: ssḇuk farosi fa san mamami ḇeraker boiyaswa." 32 Inja Yesus ikofen farosi: "Kaku ḇeri yakofen faro mko, Moses i ḇeḇuk mamami faro mko ro boiyaswa yaḇa, mboi Kma yedi ḇeḇuk faro mko mamami ḇekaku ro boiyaswa. 33 Snar mamami ḇeraker Allah irya mamami ḇesabu ro boiyaswa ma ḇeḇuk kankenem faro supswan." 34 Inja sikofen faroi, ḇo soḇo: "Manseren, buk maḇe nko ḇesya kwar mamami ani." 35 Yesus ikofen farosi: "Aya ine mamami ḇeḇuk kankenem; mansei ḇerama faro aya, nari ipok ibiser werḇa, ma mansei ḇekyar faro aya, ipok imbruw werḇa. 36 Ḇape yakofen faro mko kwar: Kaku ḇeri mkomam aya kwar, ḇape mkokyar ḇa. 37 Roi ḇeḇor kam Mami ḇyuk faro aya, nakam nari ndama faro aya, ma mansei nari ḇerama faro aya, nari yasaweni ḇa. 38 Snar ayai ḇesabu kwar ro boiyaswa, insa yafrur marisen ayena ḇa, ḇape yaḇeuser Allah marisen ḇyena ḇewan aya kwar. 39 Ma Allah ḇewan aya marisen ḇyedi, isoine insa snonkaku ḇeḇor kam ḇyuk faro aya kwar ono sro awer, ḇape insa yaḇawes si wer ro ras ḇepupesya. 40 Snar Mami marisen ḇyedi ryadine, isoine insa snonkaku oser-oser ḇemam Rumkunya, ma ḇekyar faroi, sisma kankenem ḇekain fyoro, ma insa yaḇawes si ro ras ḇepupesya." 41 Inja kawasa Yahudisya suremi snar ikofen kwar: "Aya ine mamami ḇesabu ro boiyaswa." 42 Sikofen, ḇo soḇo: "Mboi inenido Yesus iryake, Yusuf mandaḇendi, snar kma ma sna ḇyesu kofawi su? Rariso ikofen, ḇo doḇo: Aya ine yasabu ker boiyaswa?" 43 Yesus kyarem farosi: "Mkurem awer." 44 Snonkaku oso ḇaḇeri nari ryama faro aya, rofyor Mami ḇewan aya duni maro aya, ma nari yaḇawesi ro ras papupesya. 45 Fasfas isya ro syap nabi-nabi ḇerok radine: Ma sikam nari Allah fyarkorsi. Ma snonkaku oser-oser ḇemnaf kwar, ma ḇemarisen farkarkor ro Mami, srama faro aya. 46 Fasfas ani ikofen ḇa mboi ono sisya smam Mami. Demir i ḇerama ro Allah, iso ḇemam kwar Kmari. 47 Yakofen faro mko: Kaku ḇeri mansei ḇekyarya, isma kankenem ḇekain fyoroya. 48 Aya ine kada mamami ḇeḇuk kankenemya. 49 Kpu mkoḇesi san kwar manna ro sup ḇeursḇa ma simar kwar. 50 Ine mamami ḇesabu ro boiyaswa: Mansei ḇeyan mamami ine ido, ikada nari imar ḇa. 51 Aya ine mamami ḇekenem ḇesabu kwar ro boiyaswa. Rofyor oso dan ro mamami ine ido, ikada ikenem fyoro-fyoro ma mamami yaḇuk ani irya kraf ayedi, yaḇuk faro kankenem supswan." 52 Kawasa Yahudi sfamfaḇri rofandu mankunsi ma sikofen: "Rariso nari ḇyuk kraf ḇyedi fa ḇyeroḇean fa kani?" 53 Inja Yesus ikofen farosi: "Kaku ḇeri yakofen faro mko rofyor mkan kraf Rumkun Snonkakuya ḇa ma mkinem rik ḇyedi ḇa, nari mkosma kankenemya ro mankun mko ḇa. 54 Mansei ḇeyan kraf ayedi ma ḇeyinem rik ayedi, ikada isma kankenem ḇekain fyoro ma nari yaḇuk fa diḇri ro awar ḇepupesya. 55 Snar kraf ayedi irya roḇean ḇekaku ma rik ayedi aninem ḇekaku. 56 Mansei ḇeyan kraf ayedi ma ḇeyinem ro rik ayadi kada ḇyeoser kuker aya ma yaḇe oser kukeri. 57 Imnis raris Mami ḇekenem ḇewan aya ma yakenem snar Mami, rarirya kako mansei ḇeyan aya, nari ikenem snar aya. 58 Ine kada mamami ḇesabu kwar ro boiyaswa, mamami ḇemnis kuker mamami kpu mkoḇesi san raimnai simar kwar aniḇa. Mansei ḇeyan mamami ine ikada isma kankenem fyoro-fyoroya." 59 Roi ḇeḇor nanekam Yesus ikofen na ro Kapernaum rofyor ḇyuk farkarkor ro Rum nadi. 60 Rofyor simnaf wos anna kam sibor ro manfamyan Yesus ḇyesi sikofen, ḇo soḇo: "Wos nane npakrek, mansei nari ḇekḇaḇ ḇemnaf naya?" 61 Yesus ifawi, mboi manfamyan ḇyesi sisurem snar wos anna, ikofen farosi: "Inja wos anna neḇirḇar kakyar mkoḇena? 62 Ma rariso rofyor mkomam Rumkun Snonkakuya dekḇe moḇ randakya isya roya? 63 Rurya iso ḇeḇuk kankenem, krafya ḇyefainda oso ḇaḇeri. Wos yawos faro mko nane irya Rur ma kankenem. 64 Ḇape rofandu mko ono sisya sikyarḇa." Snar Yesus ifawi ro randakya, mansei ḇekyarḇa ma mansei nari ḇeḇoḇiya. 65 Raimnai ikofen: "Eḇedari yakofen faro mko: Snonkaku oseroḇaḇeri nari ryama faro aya ido, Mami nari ḇyuk na faroi ḇa." 66 Randak ro ras ani manfamyan ḇyesi sisusu buri ma sisoi werḇa. 67 Inja Yesus ikofen faro manfamyan samfur seser risuru ḇyesi: "Inja mko kako mkomarisen mkobur ayake?" 68 Simon Petrus kyarem faroi, ḇo doḇo: "Manseren, faro mansei nari nkobur faroya? Manseren wos ḇena nbuk kankenem ḇekain fyoro; 69 ma nkokyar kwar ma nkofawi au Manseren wawan ḇesren ro Allah." 70 Yesus kyarem farosi: "Mboi aya iso ḇekinfir mko snon samfur seser risuru ine? Mboi oso rofandu mko ḇyeibiris." 71 Ikofen fa kyurya isoine Yudas, Simon Iskariot mandaḇendi; snar iso nari ḇeḇoḇ Yesus, oso ro fandu manfamyan samfur seser risuru ansi.
1 Raimnai Yesus imbran yaryar Galilea, snar imewer kyain faswef ro Yudea, snar kawasa Yahudi sesewar fa siḇe smuni. 2 Fafisu ani ras munara kawasa Yahudi, isoine ras munara Soyai Undam fyanam kwar. 3 Rarirya Yesus naek ḇyesi sikofen faroi, ḇo soḇo: "Mkombran rodine ma mkora ḇe Yudea, insa manfamyan-manfamyan besi sakmam fararur wafrur na. 4 Snar snonkaku oso ḇaḇeri iyokef rosai ifrur na rofyor imarisen ḇye snonsnon ro ḇarpon kawasa. Rofyor wafrur roi ḇerarirya, fasnai mankundaw faro supswan ine." 5 Snar naek ma srar ḇyesi kako sakkyari ḇa. 6 Inja Yesus kyarem farosi: "Fafisu ayedi ryama ḇaim, ḇape faro mko fafisu na naisya ḇesya kwar. 7 Supswan ipok dayin mkoḇa, ḇape aya kada dayin aya, snar yakofen ḇesya kwar faro supswan ine roi ifrur na nḇarḇor. 8 Mkoramura ḇemunara ani. Aya kada yakra ḇaim, snar fafisu ayedi imnis ḇaim." 9 Rarirya wos ḇyena farosi, ma ikada kyain ro Galilea. 10 Ḇape rofyor naek srar ḇyesi sra kwar ḇe munara ani, insape ikako dakra, ḇape kuker kankunes. 11 Kawasa Yahudi ssasewar i ro munara ani ma sikofen, ḇo soḇo: "Isya ro?" 12 Ma kawasa sibor sawos fasasis roi. Ono sikofen, ḇo soḇo: "I, snon ḇeḇye rirya." Ono wer sikofen, ḇo soḇo: "Roḇa, fyarkor ninyan kawasa ḇeḇor." 13 Ḇape snonkaku oso ḇaḇeri ḇemku fa ḇeyawos fababa roi snar simkak kawasa Yahudisya. 14 Fafisu munara ani ḇyedodo, Yesus syun ro Allah Rum byedi ma ḇyuk farkarkor. 15 Inja kawasa Yahudisya sikandor ma sikofen, ḇo soḇo: "Rariso, snon ine daksun farkarkorḇa ḇesyaḇo isma fawawi ḇeradine!" 16 Yesus kyarem farosi: "Farkarkor yaḇuk nane neknam ro mankundaya ḇa, ḇape neknam ro Allah ḇewan aya kwarya. 17 Mansei ḇemarisen ḇefrur Allah marisen ḇyedi, nari ifawi farkarkor ayena ndamuma ro Allah, roḇaido yawawos ro mankundaya ḇardi. 18 Mansei ḇeyawawos ro mankundi ḇardi, syewar sanandik faro mankundi, ḇape mansei ḇesewar syom faro Allah ḇewaniya, ikada inapes ma dankar ḇa. 19 Moses iso ḇeḇuk sasoser Refo Yahudi faro mkoke? Ḇape oso ḇaḇeri rofandu mko ifrur sasoser anna. Snaro mkosewar fa mkomun aya?" 20 Snonkaku ḇeḇor ansi skarem, ḇo soḇo: "Setansya siswoḇer aw; mansei ḇeḇesewar fa ḇemun awya?" 21 Yesus kyarem farosi: "Fararur oser monda iso yafrur ro ras Mananai Yahudi ma mkokam mkokandor. 22 Inja: Moses ḇyuk fa insa mkofrur sofakfuk ḇape sofakfuk ani ḇyeknam ro Moses ḇa ḇoi ḇyeknam ro up mkoḇesi --mkomarisen sofakfuk ro ras Mananai Yahudi! 23 Rofyor snon oso isma sofakfuk ro ras Mananai Yahudi, insa seyuk awer Moses sasoser ḇyena, snaro mkomsor aya, snar yaḇuk pararei faro baken ḇesiper ro snonkaku oso ro ras Mananai Yahudi. 24 Mkoḇe mankara awer imnis rosai ḇeḇair, ḇape mkoḇe mankara kuker napnapes." 25 Snon Yerusalem ono sikofen, ḇo soḇo: "Snonkaku ine iso simarisen smunya? 26 Ma mkomam kada, dawawos kuker fababa ma sipok sawos roi oso faroi ḇa. Imbude manfarkin koḇesi sifawi kaku kwar, mboi i Wairek ḇeḇuk koreri? 27 Ḇape snon inekada kofawi moḇsai ryamuma roya, ḇape rofyor Wairek ḇeḇuk koreri ryama, snon osero ḇaḇeri ifawi moḇsai ryamuma roya." 28 Rofyor Yesus ḇyuk farkarkor ro Allah Rum ḇyedi, dor naba: "Mboi ayakada mkomambaḇir ma mko fawi moḇ yaramuma roya; ḇape yarama ro mankundaya marisen ayediḇa, ḇape aya ine yaser wawan ro ḇenapesya ikada mkomamḇaḇiri ḇa. 29 Ayakada yamambaḇiri, snar yaramuma roi ma iso ḇewan aya." 30 Sesewar fa sfor Yesus, ḇape snonkaku osero ḇaḇeri fa iserepen i, snar fafisu ḇyedi ryama ḇaim. 31 Ḇape rofandu kawasa ḇeḇor ansi ono sibor sikyar faroi ma sikofen, ḇo soḇo: "Rofyor Kristus ryama, nari ifrur aḇyair kanandor nabor syadi ro snonkaku ine ifrurnake?" 32 Snon Farisi simnaf snonkaku ḇeḇor ansi roi sfararum fa ḇekur Yesus, inja mananir imam-imam ma snon Farisi siwan fa ḇewaren Allah Rum ḇyedi sfor Yesus. 33 Inja Yesus ikofen: "Fafisu kermkun monda aya isya kuker mko ma ḇarpurya nari yakaḇer faro ḇewan ayanya. 34 Nari mkosewar aya, ḇape nari mkosrow ayaḇa, snar nari mkopok mkoramuma ro moḇ ayaisya royaḇa." 35 Snon Yahudi ansi sikofen yae farosi, ḇo soḇo: "Moḇ rosai iḇe ryaḇeya, isof kopok kosrowi ḇa? Imbude iḇe ryaḇe moḇ kawasa Yahudi ḇekon imnis ambersya rofandu kawasa Yunanisya fa ḇyuk farkar farosike? 36 Rosaiso kyara ḇesya ro wos iwos nane: Nari mkosewar aya, ḇape nari mkosrow ayaḇa, ma: mkopok mkora faro moḇ rosai aya isya royaḇa?" 37 Ma ro ras ḇepupes ro munara ani ḇyedodo Yesus dores ro Allah Rum ḇyedi ma dor naba: "Mansei ḇembrowya, iḇye ryama faro aya ma dinem! 38 Mansei ḇekyar faro aya, imnis raris Refo moḇ ikofen raya: Rosne ḇyedi nari war ḇeryuḇerya idaf fa ḇyuk kankenem." 39 Roi kyaraya isoine ḇekyar faroisya nari sisma Rur ḇesrenya; snar rurya ryama ḇaim, snar Yesus isma payamyum ḇaim ro marmar ḇyedi. 40 Snonkaku ono rofandu kawasa ḇeḇor ansi, ḇemnaf wos anna, sikofen ḇo soḇo: "Snon ine nabi rirya." 41 Ono wer sikofen, ḇo soḇo: "Ineido Wairek." Ḇape ono wer sikofen, ḇo soḇo: "Roḇa, Wairekya ryama ro Galilea ḇa! 42 Snar Refoya ikofen, mboi Wairek ḇyeḇarpur ro Daud ma ro mnu Betlehem, moḇ Daud kyon ḇepon roya." 43 Inja rofandu kawasa ḇeḇor ansi sfamfaḇri snar Yesus. 44 Snonkaku ono rofandusi simarisen sfori, ḇape snonkaku oso ḇaḇeri iserepeni. 45 Inja manwarwaren-manwarwaren ansi sra faro mananir imam-imam ma snon Farisi ansi sikofen farosi, ḇo soḇo: "Snaro mkuni ḇa?" 46 Manwarwaren-manwarwaren ansi skarem, ḇo soḇo: "Snonkaku oso ḇaim dawos imnis snon ani!" 47 Snon Farisi ansi skarem farosi, ḇo soḇo: "Inja ḇyeninyan mko kwarke? 48 Inja snon ono fandu manfarkin-manfarkin ma Farisisya sakyar faroike? 49 Ḇape kawasa ḇeḇor sine ḇeyakfawi Refo Yahudiḇa, frasya kyursi!" 50 Nikodemus, snon oso ro si, ḇerama yoḇ Yesus kwar ani ikofen farosi, ḇo doḇo: 51 "Inja sasoser Refo Yahudi koḇedi ḇyuk samamyai faro snonkaku ḇesasar oso, rofafisu ḇyeḇemnaf ma ḇyeḇekukeḇ ḇaim?" 52 Skarem, ḇo soḇo: "Inja aw kako snon Galileake? Kwukeḇ Refo ma nari wafawi mboi nabi oso isya ryama ro Galilea ḇa." 53 Raimnai sibur ḇerum sena,
1 ḇape Yesus ryaḇe urek Zaitun. 2 Meserdi arwo prim kaku Yesus isya wer ro Allah Rum ḇyedi, ma kawasa ḇeḇor ansi kam srama yoḇi. Kyain ma ḇyuk farkarkor farosi. 3 Mboi ḇefawinananem Refo Yahudi ma snon Farisi sun faro Yesus bin oso sisrow ḇefrur farbuk. Siwan bin ani fa dores rofadu, 4 raimnai sikofen faro Yesus, ḇo soḇo: "Guru, bin ine nkosrow ro fafisu isya ifrur farbuk. 5 Ro sasoser Refo Yahudi Moses doḇo bin ḇeradine sḇeḇeso kuker karui isof simar. Rosai wakkara ro mnuk ine?" 6 Sikofen rarirya fa sifrowes biri, insa sisma roi oso fa ssḇuk sofi. Ḇape Yesus kyankunem ma fyas kuker ḇrampin ḇyesi ro sapropya. 7 Ma snar sifuken yayayu ḇesya kwar, inja ikḇawes ma dores, raimnai ikofen farosi: "Mansei rofandu mko ḇeyaksasar ḇa, iḇye syadi iso ḇeso ḇepon karui faro bin ine." 8 Raimnai kyankunem wer ma fyas ro sapropya. 9 Ḇape rofyor simnaf wos ani, sibur ḇesisye kam, randak ro ḇeḇesinansya. Papupesya Yesus derer dores kuker bin ani, ḇeyores faswef ro moḇ ḇyedi. 10 Raimnai Yesus iyori ma ikofen faro bin ani: "Kawasa ansi sraiso? Snonkaku oso isyaḇake fa ḇyuk samamyai faro aw?" 11 Kyarem, ḇo doḇo: "Oroḇa, Manseren." Raimnai Yesus ikofen: "Aya kako yaḇuk samamyai faro awḇa. Wabur ma randak ro knikine wafrur sasar wer awer." 12 Inja Yesus ikofen faro kawasa ḇeḇor ansi: "Aya ine isnai supswan ine; mansei ḇeso aya, ikada nari imbrain ro pampan ḇa, mboi nari isma isnai ḇekenemya." 13 Kawasa Farisi sikofen faroi, ḇo soḇo: "Mankundaw buk ḇaḇesaksi ḇekur aw, inja ḇaḇesaksi bedi kyakuḇa." 14 Yesus kyarem farosi: "Yaḇuk ḇaḇesaksi ḇekur mankundayano, mboi ḇaḇesaksi ayena nkaku, snar yafawi, moḇ yarama roya ma moḇ yarayoḇya. Ḇape mkokada mkofawiḇa, moḇsai yaramuma roya ma moḇsai yarayoḇya. 15 Mkokada mkoḇuk samamyai imnis warnkyara snonkaku, ayakada yaḇuk samamyai faro snonkaku osero ḇaḇeri, 16 ma rofyor yaḇuk samamyai mboi samamyai yaḇuk na nkaku, snar yerer ro mankundaya ḇa, mboi yafnoḇek kuker Kma yedi ḇewan ayanya. 17 Ma ro Refo Yahudi mkoḇedi fasfas isya, mboi ḇaḇesaksi ro snonkaku risuru irya kyaku. 18 Aya ine yaḇuk ḇaḇesaksi ḇekur mankundaya ḇardi, ma Mami, ḇewan ayanya, dakḇuk ḇaḇesaksi ḇekur aya." 19 Ma sikofen faroi, ḇo soḇo: "Kma bedi isyaro?" Yesus kyarem: "Iḇye aya, ma Kma yedi mkomambaḇir nuḇa. Rofyor mkomambaḇir ayakada, mkomambaḇir Mami kako." 20 Wos nane Yesus ikofen na fanam burua pipi rofyor ḇyuk farkarkor ro Allah Rum ḇyedi. Ma snonkaku oso fyoriḇa snar fafisu ḇyedi ryama ḇaim. 21 Raimnai Yesus ikofen wer faro snonkaku ḇeḇor ansi: "Nari yara ma nari mkosewar aya, ḇape nari mkomar snar sasar mkoḇena. Moḇ yara ḇeya nari mkorama ro iba." 22 Inja kawasa Yahudi ansi sikofen, ḇo soḇo: "Inja iḇe myun mankundike eḇedari ikofen, ḇo doḇo: Ḇemoḇ yaraḇeya, mkopok mkora faroi ḇa?" 23 Raimnai ikofen farosi: "Mkoine mkoḇe knam ro supswan ine, ayakada yarama ro boiyaswa; mkokada mkoraker supswan ine, aya yaraker supswan ineḇa. 24 Eḇedari insanja yakofen faro mko, mboi nari mkomar snar sasar mkoḇena; rofyor mkokyarḇa, mboi aya irya nari mkomar rodo sasar mkoḇena." 25 Inja sikofen faroi, ḇo soḇo: "Manseiso aw?" Yesus kyarem farosi: "Fainda rosai yawawos kuker mko kaker? 26 Nabor kaku roi yamarisen yawos ma yaḇemankara fa ḇekur mko; ḇape i ḇewan aya, ikada inapes ma rosai yarower roi, naiso yakofen faro supswan ine." 27 Sifawiḇa, mboi dawawos farosi ro Kmari. 28 Inja Yesus ikofen: "Rofyor mkoyer nakaki Rumkun Snonkaku kwar, insape mkofawi mboi aya ine Aya Isya, ma rarirya yafrur roi oso ro mankundaya ḇardiḇa, ḇape yawawos monda, imnis raris Mami fyarkor maro aya. 29 Ma i ḇewan aya kwar, ifnoḇek aya. Ipok ryir ayaḇa, snar yafrur ḇesya kwar rosai ḇefrur i marisen na." 30 Yesus ikofen roi anna kam kwar, snonkaku sibor sikyar faroi. 31 Rarirya ikofen faro kawasa Yahudi ḇekyar faroisya: "Kaku ḇeri rofyor mkokin nako wos ayena, rarirya mkoḇe manfamyan kaku ḇe aya 32 ma nari mkofawi napnapesya ma napnapesya nari ḇyuk ḇaḇemkei faro mko." 33 Skarem ḇo soḇo: "Nkoine nkoḇe ḇarpur ro Abraham ma nkoḇe manfyan ḇaim faro manseiryawer. Rosai wakofen, ḇo woḇo: "Nari mkosma ḇaḇemkei?" 34 Yesus ikofen farosi: "Kaku ḇeri snonkaku ḇefrur sasarsya, nari semanfyan faro sasarya. 35 Ma manfyan oso kyain faswef ro rumya doriḇa, ḇape romawaya kada kyain faswef ro rumya dori. 36 Inja rofyor Rumkunya ḇyuk ḇaḇemkei faro mko, kaku ḇeri nari mkoḇe mkei." 37 "Yafawi, mboi mkoḇe ḇarpur ro Abraham, ḇape mkosewar fa mkomun aya snar mkomewer mkoso farkarkor ayenari. 38 Rosai yamam ro Mami, naiso yakofen na ma rarirya kako mkofrur rosai mkomnaf ro kma mkoḇesi." 39 Skarem faroi, ḇo soḇo: "Kma nkoḇedi isoine Abraham." Yesus ikofen farosi: "Rofyor mkokofen kaku mko romawa Abraham, rarirya ido nari mkofrur fararur Abraham ifrur na. 40 Ḇape roi mkofrur na isoine mkoḇesewar fa mko mun aya, aya ine, snonkaku ḇekofen napnapes faro mko, isoine napnapes yamnaf ro Allah; fararur ḇerarirya Abraham dakfrur naba. 41 Mboi kma mkoḇesi roi sifrur naiso mkakfrur na." Skarem, ḇo soḇo: "Nkoine romawa soneiḇa. Kma nkoḇedi isoine Allah." 42 Yesus ikofen farosi: "Rofyor Kma mkoḇedi Allah, nari mkoswar aya, snar yarama ro Allah. Ma yarama kuker marisen ro mankundayaḇa, mboi iso ḇewan ayanya. 43 Rosai ḇeḇewar fa mkofawi roi yakofen naba? Snar mkosambraḇ fa mkomnaf farkarkor ayenaḇa. 44 Kma mkoḇedi Ibirisya inja mko marisen mkoso marisen ḇyena. Ro randakya Ibirisya myamun, ikada iso napnapes yaḇa, snar napnapesya isya roiḇa. Rofyor ḇyeankar, ima kaku snar rari ḇyedi moḇ ryairi, snar ḇyeankarkar ma ḇye kma ro ankarkar na kam. 45 Ḇape snar yawos ro napnapesya, faro mko snaro mkokyar ayaḇa. 46 Mansei rofandu mko ḇeḇuk fasasna mboi yafrur sasar? Rofyor yawos ro napnapesya, snaro mkokyar ayaḇa? 47 Mansei ḇeḇeknam ro Allah ikada, imnaf Allah wos ḇyena; snar mkoḇe knam ro Allah ḇa, eḇedari mkomewer mkomnafi." 48 Kawasa Yahudi skarem faro Yesus, ḇo soḇo: "Kaku ḇake rofyor nkokofen mboi aw snon Samaria ma rur ḇemaḇakya iswoḇer aw?" 49 Yesus kyarem farosi: "Rur ḇemaḇakya iswoḇer ayaḇa, ḇape yaḇe syowi Mami yedi ma mkokada mkoḇe syowi ayaḇa. 50 Ḇape yasewar syowi faro ayaḇa: Oser isya ḇesewar syowiya ma ikako ḇye mankara. 51 Yakofen faro mko: Kaku ḇeri mansei ḇeḇeuser wos ayena, ima nari daksma marmariḇa isof fyoro-fyoro." 52 Yahudisya sikofen faroi wer, soḇo: "Insape nkofawi, rur ḇemaḇakya iswoḇer aw. Snar Abraham imar kwar ma rarirya kako nabi-nabisya, ḇesyaḇo woḇo: mansei ḇeḇeuser wos ayena, ima nari daksma marmariḇa isof fyoro-fyoro. 53 Inja waba syadike ro kma nkoḇedi Abraham, ḇemar kwarya! Nabi-nabisya kako simar kwar; kuker mansei bukmnis aw?" 54 Yesus kyarem: "Rofyor yasandik mankundaya, rarirya ido sanandik ayedi ḇyemaeja kermkuno ḇaḇeri. Kma ayedi ḇeḇuk sanandik ḇe aya, iso mkofen ḇo mkoḇo: Ikada Allah nkoḇedi, 55 ḇesyaḇo mkomambaḇiri ḇa, ḇape ayakada yamambaḇiri. Ma rofyor yakofen: Yamambaḇiri ḇa, rarirya aya ine manankarkar, imnis raris mko, ḇape yafawi i ma yaḇeuser wos ḇyena. 56 Abraham kma mkoḇedi iryaḇ kaku mboi nari myam ras ayedi ma myami kwar ma iryaḇ kaku." 57 Inja kawasa Yahudi ansi sikofen faroi, ḇo soḇo: "Umur bedi ḇyewampasi wambarek samfur ririm ḇaim ḇesyaḇo wamam Abraham kwarke?" 58 Yesus ikofen farosi: "Yakofen faro mko, kaku ḇeri Abraham ḇyeḇeaḇen ḇaim, aya isya kwar." 59 Raimnai sun karui fa siḇe ssḇuk soi; ḇape Yesus smamiḇa ma ibur Allah Rum ḇyedi.
1 Rofyor Yesus imbranuk, myam snon ḇepraf oso ro fafisu ḇyeḇeaḇenya. 2 Manfamyan ḇyesi sifuken faroi, ḇo soḇo: "Guru, snaro snon ine ipraf rofyor ḇyeḇeaḇenya, snar mankundi sasar ḇyena roḇa ido snari ma kmari sasar suḇenake?" 3 Yesus kyarem: "Snon ine sasar ḇyenaḇa ma sinan ḇyesuyaḇa kako, ḇape snar fararur-fararur Allah nari neḇefasna roi. 4 Nari kofrur ḇewan ayanya fararur ḇyena rofyor isnaya isya kaker; mboi roḇya ryama, snonkaku oso ipok ifararur werḇa. 5 Fyor aya isya ro supswan ine, aya ine isna supswan ine." 6 Rofyor ikofen wos nane kam kwar, ininef ḇe sapropya, ma irḇaren aninef ḇyena ro sapropya, raimnai ipyos na ro snon ḇepraf ani mkamor ḇyesuya 7 ma ikofen faroi: "Rwamura, ban mkamsu ro sawon Siloam." Siloam isoine: "Manwawan". Inja snon ani rya ḇyan mkamor ḇyesuya, raimnai kyaḇer muma ma myam kwar. 8 Ḇape min ḇyesi ma ḇese ḇefawi i ḇefararyor ani, inja soḇo: "Inja snon ḇefararyor ani iso ineke?" 9 Ono ḇese sikofen, ḇo soḇo: "Kaku, irya ḇaḇoi." Ono ḇese wer sikofen, ḇo soḇo: "Isyaḇa ḇoi, imnisbos kakui." Snon ani mankundi ikofen, ḇo doḇo: "Kaku aya irya." 10 Sikofen faroi, ḇo soḇo: "Rariso mkamsu suḇas wer?" 11 Kyarem, ḇo doḇo: "Snonkaku ḇenirḇe Yesus irḇaren saprop na ma ḇyuki isfu mkamor ayesuya ma ikofen maro aya: 'Rwamura ma ban mkamor besuya ro sawon Siloam. Inja yara, ma rofyor yaḇan mkamor ayesuya, ma yamam beri.' " 12 Raimnai sikofen faroi, ḇo soḇo: "Snon ani isyaro?" Kyarem farosi, ḇo doḇo: "Yafawiḇa." 13 Raimnai ssun snon ḇepraf ani faro kawasa Farisisya. 14 Ras Yesus irḇaren sapropya ma aninef fa ḇyuki isfu snon ani mkamor ḇyesuya, irya ras Mananai Yahudi rirya. 15 Eḇedari kawasa Farisi ansi sifuken faroi, rariso mkamor besuya suḇas wer. Kyarem, ḇo doḇo: "Isfu saprop irḇaren kwar ro mkamor ayesuya, raimnai yaḇan mkamor ayesuya ma insape yamam." 16 Ma ono ro Farisi ansi sikofen, ḇo soḇo: "Snon ine ḇyeknam ro Allah ḇa, snar ḇyefandun ras Mananai Yahudiya ḇa." Ono kada sobo: "Rariso snon ḇesasar oso ipok ifrur aḇyair kanandor radine?" Rarirya sfamfaḇri ro fandusi. 17 Raimnai sikofen wer faro snon ḇepraf ani, ḇo soḇo: "Mboi awne ido, rosai wakofen roi, snar ifrur mkamor ḇesuya fa mam kwar?" Kyarem farosi, ḇo doḇo: "Inido nabi rirya." 18 Ḇape kawasa Yahudi ansi sikyarḇa, snon ani insandi ipraf ma myam wer, isof sor sinan ḇyesuya 19 ma sifuken su, ḇo soḇo: "Romawa muḇedisine, iso mukofen, ḇo muyoḇo, ipraf ro ḇyeḇeaḇenya? Rariryaido, rariso knikine myam wer?" 20 Sinan ansu sukarem, ḇo suyoḇo: "Roi nufawiya isoine, mboi i romawa nuḇedirya ma fafisu ḇyeḇeaḇenya ipraf. 21 Ḇape rariso knikine myam werya, nufawiḇa, ma mansei ḇeḇas mkamor ḇyesuya, nufawiḇa kako. Mkofuken ro mankundi, snar ḇyesnonkbor kwar, ifawi kyarem ro mankundi." 22 Sinan ḇyansu suwos rarirya snar sumkak kawasa Yahudisya, snar kawasa Yahudisya sna sne oser kwar, mboi snonkaku mansei ḇekaremi ḇe Wairek, nari spampumi. 23 Eḇedari sinan ḇyesu sukofen, ḇo suyoḇo: "Ḇyesnonkbor kwar, inja mkofuken faro mankundi." 24 Raimnai sorḇe oser wer snon insanja ḇepraf ani ma sikofen faroi: "Wawos kuker napnapes ro ḇarpon Allah; nkofawi mboi snon ani snon ḇesasar." 25 Kyarem farosi, ḇo doḇo: "Snon ani snon ḇesasar rirya, yafawiḇa; ḇape roi oser yafawiya, mboi isoine insandi yapraf ma knikine yamam wer." 26 Sikofen faroi, ḇo soḇo: "Rosai ifrur faro aw? Rariso ḇyuk mkamor besuya fa suḇas wer?" 27 Kyarem farosi, ḇo doḇo: "Yakofen faro mko kwar, ma mkomnafḇa; snaro mkomarisen mko mnaf wer? Imbude mkomarisen mkakḇe manfamyan faroi kako?" 28 Rarirya skoryaei ḇo sikofen faroi: "Awkada ḇe manfamyan faro snon ani mboi nkokada manfamyan ro Moses. 29 Nkofawi, mboi Allah iwawos faro Moses, ḇape faroi nkofawiḇa moḇsai ryama roya." 30 Snon ani kyarem farosi, ḇo doḇo: "Kokandor kaku snar mkofawi moḇ ryamuma royaḇa, ḇape ḇyas mkamor ayesuya kwar fa yamam wer. 31 Kofawi, mboi Allah imnaf snonkaku ḇesasarsya ḇa, mboi snonkaku ḇesren ma ḇeḇeuser marisen ḇyedi. 32 Ro ḇepon isof babo ine komnaf ḇaḇeri, mboi snonkaku oso isya ḇyas mkamor snonkaku ḇepraf ro fafisu ḇyeḇeaḇenya ḇaim. 33 Rofyor snonkaku ani ryamuma ro Allah ḇa, ipok ifrur royoḇa." 34 Skarem faroi, ḇo soḇo: "Aw ine beḇeaḇen ro sasar ḇesyaḇo woḇe farkor nko?" Raimnai siyawi ḇe ḇondibur rum nadi. 35 Yesus imnaf mboi siyawi kwar ḇeḇondi. Ḇarpurya isrowi ma ikofen: "Wakyar faro Rumkun Snonkakuyake?" 36 Kyarem ḇo doḇo: "Manseren manseirya? Insa yakyar faroi." 37 Yesus ikofen faroi: "Aw mami mondaḇa; ḇape iso ḇeyawawos faro aw ine!" 38 Ikofen ḇo doḇo: "Manseren yakyar!" Raimnai ḇyan suba ro ḇarpon ḇyedi. 39 Yesus ikofen: "Yarama ḇe supswan ine insa yaḇe mankara, insa mansei ḇemamba smame, ma mansei ḇemamsya siprafe." 40 Wos anna Farisi ono sakmnaf na, inja sikofen faroi, ḇo soḇo: "Inja woḇe nkokako nkoprafke?" 41 Yesus ikofen farosi: "Mboi mkopraf kada, mkoḇe sasarḇa, ḇape snar mkoḇo: Nko kada nkomam, rarirya sasar mkoḇena naisya faswef."
1 "Yakofen faro mko: Kaku ḇeri mansei ḇesun ro kedwai padwar dombayaḇa, ma dek ro ayaryaido, ḇekaraw ma ḇefasyar rirya; 2 ḇape mansei ḇesun ro kedwaiya, ikada manfarandows domba rirya. 3 Faroi ḇewarenya ḇyas kedwai padwarya ma dombasya simnaf mkaren ḇyedi ma dor domba ḇyesi oser-oser kuker snonsnon sena ma fyarkin sifa sisasyar. 4 Rofyor domba ḇyesi kam dunsi ḇe ḇondi kwar, pyonsi ma domba-domba ansi sisoi, snar simnaf ḇaḇir mkaren ḇyedi. 5 Simewer siso snonkaku ḇesesyandi, ḇape sifrar sibursi, snar simnaf ḇaḇir mkaren ḇyediḇa." 6 Yesus ikofen sarḇer ani farosi, ḇape sifawi rosai ikofen ḇesyanya ḇa. 7 Ma Yesus ikofen wer: "Kaku ḇeri yakofen faro mko, aya ine kedwai ḇe domba-dombasya. 8 Snonkaku ḇerama ḇepon ro aya, sikada mankaraw ma manfasyar, ma domba-domba ansi simnaf siḇa. 9 Aya ine kedwai; mansei ḇesun ḇeyunuk ro aya, nari isma aski ma ikada nari syun syae ma isma maper aḇris. 10 Mankarawya ryama fa kyaraw ma myamun ma kyakok monda; ḇape yarama insa snonkakusya sisma kankenem fyoroya. 11 Aya ine manfarandows ḇeḇye. Manfarandows ḇeḇye ḇyuk kankenem ḇyedi faro domba-domba ḇyesi; 12 mboi snonkaku besma sasuref manfarandows risyaḇa, ma snar domba-domba ḇyesisya ḇa, rofyor myam naf supya ryama, ifrar ibur domba-domba ansi, isof naf sup ani doper ma fyasasye domba-domba ansi. 13 Ibur snar snon ḇesma sasuref rirya ma fyandun domba-domba ansiḇa. 14 Aya ine manfarandows ḇeḇye ma yamamḇaḇir domba-domba ayesi ma domba-domba ayesi simnaf ḇaḇir aya 15 imnis raris Mami ifawi aya ma ayano yafawi Mami, ma yaḇuk kankenem ayedi faro domba-domba ayesi. 16 Yasma domba-domba ono ḇese kako fa sisya, ḇeyaksun ro padwar ine ḇa; domba ansi nari yunsi kako ma nari simnaf mkaren ayedi ma sikam senai oser kuker manfarandows oser. 17 Mami iswar aya, snar yaḇuk kwar kankenem ayedi faro yasma kaḇeri wer. 18 Snonkaku oso ḇaḇeri duni bur ayaḇa, mboi yaḇuki raris mankundaya marisen ayedi. Yasma papoik fa yaḇuki ma papoik fa yun kaberi kako. Inekada fararur yasma ro Kma yedi." 19 Rarirya kawasa Yahudi ansi sfamfaḇri ro mankunsi snar wos anna. Sibor rofandusi soḇo: 20 "Rur ḇemaḇakya iswoḇeri ma syawo; snaro mkoroweri?" 21 Ḇesesya soḇo: "Snonkaku rur ḇemaḇakya iswoḇersya sawos rariryaḇa; rur ḇemaḇaksya nari sifrur fa ḇeprafsya smame?" 22 Fyoroḇa Ras Saḇseḇen Allah Rum byedi ro Yerusalem; fafisu ani supya ipnunek. 23 Ma Yesus imbran ro Allah Rum byedi ro sim Salomo. 24 Inja kawasa Yahudi sores yari ma sikofen ḇo soḇo: "Fyor rosai ryakaker wafrur fa nkokenem kuker ḇirḇar? Rofyor Wairek isawido, wakofen maḇe inko." 25 Yesus kyarem farosi: "Yakofen faro mko kwar, ḇape mko kyarḇa; fararur-fararur yafrur kuker Mami snonsnon ḇyedi, naiso ḇefasna ḇadir ro aya, 26 ḇape mko kyarḇa, snar mkaksun ro domba-domba ayesi ḇa. 27 Domba-domba ayesi simnaf mkaren ayedi ma ayano yafawisi ma siso aya, 28 ma yaḇuk kankenem ḇekain fyoro farosi ma sikada nari sroḇa fyoro-fyoro ma snonkaku osoḇaḇeri nari pyosersi ro ḇramin ayedi. 29 Mami, ḇeḇuksi maro aya, iba syadi ro mansei ryawer, ma snonkaku oso ḇaḇeri pyosersi ro Mami ḇramin ḇyesuya. 30 Aya ma Mami nuḇe oser." 31 Kawasa Yahudi ssun karui fa siḇe sḇukso Yesus wer. 32 Yesus ikofen farosi: "Mkomam yafrur fararur ḇeḇye nabor kwar, Mami ḇyuk maro aya; ro fararur ḇeḇor anna, fararur rosai ḇefnai fa mkoḇe mkoso aya kuker karui?" 33 Yahudi ansi skarem faroi, ḇo soḇo: "Snar fararur ḇeḇye oso eḇedari nkoḇe nkoso aw kuker karuiyaḇa, mboi snar wonef Allah, ma snar aw snonkaku monda, ḇesyaḇo woḇo wamnis kuker Allah." 34 Yesus ikofen farosi: "Ro Refo Yahudi mkoḇedi fasfas oso isyaḇake doḇo: Yakofen kwar: Mkoine Allahke? 35 Kofawi mboi rosai ḇefas ro Refo, isya rofyoro. Rofyor Allah ḇyuk aror "Allah" faro snonkaku ḇena wos ḇyedisya, 36 snaro mko kofen yonef Allah, snar yakofen aya ine Allah Rumkun ḇyedi? Mboi Mami kyinfir aya ma iwan ayaḇe supswan ine. 37 Rofyor yafrur fararur-fararur Mami ḇyenaḇa, mkokyar awer aya, 38 ḇape rofyor yafrur na ma mkomewer mkokyar aya, mkokyar fararur-fararur anna, insa mkofawi mkomambir ma mkofawi mboi Mami ḇye oser kuker aya ma ayano yeḇe oser kuker Mami." 39 Ḇerarwan oser wer ssewar fa sfori, ḇape ikfis ro siḇrasna. 40 Ḇarpurya Yesus ryaḇe war Yordan ḇariwara, ḇemoḇ ḇepon Yohanes ḇyuk masasi ro ani, ma kyain ro dia. 41 Ma kawasa sibor srama faroi ma sikofen, ḇo soḇo: "Yohanes kada dakfrur aḇyair kanandor osoḇa, ḇape wos ḇeḇor ikofen nakam ḇekur snon ine nkaku kam." 42 Ma kawasa ḇeḇor ro dia sikyar faro Yesus.
1 Snon oso snonsnon ḇyedi Lazarus isya ro dafduf. Kyain ro Betania fnoḇek srar ḇyesuya Maria ma ḇedar ḇyedi Marta. 2 Maria ine bin ḇerem Manseren wemin ḇyesuya kwar kuker mani ḇespum ma ḇepyos wemin ansu kuker snonḇuryam ḇyena. 3 Ma Lazarus ḇeduf ani Maria srar ḇyedirya. Bin ansuya suyankinem faro Yesus, ḇo suyoḇo: "Manseren, snonkaku waswar ani iduf." 4 Fafisu Yesus imnaf ankinem anna, ikofen: "Dafduf ani nari dunḇe marmarḇa, ḇape nari fyasna Allah baba ḇyena, snar kuker dafduf ani Allah Rumkun ḇyedi nari isma baba kako." 5 Mboi Yesus iswar kaku Marta, Maria ma Lazarus. 6 Yesus imnaf kwar Lazarus iduf, ḇesyaḇo kyain ras risuru wer ro moḇsai isya roya; 7 ḇape ḇarpurya ikofen faro manfamyan ḇyesi: "Mko rama kokaḇer wer ḇe Yudea." 8 Manfamyan ḇyesi sikofen faroi, ḇo soḇo: "Rabi, babo ine kawasa Yahudi sesewar fa sso aw, ḇesyaḇo wamarisen kaker fa kwaḇer ḇe diwara?" 9 Yesus kyarem farosi: "Mkofawi ḇake oras samfur seser risuru ro ras oser? Mansei ḇembran ro meserya wemin ḇyesu sukarkarḇa, snar myam isna supswan ine. 10 Ḇape rofyor snon oso imbran ro roḇ, wemin ḇyesu sukarkar, snar isnaya isya roiḇa." 11 Raimnai Yesus ikofen wer farosi: "Lazarus, naek koḇani denef kwar, ḇape yara fa yaḇani ro anenef ḇyedi." 12 Irya manfamyan ḇyesi sikofen faroi, ḇo soḇo: "Manseren, rofyor denef, nari ikḇok ro mankundi." 13 Yesus dawos ro Lazarus marmar ḇyedi, ḇape skara ḇo soḇo: Yesus ikofen ro anenef monda. 14 Eḇedari Yesus ikofenbos farosi: "Lazarus imar kwar; 15 ḇape kasumasa snar aya isya rofafisu aniḇa, rarirya iḇye syadi faro mko, insa mkosma farkarkor kakyar. Knikine mkorama koramura faroi." 16 Inja Tomas sapḇe Didimus, ikofen faro min ḇyesi, isoine manfamyan ḇesesya, ḇo doḇo: "Mkorama kosoi, insa kakmar fnoḇeki." 17 Ma rofyor Yesus rya kwar ro Betania, isma Lazarus sikriri ras rifiak kwar. 18 Betania kyain fanam Yerusalem, indokada swafya mil risuru. 19 Rodia kawasa Yahudi sibor srama kwar faro Marta ma Maria fa ssḇuk sneprei faro su snar srar suḇedi marmar ḇyedi. 20 Ma fafisu Marta imnaf mboi Yesus ryama, inja rya fa isrowi. Ḇape Maria kyain ro rum. 21 Mboi Marta ikofen faro Yesus, ḇo doḇo: "Manseren rofyor awsya ro dinekada, srar ayedi nari imar ḇa. 22 Ḇape knikine kako yafawi mboi Allah nari ḇyuk faro aw roi ḇeḇor wor faroi na." 23 Yesus ikofen faro Marta: "Srar bani nari diḇeri." 24 Marta ikofen faro Yesus, ḇo doḇo: "Yafawi mboi nari diḇri rofyor ḇemarsya siḇersi ro ras fawarya." 25 Yesus kyarem faroi: "Aya ine aḇiḇer ma kankenem; mansei ḇekyar faro aya, imar kwaro nari ikenem wer, 26 ma snonkaku ḇemar ma ḇekyar faro aya nari simar ḇa isof fyoro-fyoro. Wakyar roi ḇeḇesne ani?" 27 Marta kyarem, ḇo doḇo: "O Manseren, yakyar mboi aw Wairek Allah Rumkun ḇyedi, awso nari ḇerama ḇe supswan ine." 28 Ma ikofen rarirya kwar raposa, rya dor ḇeba ḇyedi Maria ma fyararum faroi, ḇo doḇo: "Guru isya rodiwa ma dor aw." 29 Maria imnaf rarirya iyori fasau fa isrow Yesus. 30 Ḇape rofyor ani Yesus syun ro mnu ani ḇaim. Isya kaker ro moḇ Marta isrowi ro ani. 31 Fafisu kawasa Yahudi ḇefnoḇek Maria ro rumsya fa ḇeḇuk sneprei faroi, smam mboi Maria iyori fasau ma ryaḇe ḇondi, inja sisoi, snar skara soḇo mboi ryaḇe rus fa kyanes ro diwa. 32 Maria rya kwar ro moḇ Yesus isya ro ani ma isrow Yesus, ma kyain wepur ro ḇarpon ḇyedi ma ikofen faroi, ḇo doḇo: "Manseren, rofyor awsya ro dinekada, srar ayedi nari imarḇa." 33 Fafisu Yesus myam Maria kyanes ma kawasa Yahudi ḇerama ḇefnoḇekisya kako sakkanes, inja Yesus sneri isosi ma ikofen: 34 "Moḇ saiso mko kriri roya?" Skarem, ḇo soḇo: "Manseren, rwamura fa wakmam!" 35 Fyor ani Yesus kyanes. 36 Kawasa Yahudisya sikofen, ḇo soḇo: "Mkomam kada, iswarbos faroi!" 37 Ḇape snonkaku ono fandusi, soḇo: "I ḇeḇuk mamam faro ḇeprafsi, ipok ḇake fa ifrur isof snon ine imarḇa?" 38 Yesus iswarsi wer, inja ryaḇe rus ani. Rus ani aḇyaḇ rirya, ma sisiseni kuker karui. 39 Yesus ikofen farosi: "Mkokris karui ine!" Lazarus ḇemar ani srar ḇyedi Marta ikofen faro Yesus, ḇo doḇo: "Manseren, ras rifiak kwar ro rusya, inja nari isnarem." 40 Yesus kyarem: "Yakofen ḇeaw; rofyor wakyar nari wakmam Allah papoik ḇyena!" 41 Inja sikris karui ani raimnai Yesus myam ḇebo ma ikofen: "Mami, yakofen kasumasa faro aw, snar wamnaf aya kwar. 42 Yafawi wamnaf aya ḇesya kwar, ḇape snar snonkaku ḇeyores yar aya rodine, yakofen na insa sikyar, mboi Mami ḇewan aya kwarya." 43 Ma ikofen rarirya kwar, ma dor naba: "Lazarus, wasasyar!" 44 Snonkaku ḇemar ani isasyar ro rus ani, wemin ma ḇramin ḇyesuya neḇeparek kuker kruḇen ḇeruren ma mkamor ḇyesuya suḇe ḇekawef kuker marḇun. Yesus ikofen farosi: "Mkoper kruḇen anna insa imbran ḇe mkei." 45 Kawasa ḇeḇor ḇerama ḇeḇuk sneprei faro Maria ansi smam rosai Yesus ifrur na inja sikam sikyar Yesus. 46 Ḇape onokada sra faro snon Farisisya ma sfarfyar farosi ro rosai Yesus ifrur kwar na. 47 Inja mananir imam-imam ma snon Farisi sor Kankain Karkara Agama fa siryur ma sikofen, ḇo soḇo: "Rosai nari kofrurya? Snar snon ani ifrur aḇyair kanandor nabor. 48 Rofyor komam mondai, nari kawasa kam sikyar faroi, ma kawasa Roma nari srama ma skakok Allah Rum ḇyedi ma er koḇansine ḇesiper." 49 Ḇape oso rofandusi isoine Kayafas, imam ḇeba ro wampasi wambarek ani, ikofen farosi, ḇo doḇo: "Mkofawi royoḇa, 50 ma mkokara ḇake, mboi iḇye syadi faro mko, rofyor snonkaku oser imar fadwer er ḇesiper koḇedi, ro er ḇesiper koḇedi ryoe." 51 Kayafas ikofen rarirya ro mankundi ḇa, ḇape snar ḇye imam ro wampasi wambarek ani, inja ḇyardi mboi Yesus nari imar sadwer er ansi, 52 ma faro er Yahudi sererḇa, ḇape insa fyanjur Allah romawa ḇyesi ḇekakek sya fa seoser kako. 53 Randak ro ras ani sḇesneoser fa smun Yesus. 54 Snar rarirya Yesus imbran fababa wer ḇa ro ḇarpon kawasa Yahudi imbran rodia ḇe sup mnuk ḇefanam sup ḇeḇeursḇa, ḇe mnu oso snonsnon ḇyedi Efraim, ma kyain fnoḇek manfamyan ḇyesi rodia. 55 Rofafisu ani ras ḇeba munara Paskah Yahudi sedi fyanam kwar ma kawasa ḇeḇor ro mnu ani sraḇe Yerusalem insa sfasren mankunsi ḇepon ro munara Paskah ani. 56 Ssewar Yesus ma sores ro Allah Rum ḇyedi dori, sikofen yae farosi, ḇo soḇo: "Rariso kakara mkoḇena? Nari ryama kako ḇe munara ineke?" 57 Rofafisu ani mananir imam-imam ma snon Farisi ssḇuk sasoser kwar insa snonkaku mansei ḇefawi Yesus ro moḇsai isya, sikofen ḇadir insa sfori.
1 Ras riwonem ḇepon ro Paskahya Yesus ryama ro Betania, ro moḇsai Yesus ḇyuk aḇiḇer faro Lazarus fandu ḇemarsya ro ani. 2 Rodia sfasos roḇean faro Yesus, ḇeyanan fnoḇek Yesus sya oso snonsnon ḇyedi Lazarus, Marta ḇeyuf farmyan si. 3 Ma Maria dun mani ḇespum ḇekakur kaku, kati mun ono fa ḇyuki ryem Yesus wemin ḇyesuya ma ipyos su kuker snonburyam ḇyena; ma rum ani ḇesiper isnarem apan ḇemani spum. 4 Ḇape Yudas Iskariot snon oso fandu Yesus manfamyan ḇyesi, nari ḇeḇoḇ fasawi, ikofen ḇo doḇo: 5 "Snaro mani ḇespum ine ḇyeḇeḇoḇ ḇa kuker maeja kumpan sarak utin rikior ma pipisya seḇeḇerwas faro ḇesaḇararsya?" 6 Wos ikofen ine, ikofen rarirya snar iswar kawasa ḇesaḇarar syaḇa mboi snar i snon ḇekaraw-raw rirya; snar ikada dun ḇesya kwar pipi ḇekram ro rosaser dufya. 7 Inja Yesus ikofen: "Mkomam monda bin ine ifrur rarirya fa ḇyeswarapepen ro ras kardir ayedi. 8 Snar snonkaku ḇesaḇararsya sisya ro fandu mko ḇesya kwar, ḇape ayama roḇa." 9 Kawasa Yahudi sibor simnaf, mboi Yesus isya ro Betania ma srama snar Yesus mondaḇa, mboi srama insa sakmam kako Lazarus ḇesma aḇiḇer kwar rofandu snonkaku ḇemarsya. 10 Raimnai mananir imam-imam sna awi fa smun Lazarus kako, 11 snar kukeri kawasa Yahudi sibor sibursi ma sikyar faro Yesus. 12 Meserdi fafisu snonkaku ḇeḇor ḇerama ḇeyakso munara simnaf, mboi Yesus isya ro nyanya faduri fa ryama ḇe Yerusalem, 13 sun yar ram ono, ma sra sisrowi kuker bararas, ḇo soḇo: "Hosana! (Wakenem!) Ḇerama kuker snonsnon Manseren isma ḇok, Wairek Israel!" 14 Yesus isma keledai kuḇ oso raimnai dekroi, imnis fasfas ro Refo: 15 "Mkomkak awer inai infun Sion, mkomame Wairek mkoḇedi ryama, dek keledai mkun oso!" 16 Randakya Yesus manfamyan ḇyesi sifawi roi ḇeḇesya ineḇa, ḇape rofyor Yesus isma baba ḇyedi, si swarepen mboi mnuk ani kyuri, ma sifrur rarirya faroi. 17 Snonkaku ḇeḇor ḇefnoḇek i ro fafisu dor Lazarus fa isasyar ro rus ma ḇeḇuk aḇiḇer faroi rofandu ḇemarsya si ḇeḇesaksi ro Yesus. 18 Eḇedari snonkaku ḇeḇor ansi sra sisrowi, snar simnaf, mboi i ḇefrur aḇyair kanandor ani. 19 Inja snon Farisi ansi sikofen yae faro mankunsi, ḇo soḇo: "Kopok kofrur royoḇa mboi mkomam kada, supswan ḇesiper siwayan kam fa sisoi." 20 Rofandu snonkaku ḇeyakḇe nadisya ro ras munara ani, snon Yunani ono sisya. 21 Snonkaku ansi sra faro Filipus, ḇeḇeknam ro Betsaida ro Galilea, ma sikofen faroi, ḇo soḇo: "Naeko mkomarisen ido nkomarisen nkosrow Yesus." 22 Filipus rya ikofen ḇadir faro Andreas; Andreas ma Filipus sukofen ḇadir wer faro Yesus. 23 Ḇape Yesus kyarem faro su: "Fafisu Rumkun Snonkaku isma babaya ryama kwar. 24 Yakofen faro mko: Rofyor fas morya isapi ro sapropya ma imarḇa ido, nari ḇyemor oser faswef monda; ḇape rofyor imar nari ḇyuk bon nabor. 25 Mansei ḇeswar kankenem ḇyedi, nari kankenem ḇyedi ryoburi, mboi mansei ḇeswar kankenem ḇyediḇa ro supswan ine nari fyadurui faro kankenem ḇekain fyoroya. 26 Mansei ḇeyuf farmyan aya, nari iso aya ma moḇsai aya isya roya, rodia kako ḇeyuf farmyan ayasya sisya. Mansei ḇeyuf farmyan aya nari Mami ḇyesyowi i. 27 Knikine sneri fyafardun ma rosai yaḇe yakofenya? Inja nari yor ro Mami fa fyaspar aya ro fafisu ine? Ḇape insa yasma kandera ine eḇedari yarama kwar ine. 28 Mami snombri isma baba!" Rarirya simnaf mkaren ro boiyaswa: "Yaḇuk baba faroi kwar, ma nari yaḇuk baba faroi wer!" 29 Snonkaku ḇeḇor ḇeyores ro moḇ ani ma ḇerower sikofen, mboi ine rakrok karadu. Ono wer sikofen: "Malaikat oso iso ḇeyawawos kuker i kwar." 30 Yesus kyarem: "Mkaren ani ḇyeḇerower kwar snar ayaḇa, mboi snar mko. 31 Knikine samamyai imbran ro supswan ine: knikine kako papoik supswan ine ḇyeḇesawen ḇe ḇondi; 32 ma aya, rofyor mkoyer nakaki aya ro supswan ine, nari yun snonkaku syakam fa srayoḇ aya." 33 Ikofen radine fa fyasna moḇsai nari imar raya. 34 Raimnai snonkaku ḇeḇor ansi skarem: "Nkomnaf ro sasoser Refo Yahudi mboi Wairek ikenem faswef fyoro-fyoro; inja rariso wakofen Rumkun Snonkaku nari siyer nakaki i? Mansei Rumkun Snonkakuya?" 35 Yesus ikofen farosi: "Fafisu kermkun monda wer isna isya fandu mko, fafisu rosai isnaya isya ro mko, mkokyar faroi, insa papoik pampanya ikawef awer mko; mansei ḇembran ro pampanya dori, ifawi moḇ iḇe ryayoḇyaḇa. 36 Mkokyar faro isnaya, rofyor isnaya isya faro mko, insa mkoḇe romawa-romawa isna." Yesus ikofen rarirya kwar, rya dofbursi. 37 Ma Yesus ifrur aḇyair kanandor nabor kako kwar, ḇape sikyar faroi ḇa, 38 insa nabi Yesaya wos ikofenya imnis: "Manseren, mansei ḇekyar faro ḇaryas nkoḇena? Ma faro mansei Manseren papoik bedi ḇyeḇefasna farosya?" 39 Eḇedari sikyarḇa, snar Yesaya ikofen kako kwar: 40 "Yafrur mkamor sena fa napraf, Yafrur sisnesna fa nedip; insa mkamor sena nmam awer, kakara sena nafawi awer. Insa skaḇer awer faro aya, fa yaḇuk parare farosi." 41 Yesaya ikofen rarirya snar myam Yesus baba ḇyedi kwar ma iwawos roi kwar. 42 Rariryano manfarkinsya sibor kaku sikyar faroi, ḇape snar snon Farisi simewer skarem i rofababa, insa spampum awer si ro rum ari. 43 Snar simarisen syadi faro sanandik snonkaku ro ḇaḇesyowi Allah. 44 Ḇape Yesus iyiw ḇo ikofen: "Mansei ḇekyar faro aya, ikyar faro Allah ḇewan aya kwarya; 45 ma mansei ḇemam aya, myam kako Allah ḇewan aya kwarya. 46 Yarama ḇe supswan ine kwar imnis isna, insa snonkaku ḇekyar aya sya, skain awer ro pampanya. 47 Ma rofyor oso ryower wos ayena, ḇape ifrur naba, yaḇe mankara faroi ḇa, snar yarama yeḇe mankara supswan ineḇa, mboi yaḇuk koreri. 48 Mansei ḇemewer aya, ma ḇemnaf wos ayenaḇa sya, mankaraya isya kwar farosi, isoine wos yakofen kwar na, naiso nari ḇeḇemankara farosi ro awar ḇepupesya. 49 Snar yawawos ro mankundayaḇa ḇape Mami ḇewan ayanya, iso ḇeḇuk sasoser faro aya insa yakofen rosai nari yakofen na ma yaḇuk mufa. 50 Ma yafawi, mboi sasoser ḇyena irya kankenem ḇekain fyoro. Inja rosai yakofenya, yaḇuk na raris Mami ikofen maro aya kwar."
1 Ras oser wer munara Paskahya ḇyeḇefrur, Yesus ifawi kwar, mboi fafisu ḇyedi ryama kwar fa ibur supswan ine faro kmari. Imnis raris iswar manfamyan ḇyesi rarirya baboine iswarsi isof papupesya. 2 Rofyor sisya sanan kam, ma Ibiris fyararum kwar ro Yudas Iskariot, Simon mandaḇendi sne ḇyedi ro nyan rosai nari ḇyuki ḇyoḇ Yesus. 3 Yesus ifawi, mboi Kmari ḇyuk roi ḇeḇor nakam faroi kwar ma ifawi ryama ker Allah ma nari kyaḇer faro Allah. 4 Raimnai Yesus iyori ma pyer syatu ḇyedi. Dun marḇun oso ma fyesi ro sifer ḇyedi, 5 raimnai iwek war ro sayer oso, ma ḇyuki ḇyan manfamyan ḇyesi wemin sena ma ḇyunek kuker marḇun ḇefes ro sifer ḇyedi ani. 6 Rofyor ryama faro Simon Petrus, Petrus ikofen faroi, ḇo doḇo: "Manseren, inja waḇe ban wemin ayesuya?" 7 Yesus ikofen faroi: "Rosai yafrur ro knikineya wafawi ḇaim, ḇape ras ḇarpurya nari wafawi." 8 Petrus ikofen faroi, ḇo doḇo: "Roḇa Manseren, wapok ban wemin ayesuyaḇa." Yesus kyarem faroi: "Rofyor yaḇan wemin besuyaḇa, nari wasma rarwas kuker ayaḇa." 9 Simon Petrus ikofen faroi, ḇo doḇo: "Manseren rarirya ido, ban wemin ayesuya monda ḇa, mboi ḇramin ma ḇukor ayedi kako!" 10 Yesus ikofen faroi: "Mansei ḇemasi kwar, ipok imasi wer ḇa, mboi koḇan wemin ḇyesya, snar isren kwar. Mko kako mkosren kwar mboi mkosren kam ba." 11 Snar ifawi kwar, nari mansei ḇeḇoḇiya. Eḇedari ikofen: "Mkosren kwar ḇape mkosren kam baim." 12 Ḇyan wemin sena kwar, syansun sansun ḇyena wer raimnai kyain. Raimnai ikofen farosi: "Mkofawi kwarke rosai yafrur faro mkoya? 13 Mkap ayaḇe Guru ma Manseren ma kaku ro wos mkoḇena, snar kaku aya ine Guru ma Manseren. 14 Inja rofyor yaḇe Manseren ma Guru mkoḇedi ḇape yaḇan wemin mkoḇena, rarirya mko kako mkakḇan yae wemin mkoḇena. 15 Snar yaḇuk nyan oso kwar faro mko, insa mko kako mkakfrur raris moḇ rosai yafrur faro mko kwar raya. 16 Kaku ḇeri yakofen faro mko: Manfyan oso ikaki syadibur tuan ḇyedi ḇa, roḇaido wawan oso iba syadi ḇewani yaḇa. 17 Rofyor mkofawi roi nane kam kwar, ma rofyor mkofrur na ido, aski faro mko. 18 Yakofen faro mko kam ḇa, snar yafawi, mansei yakinfir kwar. Ḇape imnis rosai sfas kwar ro Refo isoine: Snonkaku ḇeyanan fnoḇek aya nari isampum aya. 19 Yakofen na rarirya faro mko rofafisu ine kako rofyor roi yakofen nane ndama ḇaim, insa roi ḇeḇesya ani ryama kwar, rarirya mkokyar mboi aya irya. 20 Kaku ḇeri yakofen faro mko; mansei ḇena snonkaku yawansya, nya aya, ma mansei ḇena ayansya sakna kako ḇewan ayanya." 21 Yesus ikofen rarirya kwar iswar fafayaḇa inja ḇyesaksi: "Yakofen faro mko, kaku ḇeri rofandu mko nari oso ḇyoḇ aya." 22 Manfamyan ansi smam yaesi, ma sikmom snar sifawi mansei Yesus ikofenya ḇa. 23 Oso rofandu Yesus manfamyan ḇyesi, isoine manfamyan iswar ani ma ḇekain fanami, ro ḇar raku ḇyedi. 24 Simon Petrus pyanir manfamyan ani ma ikofen, ḇo doḇo: "Wafuken manseiso ikofen ḇesyanya!" 25 Manfamyan ḇekain fanam Yesus ani iknenef ma ikofen faroi, ḇo doḇo: "Manseren, manseiso eḇesyani?" 26 Yesus kyarem: "Snonkaku yasowen mamami ma yaḇuk faroya ido irya." Ikofen rarirya posa dun mamami ma syoweni posa ḇyuki faro Yudas, Simon Iskariot mandaḇendi. 27 Ma Yudas duf mamami ani kwar, Ibirisya isawoḇi. Ma Yesus ikofen faroi: "Rosai waḇe wafrurya, iḇye wafrur fasaw." 28 Ḇape snon osero ḇaḇeri ro ḇekain ḇeyanan ansi ifawiḇa, rosai Yesus ikofen rarirya faro Yudas. 29 Snar Yudas iso ḇeyuf mansrip ḇeser pipiya inja skara, mboi Yesus iwani fa kyoḇes roi ḇeḇefandun faro munara ani, roḇaido ḇyuk roi ono faro ḇesaḇararsya. 30 Yudas dun mamami raimnai rya fasau. Ma rofyor ani roḇ kwar. 31 Rofyor rya kwar, Yesus ikofen: "Insape Rumkun Snonkaku isma baba ma Allah isma baba kukeri. 32 Rofyor Allah isma baba snar i, ma Allah nari ḇyuk faḇei baba kako, baba ro Allah mankundi ḇardi ma nari ḇyuk baba fasaw faroi. 33 Ne, romawa ayena mko, fafisu kermkun monda kaker, aya isya fnoḇek mko. Ma nari mkosewar aya, ḇape raris yakofen faro kawasa Yahudisya: Ḇemoḇ yara yoḇya, mkopok mkorama roiḇa, rarirya kako knikine yakofen faro mko. 34 Yaḇuk sasoser ḇaḇo faro mko, insa mko swar yae mko; imnis raris moḇ yaswar mko kwar raya, rarirya mko kako mko swar yae mko. 35 Rofyor mko swar yae mko ido snonkakusya kam nari sifawi mboi manfamyan ayesi mko, rofyor mko swar yae mko kada." 36 Simon Petrus ikofen faro Yesus, ḇo doḇo: "Manseren, waḇe rwaḇeso?" Yesus kyarem: "Moḇ yarayoḇya, nari wapok waso ayaḇeri ro knikine ḇa, ḇape insape nari waso aya." 37 Petrus ikofen faroi, ḇo doḇo: "Manseren, snaro yaso beri au ro knikine ḇa? Yamarisen yamar sadwer aw!" 38 Yesus kyarem: "Kakuke wamarisen fa wamar sadwer aya? Kaku ḇeri yakofen faro aw: Mankokosya sor ḇaim, famyun aya ḇe rarwan rikior kwar."
1 "Mkosnemna neḇirḇar awer; mkokyar faro Allah, mkokyar maro aya kako. 2 Ro Mami rum ḇyedi moḇ kankain nasya nabor. Rofyor rariryaḇa, nari yakofen na faro mko. Snar yaramura ḇediwa insa yafasos moḇ faro mko. 3 Ma rofyor yara ro diwa kwar ma yafasos moḇ faro mko kwar, nari yakaḇer muma wer ma yun mkoḇe moḇ ayedi, insa moḇ rosai aya isya roya, mko kako mkoisya ro moḇ ani. 4 Ma moḇ yaraḇeya, mkofawi nyan ḇeraḇe moḇ ani." 5 Raimnai Tomas ikofen faro Yesus, ḇo doḇo: "Manseren, nkofawi moḇsai rwaḇeyaḇa; inja rariso nari nkofawi nyanya?" 6 Yesus ikofen faroi: "Aya ine kada nyanya ma napnapes ma kankenem. Snonkaku oso ḇaḇeri ḇerama faro Mami, rofyor imbranuk ro ayaḇa. 7 Rofyor mkomambaḇir aya, nari mkomambaḇir kaku mami kako. Knikine mkomam baḇiri ma mkomami kwar." 8 Filipus ikofen faro Yesus, ḇo doḇo: "Manseren, fasna Kmaya maro nko, rarirya imnis maro nko kwar." 9 Yesus ikofen faroi: "Fyoro kaku aya isya fnoḇek mko, Filipus, ḇesyaḇo mambaḇir ayaḇa? Mansei ḇemam aya kwar ido, myam Kmaya kwar kako; rariso wakofen: Fasna Kmaya maro nko. 10 Wakyarḇake, yaḇe oser kuker Kmaya ma Kmaya ḇyeoser kuker aya? Rosai yakofen faro aw, yakofen na ro mankundaya ḇardiḇa, ḇape Kmaya ḇaḇeoser nuḇedi, iso ḇefrur nakamya. 11 Mkokyar faro aya mboi yaḇe oser kuker Kmaya ma Kmaya ḇye oser kuker aya, mboi roḇaido mkokyar snar rosai yafrur kwar na. 12 Kaku ḇeri yakofen faro mko: Mansei ḇekyar faro aya, nari dakfrur kako fararur-fararur yafrur nane, mboi nari ifrur roi ḇeba syadi wer. Snar yara faro Kmaya; 13 ma rosai mkor kuker snonsnon ayedi, nari yafrur na faro mko, insa Kmaya isma baba ro Rumkunya. 14 Rofyor mkor roi ono kuker snonsnon ayedi, nari yafrur na." 15 "Rofyor mkoswar aya ido, nari mkoḇeuser sasoser ayena kam kada. 16 Nari yor faro Kmaya, ma nari ḇyuk faro mko snon ḇesaramper oso ḇese, insa ifnoḇek mko, 17 isoine Rur Napnapesya. Supswan ine dakna iba, snar supswan ine dakmam iba ma ssmambaḇir iba. Ḇape mko kada mkomamḇaḇiri, snar ifnoḇek mko ma ḇyeoser kuker mko. 18 Nari yabur mkoḇa imnis awak param. Nari yakaḇer maro mko wer. 19 Fyoroḇa wer supswan ine nari smam aya werḇa, ḇape mkoma nari mkomam aya, snar yakenem ma mko kako nari mkakkenem. 20 Rofyor ani nari mkofawi, mboi yaḇeoser kuker Mami, ma mkoḇe oser kuker aya ma ayano yaḇe oser kuker mko. 21 Mansei ḇeyuf sasoser ayena ma ḇeḇeuser na, iso ḇeswar ayanya. Ma mansei ḇeswar aya, ikada nari Mami dakswari ma aya kako nari yakswari ma nari yafasna aya ḇardi faroi." 22 Yudas ḇekofen ine Iskariot isyaḇa, ifuken faro Yesus, ḇo doḇo: "Manseren, rosai eḇedari woḇo fasna au maḇe nko, mboi faro supswan ineḇa?" 23 Yesus kyarem: "Rofyor oso iswar aya, ikada nari ḇyeuser farkarkor ayena, ma Mami nari iswari ma nari nko rama faroi ma nko kainusi. 24 Mansei ḇeswar ayaḇa, nari ḇyeuser farkarkor ayenaḇa; ma farkarkor mkomnaf anna ndama ro ayaḇa, mboi ndama ro Kmaya ḇewan aya. 25 Yakofen roi ḇeḇor annane kam faro mko, rofyor aya isya kaker kuker mko; 26 ḇape Rur Ḇesren, isoine Rur Ḇeḇuk snepreiya nari Kmaya iwani kuker snonsnon ayedi, iso nari ḇefarkor fa ḇemko ma ḇeḇuk swarepen ro roi ḇeḇor yakofen kwar faro mko anna kam. 27 Askiya yaḇeifa kyainus mko. Aski ayena yaḇuk na faro mko, ma rosai yaḇuk faro mko namnis kuker roi supswan ine ḇyuk faro mko naba. Mkosnemna neḇirḇar ma mkomkak awer. 28 Mkomnaf mboi yakofen faro mko kwar: 'Yara, ḇape nari yakaḇer faro mko wer.' Rofyor mko swar aya kada, nari mko marisen kaku snar yara faro Mami, snar Mami ḇeba syadi ro aya. 29 Ma knikine yakofen na kako faro mko rofyor ndama ḇaimya, insa mko kyare, rofyor ndama kwarya. 30 Yawos nabor wer faro mkoḇa, snar papoik supswan ine ryama ma ipok ayaḇa. 31 Ḇape insa supswan ine sifawi, mboi yaswar Mami ma yafrur roi ḇeḇor kam Mami syoser faro ayana kwar. Mkoyor mko kora kobur moḇ ine."
1 Yesus ikofen wer, "Aya ine anggur knam ḇenapesya ma Mamiso ḇefrur yaf ani. 2 Snaw ayena ḇeḇuk bon ḇana kyaruk na mboi snaw ḇeḇuk bon na ifron sren na, insa namarem syadi wer. 3 Mkokada mkosren kwar snar farkarkor yaḇuk faro mko kwarna. 4 Mkoḇe oser faswef kuker aya, ma ayano nari yaḇe oser faswef kuker mko. Imnis snawya imarem ro mankundiḇa, rofyor ḇyeoser faswef kuker knamyaḇa, rarirya ido nari mko maremba, rofyor mkoḇe oser faswef kuker ayaḇa. 5 Aya ine anggur knam ma mkoḇe snaw ro aya. Mansei ḇeḇeoser kuker aya nari ayano yaḇe oser kukeri, ikada ḇyuk bon nabor, snar roḇondibur aya mkopok mkofrur royoḇa. 6 Mansei ḇeḇeoser kuker ayaḇa, nari ḇyeḇesawen imnis snaw ma nari myas, ḇarpurya snonkakusya siryur na ma sisawen na ro forya fa nananem. 7 Rofyor mkoḇe oser kuker aya ma farkarkor ayena nkain ro mkosnemna, mkor rosai mko marisen na ro Mami, nari mkosma na. 8 Rofyor mkoḇuk bon nabor, Mami isma baba, rarirya mko fasna mkoḇe manfamyan ḇeaya." 9 "Raris Mami iswar aya kwar, rarirya kako yakswar mko; mko kain ro saswar ayedi kada. 10 Rofyor mkoḇeuser sasoser ayena ido, nari mko kain ro saswar ayena, imnis raris yaḇeuser Mami sasoser ḇyena rarirya yakain ro saswar ḇyedi. 11 Roi ḇeḇor nane kam yakofen na faro mko, insa raryaḇ ayena naisya ro mkosnemna ma marisen mkoḇena namnis. 12 Sasoser ayena naiso nane, insa mkoswar yae mko, raris moḇ yaswar mko raya. 13 Snonkaku ḇeswar syadi bati ḇyesi isoine, snonkaku ḇeḇuk kankenem ḇyedi faro bati ansi. 14 Bati ayesiso mko, rofyor mko frur rosai yasoser faro mko. 15 Yor mkoḇe manfyan wer ḇa, snar manfyanya ifawi roi tuan ḇyedi ifrur naba, ḇape yor mkoḇe bati, snar yakofen ḇadir faro mko kwar roi ḇeḇor nakam yamnaf kwar ro Mami na. 16 Mkoi ḇekimfir ayaḇa ḇape ayaiso ḇekimfir mko. Ma yaḇeasas faro mko kwar, insa mkora ma mkoḇuk bon ma bon mkoḇena nako, insa rosai mkor ro Kmaya kuker snonsnon ayedi, Mami ḇyuk na faro mko. 17 Sasoser ayena naiso nane faro mko: Mkoswar yae mko." 18 "Rofyor supswan ine dayin mko, mko swarepen mboi dayin ḇepon aya kwar ro mko. 19 Rofyor supswan ine i ḇena mkonya, nari iswar mko imnis snonkaku ḇyesi. Ḇape snar supswan ine i ḇena mkonyaḇa, mboi yakimfir mko kwar ro supswan ine, eḇedari supswan ine dayin mko. 20 Mko swarepen rosai yakofen faro mko kwar: manfamyan oso ikaki syadi tuan ḇyediḇa. Rofyor sewayam aya kwar, rarirya nari sewayam mko kako; rofyor siso farkarkor ayena, nari siso farkarkor mkoḇena kako. 21 Ḇape roi ḇeḇor nakam nari sifrur na faro mko snar aya, snar ssmambaḇir ḇewan ayanyaḇa. 22 Rofyor yarama ḇaim ma yawawos faro siḇa, nari sesasar ḇa. Ḇape baboine sisma sanoḇa faro sasar sena! 23 Mansei ḇeyayin aya, ikako dayin Mami. 24 Rofyor yafrur fararur nane ro fadu senaḇa imnis raris snonkaku ḇesesya moḇ sifararur ḇaḇeri raya nari sesasarḇa. Ḇape baboine smam roi ḇeḇor yafrur nakam kwar ḇesyaḇo sayin faro aya ma Mami kako. 25 Ḇape fasfas ro Refo Yahudi sedi nari seimnisi: Sayin aya kuker knamoḇa. 26 Nari yawan faro mko Rur Ḇeḇuk sneprei ḇeḇeknam ro Kmaya iso nari ḇafasna napnapes ro Allah ya. Rofyor ryama kwar, nari ḇyesaksi ro aya. 27 Ma mko kako nari mkoḇe saksi ro aya, snar mko kada ro randakya mko fnoḇek aya kwar."
1 "Yakofen roi ḇeḇor nane kam faro mko, insa mkoḇe ḇirḇar awer. 2 Nari spampum mkobur rum nadi na, ma nari fafisuya ryama nari snonkaku ḇemun mko skara ḇo soḇo: sesyowi faro Allah. 3 Nari sifrur rarirya faro mko, snar ssmambaḇir faro Mami ma ayaḇa. 4 (4 a) Ḇape yakofen roi ḇeḇor nane kam faro mko, insa rofyor fafisuya ryama ido mko swarepen mboi yakofen na kwar faro mko." (4 b) "Roi nane kam yakofen na faro mko ro randakyaḇa, snar fyor ine aya isya fnoḇek mko, 5 ḇape baboine nari yakaḇer faro ḇewan aya kwarya ma mkono osero ḇaḇeri ḇefuken maro aya: Waḇe rwa ḇeso? 6 Ḇape snar yakofen roi ḇeḇor nane faro mko, eḇedari mkosnemna nfafardun. 7 Rarirya roi yakofen faro mko nane nkaku: Iḇye syadi faro mko, fa yara. Snar rofyor yaraḇa, nari yawan Rur Ḇeḇuk snepreiya faro mkoḇa. Ḇape rofyor yara, nari yawani faro mko. 8 Ma rofyor ryama ido, iso nari ḇeḇuk fa supswan ine ssmambaḇir sasarna, napnapes ma ḇaḇesamamyaiya; 9 ro sasarna, snar sikyar faswef faro ayaḇa; 10 faro napnapesya, snar yara faro Mami ma mkomam aya werḇa; 11 ro ḇaḇesamamyaiya, snar samambraḇ supswan ine isma samamyai kwar. 12 Roi ono naisya nabor kaker fa yakofen faro mko wer, ḇape baboine mko sambraḇ ḇaim fa mko kamar na. 13 Ḇape rofyor Rur ḇenapesya ryama, ikada nari dun mko faro napnapesya; snar nari iwos ro roi ḇekur mankundi ḇardiḇa, ḇape dawos roi ḇeḇor kam imnaf na naiso ikofen na ma nari ḇyaryas faro mko ro roi nari ḇerama na. 14 Ikada nari ḇyuk baba maḇe aya, snar nari ḇyaryas faro mko rosai isma ro aya. 15 Roi ḇeḇor kam Mami ḇyena, roi yana nairya, eḇedari yakofen: Rur ani nari ḇyaryas faro mko rosai isma ro aya." 16 "Fafisu kermkun monda nari mkomam aya werḇa ma fafisu kermkun monda nari mkomam aya wer." 17 Simnaf rarirya manfamyan ḇyesi ono sifuken yae farosi: "Rosai ikofen ḇesyani: Fafisu kermkun monda nari mkomam aya werḇa, ma fafisu kermkun monda nari mkomam aya wer? Ma: Yara faro Kmaya?" 18 Inja sikofen, ḇo soḇo: "Rosai ikofen ḇesya maroko: Fafisu kermkun monda wer? Kofawi rosai ikofenyaḇa." 19 Yesus ifawi, mboi simarisen sifuken roi oso faroi, inja ikofen farosi: "Inja roi yakofen ro insanja anna naiso mko fuken yae mko kuker na, isoine: Fafisu kermkun monda nari mkomam ayaḇa ma fafisu kermkun monda wer kako nari mkomam aya? 20 Kaku ḇeri yakofen faro mko: Nari mko kanes mboi supswan ine nari siryaḇ; mko kada nari mkomandak, ḇape mandak mkoḇena nari nfarwe ḇe raryaḇ. 21 Bin oso fyafardun rofafisu fanam iḇe daḇenya, ḇape rofafisu daḇen romawa ḇyedi kwar, bin ani ḇyepro kandera ḇyena, snar wombrek mkun oso ḇyeḇeaḇen kwar ḇe supswan ine. 22 Rarirya kako fafisu ine mkoḇe mandak, ḇape nari yasrow mko wer ma nari mkoryaḇ ma snonkaku oso ḇaḇeri fa dun raryaḇ mkoḇena burmko. 23 Ma ro ras ani mkono nari ifuken roi ono faro aya ḇa. Kaku ḇeri yakofen faro mko: Roi ḇeḇor kam mkor faro Mami kuker snonsnon ayedi nari ḇyukna faro mko. 24 Isof ro ras ine mkor roi oso ḇaim kuker snonsnon ayedi. Mkor nari mkosma, insa raryaḇ mkoḇedi imnis. 25 Roi ḇeḇor nane kam yakofen na faro mko kuker sarḇer. Mboi fafisuya nari ryama yawos faro mko kuker sarḇer wer ḇa, ḇape yawos isnabos beri ro Mami faro mko. 26 Ro ras ani nari mkonadi kuker snonsnon ayedi. Ma yakofen faro mkoḇa mboi yor ro Mami faro mko; 27 snar Mami mankundi iswar mko, snar mkoswar aya kwar ma mkokyar mboi yarama ro Allah. 28 Yarama ro Mami ma yarama ḇe supswan ine; yabur supswan ine wer ma yara faro Mami wer." 29 Manfamyan ḇyesi sikofen faroi, ḇo soḇo: "Babo ine Manseren wawos isna bosḇeri ma swarḇer werḇa. 30 Insape nkofawi, mboi wafawi roi ḇeḇor nane kam ma fandun fa snonkaku sifuken wer ro awḇa. Eḇedari nkokyar mboi rwama ro Allah." 31 Yesus kyarem farosi: "Inja insape mkokyare? 32 Mkomam, fafisuya ryama ma ryama kwar, mboi mkoḇe ḇekakek oser-oser ḇe moḇ ḇyedi ma mkobur ayaḇo yerer ro mankundaya. Mboi yemir ḇardiḇa, snar Mami ryous aya. 33 Yakofen faro mko, roi ḇeḇor nane, insa mkosma aski snar mkoḇe oser kuker aya. Ro supswan ine sewayam mko ma mkoḇe kandera ḇape mkosambraḇser mkosnemna, snar yakafyo supswan ine kwar."
1 Yesus ikofen rarirya. Raimnai iwakwaker ḇe nanki ma ikofen: "Mami, fafisuya ryama kwar; buk baba faro Rumkun bedi, insa Rumkun bedi dakfrur baba faro aw. 2 Imnis raris buk faroi kwar papoik robo kawasasya kam, rarirya nari ḇyuk kako kankenem ḇekain fyoroya faro snonkakusya kam buk faroi kwarsya. 3 Kankenem ḇekain fyoroya, isoine mboi ssmambaḇir aw werer Allah ḇenapes, ma ssmambaḇir Yesus Kristus wawan kwar ani. 4 Yafrur wasma baba kwar ro supswan ine kuker nyan yafrur posa fararur buk maro aya fa yafrur na. 5 Inja knikine, o Mami, buk baba ḇe aya ro aw ḇardi, kuker baba yasma ro ḇarpon bedi rofyor supswan ine isya ḇaim. 6 Yafasna Mami kwar faro snonkaku ḇeḇor buk kwar maro aya ro supswan ine. Sikada aw ḇenasi ma buksi maro aya kwar ma siso wos ḇena kwar. 7 Insape sifawi, mboi snonkaku buk ḇe ayansya kam seknam ro aw. 8 Snar roi ḇeḇor buk maro aya kwar yaḇuk na kwar farosi ma sakna na kwar. Sifawibos kaku, yaḇe knam ro aw ma sikyar aw ḇewan ayanya. 9 Yaḇe nadi warek si. Yaḇe nadi faro supswan ineḇa, ḇape faro snonkaku buk kwar maro aya, snar aw ḇenasi, 10 ma roi ḇeḇor ayena kam aw ḇenananya ma roi nwana ayai ḇenananya, ma yasma baba kukersi kwar. 11 Ma aya isya ro supswan ine werḇa, ḇape sikada sisya kaker ro supswan ine, ma yara mufaḇe aw. O Mami ḇesren, fadurusi ro snonsnon ḇedi, isoine snonsnon bedi bema ḇe aya kwar; insa sḇeoser imnis raris Ko. 12 Rofyor aya isya fnoḇek si, yafadurusi ro snonsnon bedi, isoine snonsnon bedi buk kwar maḇe aya; yawarensi kwar, ma oso rosi ryoḇa derer faroi sfasna kwar fa ḇeroe, insa fasfas Refoya imnis. 13 Insape yara mufaḇe aw ma yakofen nakam ine rofyor aya isya kaker ro supswan ine, insa raryaḇ ayena rofandusi. 14 Yaḇuk wos ḇena farosi kwar, inja supswan ine sayinsi, snar sikada supswan ine nyasiḇa, imnis raris aya ine kako sup-swan ine nya ayaḇa. 15 Yor fa wunsi bur supswan ineḇa, imboi insa fadirensi ro ḇarḇorya. 16 Supswan ine nyasiḇa, imnis aya kako supswan ine nya ayaḇa. 17 Fasren si ro napnapesya; wos bedi kada napnapes rirya. 18 Imnis raris wawan aya kwar ḇe supswan ine, rarirya yawansi ḇe supswan ine kako; 19 ma yafasren mankundaya farosi, insa seḇeyakfasren ro napnapesya. 20 Ma yaḇenadi warek serer mondaḇa, ma yaḇenadi warek kako snonkaku ḇekyar faro ayasya snar ḇararyas sena; 21 insa sikam seoser, imnis raris Mami, ḇyeoser kuker aya ma aya yaḇeoser kuker Mami, insa sikako sakḇe oser kuker Ko, insa supswan ine sikyar, mboi Mami ḇewan ayanya. 22 Yaḇuk farosi baba, buk kwar maḇe ayana, insa sḇeoser, imnis raris moḇ Ko ḇeoser raya. 23 Aya yaḇe oser kukersi ma aw beoser kuker aya insa simnis sḇeoser, insa supswan ine sifawi, mboi aw ḇewan aya kwar ma waswarsi, imnis raris waswar aya. 24 O Mami ḇenapes, mboi supswan ine dakmam baḇir awḇa, ḇape aya kada yamambaḇir aw ma naek ansine kada sifawi, mboi aw ḇewan ayanya. 25 O Mami, yamarisen insa, moḇ rosai aya isya roya, sisya fnoḇek aya, snonkaku buk kwar maḇe aya, insa smam baba ayena buk kwar maḇe aya, snar waswar aya kwar rofyor supswan ine ḇyeḇefrur ḇaimya. 26 Ma yakofen ḇadir snonsnon bedi farosi kwar ma nari yakofen ḇadir wer, insa saswar buk faro aya ḇyeoser kuker si ma ayano yaḇe oser kukersi."
1 Yesus ḇyenadi rarirya kwar isasyar ro moḇ ani kuker manfamyan ḇyesi skunuk war Kidron. Rodia yaf oso isya ma Yesus syun ro yaf ani fnoḇek manfamyan ḇyesi. 2 Yudas ḇeḇoḇ Yesus, dakfawi moḇ ani kako, snar fafisu ono Yesus fyananjur kuker manfamyan ḇyesi ro moḇ ani. 3 Inja mananir imam-imam ma snon Farisisya siwan Yudas fa dun sarar sordade Romawi ma manwarwaren Allah Rum ḇyedi, ssun romamun ma ambar, ḇo sakrama ro moḇ ani. 4 Yesus ifawi kwar rosai nari ḇekuri, inja imbran fa isrowsi ma ikofen farosi: "Manseiso mko sewarya?" 5 Skarem faroi, ḇo soḇo: "Yesus ro Nazaret." Ikofen farosi: "Aya isoine." Yudas ḇeḇoḇi ani isya kako rodia fnoḇeksi. 6 Rofafisu ikofen farosi: "Aya isoine," sisusu ma sisapi kam. 7 Raimnai ifuken wer: "Manseiso mko sewarya?" Sikofen, ḇo soḇo: "Yesus ro Nazaret." 8 Yesus kyarem: "Yakofen kwar faro mko, aya isoine. Rofyor ayai mkosewarya ido, mkorir ḇese sine fa sibur." 9 Rarirya insa Yesus wos ikofen kwar imnis: "Mami manseiso buk kwar maro aya, yamam mondasi ḇo oso ryoḇa." 10 Inja Simon Petrus, ḇeyun sumber oso, pyas sumber ani ro sowerya ma pyapek bas imam ḇeba manfyan ḇyedi knaram byedi ḇar rakuya. Manfyan ani snonsnon ḇyedi Malkus. 11 Yesus ikofen faro Petrus: "Swower sumber bedi; kwara woḇo yamewer yinem ro sekaninem kandera Mami ḇyuk kwar maro aya?" 12 Inja sarar sordade Romawi mananir sedi ma Yahudisya manwarwaren siwansya sfor Yesus ma sewankai. 13 Raimnai suni ḇepon faro Hanas, Kayafas manbanyori, Kayafas ine iso ḇeḇe Imam Ḇeba ro wampasi wambarek ani. 14 Kayafas ine iso ḇeḇuk swarepen kwar faro kawasa Yahudisya: "Iḇye syadi snonkaku oser imar sadwer er ḇeḇor kam." 15 Simon Petrus ma manfamyan ḇese ani suso Yesus. Manfamyan ḇese anikada ifawi Imam Ḇebaya, inja daksun fnoḇek Yesus ḇe buḇes Imam Ḇeba rum ḇyedi, 16 mboi Petrus iwaf ro ḇondi fanam kedwaya. Manfamyan ḇese ḇefawi Imam Ḇeba ani, kyaḇer randi, dawawos faro ḇinfyan ḇewaren kedwaya, raimnai dun Petrus fa syun. 17 Ḇinfyan ḇewaren kadwai ani ikofen faro Petrus, ḇo doḇo: "Awne kako manfamyan oso ro snon iwa?" Petrus kyarem ḇo doḇo: "Roḇa!" 18 Rofafisu ani manfyan manwarwaren Allah Rum ḇyedi ono sikaḇen for oso kwar, snar pnunek iba ro fafisu ani, ma sores sidapen rodia. Petrus kako dores dakdapen fnoḇeksi. 19 Ma Imam Ḇebaya irandak ifuken Yesus ro manfamyan ḇyesi ma farkarkor ḇyena kako. 20 Yesus kyarem farosi: "Yawos isna ro fababa faro supswan ine: Yaḇuk farkarkor ḇesya kwar ro rum nadi ma Allah Rum ḇyedi moḇ kawasa Yahudisya siryur ro na; yawos roi ono kuker kankunes ḇaim. 21 Snaro wafuken aya? Wafukensi rosai yakofen kwar farosi; kaku ḇeri sifawi rosai yafarkor kwar farosi." 22 Rofafisu ikofen rarirya, snon ḇewaren oso ḇeyores ro dia, ḇyaser Yesus, ḇo doḇo: "Kwarem rarirya faro Imam Ḇeba?" 23 Yesus kyarem faroi: "Rofyor wos ayedi syasar ido, fasna sasarya, ḇape rofyor wos ayedi kyaku ido, snaro baser aya?" 24 Ma Hanas fyaremi kuker ḇramin ḇeḇewanka faro Imam Ḇeba Kayafas. 25 Simon Petrus dores dakdapen for kaker rodia. Snonkaku ḇeyores rodia sikofen faroi, ḇo soḇo: "Aw kako manfamyan oso roi?" 26 Fyamyuni ḇo doḇo: "Roḇa." Manfyan oso ro Imam Ḇeba isoine kina ro snon Petrus pyapekbas knaram ani ikofen, ḇo doḇo: "Insanja yamam aw kako ro yaf ani fnoḇek snon ani?" 27 Ma Petrus fyamyun wer ma rofyorya mankokosya sor. 28 Ma arwo prim kaku Yesus ḇyeḇeyun ro Kayafas rum ḇyedi ḇe rum karkara ḇenapes. Sikada saksun ro rum karkara ḇenapesḇa snar simkak ḇude sifrur mamas mankunsi, snar siḇe san Paskah. 29 Eḇedari Pilatus isasyar fa isrowsi ma ikofen ḇo doḇo: "Rosai mkoḇuksof snon ineya?" 30 Skarem faroi ḇo soḇo: "Rofyor snon ḇeḇarḇor risyaḇa kada nari nkuni fa nkoḇuki faro awḇa!" 31 Pilatus ikofen faroi, ḇo doḇo: "Mkuni ma mkoḇe mankarai raris sasoser Refo Yahudi mkoḇedi." Yahudi ansi soḇo: "Nkopok nkoḇuk samamyai marmari faro snonkakuḇa." 32 Rarirya insa imnis Yesus wos ikofen, fa ḇekur marmar ḇyedi. 33 Raimnai Pilatus syun kaḇer ḇerum karkara ḇenapesya, raimnai dor Yesus ma ifukeni, ḇo doḇo: "Aw ine wairek Yahudisya sediso awke?" 34 Yesus kyarem: "Inja fakfuken ḇedine dekro snembrike roḇaido ono ḇese ḇekofen faro aw ro aya?" 35 Pilatus ikofen, ḇo doḇo: "Inja aya ine snon Yahudike? Er ḇesi ḇardi ma mananir imam-imam siso ḇeḇuk aw faro aya kwar; rosai wafrur kwarya?" 36 Yesus kyarem: "Ḇaḇesasoser ayedi isya ro supswan ineḇa; rofyor Ḇaḇesasoser ayadi isya ro supswan inekada, nari manfamyan ayesi sisampum, ma siḇri warek aya insa ssḇuk aya faro Yahudisya ḇa, ḇape Ḇaḇesasoser ayedi ro dineḇa." 37 Inja Pilatus ikofen faroi, ḇo doḇo: "Inja wairek risawke?" Yesus kyarem: "Imnis raris moḇ wakofen raya, kaku aya ine wairek. Iso eḇedari yaḇe ḇeaḇen ma iso eḇedari yarama ḇe supswan ine, insa yaḇuk ḇaḇesaksi ro ḇaḇenapnapesya; snonkaku oser-oser ḇeḇeknam ro napnapesya simnaf mkaren ayedi." 38 (38 a) Pilatus ikofen faroi, ḇo doḇo: "Rosai ḇaḇenapnapes ani?" (38 b) Raimnai Pilatus isasyar ro rum karkara ḇenapes wer faro kawasa ansi ma ikofen farosi, ḇo doḇo: "Yasma sasar oso ḇaḇeri ro snon ine. 39 Ḇape faro mko ro ras Paskah yasasyar snon oso ro ḇesmaisya faro mko. Mko marisenke yasasyar wairek Yahudi faro mko?" 40 Skarem kuker ḇararas, ḇo soḇo: "Roḇa, iba ḇoi Barabas!" Barabas ikada snon oso ḇefasyar.
1 Raimnai Pilatus duni ma iwan fa sipreri. 2 Sordadesya siyanem wower borek oso ro kaḇrai borek posa sriri ro ḇukor ḇyedi. Ma ssansuni kuker syatuḇefuk, 3 Ma sikofen faroi, ḇo soḇo: "Jow suba, ne wairek Yahudi!" Raimnai sḇaseri. 4 Raimnai Pilatus isasyar wer ma ikofen faro kawasa ḇeḇor ansi, ḇo doḇo: "Mkomam, yuni fa isasyar faro mko, insa mkofawi, yasma sasar oso roi ḇaḇeri." 5 Raimnai Yesus isasyar, isaswo wower borek ma syansun syatu ḇefuk. Ma Pilatus ikofen farosi, ḇo doḇo: "Mkomam snonkaku ine!" 6 Rofyor mananir imam-imam ma manwarwaren ansi smami, sibras kam ḇo soḇo: "Ḇye ḇepai ro aprop, ḇye ḇepai ro aprop!" Pilatus ikofen farosi, ḇo doḇo: "Mkuni ma mkopai ro mankun mko; snar yasma sasar oso roi ḇaḇeri." 7 Kawasa Yahudi skarem faroi, ḇo soḇo: "Nkona sasoser ma sasoser ani doḇo nari imar snar kyarem mankundi ḇe Allah Rumkun ḇyedi." 8 Rofafisu Pilatus imnaf wos ḇerarirya imkak syadi wer, 9 raimnai syun kaḇer wer ḇe rum karkara ḇenapes ma ikofen faro Yesus, ḇo doḇo: "Aw ido beknam roriso?" Ḇape Yesus kyaremba. 10 Inja Pilatus ikofen faroi wer, ḇo doḇo: "Inja wamewer wawos kuker ayake? Wafawi ḇake yasma papoik fa yafaspar aw, ma papoik kako fa yawan ḇo spai aw ro aprop?" 11 Yesus kyarem: "Wasma papoik oḇa beri kako faro aya, rofyor papoik ani ḇyeḇeḇuk faro aw ro boiyaswaḇa. Eḇedari: ḇeḇuk aya faro awsya sasar sena naba syadi ro aw." 12 Rofyor ani Pilatus ḇyesewar fa fyaspar Yesus, ḇape kawasa Yahudisya sibras, ḇo soḇo: "Rofyor faspari ido Kaisar bati ḇyediso awḇa. Snonkaku oso ḇekara mankundi ḇe wairek ikada isampum Kaisar." 13 Rofyor Pilatus imnaf wos anna, iwan fa ssun Yesus ḇe ḇondi, ma kyain ro karapesa napnapesya, ro moḇ ḇenirḇe Litostrotos, (ansan karui) ro wos Ibrani Gabata. 14 Ras ani kada ras fasasos Paskah, indokada oras samfur seser risuru. Pilatus ikofen faro kawasa Yahudi ansi; ḇo doḇo: "Inekada wairek mkoḇedi!" 15 Inja sibras ḇo soḇo: "Mkomuni! Mkomuni! Mko pai ro aprop!" Pilatus ikofen farosi, ḇo doḇo: "Inja mkomarisen ḇoyapai wairek mkoḇedi ro aprop?" Mananir imam-imam ansi skarem, ḇo soḇo: "Nkona wairek oso ḇese ḇa mboi Kaisar ikada wairek nkoḇedirya!" 16 (16 a) Ḇarpurya Pilatus ḇyuk Yesus farosi fa spai ro aprop. (16 b) Ssun Yesus raimnai sra. 17 Yesus mankundi ḇyar aprop ḇyedi ḇo isasyar ḇe moḇ ḇenirḇe Ḇukorbei, ro wos Ibrani: Golgota. 18 Ma rodia spai ro aprop ma spai fnoḇeki kako snon risuru oso ro ḇar raku ma oso ro ḇar rasar ḇoi Yesus ro fadu. 19 Ma Pilatus iwan fa sfas ro Yesus aprop ḇyedi: "Yesus ro Nazaret, wairek kawasa Yahudi." 20 Kawasa Yahudi sibor siwasya fasfas ani, snar moḇ spai Yesus ro ani fyanam mnuya ma fasfas anna neḇefas ro wos Ibrani, Latin (Roma) ma wos Yunani. 21 Inja mananir imam-imamsya sikofen faro Pilatus, ḇo soḇo: "Fas awer: 'Yahudisya wairek sedi,' mboi fas radine: 'Snon ine ikofen, Aya Wairek kawasa Yahudi.' " 22 Pilatus kyarem farosi, ḇo doḇo: "Rosai yafas kwar, kyain raririrya." 23 Sordade ansi spai Yesus kwar, ssun sansun ḇyena ma serwas na ḇefiak: Oser-oser isma rarwas oser ma syatu ḇyedi suni kako. Syatu ani ḇyeḇesipḇa mboi ḇyeḇesnai robo ḇe sop monda. 24 Eḇedari sikofen yae farosi, ḇo soḇo: "Korwas iḇe mnuk-mnuk awer, mboi iḇye kokinsor fa kofawi mansei ḇenaiya. Sifrur rarirya insa seimnis fas-fas ro Refo: "Sḇerarwas sansun ayena, ma skinsor faro syatu ayedi." Ma sordade ansi sifrur rarirya. 25 Ma ro fanam Yesus aprop ḇyedi, snari dores ma sna ḇedar ḇyedi Maria, Kleopas swari ma Maria Magdalena. 26 Fafisu Yesus myam snari ma manfamyan iswar ani dores fanami, inja ikofen faro snari: "Awine, inekada romawa bedi!" 27 Raimnai ikofen faro manfamyan ḇyedi: "Inekada sna bedi!" Randak ro ras ani beri manfamyan ani dun Yesus snari ḇe rum ḇyedi. 28 Raimnai, Yesus ifawi, mboi roi ḇeḇor kam namnis kwar, ma insa rosai sfas ro Refo ndarirya, inja ikofen: "Yambrow!" 29 Rodia isya sek oso ifo kuker anggur ḇemnir. Inja skokukser bunek ḇesowen kwar ro anggur ḇemnir ansi ro amfriwen oso ma skosui ro Yesus sḇardip ḇyedi. 30 Yesus dinem anggur ḇemnir ani kwar, ikofen: "Imnis kwar." Raimnai kyankunem ma imar. 31 Snar ras ani ras fasasos ma insa ro ras Mananai Yahudi ani kekḇa ansi skaf awer ro aprop-snar ras Mananai Yahudi ani ras ḇeba rirya-inja kawasa Yahudi sra faro Pilatus ma sor faroi insa snonkaku spai ansi wemin sena neḇepankar ma kekḇa ansi seḇesabu. 32 Inja sordade ansi sra ma spankar ḇepon snon risuru spai fnoḇek Yesus ansuya wemin suḇesi; 33 ḇape rofyor srama faro Yesus ma smam imar kwar, inja sakpankar wemin ḇyesuya ḇa, 34 ḇape snon oso ro sordade ansi iwankir pe ḇyedi kuker bom, ma rik kuker war nasar beri. 35 Ma snonkaku ḇemam roi ḇeḇesya ani iso ḇeḇuk ḇaḇesaksi kako ma ifawi ḇaḇesaksi ḇyedi kyaku, ma ifawi, mboi ikofen roi ḇenapes, insa mkokyar kako. 36 Roi ḇeradine ndarirya, insa fasfas ro Refo imnis isoine: "Kor ḇyesi oso nari ḇyeḇepankarḇa." 37 Ro Refo sfas kako radine: "Nari smam Yesus siwankir ani." 38 Posa kwar Yusuf ro Arimatea rya faro Pilatus ma dor insa dun Yesus kekḇa ḇyedi ro apropya. (Yusuf manfamyan ro Yesus ḇeso fasis, snar imkak kawasa Yahudisya.) Ma Pilatus ḇyuk raris fararyor ani. Inja rya dun Yesus kekḇa ḇyedi. 39 Nikodemus, ro randakya ḇera faro Yesus rofafisu roḇ, dakso Yusuf kako. Nikodemus dun mani mur ḇefawas mampasa marḇakḇakya indokada kati samfur ririm. 40 Snon ansuine suyun Yesus kekḇa ḇyedi, suparek epeni kuker kruḇen ḇepyoper ma supyosi kuker kefi-kefi imnis rari kawasa Yahudi rofyor sikrir ḇemarsya. 41 Fanam moḇ spai Yesus ro ani yaf pampen oso isya, ma ro yaf ani ureren babo oso isya, ḇape sikrir snon oso roi ḇaim. 42 Snar ras ani ras fasasos kawasa Yahudi ma ureren ani ḇyinkwanḇa, inja sfaryaker Yesus kekḇa ḇyedi ro dia.
1 Ro ras ari arwo prim kaku, fafisu isnai karkir, Maria Magdalena ryaḇe rus ani ma myam mboi karui ḇesisen urerenya ḇyeḇekris kwar bur urerenya. 2 Ifrar fa syewar Simon Petrus ma manfamyan Yesus iswar ani, ma ikofen faroi, ḇo doḇo: "Snonkaku ono ssun Manseren bur ureren ḇyani ma nkofawi moḇ sikrami wer royaḇa." 3 Inja Petrus ma manfamyan ḇese ani sura ḇe rus ani. 4 Sufrar kam ḇape manfamyan ḇese ani ifrar samberen syadi Petrus inja pyonra ro rus ani. 5 Kyankunem ma ikiki myam ro urerenya, kruḇen ḇeparek Yesusya ḇyarek ro moḇ ani, ḇape syun ro ureren aniḇa. 6 Simon Petrus iyauser ma syun pdef ro ureren ani. Myam kruḇen ḇeparek Yesus ani ḇyarek rodia, 7 ma marḇun ḇefes Yesus bukor ḇyedi ḇyarek fanam kruḇen ḇeparekiya ḇa, mboi ḇyeḇeyaper ḇo ḇyarek ḇese. 8 Inja manfamyan ḇese ḇefrar ḇepon maro rus ani, dakkiki kako ma myam rarirya inja ikyar. 9 Snar rofyor ani kada sifawi ḇaim rosai sfas ro Refo mboi nari diḇeri bur marmarya. 10 Raimnai manfamyan ansuya subur ḇe rum. 11 Ḇape Maria dores fanam ureren ani ḇo kyanes. Fafisu kyanes ḇo ikiki fa myam ro ureren ani, 12 ma myam malaikat risuru susansun sansun ḇepyoper ḇo sukain ro moḇ Yesus kekḇa ḇyedi ḇyarek ro ani, suminya ro mun ḇukorya ma suminya ro mun weminya. 13 Malaikat ansuya sukofen faroi: "Awine, rosai kwanes kukerya?" Maria kyarem, ḇo doḇo: "Snonkaku ono ssun Manseren ayedi kwar ma yafawi moḇ sriri royaḇa." 14 Ikofen rarirya kwar iknenef ḇeḇarpur ma myam Yesus dores, ḇape ifawiḇa, mboi Yesus irya. 15 Yesus ikofen faroi: "Awine, rosai kwanes kukerya? Mansei swewarya?" Maria kyara ḇo doḇo snon ḇewaren yaf rirya inja ikofen faroi, ḇo doḇo: "Tuan rofyor awi ḇeyuni ido wakofen ḇadiri ḇe aya, moḇ rosai rwiri roya, insa yara yuni." 16 Yesus ikofen faroi: "Maria!" Maria iknenef ma ikofen faroi kuker wos Ibrani: "Rabuni!" isoine, "Guru". 17 Yesus ikofen faroi: "Pan awer ro aya, snar yara faro Mami ḇaim, mboi rwa wakofen faro naek ayansi, mboi insape yaḇe yara faro Mami ma Kma mko ḇedi, faro Allah ayedi ma Allah mkoḇedi." 18 Maria Magdalena rya ma ikofen faro manfamyan ansi: "Yamam Manseren kwar!" ma Manseren iso ḇekofen roi ḇeḇor anna faroi. 19 Ro ras ari ani kako fafisu roḇ kwar, Yesus manfamyan ḇyesi siryur ro rum oso ma kedwana neḇesopder, snar simkak kawasa Yahudisya. Rofafisu ani Yesus ryama dores fandusi, ma ikofen: "Aski faro mko!" 20 Ma ikofen rarirya kwar, fyasna ḇramin ḇyesu ma pe ḇyedi farosi. Manfamyan ansi simarisen kaku rofafisu smam Manseren. 21 Ma Yesus ikofen wer: "Aski faro mko! Imnis raris Mami iwan aya, rarirya knikine yakwan mko kako." 22 Ma rofyor dawawos rarirya kwar, iwuf yoi ḇyedi farosi ma ikofen: "Mkosma Rur Ḇesrenya. 23 Rofyor mkopyos snonkaku oso sasar ḇyena, Allah kako dakpyos sasar ḇyena. Mboi rofyor mkopyos oso sasar ḇyenaḇa, Allah kako dakpyos sasar ḇyenaḇa." 24 Tomas, snon oso ro manfamyan samfur seser risuru, ḇyansi sap i kako ḇe Didimus, isya fnoḇek min ḇyesiḇa rofafisu Yesus ryama farosi ani. 25 Inja manfamyan ḇese ansi sikofen faroi, ḇo soḇo: "Nko mam Manseren kwar!" Ḇape Tomas kyarem farosi, ḇo doḇo: "Rofyor yamam apurwan paku ro ḇramin ḇyesuyaḇa, ma yasyun ḇrampin ayesi ro apurwan paku ani ma yasyun ḇramin ayesi ro pe ḇyediḇa, yakyar ḇaim." 26 Ras riwar nawas kwar Yesus manfamyan ḇyesi siryur wer ro rum ani ma Tomas ifnoḇeksi kako. Fafisu ani kedwana neḇesopder kam, ḇesyaḇo Yesus ryama dores fanandusi, ma ikofen: "Aski faro mko!" 27 Ḇarpurya Yesus ikofen faro Tomas: "Wasyun ḇrampin besi rodine, ma mam ḇramin ayesuine, fos ḇramsu ma wasyun ro pe ayedine ma wakyarḇa kaker awer, mboi wakyar beri." 28 Tomas kyarem faroi, ḇo doḇo: "O Manseren yedi ma Allah yedi!" 29 Yesus ikofen faroi: "Snar mam aya kwar eḇedari wakyarya. Aski faro ḇemamḇa, mboi ḇekyarsya." 30 Aḇyair-aḇyair kanandor naisya nabor kaker Yesus ifrur ro ḇarpon manfamyan ḇyesi mamam sena, ḇape neḇefas kamba ro syap ine, 31 ḇape roi ḇeḇor nane neḇefas kwar insa mko kyar, mboi Yesus Wairek ḇeḇuk koreri, Allah Rumkun ḇyedirya, ma snar mko kyar faroi, inja mkosma kankenemya.
1 Ḇarpurya Yesus fyasna mankundi wer faro manfamyan ḇyesi ro danosen Tiberias andirya ma fyasna mankundi farosi radine. 2 Ro danosen andir ani manfamyan ḇyesi ono sisya siryur isoine: Simon Petrus, Tomas sap kako ḇe Didimus, Natanael ro Kana ro Galilea, Zebedeus mandaḇen ḇyesuya ma manfamyan ḇyesi suru wer. 3 Simon Petrus ikofen farosi, ḇo doḇo: "Yaḇe yaraswan." Sikofen faroi, ḇo soḇo: "Nkoso aw!" Sra sek ro waya, ḇape roḇ ani smun ino ḇaḇeri. 4 Fafisu fanam meser, Yesus dores ro danosen andirya; ḇape manfamyan ansi sifawiḇa, mboi ḇeyores ani Yesus irya. 5 Yesus ikofen farosi: "Ne, romawa yesi, mkosma manfna onoke?" Skarem ḇo soḇo: "Oroḇa beri." 6 Inja Yesus ikofen farosi: "Mko nap pam mkoḇedi ro waya ḇar rakuya, ma nari mkosma in ono." Raimnai snap pam ani ma ssambraḇ fa spaw pam aniḇa snar insya sibor mankenem. 7 Inja manfamyan Yesus iswar ani ikofen faro Petrus: "Manseren irya." Fafisu Petrus imnaf mboi Manseren irya, inja syansun sansun ḇyena, snar syansuni ḇa, raimnai doper ro danosenya. 8 Manfamyan ḇesesya siyauser kuker waya ma spaw pam ḇefo kuker in ani ḇe ḇonde snar sḇinkwan ro ḇondeyaḇa, indokada rof utin oser monda. 9 Fafisu srande kwar smam fondesna kuker in ma mamami. 10 Yesus ikofen farosi: "Indo mkun in mko mun babo ansi ono muma." 11 Simon Petrus dek ro waya raimnai skopaw pam ani ḇe ḇonde, ifo kuker in ḇeba-ḇeba monda: Utin oser samfur ririm seser rikior, sibor rarirya ḇesyaḇo pam ani imuk ḇaḇeri. 12 Yesus ikofen farosi: "Mkorama kanan." Manfamyan ansi oso ḇaḇeri ḇefuken faroi: "Inja manseso aw?" Snar sifawi, mboi Manseren irya. 13 Ḇarpurya Yesus fyanamsi, ma dun mamami ani fa ḇyukḇoḇ si. Ifrur rarirya kuker in ansi. 14 Ine rarwan ḇeḇe kior Yesus fyasna mankundi faro manfamyan ḇyesi posa ro aḇiḇer ḇyedi ro fandu ḇemarsya. 15 Sanan posa kwar Yesus ikofen faro Simon Petrus: "Simon, Yohanes mandaḇen ḇyedi, waswar syadi ayake ro min besine?" Petrus kyarem faroi, ḇo doḇo: "O Manseren, wafawi, mboi yaswar aw." Yesus ikofen faroi: "Wafarandows domba-domba ayesi." 16 Yesus ikofen faroi ḇerarwan ḇeḇe suruya: "Simon, Yohanes mandaḇen ḇyedi, waswar syadi ayake?" Petrus kyarem faroi; ḇo doḇo: "O Manseren wafawi, mboi yaswar aw." Yesus ikofen faroi: "Wafarandows domba-domba ayesi." 17 Yesus ikofen faroi wer ḇerarwan ḇeḇekiorya: "Simon, Yohanes mandaḇen ḇyedi, waswar syadi ayake?" Inja Petrus sne ḇyedi fyafardun snar Yesus ifuken ḇerarwan rikior: "Waswar syadi ayake?" Ma ikofen faroi: "Manseren, Manseren wafawi roi ḇeḇor kam, wafawi, mboi yaswar aw." Yesus ikofen faroi: "Wafarandows domba-domba ayesi. 18 Kaku ḇeri yakofen faro aw: Fafisu besnonkborya mankundaw fes sifer bedi kuker ḇeḇoḇek ma wambran ḇe moḇ rosai wamarisenya, ḇape rofyor bemansar kwar, nari fos ḇramsu ma snonkaku ḇese siyaḇek aw ma sun awḇe moḇ mankundaw wamarisenḇa." 19 Wos nane ikofen na rarirya fa nfasna Petrus marmar ḇyedi ḇeḇuk baba faro Allah. Posa kwar Yesus ikofen faro Petrus: "Waso aya." 20 Fafisu Petrus iknenef, myam mboi manfamyan Yesus iswar ani isoine manfamyan ro fafisu skanan kam ma ḇekain fanam Yesus ma ḇefuken, ḇo ḇeyoḇo: "Manseren, manseiso nari ḇeḇoḇ awya?" 21 Rofyor Petrus myam manfamyan ani, ikofen faro Yesus, ḇo doḇo: "Manseren, rariso kuker snon ine?" 22 Yesus kyarem: "Rofyor yamarisen, nari ikenem rao isof yakaḇer werma, ine fararur bedisyaḇa. Mboi awkada waso aya." 23 Inja wos ani ḇyesno ro fandu manfamyan Yesus ḇyansi mankunsi, mboi manfamyan ani nari imarḇa. Ḇape Yesus ikofen rariryaḇa, mboi doḇo: "Rofyor yamarisen nari ikenem rao isof yakaḇerma wer, ine fararur bedisyaḇa." 24 Manfamyan ani iso, ḇeḇuk ḇaḇesaksi ro roi ḇeḇor nane kamya. Iso ḇefas epen na kako, insa kofawi rosai ikofen na nkaku. 25 Yesus roi ifrurna naisya nabor kaker, ḇape rofyor neḇefas kam oser ḇe oser ido, yakara ḇoi moḇ ono ro supswan ine fa naser syap ḇeḇor nari sfas naba.